తెలుగులో ‘మంకుతిమ్మన కగ్గ’-66

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

661.
తప్పెట వాయించి ప్రకటించదు మొక్క తా మొలకత్తు వేళ,
గొప్పగ ముఖవీణాపన సేయదు కాయ తా ఫలమగు వేళ,
డప్పు సద్దు జేసి యుదయించరు సూర్యచంద్రులును; నీ
గొప్ప జెప్పక కుట్లు వేయుము నీ మోవికి – మంకుతిమ్మ!

662.
చరింపుము నీ ధర్మంబును విరామమెరుగని దినకరుని వోలె
విరజల్లుము నీ తేజంబును యంతటన్ విద్యుల్లత వోలె
కార్యము శక్తికి మించిన దైనను, ఫలితంబుల నెంచక
చరింపుము తలయొగ్గి సద్దు సేయక – మంకుతిమ్మ!

663.
లోకవ్యవహారంబు లరయ రెండు రకంబు లీ యవని;
యొకటి పరమార్థంబునకు, వ్యావహారంబున కింకొట
యొకపరి రెంటినిన్ పరికించి, పరమార్ధమున్ మరచి
లోక వ్యవహారంబున కెక్కుడు తానమీయక మెలగుము – మంకుతిమ్మ!

664.
మనుజుని వ్యవహారంబునకు ఆదాయ వ్యయంబులవి రెండు
అనుభవ భోగభాగ్యంబుల కొకటి, లో మనసులోని నీతి కొకటి,
తన సంపాదన దేహసుఖంబునకైన, మనఃసుఖంబున కయ్యది
అనువగునే పరికింపుము – మంకుతిమ్మ!

665.
తనువును తనివి జెందించు కవళంబొకపరి విషమగు
ఎనలేని మోహపాశంబు గాలంబగు జీవనంబునకు
మనః శరీరంబులపై దెలియని పరిణామంబు లేర్పడు
గణించుము ఆత్మలాభంబును – మంకుతిమ్మ!

666.
నూరారు సరుకుల బహు దొడ్డ సంత ఈ జీవితము
ఊరిలోనివి, గేరిలోనివి, గేహంబులోనివి సరకులవెన్నో
వేరు వేరు సరుకులకు వేర్వేరు నెలవులు, వెలలు వేరువేరు
తారతమ్య మెఱుగ తత్త్వంబుల – మంకుతిమ్మ!

667.
ఇల్లు తగలబడి పోవుచుండ, నురుకుము దాని నార్ప; మనసును
జ్వలించు జ్వాలల నార్పగరాదు – దవ్వుల నుండుటే మేలరయ
అల్ల దేహంబున కుపకారంబు సేయబోవు ఆతురత తోడి
అల్లకల్లోలంబు సేయబోకు ఆత్మను – మంకుతిమ్మ!

668.
వడ్రంగి, కృషీవలుడు, కార్మికుడును యోగిపుంగవులే గదా!
ముడుపుగా బెట్టుదురు తమ మనస్సులన్, కరములన్;
ఎడతెరపి లేక కష్టించు వీరికి క్షుద్ర తలంపులకు తావే లేదు
వడయ రెవరి దాక్షిణ్యమును, కర్మయోగులు వీరు – మంకుతిమ్మ!

669.
ఈలాగునో, ఏలాగునో, ఏ తీరునో గడచిపోవు నీ జన్మ; సాగి
కాలంబు ముగిసిపోవు, ముగిసి మరచుటే సుకృతము; ఈ
వేళనో, ఆ వేళనో ఎప్పుడో ముగిసిపోవునని దలచి, యదియ
వలసిన భాగ్యమని ఎంచి, సంతసించు – మంకుతిమ్మ!

670.
ఏరికేని సాధ్యమే మరి మరి పుట్టు రోగంబుల కోషధుల గూర్చ
పరిహారంబేది: నరుని నీచపు యాలోచనా పరంపరలకు
ధర, భరించి యుండదే అత్యుష్ణమును తాల్మి తోడ
మారు పల్కక పల్బిగబెట్టి నోర్చుకోవలె – మంకుతిమ్మ!

(ఇంకా ఉంది)