అమ్మో.. షాపింగా..!!
షాపింగులు పలు రకాలు. మామూలుగా షాపింగ్ అంటే ఏమి కొనుక్కోవడానికి వెళ్లినా అది షాపింగే! కానీ ప్రత్యేకమైన వస్తువులను కొనడానికి ప్రత్యేకమైన షాపింగులు ఉంటాయి, అది కూడా ముఖ్యంగా స్త్రీమూర్తులకు. పురుషుల షాపింగ్, ప్రత్యేకంగా చెప్పుకోవడానికి ఉండదు, దానికి పెద్ద ప్రాముఖ్యత కూడా ఉండదు. ఎందుకంటే, అది అంతే! అలా స్త్రీమూర్తులు చేసే షాపింగుల్లో బట్టల షాపింగ్, బంగారం షాపింగ్ చెప్పుకోదగ్గవి. కొద్దీ శాతం పురుష పుంగవులకు కూడా ఈ షాపింగ్ మీద మోజు బాగానే ఉంటుంది. కొన్నిసందర్భాలలో, స్త్రీ-పురుషులు (ఉదాహరణకు, భార్యాభర్తలు) కలిసి షాపింగ్కు వెళ్లినా, మగాడి హవానే ఎక్కువగా ఉంటుంది. భార్యకు నచ్చకపోయినా, భర్తకు నచ్చినదే నచ్చినట్టు ఒప్పుకు తీరాలి. లేదంటే అతి తక్కువ శాతం ఇలాంటి వాళ్ళు వుంటారు. ఎక్కువ శాతం ఆడవాళ్లే ఆ పని పెట్టుకుంటారు. దానికి ఎక్కువ ఓపిక కావాలి కనుక మగవాళ్ళు తప్పించుకుంటారు. అలా ఊరుకోక ఆడవాళ్ళ మీద జోకులు వేస్తారు. అయితే షాపింగ్ అనేది మామూలు విషయం కాదు, అది ఒక యజ్ఞమే! షాపింగ్‌లో బట్టల షాపింగ్ ప్రత్యేకం! పండుగలప్పుడు చూడాలి షాపింగుల మజా ఏమిటో.
గ్రామాలలో బట్టలు సైకిళ్ళ మీద అమ్మకాలు. (కర్టెసీ గూగుల్)
నాది పల్లెటూరు గ్రామ నేపథ్యం కాబట్టి, మా గ్రామంలో బట్టల షాపులు ఉండేవి కాదు. ఎక్కడో దూరంగా తాలూకా కేంద్రంలో కొద్దీ షాపులు ఉండేవి. సామాన్య ప్రజానీకానికి అన్నిరకాలుగా అవి అందుబాటు లోనికి వచ్చేవి కాదు. చిన్నచిన్న బట్టల వ్యాపారస్థులు అన్ని రకాల బట్టలూ పెద్ద మూటలో కట్టుకుని సైకిళ్ళ మీద, గ్రామాల్లో తిరిగేవారు. వాళ్ళ దగ్గర ఎక్కువ రకాలు ఉండేవి కనుక, బట్టను ఎన్నుకోవడం త్వరగానే తెమిలిపోయేది, రేటు దగ్గర మాత్రం అటు వ్యాపారి ఇటు కొనుగోలుదారుకి మధ్య చాలా సేపు తర్జనభర్జనలు జరిగేవి. ఇప్పుడు పరిస్థితులు మారిపోయాయి.
గ్రామాలలో బట్టలు సైకిళ్ళ మీద అమ్మకాలు. (కర్టెసీ గూగుల్)
గ్రామాలలో బట్టలు సైకిళ్ళ మీద అమ్మకాలు. (కర్టెసీ గూగుల్)
రవాణా సౌకర్యాలు పెరిగిన తర్వాత (ప్రభుత్వ పరంగానూ, స్వయంగాను) గ్రామాలు, తాలూకాలకూ, జిల్లాలకు, నగరాలకు చేరువైనాయి. ప్రజల డిమాండును బట్టి, ఆయా ప్రదేశాల్లో బట్టల షాపులూ పెరిగాయి. అక్కడక్కడా చేనేత వస్త్రాల దుకాణాలు రకరకాల పేర్లతో వెలిశాయి. ఈ నేపథ్యంలో కుటుంబాలలో పండగల సందర్భంగా, పెళ్లిళ్ల సందర్భంగా, షాపింగులు చేయడాలు మొదలై షాపులు ఎప్పుడూ నిత్యకళ్యాణం పచ్చతోరణంలా కళకళలాడుతూ జనాల్ని ఆకర్షిస్తుంటాయి.
