జ్ఞాపకాల పందిరి-131 | సంచిక - తెలుగు సాహిత్య వేదిక

జ్ఞాపకాల పందిరి-131

పలకరింత-పులకరింత..!!

పల్లెల్లో రైతులూ, రైతుకూలీలూ, ఇతర వ్యక్తులూ తాము పనికి పోయినప్పుడు, పని నుండి ఇంటికి తిరిగి వెళ్ళెప్పుడూ, దారిపొడవునా తెలిసిన వారినందరినీ పలకరించుకుంటూ పోతారు. అలా చివరివరకూ మాట్లాడుకుంటూ, సమాధానాలు చెప్పుకుంటూ, హాస్యమాడుతూ.. అలా సమయాన్ని సద్వినియోగం చేసుకుంటారు, తమ పరిచయాలను పునరుద్ధరించుకుంటారు. ఆత్మీయతలు పంచుకుంటారు.

శ్రీ రాజేంద్ర ప్రసాద్ (BSNL)

మనం తెలిసినవాళ్ళు కనపడితేనే పలకరిస్తాం, కానీ కొన్ని పాశ్చాత్యదేశాలలో ముఖ్యంగా అమెరికాలో (నేను గమనించిన దేశం) తెలిసిన వాళ్ళు ఎదురొచ్చిన తెలియని వాళ్ళు ఎదురొచ్చినా, చక్కగా నవ్వుతూ ‘హాయ్’ అని పలకరిస్తారు. అది ఆ దేశపు సంస్కృతి. అక్కడ సీరియస్ ముఖాలు తక్కువ కనిపిస్తాయి.

ఝాన్సీ కొప్పిశెట్టి, ఆస్ట్రేలియా

బస్సుల్లో, రైళ్లల్లో, విమానాల్లో ప్రయాణం చేసేటప్పుడు, మన పక్కన మనవాళ్లు కాకుండా ఇతరులు కూర్చుంటే, చాలామంది మాట్లాడకుండా బిగుసుకుపోయి కూర్చుంటారు. దీనికి అమ్మాయిలు అతీతం కాదు. కొందరు స్వయంగా తమను తాము పరిచయం చేసుకుని మాటల్లోకి దింపుతారు. కొందరు పుస్తకాల గురించి, మరికొందరు రాజకీయాల గురించి, విద్యావ్యవస్థ గురించి, వైద్యరంగం గురించి, పిల్లల పెళ్ళిళ్ళ గురించి, క్రీడారంగం గురించి చర్చలు చేస్తూ కాలం గడుపుతారు. ఇలాంటి పలకరింపులతో, అతికొద్ది సమయంలోనే గొప్ప స్నేహితులు అయినవారు వున్నారు, స్నేహం ప్రేమగా మారి పెళ్లిళ్లు చేసుకున్న వారూ వున్నారు. అంటే పలకరింపుకు అంత విలువ వుంది అన్న మాట!

శ్రీమతి రేణుకా సుసర్ల, అనంతపురం

తెలిసిన వారిని సైతం పలకరించడానికి వెనుకాముందు లాడేవారు వున్నారు. సంస్కారం అందని/నేర్పని ఇళ్లల్లో పెరిగేవారు ఈ జాబితాలోకి వస్తారు. తెలిసిన వ్యక్తి ఎదురుపడిన, చూడనట్లు నటిస్తూ, పలకరించకుండా వడి.. వడిగా నడిచిపోయేవారూ వున్నారు. కొంతమందైతే, తెలిసినవారు ఎదురు వస్తున్నట్లు, దూరం నుంచే గమనించి తమ మార్గం మార్చుకునేవాళ్లూ వుంటారు. ఒకసారి ఒక వ్యక్తి పరిచయం అయినప్పుడు, ఆ వ్యక్తిని అప్పుడప్పుడూ పలకరించడం ద్వారా స్నేహం పటిష్టం కావడమే కాకుండా మానసిక తృప్తి మిగులుతుంది. తరువాత, ఎప్పుడు ఏ వ్యక్తితో పనిపడుతుందో తెలియదు. అందుచేత మనకు ఇష్టమైన పరిచయస్థులను,ముఖ్యంగా స్నేహితులను పలకరిస్తూ, మన స్నేహాన్నీ, పరిచయాన్నీ పునరుద్ధరించుకోవాలి.

