తెలుగులో ‘మంకుతిమ్మన కగ్గ’-53

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

521.
వేద, లోకానుభవ స్వానుభవ జ్ఞానంబుల మూటినిన్
శోధించి సమన్వయించుము, ఈ రీతి
సాధించిన జ్ఞానమది ప్రమాణంబగు,
అది నీకగు దారి దీపము – మంకుతిమ్మ!

522.
కొంగ్రొత్త చిగురు, పాత వేరు యుండిననే తరువునకు
సొంపు; నవయుక్తికి, సనాతన తత్త్వ మొడగూడ,
ఇంపైన ఋషి వాక్యముల తోడ నూతన విజ్ఞానము మేళవించు, యా
పొందికయే జీవనంబునకు యశస్సు – మంకుతిమ్మ!

523.
వేద, పురాణ, శాస్త్ర లోక నీతులన్నియు
పాదచారికి రాతిరివేళ దారి చూపించు దివిటీలట్లు గాదె;
సౌధంబు నెక్కిన వానికి, నభము చేరినవానికి
వీధి దీపంబుతో పని యేమి – మంకుతిమ్మ!

524.
మత నీతి రీతుల కంటె విలువైనదీ జీవనము; వరద
యతి రభసంబైన తరి, దరుల నధిగమించదే నది;
అతి సూక్ష్మతరమీ ధర్మంపు విషయంబులు, వాటినిన్
హితంబుగ దెలిసి నడువుము – మంకుతిమ్మ!

525.
జగము వృద్ధి జెంద శాస్త్ర మదియు వృద్ధి జెందకుండునే
నిగమ సంతతియు వృద్ధి చెందుచునే యుండు
తగ జీవ సత్వమది వికసిత మగుచు నుండ, వే
వేగ బహురీతుల విజ్ఞానంబు విస్తరించు – మంకుతిమ్మ!

526.
ధర్మ పాదపమది చెఱవడదు మతతత్త్వంబుల;
జరా పీడితమై, ఎండి మోడై పోవునది మఠంబుల నీడలోన –
పరసత్త్వ మనెడి గుజ్జు జీవంపు వేర్ల నిల్చి పదిలంబుగ
పెరుగు నా ధర్మతరువు సొగసు గాను – మంకుతిమ్మ!

527.
జీవుల సృష్టి కారణం బది నిగూఢమై యున్ననేమి?
ధీ వికాసపు వెలుగులన్ వడిసి ముందుకు సాగుచు
కైవల్య పథంబునన్ వడి కొనసాగించవలె యాత్ర;
దివిటీ నీ బుద్ధి యొక్కటె – మంకుతిమ్మ!

528.
సులభతరములవి భక్తి, నమ్మక భజన వందనములు,
దుర్లభములవి తత్త్వ శోధనామతి కార్యంబులు,
సులభంబులవి జనులకు గిరి ప్రదిక్షణములు సేయ
అల తాపసి యొక్కడే దర్శించు నీశుని – మంకుతిమ్మ!

529.
వేరు గతి లేదు నరునకు దైవంబు దప్ప, నిజమిది;
నరుడు లేకున్న మరి యా దైంబును తలచు వారెవరు?
పురుషత్వమే సేతు వరయ మృగ దైవత్వమనుసంధింప,
మరి యా సేతువును ఛిద్రంబు సేయకు – మంకుతిమ్మ!

530.
పరిమిత మీ జగము, నీ దృష్టి, శ్రవణ మనోబలంపు
మేరకు; నీ సుఖదుఃఖంబులు నీ వశంబులరయ
సరియగు యున్నతి నీవు బడిసినన్, నీ అల్పత్వము
కరగిపోవు – మంకుతిమ్మ!

(ఇంకా ఉంది)