తెలుగులో ‘మంకుతిమ్మన కగ్గ’-60

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

601.
మేలుకీడనక నిర్వహింపుము నీదగు కార్యము మనసుబెట్టి
కలిగినదే మహాప్రసాదమని యారగింపుము గొణగక
మేలిమిగ భరింపుము పరమార్థమును వదలక
అల వీడుము ఇల, పిలుపు వచ్చిన తరి – మంకుతిమ్మ!

602.
మాయను సృజించి యాపెను జగన్మాతగ జేసి
ఆయాసంబుగ సంసారి యాయె ఆ మన
నాయకుడు బ్రహ్మ; ఆతని యనుచరులమే గద మనము
హేయమని దలంపనేల – మంకుతిమ్మ!

603.
అవని యొక గోళాకారంపు మూస; సంసార తాపంబు
జీవులన్ పుటంబు బెట్టి, అహంకారమమకారంబుల
య్యవి; కరగిపోవ పరిశుద్ధుడై నూతన జీవి
వెల్వడు విస్తారాత్ముడై – మంకుతిమ్మ!

604.
వసుధ మూసలో కరగి కరగి, కశ్మలము తొలగగ
మసి బాసి క్షణ క్షణము నూతనుడై వెలుగొందు
రసమూర్తియై, జగదాత్మ మతియై చరించు జీవుడు
పస చెడక రాణించు – మంకుతిమ్మ!

605.
ఉదర జ్వాల నొక ఎడ, హృదయ జ్వాల నింకొక ఎడ
వదలక జ్వలించ మృదువుగాక పోవునే జీవశిల?
బదుకు మంటలో కరగి కశ్మలము తొలగ పరి
శుద్ధుడై తేలు ఆత్మార్ణవముపై – మంకుతిమ్మ!

606.
తక్కెడలో కప్పల బెట్టి సరితూచు చతురతయు,
నిక్కంబుగ ద్వంద్వంబుల నెదురించు సమర్థతయు, నిరు
ప్రక్కల చురకత్తులు వీచుచుండ తాటిపై నడచుచు
చిక్కక బయల్పడుటే గృహస్థ ధర్మము – మంకుతిమ్మ!

607.
ప్రేమాతిశయంబు లేని దాంపత్యము వృద్ధి చెందదు
వ్యామోహంబతిశయంబైన, శృంఖంబు లగునవి
సామరస్యమెట్లు సాధ్యమగు నీ విషయంబున
ఆమిషంపు యాకర్షణ నియ్యది – మంకుతిమ్మ!

608.
ప్రతి సంసారంబున కైకేయి వోలు తల్లులు, భామ
సత్యయు వోలు ఇల్లాండ్రును, తమ తమ వారిని బెంచి
సంతస, మమత, మత్సర మోహావేశంబులన్ ప్రకటింతురు
అత్యావశ్యము లివి ఈ లోక నాటకము రక్తిగట్ట – మంకుతిమ్మ!

609.
అనుభంబు లనేకములీ జీవనంబును పక్యమొనరించు; ఏ
పుణ్య ఫలమో, చేసిన పాపము క్షయమగు; పాప
క్షీణలకు పరితాపాగ్నిన్ బడి శుద్ధుడు గావలె జీవి,
ఎన్నగ, పడు ఇడుము లన్నియు మేలొనరించు – మంకుతిమ్మ!

610.
క్షుత్ మమతలివి జీవంపు కొలిమియు, సుత్తియు నౌను,
ఉత్తమ జీవనంబు నడుప, కల్మషంబులు పోద్రోల
చిత్త సంస్కారంబు వడయ సాధనములివి: సంసార
తత్వంబు దెలిసినవారికి – మంకుతిమ్మ!

(ఇంకా ఉంది)