శ్యామ్ కుమార్ చాగల్, నిజామాబాదు

అలాగే బంధువులనూ,శ్రేయోభిలాషులను, తప్పకుండా అప్పుడప్పుడూ పలకరించడం ద్వారా, వారితో మనకు గల బంధాలు బలపడతాయి. అవసరం అయినప్పుడే పలకరించడం, మిగతా సమయాల్లో స్తబ్దుగా ఉండిపోవడం సరైన పద్ధతి కానేకాదు. పలకరింపులో ఒక దగ్గరితనం, ఒక ఆత్మీయత, తెలియని బంధం ఏర్పడతాయి. పలకరింపుతో మనిషి మానసికంగా ఎంతో ఉత్సాహాన్ని పొందుతాడు. మన సమాజంలో చాలా మంది అవసరం అయితేనే పలకరింపులతో ముంచేస్తారు. లేకుంటే ముఖం చూడడానికి కూడా ఇష్టపడరు కొందరు.

ఇలా కాకుండా సుఖంలోనూ, దుఃఖం లోనూ పలకరింపు అనేది మనిషిని చైతన్యవంతుడిని చేయడానికీ, ఆరోగ్యంగా ఆనందంగా ఉంచడానికి ‘కేటలిస్ట్’ మాదిరిగా పనిచేస్తుంది. అది తెలియని చాలామంది ఈ పలకరింపులకు చాలా దూరంగా వుంటారు.

శ్రీ బాపూజీ(ఆర్టిస్ట్), హైదరాబాద్

ఈరోజున మన ఆధునిక ప్రపంచంలో మన చుట్టూ ఉన్నవాళ్ళని మాత్రమే కాదు, ప్రపంచంలో నలుమూలలా వున్న బంధువులను, స్నేహితులనూ, శ్రేయోభిలాషులను, ఎప్పుడంటే అప్పుడు ఇష్టం వచ్చినన్ని సార్లు పలకరించుకునే వెసులుబాటు ‘మొబైల్ ఫోన్’ కలుగజేస్తున్నది. ఫేస్‌బుక్, వాట్సప్, టెలిగ్రామ్, ట్విట్టర్, వగైరా మనకు అందుబాటులోనికి వచ్చాయి. అయినా పలకరించుకునే వారు ఎందరు? ఆధునిక సదుపాయాలను సద్వినియోగం చేసుకునేదేందరు?

శ్రీమతి అఫ్సర వలీషా, ద్వారపూడి

నా విషయం వచ్చేసరికి, నాకు ఒక్కసారి ఎవరైనా పరిచయం అయితే మరచిపోయే ప్రసక్తి లేదు. వాళ్ళని పలకరించకుండా వుండే ప్రసక్తి లేదు. అవతలివారు స్పందించినంత కాలం నేను వాళ్ళని పలకరిస్తూనే వుంటాను,వాళ్ళు ఒకవేళ స్పందించకపోతే, కొంతకాలం వరకూ నేను పలకరిస్తాను. అది నా ప్రవృత్తుల్లో ఒకటిగానే నేను భావిస్తాను.

ప్రొఫెసర్.పి.రవి కుమార్, హనంకొండ.

మొబైల్ నాకు అందుబాటులోనికి వచ్చిన తర్వాత నా పలకరింపుల పర్వం విస్తృతం అయిపొయింది. వాట్సప్‌లో ‘బ్రాడ్కాస్ట్’ సహకారంతో, రోజూ మూడువందలకు పైగా ‘శుభోదయం’ పలకరింపులు వెళతాయి. అందులో – బంధువులు వుంటారు, స్నేహితులు/స్నేహితురాళ్ళు, శ్రేయోభిలాషులు, చదువు చెప్పిన గురువులు వుంటారు. ఆది నాకొక తృప్తి. ఉదయం లేవగానే నేను చేసే మొదటి పని ఇదే. అయితే నా పలకరింపులకు అందరూ స్పందించరు.

