[‘పుస్తక సురభి’ శీర్షికలో భాగంగా జోజో మోయెస్ రాసిన ‘వుయ్ ఆల్ లివ్ హియర్’ అనే పుస్తకాన్ని సమీక్షిస్తున్నారు స్వప్న పేరి.]
జోజో మోయెస్ రచించిన ‘వుయ్ ఆల్ లివ్ హియర్’ అనేది హృద్యమైన నవల. హాస్యం పండిస్తూనే, కుటుంబ జీవితంలోని గొప్పదనాన్నీ, లోటుపాట్లనూ చర్చిస్తుంది. ఈ నవల నడివయసు రచయిత్రి లీలా కెన్నెడీ కేంద్రంగా నడుస్తుంది. వివాహం గురించి పుస్తకం ప్రచురించిన కొద్ది వారాలకే ఆమె భర్త ఆమె నుంచి విడిపోతాడు. తల్లి హఠాన్మరణం, తిరుగుబాటు స్వభావం కలిగిన ఇద్దరు కూతుర్లు, శిథిలావస్థలో ఉన్న ఇల్లు, ఇంకా వృద్ధుడైన సవతి తండ్రితో, లీలా ప్రపంచం గందరగోళంగా ఉంటుంది, భావోద్వేగ కల్లోలాల సుడిగుండంలా మారుతుంది.
గొప్పగా చిత్రీకరించబడిన పాత్రలే ఈ నవలకి బలం. నవలకి నాయిక లీలానే, సందేహం లేదు. కానీ ఆమెకి తన మీద తనకి విశ్వాసం లోపిస్తుంది, ఆర్థిక పరిస్థితి అస్థిరంగా ఉంటుంది, సింగిల్ మదర్‌గా ఎన్నో డిమాండ్లను ఎదుర్కోవాల్సి వస్తుంది. అయితే తనని తాను ఆమోదించుకుని, సాధికారత సాధించే దిశగా సాగిన ఆమె ప్రస్థానాన్ని జోజో మోయెస్ గొప్ప ప్రామాణికతతో చిత్రించి, ఆమె పోరాటాలనీ, ఎదుగుదలని ఆసక్తికరంగా అందించారు. దశాబ్దాల క్రితం లీలాను విడిచిపెట్టిన వెళ్ళిపోయిన ఆమె అసలు తండ్రి, ఒకప్పటి ప్రసిద్ధ నటుడు జీన్ ఆ కుటుంబంలోకి మళ్ళీ రావడం – కథనానికి సంక్లిష్టతను జోడిస్తుంది. దాంతో లీల బాధాకరమైన గత గాయాలను ఎదుర్కోవలసి వస్తుంది. కథ చివరికి మన్నింపులకు, అవగాహనా క్షణాలకు దారితీస్తుంది. లీలాకి, ఆమె కూతుర్లు సెలీ, వైలెట్ తోనూ, సవతి తండ్రి బిల్ తోనూ ఎదురయ్యే సంఘటనలూ, సన్నివేశాలు కథనాన్ని సుసంపన్నం చేస్తాయి. సాంప్రదాయేతర కుటుంబ బంధాలు, షరతులు లేని ప్రేమ వంటి అంశాలను ప్రస్ఫుటం చేస్తాయి.
జోజో మోయెస్
నవలలోని – గుండెకోతలు, పశ్చాత్తాపాలు, మన్నింపులు వంటి భారమైన అంశాలను సుముచితమైన పాళ్ళల్లో హాస్యాన్ని, ఆత్మీయతని రంగరించడం ద్వారా – బాలెన్స్ చేశారు జోజో. సహజ వేగంగా సాగే ఈ కుటుంబ కథనం కొందరు పాఠకులకు ‘నెమ్మదిగా’ సాగినట్లు అనిపించవచ్చు. కానీ మరొకొందరు దాని లోతుని, పాత్రలపై నిలిపిన దృష్టిని అభినందిస్తారు. గొడవలు పడే ముసలి తండ్రుల నుంచి – టీనేజ్ తిరుగుబాటుల వరకూ – కుటుంబ సభ్యుల కార్యకలాపాలను హాస్యపూరితంగా, అంతర్దృష్టితో ప్రదర్శించి – నవలను వినోదాత్మకంగానూ, భావోద్వేగాల అల్లికగానూ తీర్చిదిద్దారు రచయిత్రి జోజో.