ఈ రోజున రకరకాల బట్టలు, రెడీమేడ్ దుస్తులు అందుబాటు లోనికి వచ్చాయి. ఎక్కువ రకాలు ఉంటే సెలెక్షన్ కూడా కష్టమేమో! కస్టమర్లు ఆ షాపు వాళ్ళ సహనాన్ని పరీక్షిస్తుంటారు. అవసరం అయి చేస్తారో, కావాలని చేస్తారో కానీ కొందరు స్త్రీమూర్తులు అక్కడ వున్న చీరలు అన్నీ చూపించమంటారు. అన్నీ వారి ముందు క్షణాల్లో ప్రత్యక్షం అవుతాయి, కానీ వాటిల్లో ఒకటీ నచ్చదు. ఏమీ చెప్పకుండానే లేచి వేరే షాపుకు వెళ్ళిపోతారు. నచ్చిన దుస్తులు తీసుకోవలసిందే, దానిని ఎవరూ కాదనలేరు. కానీ మొత్తం షాపులో ఏమీ నచ్చకపోవడం వింతగానే ఉంటుంది. బహుశః అక్కడి బట్టలు నచ్చక కాకపోవచ్చు, మరో షాపులో ఇంకా మంచివి దొరుకుతాయని ఆశ కావచ్చు.
బట్టల దుకాణంలో
ఇక ఆ షాపు వాడి ముఖం చూడాలి. అవన్నీ నిరుత్సాహంగా మడత పెట్టడం మొదలు పెడతాడు. ఈ పని అక్కడ పని చేసే వ్యక్తులు చేయవచ్చు గాక అది వేరే విషయం అనుకోండి! అయినా వాళ్ళ అమ్మకాలకు లోటు లేదు. కొత్త షాపులు వస్తూనే వున్నాయ్, జనంతో కిటకిట లాడుతూనే వున్నాయ్.
‘పెట్టుడు బట్టల’కు కూడా ఎప్పుడూ డిమాండు ఉంటూనే వుంది. ఒకప్పుడు, టైలర్ షాపులకు బాగా డిమాండు ఉండేది. ఇప్పుడు సూట్ నుండి చుడీదార్ వరకూ రెడీమేడ్ దొరుకుతుండడంతో, కొంతవరకూ టైలర్లకు కాస్త డిమాండు తగ్గినట్టే. ఇప్పుడు ‘మగ్గం వర్క్స్’ కు డిమాండు పెరిగింది.
మహిళల చోళీలు సైతం వేలరూపాయల్లో ఉండడం, నేడు నడుస్తున్న చరిత్ర. ఏది ఏమైనా బట్టల షాపింగ్ చేయడంలో వనితలకున్నంత ఓపిక, శ్రద్ధ, అభిరుచి పురుషులకుండవన్నది జగమెరిగిన సత్యమే!
చాలా కుటుంబాలలో, ఇంట్లో అందరి బట్టలు, ఇంటావిడ కొనడమే రివాజు. సాధారణంగా పిల్లల బట్టలు, తల్లులే కొంటుంటారు. ఆ కోవకు చెందిన వాళ్ళల్లో నేనూ ఒకడిని.
చిన్నప్పుడు మా అమ్మ సంవత్సరానికొకసారి మాత్రం, అది కూడా సంక్రాంతికి (నా అసలు పుట్టిన తేదీ జనవరి 13) బట్టలు కొనేది. ఖద్దరు చొక్కా, కాకి నిక్కరు. సైకిలు మీద తెచ్చి అమ్మే బట్టల వ్యాపారి దగ్గర కొనేది. అతను అరువు కూడా పెట్టేవాడు. ఆ బట్టలు టైలరుకు ఇవ్వడం, అతను కుట్టి ఇచ్చిన బట్టలు అదో రకమైన సువాసన వచ్చేవి. అవి తొడుక్కున్నప్పుడు పొందిన ఆనందం ఇప్పుడు కావాలన్నా దొరకదు. నేను కాస్త పెద్దయిన తర్వాత పెద్దన్నయ్య, అక్కలు (మహానీయమ్మ, భారతి) కొనేవారు. నా పెద్దక్క స్వర్గీయ మహానీయమ్మ నాకు పెళ్ళై, పిల్లలు పుట్టినా నా పుట్టిన రోజుకు బట్టలు కొనేది.