దివ్య.కానేటి (కోడలు), అమెరికా (బోస్టన్)

అలా అని నేను నిరుత్సాహపడను. కొందరు ‘గుడ్ మార్కింగ్/శుభోదయం’ చెబితే విసుక్కుంటారు. అలాంటి వారిని పలకరించడం మానేస్తుంటాను. వాళ్ళను ఎట్టి పరిస్థితిలోనూ ఇబ్బంది పెట్టను. వాళ్ళ సాంకేతిక ఇబ్బందులను కూడా నేను అర్థం చేసుకోగలను. ఈ నేపథ్యంలో, నాకంటే పెద్దవారూ, నాకు పాఠాలు బోధించిన ప్రొఫెసర్లు, విదేశాల్లో నివసిస్తున్న బంధువులు, స్నేహితులు, శ్రేయోభిలాషులూ ఫోన్ చేసి నన్ను పలకరించినప్పుడు, నా హృదయం ఆనందంతో పులకరిస్తుంది. చెప్పలేని అనుభూతిని మిగులుస్తుంది, అది అనుభవించినవారికి మాత్రమే తెలుస్తుంది. ఈ ఆధునిక సదుపాయాలు రాకముందు, దూర ప్రాంతాలలో ఉంటున్న వారిని పలకరించడానికి, యోగక్షేమాలు తెలుసుకోవడానికి, పోస్ట్-కార్డులు, ఇన్లాండ్ కవర్లు, ఎన్వలప్‌లు ఉండేవి. దూరప్రాంతాలకు టెలిఫోన్‌లో మాట్లాడడానికి సామాన్యుడికి సాధ్యం అయ్యేది కాదు. ఇప్పుడు కూడా అలవాటును బట్టి, ప్రత్యేక అభిరుచిని బట్టి కొందరు ఉత్తరాలు రాస్తున్నారు గానీ, ప్రస్తుత ఆధునిక సదుపాయాలతో క్షణాల్లో పలకరించుకునే అవకాశం ఉండడం వల్ల, వీటిముందు ఉత్తరాలు వెల వెల బోతున్నాయి. అందుకే ఇప్పుడు ఎవరూ ఉత్తరాల జోలికి పోవడం లేదు.

నాగిళ్ళ రామశాస్త్రి, హనంకొండ

ఏనుగుపల్లి వేంకటేశ్వర రావు, రాజోలు(దిండి )

ఎవరు ఎక్కడ వున్నా, మాధ్యమం ఏదైనా ఒకరినొకరు పలకరించుకోవడం ముఖ్యం. చిన్న చిన్న ఘర్షణకు లోనైన భార్యాభర్తలు, లేదా స్నేహితులు పంతాలకు పోకుండా, ఎవరో ఒకరు పలకరిస్తే, గతం మర్చిపోయి ఏకమైపోయే అవకాశాలు మెండుగా ఉంటాయి. అలా కాకుండా, మొండిగా ప్రవర్తిస్తే, సయోధ్య అనేది దరిదాపుల్లోకి రాదు. పలకరించడం అంటే ఒక విధంగా దూరంగా వున్నవారికి ‘నేను బ్రతికే వున్నాను’ అని చెప్పడం. మిగతా వారికి మన ఉనికిని గుర్తు చేయడం. ఇది కొందరికి అర్థం కాదు. ఫోన్ మెసేజ్ లతో నిండిపోతుందని గగ్గోలు పెడతారుగాని, ఇతర ఎలాంటి మెసేజ్‌లు ఎన్నివచ్చినా వారికి బాధ ఉండదు. కొన్ని గమ్మత్తు మనస్తత్వాలు సమాజంలో ఉంటాయి. అలాంటివారిని పెద్దగా పట్టించుకోవలసిన అవసరం లేదేమో. ఎవరి నమ్మకాలు వారివి కదా!

డా.డి.సుజాత, విజయవాడ

నేను ఏదైనా ఒకటి రెండు రోజులు ప్రత్యేక కారణాల వల్ల పలకరించకపోతే కంగారు పడి ఫోన్ చేసే స్నేహితుల విషయంలో నాకెంత ఆనందం అనిపిస్తుందో చెప్పలేను. ఒకరినొకరు పలకరించుకోవడం కేవలం మర్యాద మాత్రమే కాదు, చెప్పలేనంత దగ్గరితనానికి మనలో మనం వేసుకునే పునాది కూడా. నన్ను నిత్యం పలకరిస్తూ, నా పలకరింపులకు ఆనందంగా స్పందిస్తున్న వారందరికీ హృదయపూర్వక కృతజ్ఞతలు.

