తెలుగులో ‘మంకుతిమ్మన కగ్గ’-47

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

461.
రామ భరతులు ఒకరనొకరు ఆలింగించి దుఃఖింపగ
ప్రేమాశ్రువులవి యుబికి సెలయేరై ప్రవహించి
సీమల దాటె; బాంధవ్య సౌందర్య మియ్యదియ
క్షేమతరంబులు జీవంబునకు – మంకుతిమ్మ!

462.
చిత్రీకరించె ప్రేమ మహిమన్ ఘనుడా వాల్మీకి
నీతి సూత్రంబుల గణనీయంబుగ దెల్పె వ్యాస మహర్షి
గీత యుపదేశించె విశ్వ జీవన రహస్యములన్
ఖ్యాతి కెక్కిన కావ్యములవి – మంకుతిమ్మ!

463.
సతీపతుల వోలె యన్యోన్యతన్ యుండవలె హృదిని
సద్విద్యయు బుద్ధియున్; నప్పుడ జీవన సౌందర్య దర్శనంబగు
బ్రతుకు రసవత్తరమై శ్రీమంతంబై క్షేమకరంబగు
అతిసుందరమగు – మంకుతిమ్మ!

464.
హృదయాంతరాళంబున గూఢంబుగనున్న జీవరస
మది స్రవించు కావ్యగాన శ్రవణంబున, వేదగానంబున
మది ద్రవించు, భువనంపు రహస్యంబు లన్నియున్
ఎదుట సాక్షాత్కరించు – మంకుతిమ్మ!

465.
మనసున సుప్తంబైయున్న కళాభిరుచులన్ తట్టి లేపి
నానావిధ భావంబులన్ వాటి నిగూఢ భావంబులన్
మానుగ దెలియపరిచి పరమేష్ఠి తత్త్వము
మనస్సున కెఱుక పరచు స్వరాగ నాట్యాభిరీతులు – మంకుతిమ్మ!

466.
రసములు రెండవి – వ్యసన హసిత కారకంబులు; ఈ
రసముల రెంటికిన్ మీరి మాటల కందని యద్భుత
రసము, విచిత్ర గంభీర రస మదియ మౌనము, పరమేష్ఠి
ప్రసాదించిన రసము – మంకుతిమ్మ!

467.
ఆత్మగుణంబులవి లెక్కకు మీరి వర్ణణాతీతము లైనను
ఆత్మ వెన్క గల అణువులవి మనోదేహ ఇంద్రియాది సూ
క్షాత్మ యనుభవంపు దర్పణంబున ప్రతిఫలంప యయ్యది
యత్యంత సుందరమై కన్పడు – మంకుతిమ్మ!

468.
మనోహర విగ్రహంబుల గాంచినంత భగవద్దర్శనమాయె
నని భావించి జనులు తమ తమ ఇష్ట భోగంబులన్
వాని కర్పింతురు సేవా భావంబులంకురింప
అనూహ్య యాత్మ స్వభావ మిది – మంకుతిమ్మ!

469.
సౌందర్యమది దేవరహస్యము, సృష్టి రహస్యంబు వోలె
సౌందర్యమే జీవితంపుటాశ; సౌందర్యానుభవ మది
యందందు భిన్నంబుగ నుండు మనోభావంబుల రీతులు
సౌందర్య దర్శనమది యొక తపస్సు – మంకుతిమ్మ!

470.
సౌందర్యసిద్ధికి తపస్సొక మార్గము; యజ్ఞమది, వివిధ రసపాక
మది; కవి సృష్టి జగమది, శిల్పకళా కృతియది, కావ్యముల
యధ్యయనమును, కళల పరిచయంబును పరికరంబు లా
విధకార్యమునకు, విచిత్ర భావంబిది – మంకుతిమ్మ!

(ఇంకా ఉంది)