రచయిత పెద్దక్క (మహానీయమ్మ .కానేటి,నాగార్జున సాగర్) అప్పట్లో కొనిచ్చిన చొక్కా.
అసలు సంగతి నాకు పెళ్ళైన తరవాత మొదలైంది. మా ఆవిడ నా పుట్టిన రోజుకి, పెళ్లి రోజుకి, క్రిస్మస్ పండుగకు బట్టలు కొనడానికి షాపుకు రమ్మని బ్రతిమాలేది. షాపులో గంటలకొద్దీ గడపడం నాకు ఇష్టం ఉండేది కాదు. అందుచేత బట్టల షాపుకి నేను అసలు వెళ్ళేవాడిని కాదు. ఇప్పుడు నా కూతురు ఒత్తిడి మొదలైంది. మొత్తం మీద షాపుకు తీసుకు వెళతారు (ఒకోసారి నా ప్రమేయం లేకుండానే కొని తెచ్చేస్తారు). అక్కడ సెలెక్ట్ చేసిన కొన్ని జతలు ఒక సంచిలో వేసి నన్ను వాటన్నింటిని ట్రయిల్ చూడమంటారు.
నేను మాత్రం ఎక్కువలో ఎక్కువ రెండు జతలు మాత్రం ట్రయిల్ చూసి ఒక జత సెలెక్ట్ చేసుకోవడం – నాకు, వాళ్ళకీ అలవాటు అయిపొయింది. నేను మా అబ్బాయి దగ్గరకు అమెరికా వెళ్ళినప్పుడల్లా నాకు బట్టలు కొంటాడు. అబ్బాయి ఇండియాకు వచ్చినప్పుడల్లా నా కోసం బట్టలు తెస్తాడు. అలా ఇప్పుడు ఎన్ని జతలు ఉన్నాయో నాకే తెలీదు. బాల్యానికి, ఇప్పటికీ ఎంత తేడా, ఎంత మార్పు? బాల్యం నుండి నేను ఎదుగుతూ, జీవితంతో పాటు జీవనశైలిలో కూడా గొప్ప మార్పును తెచ్చుకోగలిగాను. దీని వెనుక నా తల్లిదండ్రులు, అన్నలు – అక్కలు, ప్రత్యక్షంగా, పరోక్షంగా ఎంతో మంది వున్నారు. వీరందరికీ ఎంతో రుణపడి వున్నాను. వీరికి నా పాదాభివందనం. ఇప్పుడు అసలు నేను బట్టలు కొనుక్కోవాల్సిన పనిలేదు. అవసరానికి మించి వున్నాయి. అయినా, నా శ్రీమతి గానీ, నా కూతురు గాని నాకు తెలియకుండా కొని తీస్తుంటారు. నా బట్టల సైజులు నాకంటే వాళ్ళకే బాగా తెలుసును. కరోనా సమయంలో అయితే అసలు బట్టలు ధరించి బయటికి వెళ్లే అవసరమే రాలేదు. ఈ తరం వాళ్లకి అదొక పీడకల!
బట్టల షాపుల్లో మనవరాలు ఆన్షి తో రచయిత
సాహిత్య రంగంలో వున్నాను కనుక సన్మానాల పేరుతో శాలువాలు చాలా వచ్చేవి. వాటిని శీతాకాలంలో, పెద్దవాళ్ళకి, ముఖ్యంగా అడుక్కునేవాళ్ళకి ఇచ్చేస్తుంటాను. నేను వాడిన పాత దుస్తులు కూడా అవసరమైన వారికి ఇచ్చేస్తుంటాను.
బట్టల షాపుల్లో మనవరాలు ఆన్షి తో రచయిత
ఇప్పుడు మా ఇంట్లో మనుమల తరం ప్రారంభమయింది. వాళ్ళ బట్టల కోసం ఇప్పుడు షాపింగ్ టీమ్‌లో నేను ఉండక తప్పడం లేదు. సెలెక్షన్ కోసం కాదండోయ్, పిల్లల్ని ఎత్తుకోవడానికి. ఏది ఏమైనా బట్టల సెలెక్షన్ (ముఖ్యంగా మహిళల/ఆడపిల్లల బట్టలు) మామూలు విషయం కాదండోయ్.. అది కూడా ఒక కళ సుమా!
(మళ్ళీ కలుద్దాం)
వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.
