తెలుగులో ‘మంకుతిమ్మన కగ్గ’-50

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

491.
కడలి నీటిని మట్టికుండ యందున, దినకరుని
వేడిమి గవాక్షమందున నింపుకొని, ఐశ్వర్యవంతుడ నేనని
కడు సంబరపడు బడుగు మానిసి; అల్పసంతోషపు భక్తియె
కడు శక్తి నిచ్చు భక్తునకు – మంకుతిమ్మ!

492.
ఆచమన, అర్ఘ్య పూజానైవేద్యంబులు విహితంబులు;
ఎంచగానివి బహిరంతరైక్యంబుల నొకటిసేయు నియమంబులు,
అంతరంగ శక్తిని బహిరంగ శక్తితోడ మేళవింపజేయు తంత్రమిది,
ఇంతటి స్వభావంబులె సరిగాదె – మంకుతిమ్మ!

493.
బహుజనులు కైమోడ్చిన తీర్థంబుల, క్షేత్రంబుల
మహిమ లుండునే యను సంశయంబు వలదు; దేవదేవుని
విహిత స్థలమిదియెనని నిర్దేశించిన వారెవరు?
మహిమ యున్నచోటే యాతని స్థలము – మంకుతిమ్మ!

494.
హరిభజన సేయు వారిలో భయము నుండి పుట్టు భక్తి,
వరంబుల్ వేడు నెపంబున పుట్టు భక్తి యది ఎంతటిదో!
అరయ సంతోషానురాగంబుల నిజ భక్తి కల్గిన వారెందరో;
పరమాత్మ నాకర్షించు భక్తియె, భక్తి – మంకుతిమ్మ!

495.
అరుణోదయ కాంతి ప్రభల, గిరిశృంగోన్నతుల
ఆర్ణవంపు విస్తారంబుల తిలకించ కలుగు అద్భుతా
శ్చర్యంబుల కంటె, కలుగు మేలగు పరమాశ్చర్యంబు
పరమేష్ఠి రూపమును గనినంత – మంకుతిమ్మ!

496.
పరమేష్ఠి పురాతన సృష్టి యది వెరగు పుట్టించు మనలోన,
వెరగు పుట్టించి, మైమరపించి, మూకవిస్మితుల జేయు; అ
వ్వెరగు పరవశింప జేయు మన చిత్తంబుల; వరంబిది
పరమాత్మ నర్చింప – మంకుతిమ్మ!

497.
సుతను పెంచి, పెద్ద జేసి, ధన కనక వస్తు సమేతంబుగ
ఇతర గృహంబునకు ధారవోతువు, ప్రతిఫల మపేక్షింతువే,
ప్రతిఫల మది వేరేల, సుకృతమది, వేరొండు ప్రతిఫలమేల
హితకార్యమది, మనః పరివర్తనకు – మంకుతిమ్మ!

498.
ఘన సంగీత మది చెవుల విందుసేయ, కుక్షి నింపదు
పున్నమి చందురుని కాంతి కనులవిందు, గాదెల నింపదని,
వాణిజ్య సరుకుగ చూడబోకు ప్రకృతి సోయగముల
పొంగారు ఆత్మానందమే లాభము – మంకుతిమ్మ!

499.
దేవళంబులన్ జరుగు భజన పూజ ప్రసాదంబులవి, మన
జీవనంబునకున్ యలంకారంబులు; కావవి వ్యర్థంబులు,
జీవనోద్ధారకము లవి, అల్ప లౌకిక మనోభావముల నుండి
ఆవలకున్ గొనుపోవునవి – మంకుతిమ్మ!

500.
భోగించుటకు, సాధారణ మానవుడా భగవంతుడు? ఆ
భోగ వస్తువులు – పూలు, ముడుపులు, నగలు యాతనికేల?
భాగ్యవంతుడతడు, యాతని కింపైనదేదో, నద్దాని సమర్పింప
భాగ్యమది మనకు – మంకుతిమ్మ!

(ఇంకా ఉంది)