తెలుగులో ‘మంకుతిమ్మన కగ్గ’-51

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

501.
భక్తి మార్గమున గాక, యుక్తిని భగవంతు వడయ సాధ్యమే!
యుక్తి యున్నచోట భక్తికి తావెక్కడ? యుక్తులన్నియు
రిక్తమై, ప్రాణోత్కరణంబున దైవమును స్మరింపనేమి ఫలము?
రక్తగతమై యుండవలె భక్తి – మంకుతిమ్మ!

502.
సృష్టికర్త, యద్భుత శక్తి సమన్వితు తానొకడు లేడే, మా
ఇష్టార్థంబులు నెరవేర్చ! అసాధ్యంబె యాతనికి సమకూర్చ
ఇష్టంబుగ నాతని మెప్పించవలె గాని, యయ్యదియే
కష్టంబు మనకు – మంకుతిమ్మ!

503.
తరగని యపార భాండాగార మొకటున్నది: మన
మెఱుగని షావుకారొకండద్దాని యేలుచున్నాడరయ
వరంబు లీయ సిద్ధంబుగ నున్నాడతడు, మరి తెలియ
నేరము గద వాడి నెట్లు మెప్పింప – మంకుతిమ్మ!

504.
అంబరంబొక వేడి మేల్ముసుగున్ గప్పికొన, కుమ్మరి యావంబై
అంబుధులు కాగ, ఊపిరులు ధగ ధగ మండి యుక్కిరిబిక్కిరి చేయ,
అందెచట నుండియో గాలి వీచి వర్షించి తాపము శ
మింప జేయు రీతి, దైవకృపయు మనల గాచు మంకుతిమ్మ!

505.
దైవకృప యనగ నేమి? యది నిత్యనూతనంబైన యాతని
జీవకరుణ గాదె! జీవుల కర్మంబులు పక్వంబయినంత
వేవేగ దైవకృపయు తోడగు, జీవియు సద్విచారంబుల
వివేకశీలుడై మసలు వేళ – మంకుతిమ్మ!

506.
దొరకు విన్నవింతువు నీదు నూరారు కోర్కెల దీర్చుమని
సరియైన వాటినే నాతడు దీర్చిన, నాతని కాదందువే;
కోరిన కోర్కెల దీర్చలేదని భగవంతుని యునికియే లేదందువే!
కరుణ జూపవలెనని నిర్బంధ మేమున్నది, – మంకుతిమ్మ!

507.
దండన మొసగువేళ, క్షమింప న్యాయమూర్తిని వేడినంత
ముందటి నీ సత్ప్రవర్తన, ననుభవించిన శిక్షల లెక్కగట్టి,
తండ్రి తనయుని తప్పుల మన్నించి క్షమించినట్టు
మందుల మము క్షమింపడే గోవిందుడు – మంకుతిమ్మ!

508.
తక్కెడ చేతబట్టి, నొకట పాపరాశి, నింకొకట పుణ్యరాశిని
చక్కగ బెట్టి తూచ, పాపరాశి వైపు తూగగ, సరితూగగ
నెక్కుడు పుణ్యకార్యముల పెంచిన సమతౌల్యమగు
మిక్కిలి భక్తి పశ్చత్తాపముల – మంకుతిమ్మ!

509.
గతజన్మపు పుణ్యంబులకున్ తోడుగ, పశ్చాత్తాప
మది ఇంచుక తోడైన దారుణ కర్మ నియమంబులు
శిధిలంబు జేయు దైవము; యాతని కరుణ తోడ
పాతకంబులవి కొంత సడలు – మంకుతిమ్మ!

510.
నీదు సుఖదుఃఖంబులు, నీదు ఎదుగు దిగుడులు
నీదు కొఱకే ఏర్పడిన కార్యంబులని భావించబోకు
విధిహితంబు లయ్యవి, ఎందరెందరి జీవన పక్వంబులో! ని
య్యది ఋణంపు రహస్యము – మంకుతిమ్మ!

(ఇంకా ఉంది)