తెలుగులో ‘మంకుతిమ్మన కగ్గ’-68

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

681.
ముందేమగునో, ఇంకెటులో యను భయంపు మాట లిపుడేల?
సందర్భము రానిమ్ము, అప్పుడ చింతించిన సరియగున్
పొందుగ సరి జేయువాడు గాడు నీ సేవకుడు, వేరొండుగలడు
ముందున్న నీ బ్రతుకు కొనసాగింపుము – మంకుతిమ్మ!

682.
దిన దినంబునకు నిమిష నిమిషంబునకు భవితవ్యంబున్ గూర్చి
అనుదినంబును చింతజేయనేల? ఎటులో నీడ్చుకొని బొమ్ము
మన వ్యవహరంబుల సక్కజేయ యజమాను డొకడు గలడు
వానినిన్ మది దలంచి ముందుకు సాగము – మంకుతిమ్మ!

683.
చింతించ నేల? వగవనేల? దినకరుడు గతిదప్పక యుద
యించుచు తిరుగుచుండు, వృద్ధి క్షయంబుల నన్నింటి వాడె సమర్థుండు;
మ్రింగి వేయు మృత్యువన్నింటిని, పూర్వవాసనల మరిపింపజేయ,
అంబికాపతి మనకిచ్చిన వరంబు గాదె యది – మంకుతిమ్మ!

684.
దినమనెడి కొలపాత్రతో మన ఆయురాశిని రవి కొలచిన
ఘను డాతని కొమరుడు జముడు దాని లెక్కల వ్రాసి యుంచు
మాన్యులీ దివిజు లిర్వురున్ యుపకారులు మన లెక్కల జూచి
తనువునకొక గతి కల్గింతురు – మంకుతిమ్మ!

685.
అప్పుడో, ఇప్పుడో, ఎప్పుడో మన జీవన కథ ముగిసిపోవు
తప్పదు, అంతో ఎంతో కొంత జన్మంబు కరగిపోవు
ఎప్పట్టుననో మరుపనెడి ముసుగు మమ్ముల నావరించు
ఒప్పుగ సంతసం బొసుగునది – మంకుతిమ్మ!

686.
లేదు మనకొక సరైన యూతకర్ర, లేదు తేట తెలివియు,
వదలని అరకొఱ తెలివితేటలే మనకు
తుద కెటులో సాగిపోవు జీవన యాత్ర
యద్దాని కేల నీ యార్భాటము – మంకుతిమ్మ!

687.
హిమగిరి విస్తారంపు సొబగు ప్రత్యక్ష దర్శనంబుననే
కమనీయంబగు గాని, చిత్ర దర్శనంబున
నేమయినన్ కాననగానే! అత్యద్భుత దర్శనంబుల
నీ మనసార ప్రత్యక్షంబుగ గాంచవలె – మంకుతిమ్మ!

688.
ఆర్ణవపు గంభీరత కనుల గాంచినంత గాక, కవి
వర్ణనముల తోడ తనివి జెంద వీలగునే!
పూర్ణవస్తు గ్రహణము పరోక్షంబున జేయ వీలగునే,
నిర్ణయము ప్రత్యక్షంబుగ జేయవలయు – మంకుతిమ్మ!

689.
నీ యుత్కట క్షణంబులందున, ధర్మసంకటంబుల,
నీ యంత కాలమందున, నీ నిర్వాణ సమయమందున,
నీ యత్యంత జీవన పోరాటంబున, నీ ఒక్కడవె నిల్వవలె
నీ యంత నీవే నిర్మిత్రుడై యుండుట నేర్వుము – మంకుతిమ్మ!

690.
ఏది వెంబడించి వచ్చె ధర్మజుని స్వర్గారోహణంబున? వచ్చె
నది ధర్మంబు శునక రూపంబున్, ఎవ్వరున్ రారు
ముందున, వెనుకను బుట్టిన వార లెవ్వరున్, వెంట వచ్చు మన ధర్మంబొక్కటె;
యదియ మన మనస్సాక్షి; మనల హెచ్చరించునది – మంకుతిమ్మ!

(ఇంకా ఉంది)