నవలలో లీలా ప్రస్థానంలో మరొక మలుపు – ఓ రొమాంటిక్ సబ్ ప్లాట్! మాజీ భర్త చేసిన ద్రోహం నుంచి కోలుకుంటూనే, మరో తోడును వెతుక్కునే క్రమంలో ఆమె చేసిన ప్రయత్నాలను వివరిస్తుంది. జెన్సన్ అనే తోటమాలిని, గాబ్రియేల్ అనే సింగిల్ డాడ్‌ లలో ఒకరిని ఎంచుకోవాలనుకుంటుంది. ఈ ప్రక్రియ – నడివయసులో జీవితాన్ని పునఃప్రారంభించడం ఎంత కష్టమో వివరిస్తుంది. కొత్త ప్రేమలోని ఇబ్బందిని, ఆశాభావాన్ని – మృదువుగా – విస్తృతమైన ఫామిలీ డ్రామాకి అనుబంధంగా – గొప్పగా వ్యక్తీకరించారు జోజో.
ఈ నవల సాధించిన ముఖ్యమైన విజయాలలో ఒకటి – కుటుంబ జీవితంలో అంతర్లీనంగా ఉండే రోజువారీ గందరగోళాలు, రాజీలను చిత్రీకరించడం. ప్లంబింగ్ సమస్యల నుండి స్కూల్ గేట్ వద్ద మాజీ భర్త తోనూ, గర్భవతిగా ఉన్న అతని ప్రస్తుత భాగస్వామితోనూ గొడవల వరకు లీలా జీవితంలో ఎదురైన సవాళ్ళు – చాలామంది పాఠకులకు సుపరిచితమైనవే. ఇలాంటి ఘటనల నుండి జనించే హాస్యాన్ని, నైరాశ్యాన్ని పకడ్బందీగా చిత్రించి – నవలను – పట్టుదలకీ, మానవ సంబంధాల లోని అంసంపూర్ణ సౌందర్యానికీ ప్రతీకగా రూపొందించారు జోజో మోయెస్.
కథన వేగం మరీ నత్తనడకలా ఉందని, నవలలోని ఆ కుటుంబాని సమస్యలు మరీ ఎక్కువని – కొందరు పాఠకులకి అనిపించినా, ముగింపు నమ్మశక్యంగా ఉండి సంతృప్తికరంగా అనిపిస్తుంది. లీలా కుటుంబ సభ్యులలో వచ్చిన మార్పు, పాత గాయాలు మానడం, కొత్త బంధాలు ఏర్పడడం వంటివి పాఠకులలో ఆశాభావాన్ని, పునరుద్ధరణ భావాన్ని కలిగిస్తాయి. ఒక కుటుంబం ఎలా మసలుకోవాలో రచయిత్రి జోజో మోయెస్ ఆత్మీయంగానూ, ఆలోచనాత్మకంగా వెల్లడించిన తీరు ‘వుయ్ ఆల్ లివ్ హియర్’ నవల చదవడాన్ని – పాత్రలు కేంద్రంగా సాగే కుటుంబ కథా నవలలను చదవడానికి ఇష్టపడే పాఠకులకు – ఒక చక్కని పఠనానుభూతిగా చేస్తుంది.
చివరగా, ‘వుయ్ ఆల్ లివ్ హియర్’ కుటుంబం, ప్రేమ, సెకండ్ ఛాన్స్‌ల సంక్లిష్టతలను ప్రదర్శించే ఒక హృద్యమైన, ఉత్తేజకరమైన నవల అని చెప్పచ్చు. హాస్యాన్ని భావోద్వేగపు లోతుతో మిళితం చేసే జోజో మోయెస్ సామర్థ్యం పాఠకులను అలరిస్తుంది, కదిలిస్తుంది. పట్టుదల, మన్నింపు, ఆధునిక కుటుంబ జీవితంలోని గజిబిజి, అందమైన వాస్తవికతల కథలను ఇష్టపడే ఎవరైనా ఈ నవలను తప్పక చదవాలి.
***
Author: Jojo Moyes
Published By: Penguin
No. of pages: 444
Price: ₹ 899 Paperback
Links to buy:
https://www.amazon.in/All-Live-Here-Jojo-Moyes/dp/0241415527/
https://www.amazon.in/All-Live-Here-Jojo-Moyes-ebook/dp/B0D4717KH8/
స్వప్న పేరి ఫ్రీలాన్స్ బ్లాగర్. పుస్తక సమీక్షకురాలు. సినిమాలంటే ఆసక్తి.