*
*
23 Comments
డా కె.ఎల్.వి.ప్రసాద్
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
డాక్టర్ కె.ఎల్.వి.ప్రసాద్
హన్మకొండ.
Shaym kumar chagal
ఆడవాళ్ళ షాపింగ్ సమయంలో మగవారు పడే బాధ వర్ణనాతీతం
మన భారత దేశంలో దాదాపు ప్రతి మగవాడికి ఎదురయ్య సమస్యలను చాలా కూలంకషంగా వివరించారు రచయిత గారు. నేను కూడా షాపింగ్కు వెళ్లవలసి వస్తే తప్పనిసరిగా ఒక సమయపాలన ఇస్తాను అది దాటిందంటే మరి ఇక ఊరుకోను ఊరుకోకేం చేస్తాను లెండి జస్ట్ సింపుల్ గా నేను వెళ్ళిపోతాను. అందుకని నన్ను పిలవరు కూడా
నిజం చెప్పాలంటే స్త్రీలకు షాపింగ్ అన్నది ఒక ఆనందకరమైన జీవితంలో ఒక ముఖ్యమైన భాగం. కాకపోతే ఈ సంచికలో ఈ శీర్షిక చదివిన ప్రతి మగ వాళ్లకు తప్పనిసరిగా ఈ బాధలు ఎదురయ్యే ఉంటాయి ఏమి చేయలేం జీవితంలో ఇది ఒక భాగం.
.
డా కె.ఎల్.వి.ప్రసాద్
మిత్రమా
బాగా చెప్పావు
ధన్య వాదాలు.
Neelima
డాక్టర్ గారు..
నమస్కారములు..
షాపింగ్ కోసం పాత విషయాలు చాలా బాగా చెప్పారు.. షాపింగ్ అనేది కొందటికి ప్రియం, కొందరికి అప్రియం అనేది కూడా బాగా చెప్పారు..
నాకు ఒకటి బాగా నచ్చింది..
మనుమల షాపింగ్ కి వెళ్తా అన్నారు.. దేనికి అని reason చెప్పారు గా.. బాగా నవ్వు వచ్చింది..
ధన్యవాదములు
డా కె.ఎల్.వి.ప్రసాద్
నీలిమ గారు
కృత జ్ఞత లు మీకు
Rajendra Prasad
Most of our experience us same ఆ yours. You projected the practicality of our shopping lives sir
డా కె.ఎల్.వి.ప్రసాద్
Thank you
Prasad garu.
Sagar
మనిషి జీవితంలో ఎదురయ్యే అనుభవాలకు మీ రచనలు పుట్టినిల్లు సర్. ప్రతి విషయం అనుభవంతో మీరు చేసే రచనలు ఎంతోమంది జీవితాలలో ఉన్నవే. కానీ ఎవ్వరు కూడా ఇంత పారదర్శకంగా వివరించలేరు. ఈనాటి షాపింగ్ ఉదంతంలో మీరు అన్నట్లు ఇక వయసు పెరిగే కొద్ది ఎంపిక హోదా వెళ్లి పిల్లలకు కాపలా వచ్చేస్తుంది. కాల గమనంలో తప్పదుగా? మీకు ధన్యవాదములు సర్.
డా కె.ఎల్.వి.ప్రసాద్
సాగర్
ధన్యవాదములు.
Bhujanga rao
జ్ఞాపకాల పందిరి ఈ రోజు సంచికలో పూర్వపు రోజుల్లో మరియు ఇపుడున్న షాపింగ్ విధానం,మగవారికి ఎదురయ్యే సమస్యలను అప్పుడున్న పరిస్థితులకు అనుగుణంగా ఫోటోలతో చక్కగా వివరించారు. స్త్రీలకు షాపింగ్ చేయడం అంటే చాలా ఇష్టం అందుకు తగిన ఓపిక ఉంటుంది.ఇప్పుడు ఆన్ లైన్ లో కూడా షాపింగ్ చేసే విధానం అందుబాటులో ఉంది.ప్రతి సంచికలో కొత్త విషయాన్ని అందిస్తున్న మీకు హృదయపూర్వక నమస్కారములు సర్
డా కె.ఎల్.వి.ప్రసాద్
భుజంగరావు గారు
కృత జ్ఞత లు సర్
డా కె.ఎల్.వి.ప్రసాద్
జ్ఞాపకాల పందిరి 138 లో షాపింగ్ అంశం గురించి రాశారు. ఈ రోజుల్లో ముఖ్యంగా మహిళలు చీరెలు/డ్రస్సులు/ నగల షాపింగ్ కు చాలా సమయం కెటాయిస్తారు. మహిళా కస్టమర్లకు చీరెల సెలక్షన్ లో పాపం సేల్స్ మెన్లకు/వుమెన్లకు అగ్నిపరీక్ష వంటిందే. మీరు చెప్పినట్టుగా లక్షల రూపాయల విలువైన చీరెలు/ డ్రస్సులు మార్కెట్లో లభిస్తున్నాయి. అయినా డిమాండ్ బాగానే వుంది. మహిళలు షాపింగ్ లపై ఎన్నో కార్టూన్లు కూడా వచ్చాయి. మీ కథనం బాగుంది. అభినందనలు.