ప్రొ.రామకృష్ణ మూర్తి గారు, అమెరికా

పలకరింపు ఫ్యాషన్ కాదు!

పలకరింపు..

కనిపించని ఆత్మీయ కరచాలనం!!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా. కె.ఎల్.వి.ప్రసాద్
October 9, 2022 at 6:45 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
–డా కె.ఎల్.వి.ప్రసాద్
సఫిల్గూడ.

Log in to Reply
2

Sagar
October 9, 2022 at 7:33 am
చాలా మంచి రచన సర్. నిజమే మనిషిని పలకరిస్తే వచ్చే సంతోషం అదీ ముఖ్యంగా పల్లెటూరు వాతావరణంలో ఇంకా అద్భుతంగా ఉంటుంది. ఇక వర్తమానానికి వస్తే, మీలాగా కానున్న పదుల సంఖ్యలో నా శుభోదయం మెసేజ్లు ఉంటాయి. అందులో మీకు స్థానముంది. అసలు అలాంటి పలకరింపులే మనిషిని రోజంతా ఉత్సాహపరుస్తాయి అనడంలో కూడా సందేహం లేదు. మంచి వ్యాసం అందించినందుకు మీకు ధన్యవాదములు సర్.

Log in to Reply
1. 2.1
  
  డా కె.ఎల్.వి.ప్రసాద్
  October 9, 2022 at 8:17 am
  ధన్యవాదాలు సాగర్.
  
  Log in to Reply
3

Neelima
October 9, 2022 at 7:33 am
డాక్టర్ గారు..
నమస్కారములు..

పలకరింపు అనేది జీవితంలో ఎంత ముఖ్యమైనదో చాలా బాగా చెప్పారు..
మొబైల్ ఫోన్ల వల్ల ఈ పలకరించడం ఎంత బాగా చేయవచ్చు అనేది కూడా బాగా చెప్పారు.. అదే మొబైల్ ఫోన్ల వల్ల ఎదుట ఉన్నవారితో మాట్లాడడం మాత్రం తగ్గించేస్తున్నాం. రైలు, బస్సు ప్రయాణాలలో మొబైల్స్ పట్టుకుని కూర్చుని, పక్కన ఎవరున్నారో కూడా తెలియని పరిస్థితి వస్తుంది..
ఏది ఏమైనా పలకరింపు అనేది హృదయనికి ఒక స్వాంతన అని చెప్పకనే చెప్పారు..

ధన్యవాదములు

Log in to Reply
1. 3.1
  
  డా కె.ఎల్.వి.ప్రసాద్
  October 9, 2022 at 8:19 am
  నిజమే…మీరు చెప్పింది.
  అభినందనలు…ధన్యవాదాలు.
  
  Log in to Reply
4

డా కె.ఎల్.వి.ప్రసాద్
October 9, 2022 at 8:27 am
అవసరం కోసం కాదు.. ఆత్మీయత కోసం పలకరింపు.. అనే మీ సందేశం 👌
—వెంకట నర్సయ్య
మహబూబాబాద్

Log in to Reply
1. 4.1
  
  డా కె.ఎల్.వి.ప్రసాద్
  October 9, 2022 at 8:28 am
  ధన్యవాదాలు మిత్రమా.
  
  Log in to Reply
5

నూతక్కి రాఘవేంద్ర రావు
October 9, 2022 at 8:51 am
తుమ్మెద ఝం కర్మతో మొగ్గ వికసిస్తుంది
పలకరింపుతో మనసు పరవశిస్తుంది.
చిరునవ్వుతో పలకరొస్తే పరిమళమేగా .

Log in to Reply
1. 5.1
  
  డా కె.ఎల్.వి.ప్రసాద్
  October 9, 2022 at 11:04 am
  అవునండీ
  ధన్యవాదాలు మీకు.
  
  Log in to Reply
6

డా కె.ఎల్.వి.ప్రసాద్
October 9, 2022 at 11:02 am
తాజాసంచిక చదివినాను..నాకూ ఉదయాన్నే బంధుమిత్రులను పలకరించే అలవాటున్నది.
మనం బతికున్నామనే సంగతి అవతలివారికి తెలుస్తుందని నా నమ్మకం.
మీ అభిప్రాయాలతో విభేదించవలసిన కారణం కనిపించటం లేదు.
పూర్తిగా ఏకీభవిస్తున్న ,నమస్తే
–రామశాస్త్రి
హన్మకొండ.

