తెలుగులో ‘మంకుతిమ్మన కగ్గ’-62

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

621.
ధర్మమన్న యన్నింటినిన్ ధరియించునది కాదె; నీవును నంతియె
ధర్మపు కార్యంబు మోయ బూనుము, యందరి హితమున్ గోరి
మర్మమెరిగి, లోక యుపకార్యాచరణంబు గావించుము
ధర్మరక్షణకు నడుము బిగించుము – మంకుతిమ్మ!

622.
ధర్మ నిర్ణయమది నీకు జన్మ జన్మాంతరముల నుండియు
కర్మ సంబంధముల కట్టుబడి నుండునని దెలిసి
నిర్మమత, నిర్మలోత్సాహంబు చేత నీవాచరించ
బ్రహ్మ సామీప్యము నీకగు – మంకుతిమ్మ!

623.
అంతటను, ఇంటిన్ బయట, సంఘంబున, దేశంబున
సంతస కార్యంబు సలుప విహిత తానంబిది; సర్వ
హితార్థమై, సుస్థితికి కారణంబై యొనరించు కార్య మరయ
యుత్తమ ధర్మము – మంకుతిమ్మ!

624.
అంతమొందించుటయో, అంతమొందుటయో; విజయమో, యపజయమో
నంతియ కాని, వేరుదలంచునే క్షత్రియుడు రణంబున,
కృత నిశ్చయుడై పోరు సల్పు, లాభనష్టముల దలంపు లేక, యది
యాతని యాత్మ ఋణంబు లోకమునకు – మంకుతిమ్మ!

625.
పాడు ప్రపంచ మిది; కాలి మసి బొగ్గైనది నరుని మనసు,
విడువ నసాధ్యము, వీడకున్న రోతయగు కాయము
కడు నుపాయంబున, అంటీ అంటనటుల సాగించవలె జీవనము
గడుసైనదేమీ కాదీ జీవనము – మంకుతిమ్మ!

626.
కుసుమ హితుడవె నీవు? నలుపక దాని నాఘ్రాణింపుము;
పిసికినన్ యది కంపు గొట్టు; లోకపు తీరును నింతియె,
కాసారపు తేట నీటినిన్ త్రావి కదలుము, కెలికి రొచ్చు సేయక,
పస చెడనీయకు జీవనంబును – మంకుతిమ్మ!

627.
విషయ సంగమము కన్న శ్మశాన సంగమము మిన్న
విషోగిరమారగించుట కన్న యుపవసించుట మిన్న
తృషోల్బణము, కాగిన పెనుపై బడిన పతంగముల పగిది
పిశాచి చేతికి చిక్కిన శిశువు వోలె – మంకుతిమ్మ!

628.
తీర్చవలె లోకంపు ఋణము, తప్పక తీర్చవలె; ఋణము
తీర్చినంత నెమ్మదించు యంతరాత్మ; ఋణవిముక్తడైన
తరి లోకులందరిలోని పరమాత్మను గాంచి, తనివి చెందెదవు
వేరు పాఠశాల ఏల? గేహమే నీ పాఠశాల – మంకుతిమ్మ!

629.
ఎదురు వచ్చు ఎగుడు దిగుడల్ యొక వరంబె తలంచిచూడ
అందరను యొకే సమయంబున యావహింపవవి,
బాధలనున్నవారిని, సంతృప్తులు అనునయింప
బ్రతుకు సాగించుట కష్టతరంబుగాదు – మంకుతిమ్మ!

630.
స్థూల సూక్ష్మ వివేక రహిత హితశత్రువులైన బంధుజనులు
కాలుని కోరలకును జిక్కించు యమభటులరయ, ఏ
కాలంబున జేసిన ఋణంబును వసూలు చేయవచ్చినవారు
తాలిమియె సాధనంబు మనకు – మంకుతిమ్మ!

(ఇంకా ఉంది)