ముక్కుపుడక

[శ్రీ పెద్దాడ సత్యప్రసాద్ రచించిన ‘ముక్కుపుడక’ అనే కవితని పాఠకులకి అందిస్తున్నాము.]

ఎంత పని చేశావే
ఓ ముక్కుపుడకా
అందమంత దాచేసి
ఆడ దాగుండినావా
సొగసుగా ఉంటదని
నిను చేరదీస్తే
నా సోకునంతా
దోచేసినావా
ఇంత ఇంతిని కూడా
అంతలా మాయ చేసి
అందమంతా లాగేసినావా
ముక్కు మీద ఎక్కేసి
ముత్యంలా మెరిసేసి
నన్నే చూడు అంటూ
నాకే నగుబాటు తెచ్చినావా
సౌందర్యమంటే
నీ ముక్కు పుడకేనని
అంతగా జనం అంటూంటే
ఇపుడు కదా తెలిసొచ్చే
నీ అసలు కధ
నీవు లేకున్నా
నా ముక్కుకేం తక్కువ
సంపెంగ సొంపు అది
ఇంపైన రూపం నాది
అందుకే అంటున్నా
ఓ ముక్కుపుడకా
ఇకపై నా వెంట పడకా
నాకు నేనే సాటి
నీవు ఎప్పటికీ రాకు పోటీ

పెద్దాడ సత్యప్రసాద్

పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.