Log in to Reply
1. 6.1
  
  డా కె.ఎల్.వి.ప్రసాద్
  October 9, 2022 at 11:03 am
  ధన్యవాదాలు శాస్త్రి గారు.
  
  Log in to Reply
2. 6.2
  
  డి. వి. శేషాచార్య
  October 9, 2022 at 11:57 am
  గత మూడు నాలుగేళ్లుగా క్రమంతప్పని
  ఆత్మీయమైన మీ పలుకరింపు నన్ను పులకరింపజేస్తూనే వుంది. ధన్యవాదములు. ప్రతిస్పందించనివ్వని నా బద్దకాన్ని మన్నించ ప్రార్థన.
  
  Log in to Reply
  1. 6.2.1
    
    డా కె.ఎల్.వి.ప్రసాద్
    October 9, 2022 at 3:28 pm
    ధన్యవాదాలు మిత్రమా.
    
    Log in to Reply
7

Bhujanga rao
October 9, 2022 at 1:19 pm
జ్ఞాపకాల పందిరి 131 సంచికలో పలకరింత-పులకరింత..!! విషయాన్ని చక్కగా వివరించారు.పల్లెల్లో కనిపించిన ప్రతివారితో దారిపొడవునా పలకరింపులు మరియు అప్పటి పరిస్థితులకు అనుగుణంగా ఉంటూ,వారి కష్టాలు, సుఖాలు మనసులో ఉన్న భావాలు వ్యక్తపరుస్తూ చాలా అత్మీయంగా పలకరించుకుంటారు.పలకరింపు అనేది జీవితానికి ఎంతో ముఖ్యమైనది చాలా విలువైనది అని మంచి వివరణ ఇచ్చారు సర్.మీకు ధన్యవాదములు డాక్టర్ గారు🙏

Log in to Reply
1. 7.1
  
  డా కె.ఎల్.వి.ప్రసాద్
  October 9, 2022 at 3:29 pm
  కృతజ్నతలు
  భుజంగ రావు గారూ.
  
  Log in to Reply
8

డా కె.ఎల్.వి.ప్రసాద్
October 9, 2022 at 3:26 pm
ఒక ఆత్మీయ పలకరింపు ఎదుటి వ్యక్తి కి పలకరించిన వారికి కూడా ఉత్సాహాన్ని ఇస్తుంది చాలా చక్కగా వివరించారు
—విజయ లక్ష్మి.కస్తూరి
హైదరాబాద్.

Log in to Reply
1. 8.1
  
  డా కె.ఎల్.వి.ప్రసాద్
  October 9, 2022 at 3:27 pm
  ధన్యవాదాలండీ.
  
  Log in to Reply
9

Jhansi koppisetty
October 9, 2022 at 6:07 pm
ధన్యోస్మి 🙏🙏🙏మీ పలకరింపు మిత్రుల జాబితాలో నేనూ వున్నందుకు ఆనందంగా వుంది. మీరు ఒక విషయం తెలుసుకోవాలి… ఉదాహరణకి నాకు బ్రాడ్కాస్ట్ పద్దతిలో కొందరు మిత్రుల శుభోదయం క్రమం తప్పకుండా వస్తుంది. నేను సాధారణంగా జవాబు ఇవ్వను… కాని నిత్యం వచ్చే శుభోదయం రాని రోజున వెలితిగా వుంటుంది…రెండు మూడు రోజులు వరుసగా రాకపోతే ISD call అయినప్పటికీ కాల్ చేసి పలకరించి క్షేమసమాచారం తెలుసుకుంటాను.. జవాబు ఇవ్వకపోవడంలో అలక్ష్యమో, గర్వమో, చిన్నచూపో మరేదో కాదు….కేవలం సమయాభావం.. నా స్నేహితులు నన్నర్ధం చేసుకుంటారని నా నమ్మకం…. అలాగేమీరూ అర్ధం చేసుకోవాలని విన్నపం🙏🙏

Log in to Reply
1. 9.1
  
  డా కె.ఎల్.వి.ప్రసాద్
  October 9, 2022 at 6:14 pm
  అర్ధం చే సుకుంటున్నాను
  విశ్లేషణ
  వివరణ బాగున్నాయ్.
  అభినందనలు
  ధన్యవాదాలు.
  
