తెలుగులో ‘మంకుతిమ్మన కగ్గ’-77

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

771.
నీరధి పరబ్రహ్మము, తేలియాడు హిమఖండము జీవాత్మ;
క్షీరము పరబ్రహ్మము, అందలి ఘృతము జీవాత్మ;
కీరు, పరమాన్నములు పరబ్రహ్మము, అందలి ద్రాక్ష జీవాత్మ;
నేరగ త్రిమతంబుల, ఆత్మభోదలివి – మంకుతిమ్మ!

772.
మతవాదంబులవి మూడు గాక మున్నూరుండు గాక, అన్ని
మతంబులున్ మూలంబైన సారవస్తు వొకటేయని సమ్మతించు
హితంబైన పారమార్థక చింతయే మతంబు వ్యవహరించిన, జగత్
హితమగు గాని భారంబు గావవి – మంకుతిమ్మ!

773.
బయట, వ్యవహారములందనురక్తి; లోన విరక్తి
బయట, కర్తవ్యాచరణానురక్తి; లోన ఉదాసీనత
బయట, సంసారభార నిర్వహణానురక్తి, లోన తిరస్కారత,
ఇయ్యవి వర యోగమార్గములు – మంకుతిమ్మ!

174.
సూర్యదర్శనము కన్న సూర్యకిరణ దర్శనము సులువు,
పరమ శాస్త్ర పరిచయము కన్న సరైన యుదాహరణ సులువు,
పరమ తత్త్వంబున్ వడసిన గురువు దొరక సులువే!
దొరకినన్, కడు ధన్యుడవు నీవు – మంకుతిమ్మ!

775.
కాకి, కోకిలల రూపంబు లొకటై తోచు పైపైకి – యోగియున్
పైకి కాన్పించు సంసార సుఖ దుఃఖంబుల ననుభవించు
యొక సామాన్య సంసారివోలె చూపరులకు, అంతరంగంబున
యొక త్యాగి యాతడు – మంకుతిమ్మ!

776.
పరమాత్మ విధ విధ రూపంబులు కనులముందె గో
చరించుచు నుండ, నరుండాతని గురుతింపక
ధరలో తన్ను బోలిన ప్రాణియే యని దలంచి
కరతలామలకంబైన దాని పోద్రోలు – మంకుతిమ్మ!

777.
సామాన్య వేషంబున, సంసారి వేషంబున
స్వామి నీకడ కేతెంచగ వచ్చు వరంబు నిడ;
స్వామి మహిమన్ గనెడి సంస్కారముండవలె నీయందు;
తామసికుల కబ్బునే యా వరము! – మంకుతిమ్మ!

778.
విషయ భోగములందు విరక్తి, విశ్వలీలా విషయాసక్తి,
కృషి విషయమందున దీక్ష, వైఫల్యమందున్ తితిక్ష
విషమ పరిస్థితుల సమైక్య దృష్టి, సకల భూతములందనురక్తి
విశేష సాధనంబులివి కైవల్యంబునకు – మంకుతిమ్మ!

779.
పడిన కష్టమునకున్ సరి కూలి దొరకుటయు, రేపెటుల
గడచునోయను చింతలేమియు; సంసార భారంబు
నడగించు జతగాండ్ర చెలిమియు, సంతృప్తి, పరమాత్మపై నిలి
పెడి చిత్తంబు గలుగ నదియ యుత్తమము – మంకుతిమ్మ!

780.
వర్షంబున కొక ఋతువు, పంటకొకటి, పంట కోత కొక ఋతువు;
అరయ నీ జీవిత వృక్షంబునకున్ గలదు కాల నియమంబు;
విరక్తియు, ముక్తియు, విచక్షణా జ్ఞానము, మంచితనమున్
సంక్రమించు కాలక్రమంబుగాన్ – మంకుతిమ్మ!

(ఇంకా ఉంది)