—జి.శ్రీనివాసాచారి
కాజీపేట.
డా కె.ఎల్.వి.ప్రసాద్
ధన్య వాదాలు చారి.
డా కె.ఎల్.వి.ప్రసాద్
చాలా సహజంగా గా కనిపించే విషయాలను కూడా ఏదో ఒక ఆత్మీయ బంధానికి గుర్తుగా,జీవితంలో సాధించిన తృప్తికి ప్రతీకగా చాలా అద్భుతంగా విసదీకరిస్తారు సర్ మీరు.మీ అమ్మగార్ని,అన్నదమ్ముల,అక్కల ప్రేమ స్పర్శను బట్టలుగా ధరించి ఇప్పటికీ వాటిని అనుభూతి చెందుతున్న మీఆత్మీయత గొప్పది సర్.అందరినీ వారి వారి చిన్న నాటి అనుభూతి లోకి నడిపిస్తుంది మీ పాత బట్టల జ్ఞాపక పరిమళం.నేటి ప్యాషన్ ల లోకంలోకి నడిపిస్తుంది మీ కొత్త తరపు దుస్తుల సుగంధం.నన్ను ఇందులో బాగా ఆకర్షించిన అంశం ఏమిటంటే నన్ను నేను మెరుగు పరుచుకున్నాను బాల్యం నుండి ఇప్పటి స్థితికి అన్నారు.అది చాలా నచ్చింది సర్.అవును ప్రతి వ్యక్తి గతానికి,ప్రస్తుతం గొప్పగా ఉంటేనే మన ఎదుగుదల,విజయం తెలుస్తుంది.దానిని మీరు పరోపకారానికి వినియోగించడం కూడా చాలా ఆచరణీయ అంశం సర్.దర్జీ వద్ద నుండి వచ్చిన బట్టల సుగంధం మాకూ పంచినందుకు ధన్యవాదాలు సర్
——నాగ జ్యొతి శేఖర్
కాకినాడ.
డా కె.ఎల్.వి.ప్రసాద్
అమ్మా
మీ స్పందనకు ధన్యవాదాలండీ
డా కె.ఎల్.వి.ప్రసాద్
నేనూ మీ కేటగిరీ ల చేరేవాడినే.షాపింగ్ నాకు టికాకైన పని.అందుచేత మావాళ్ళు షాపింగ్ కు రమ్మని పిలువరుకూడా. మహిళల అభిప్రాయాల గమ్మతుగా వుంటై.ఒక చీర రంగునచ్చితే ఒకచీర బార్డరు నచ్చుతుంది.ఈరంగులో ఆబార్డరు ఊంటే తీసిచూపమంటరు .ఒకపట్టాన నచ్చరు బట్టలు నచ్చితే ధరలు నచ్చవు. అదిపెద్ద ప్రహసనం లెండి .నాకు బట్టలమీద పెద్ద ఆబ లేదు చదువుకునే నాళ్ళలో కొనూక్కోవటం కష్టంగా వుండేది.అవకాశంలేక.ఇపుడు బట్టలమీద మోజులేదు.
షాపింగు ఒక్క గంటలో తెమలనివ్వరు .
అది అంతే మనమేమీ చేయలేము.
—రామశాస్త్రి
డా కె.ఎల్.వి.ప్రసాద్
శాస్త్రి గారు ధన్యవాదాలండీ
డా కె.ఎల్.వి.ప్రసాద్
బాగున్నై.. మీగతస్మృతుల్లో
షాపింగులు
—కోరాడ నరసింహారావు
విశాఖపట్నం.
డా కె.ఎల్.వి.ప్రసాద్
ధన్యవాదాలు.