  Log in to Reply
10

Rajendra Prasad
October 9, 2022 at 10:33 pm
ఆత్మీయ పలకరింపుల జాబితాలో నన్ను కూడా పెట్టి నా స్థాయిని పెంచారు. ఇది అటు ఉంచి, విషయంపై చాలా చక్కగా, నిష్కర్షగా రాశారు
– రాజేంద్రప్రసాద్

Log in to Reply
1. 10.1
  
  డా కె.ఎల్.వి.ప్రసాద్
  October 10, 2022 at 7:12 am
  ధన్యవాదాలు మీకు.
  
  Log in to Reply
11

డా కె.ఎల్.వి.ప్రసాద్
October 10, 2022 at 7:11 am
ఆహా! ఎంత చక్కని ముగింపు !పలకరింపు అనేది…” కనిపించని ఆత్మీయ కరచాలనం “…
మీరన్నట్లు ఏదో ఒక రూపంలో పలకరింపులు కొనసాగినప్పుడే బంధాలు అనుబంధాలు నిలబడతాయి. మన పలకరింపుకు లభించే ప్రతిస్పందనను బట్టి ఎదుటి మనిషి యొక్క మనస్తత్వాన్ని అంచనా వేయవచ్చు . కొందరు తమ ఆత్మీయపలకరింపుతో మనసుకు దగ్గరై తిరిగి ఎప్పుడు ఎదురు పడతారా! అని ఆగి ,మరీ ఎదురు చూస్తాము . మరి కొందరి పలకరింపుతో మనము వీరికి ఎందుకు ఎదురుపడ్డామా !అని అనిపిస్తుంది .
నాకు ఈ మధ్యకాలంలో “శృతి తప్పిన పలకరింపు ” అనే శీర్షికతో చిన్ని వ్యాసం వ్రాయాలనిపించింది. మీ పలకరింపుతో దానికి అక్షర రూపం ఇవ్వాలనుకున్నాను. చక్కని ఉత్తేజాన్ని కలిగించినందుకు ధన్యవాదములు.🙏🙏.
—-బి.రామకృష్ణా రెడ్డి
అమెరికా.

Log in to Reply
1. 11.1
  
  డా కె.ఎల్.వి.ప్రసాద్
  October 10, 2022 at 7:14 am
  చాలా బాగా రాసారు
  రెడ్డి గారు.
  కృటజ్నతలు.
  
  Log in to Reply
12

డా కె.ఎల్.వి.ప్రసాద్
October 10, 2022 at 10:16 pm
పలకరింపు గూర్చి ఎన్ని పులకరించే విషయాలు పంచుకున్నారో సర్.నిజం పలకరించే వ్యవధి కూడా ఉండడం లేదు నేటి హడావిడి జీవితాల్లో.కానీ మీరన్నట్టు మీరు మాకు గుర్తున్నారు అనే పలకరింపు అది ఫోన్ ద్వారా అయినా చిన్న సందేశమైనా ఎంతో ఆనందాన్నిస్స్తుంది. కొన్ని సార్లు మనస్సు స్థబ్ధతను వదలగొట్టి మనుషుల్లో పడేలా చేస్తుంది.పలకరింపుకి వెంటనే జవాబు ఇవ్వని వారిలో నేను కూడా ఉన్నాను.కానీ ఈనాటి మీ వ్యాసం చదివాక పలకరింపు ఒక ఆత్మీయ కరచాలనం అని స్పర్శకు వచ్చింది.హృదయం ఉత్తేజపడే అంశాన్ని అందించినందుకు హృదయపూర్వక ధన్యవాదాలు సర్🙏🙏💐
—-నాగజ్యోతి శేఖర్
కాకినాడ.

Log in to Reply
1. 12.1
  
  డా కె.ఎల్.వి.ప్రసాద్
  October 10, 2022 at 10:17 pm
  అమ్మా ధన్యవాదాలు మీకు.
  
