తెలుగులో ‘మంకుతిమ్మన కగ్గ’-75

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

751.
చిత్ర విచిత్రంబైన ఇంద్రజాలపు లోకమిది; ఈ
చిత్రంబైన చమత్కారంబును వలదనక కావలెననక; ఈ వి
చిత్రంబైన నాటకంబున నీ యంతరాత్మను పాత్రధారిగ జేయక
చిత్రంబుగ వేషంబు ధరించి నటించుము – మంకుతిమ్మ!

752.
భోజనముల కెల్ల పరమ భోజ్యమా పరబ్రహ్మ రసంబు
భుజించిన పిమ్మట వేరేది రుచింపదు, వేరేది వేడడు,
త్యాజక, త్యాగ, సంతాజ్యమనెడి భేదంబు లరయ శూన్యమై
రాజిల్లు నతడు రారాజుగ – మంకుతిమ్మ!

753.
అనుసంధించవలె బ్రాహ్మతత్త్వమును లోకవ్యవహారములందును,
అనుగుణంబుగ జీవనంపు రీతుల యందును, దేహేంద్రి
యానుభవంబుల యందునున్; బ్రహ్మతత్త్వము గోచరింపవలె, ఈ
యనుసంధానమే మోక్షసాధనా మర్మము – మంకుతిమ్మ!

754.
ఒకపరి పూదోట యందున, నింకొకపరి మిత్రకూటమి యందున,
ఒకపరి సంగీత సభలను, నింకొకపరి శాస్త్ర చర్చ యందున
ఒకపరి సంసార వ్యవహారంబుల, నింకొకపరి మౌనంబున, ఏ
రకంబున నైన బ్రహ్మానందంబును పొందుము – మంకుతిమ్మ!

755.
బుద్ధి శక్తికా బ్రహత్రత్త్వంబర్థంబైననేమి? స్మృతి పథంబున నయ్యది
ఒద్దికగ సతతంబు నెలసి యుండవలె గాదె! నిరతము
పద్దులు వ్రాయు కోశాధికారెన్ని లక్షల ధనంబుల నుచ్చరించినన్
పెద్దగ నాతనికి వచ్చు భృతి ఎంత? మంకుతిమ్మ!

756.
గుణములయ్యవి నాలుగు బ్రహ్మానందంబు వడయ; ధైర్య
గుణమది ప్రథమంబు, రెండవది బుద్ధిబలంబు; భూతదయా
గుణమది తృతీయంబు; నిర్మమతా గుణంబది నాల్గవది
గుణములలో మేల్బంతి – మంకుతిమ్మ!

757.
వలదు వ్యామోహంబునకున్ గురిసేయు ప్రేమాతిశయము,
వలదు ద్వేషంబునకున్ దారితీయు భీమసాహసంబు,
వలయు ధాంబింకంబులు లేని నియమ నిష్టతలు, పరిఢవిల్ల
వలె ఎల్లెడెల్ల సౌమ్యమనోభావంబు – మంకుతిమ్మ!

758.
నీతి నియమంబులకున్ ఔదార్యమే తల్లి ధైర్యమే తండ్రి;
నీతి నియమంబుల స్వాధిపత్యంబున నుండ నెంచితివేని,
గతించిన దానిన్ గణుతింపక, భవితంబునకున్ సిద్ధుడగుము
మితంబె సంతోషదాయకము – మంకుతిమ్మ!

759.
అందనిదాని పొందుటాతురతతో యందిన దాని మరవనేల!
అందందు కీడుల నడుమన గలుగు మంచిని గుర్తుంచుక
అందిన భాగ్యంబును గుర్తెరింగి అందనిదాని విస్మరించి నడువుము;
పొందిక నిదియె సంతోషంబునకు సోపానము – మంకుతిమ్మ!

760.
చింతించి ఫలమదేమి? మార్చ వీలు లేని గతజన్మంబు గూర్చి,
చింతించుము ఇక్కాలంబు గూర్చి; గతంబు గుర్తురాకు౦డుటకే యో
చించి పరమేష్ఠి వీపున నుంచక నీ యాననమున
ఎంచి నునిచె కనుల – మంకుతిమ్మ!

(ఇంకా ఉంది)