డా కె.ఎల్.వి.ప్రసాద్
చాలా సరదాగా ఉంది సార్ ఈ ఎపిసోడ్.
నిజంగానే 100% కరెక్ట్ మీరు చెప్పింది.
మహిళలకు షాపింగ్ అంటే చాలా చాలా సరదా. కొంత మంది ఆడవారు వాళ్లతోడు గా మగావారు వచ్చారంటే ఇంక వాళ్ళ పని అయిపోయినట్లే.
చాలామంది ఎక్కువ సేపు షాపింగ్ చేస్తారు లేడీస్. ఒక్కోసారి అనిపిస్తూ ఉంటుంది మనకు నచ్చింది ఏదో వెంటనే తీసేసుకుంటే ఒక పని అయిపోతుంది కదా అని. ఏదైనా మగవారు ఆడవారికి చీరలు వాళ్ల సెలెక్షన్ తోటి తీసుకొస్తే చాలా సంతోషం అనిపిస్తుంది. ఒక్కొక్క ఇంట్లో ఒక్కొక్కరి ఇష్టాలు. ఎపిసోడ్ చదవగానే ఒక చక్కని అనుభూతి కలిగింది. బాల్య విషయాలు గుర్తుకు వచ్చాయి. నిజంగానే అప్పుడు చాలా లిమిటెడ్ గా ఉండేవి బట్టలు. ఇప్పుడు కుప్పలు తెప్పలు అందరికీ. వస్త్ర దానం చాలా గొప్పది. మీ ప్రతి ఎపిసోడ్లో ఆత్మీయత, అనుభూతి, సేవా భావం గుప్పించి జ్ఞాపకాల పందిరిలో దొంతరలుగా మా ముందు పేర్చడం చాలా చాలా సంతోషం అనిపిస్తుంది చదువుతుంటే. హృదయపూర్వక ధన్యవాదాలు 
మీకు చక్కని అడుగుజాడలు మా ముందు పరుస్తున్నారు. హృదయపూర్వక శుభాకాంక్షలు శుభాభినందనలు సార్
ఇంత చక్కటి జ్ఞాపకాలు మాకు పంచుతున్నందుకు .చివర్లో మాత్రం కరెక్ట్ గా చెప్పారు సార్
ఆడవారు షాపింగ్ చేసేటప్పుడు పిల్లల్ని చాలా చక్కగా వారిని ఆడించేది మగవాళ్ళే నని .ఆన్షితో చక్కని ఫోటోలు అందించిన మీకు హృదయపూర్వక ధన్యవాదాలు. సార్ 
మీ మరి ఒక అనుభూతుల ఎపిసోడ్ కొరకు ఎదురు చూస్తూ ఉంటాము నమస్తే
మొహమ్మద్ .అఫ్సర వలీషా
ద్వారపూడి (తూ.గో .జి)
డా కె.ఎల్.వి.ప్రసాద్
అమ్మా
ధన్యవాదాలు.
డా కె.ఎల్.వి.ప్రసాద్
సంపాదనశక్తి , కొనుగోలుశక్తి , లభ్యత ,
.
వీటికి మించి కొత్తదనం కావాలనేఆకాంక్షించ, పైపై మెరుగులే నాణ్యత అనే భావం, వారాంతంలో హోటల్ భోజనం ,లాంగ్ వీకెండ్ లో లాంగ్ రైడ్ మొదలగు తాత్కాలిక ఉపసమనం కావాలని కోరుకునే మనస్తత్వం విపరీత ధోరణితో ఉన్న నేటి తరం ప్రజానీకం ఉన్నంతకాలం ,”షాపింగ్” అనే ప్రక్రియ నిరంతరం కొనసాగుతూ….. ఉంటుంది . ఇది సహజమే అందరూ ఒప్పుకోవలసిన నగ్నసత్యమే!
బట్టల మూట సత్తిరెడ్డిని ,పండుగలప్పుడే బయటకు తీసే దాపుడు బట్టలను ,ఆ నలిగిన బట్టలను ఇత్తడి చెంబులో నిప్పులు వేసి ఇస్త్రీ చేసుకొనే చిన్ననాటి స్మృతులను గుర్తుకు తెచ్చినందులకు రచయిత గారికి ధన్యవాదములు
—-బి.రామ కృష్ణారెడ్డి
సికింద్రాబాద్.
డా కె.ఎల్.వి.ప్రసాద్
రెడ్డి గారు ధన్యవాదాలు సర్ మీకు .