  Log in to Reply
13

samsundar.yeeda@gmail.com
October 12, 2022 at 3:03 am
చాలా చక్కగా చెప్పారు…ఒకపుడు గ్రీటింగ్ కార్డ్స్ పోస్ట్ లో పంపేవాళ్ళము…కొత్త తరానికి వాటి గురించే తెలియదు….కనీసం సామాజిక మధ్యమాల ద్వారా అయిన పలకరిస్తే చాలా మంచిది….మనిషి సోషల్ జీవితం లోనే ఉండాలి….ఒంటరిగా బంది అయ్యి ఉండలేడు…
మంచి మాట చెప్పారు ..

Log in to Reply
1. 13.1
  
  డా కె.ఎల్.వి.ప్రసాద్
  October 14, 2022 at 8:43 pm
  సామ్
  నీ స్పందనకు
  కృతజ్ఞత లు.
  
  Log in to Reply
14

డా కె.ఎల్.వి.ప్రసాద్
October 14, 2022 at 8:36 pm
జ్ఞాపకాల పందిరి 131 లో…పల్లె విషయాలను, అక్కడి పలకరింపులను చక్కగా వర్ణించారు. ప్రయాణంలో జరిగే పరిచయాలను తెలిపారు. బంధువులను, ఆత్మీయులను పలకరించడం ద్వారా బంధాలు బలపడతాయని తెలియచేశారు. పలకరింపు ఫ్యాషన్ కాదని, కనిపించని ఆత్మీయ కరచాలనం.. కొసమెరుపు బాగుంది. అభినందనలు.
—-జి.శ్రీనివాసాచారి
కాజీపేట.

Log in to Reply
1. 14.1
  
  డా కె.ఎల్.వి.ప్రసాద్
  October 14, 2022 at 8:36 pm
  ధన్యవాదాలండీ
  
  Log in to Reply
15

శ్యామ్ కుమార్ చాగల్
October 15, 2022 at 9:16 pm
జ్ఞాపకాల పందిరి సాహిత్యపథంలో dr కె ఎల్వి ప్రసాద్ గారి 131 భాగం లో పలకరింతకు వున్న ప్రాముఖ్యాన్ని సోదాహరణంగా తీర్చి దిద్దారు. ప్రస్తుతం రచించే తప్పటడుగులు వేస్తున్న నాకు మొదటి అడుగు వీరి యొక్క రచనలను విశ్లేషించటమే.
ఇవి ప్రతీ జ్ఞాపకపు మలుపులు, తన యొక్క జీవితపు సహజ జీవన పాఠం
నుండీ వచ్చిన మచ్చు తునకలు. గమనించి చూస్తే ప్రతీ ఒక్కటి అనుదినం మనం అనుభవిస్తున్నవే. ప్రతీ వ్యాక్యం మన గుండెల్లో వ్యంగ్య బాణాలుగా దిగి పోయేవే. వృత్తి రీత్యా డాక్టర్ అయినప్పటికీ రచన వ్యాసాంగం పట్ల గౌరవం తో తనకున్న ఆసక్తి తో ప్రతీ విషయాన్ని మనసుకి అల్లుకు పోయేలా కథా వస్తువును మనకు ప్రతీ వారం అందించగలిగారు.
ప్రతీ విషయం సర్వ జనావళికి అనువర్తించేవే. ఎందుకంటే ప్రతీ రచనలో జీవితం వుంది. ఈ రచనల్లో ప్రతీ విషయాన్ని పరిశీలించి పరిశోధించి రాసినట్లుగా తెలుస్తోంది. అందుకనే చదివిన మనకు ఇందులో ఎక్కడా అతిశయోక్తి కనపడదు.

అందుకే రాసిన ప్రతి ఇతివృత్తం, నిజాలకు వుండి , కల్పితం లాగా కనపడకుండా మనకు వర్తించేలా వున్నాయి.ప్రతీది వాస్తవానికి దగ్గరగా, నిర్మొహమాటం గా వున్నాయి. . స్నేహాలకు, పలకరింపు లకు , వుండే ప్రాముఖ్యాన్ని ఎత్తి చూపారు. అన్నీ కూడా మనకు వర్థించేవే. రచయిత కు , సంచిక కు ధన్యవాదాలు.

Log in to Reply
1. 15.1
  
  డా కె.ఎల్.వి.ప్రసాద్
  October 15, 2022 at 9:26 pm
  ధన్యవాదాలండీ.
  
  Log in to Reply