తెలుగులో ‘మంకుతిమ్మన కగ్గ’-45

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

441.
అంతర్బాహ్య రంగంబులు, కావవి వేర్వేరు లోకముల్;
అంతరంగంబునన్ గల్గు సవ్వడులవి; బహిర్గతంబులగు
అంతర్గతంబైన బాహ్య సవ్వడులున్; పరస్పర ప్రక్రియ లవి
అంతరంగ పక్షంబులు – మంకుతిమ్మ!

442.
సొగసు వలదను నరప్రాణి యది యేడ యున్నదయ్య ఈ
జగంబున! బాల వృద్ధులు, పురాణ పురుషులున్ వదలరు; ఇ
జ్జగపు సొగసు కన్గొనని వారలందరు, అద్దంపు ముందు తమ
మొగంబుల దిద్దుకొనరే – మంకుతిమ్మ!

443.
తను సృజించిన రూపములవి సౌందర్యంబు ప్రకటింప
తాను లోభితనమును జూపునే కర్త; నెలల పాటు
అనునయంబుగ చెంచిన చెన్గులాబి వికసింప దానిన్
గని పరమానందము జెందని వార్గలరే – మంకుతిమ్మ!

444.
నింగి నేలను తాకెడు వంపు; రవికిరణ వర్ణరంజితపు రంగు,
నింగిన్వెలుగు చంద్రకాంతి నునుపు, తారల తళ్కుల బెడగు
అంగాంగ సౌందర్య విభవ సంపదానందమున్ పంచెడి
భంగిన్ గురువుగాదె ప్రకృతి – మంకుతిమ్మ!

445.
సౌందర్య దర్శనము క్షణికమైన; నిల్చిపోవునది శాశ్వతంబుగ
హృదయాంతరాళంబున నిల్చి సత్య శివ సుందర రూపములగు
హృదయము పరవశించి, యమృతమయమగు తలచినంత
యది యక్షయము – మంకుతిమ్మ!

446.
సుందరత యన్న యదేమి? జనుల సమ్మోహితుల జేయు
నందలి మర్మమదేమి? విశ్వచేతనానందపు యాకర్షణా
స్పందనమే సౌందర్య సృష్టికి మూల కారణంబు గాదె
సుందరత ఈశ్వర రూపంబుగాదె – మంకుతిమ్మ!

447.
తన సంపూర్ణ సందర్య సృష్టిన్ కన్పడనీక దృష్టిచుక్కల
నునిచె నా పరమేష్ఠి, శశికొక మసిచుక్క- గుట్టదేమో!
మనగ యది రక్షయో! సింగరపు బొట్టో, యవహేళంబొ
ఎన్నగ సృష్టికి దృష్టిచుక్క – మంకుతిమ్మ!

448.
పొంది యున్నది సృష్టి పరస్పర విరుర్థ గుణంయిల చేత
ద్వంద్వ యుక్తమై; స్థిర చలనములు, ఋజు వక్రంబులు,
సౌందర్యానంద వైవిధ్య వర్ణంబులు, శీఘ్ర ఆలస్య చలనంబులు
పొందుగ క్షార ఆమ్లములు పొందియున్నవి – మంకుతిమ్మ!

449.
సౌందర్యాలయ మది కాదు కేవలము ద్వంద్వము; కాననగు
ద్వంద్వంబుల అమరికల పొందు; ఉచిత పరిమాణంబులు
సంధానరీతులు, సహకారపు నీతి రీతులును
సౌందర్య వర్ధకములవి – మంకుతిమ్మ!

450.
సౌందర్యంబున, బాంధవ్యంబునను కాననగు
ద్వంద్వమే; కాననగు నయ్యది లోక సహవాసంబునన్
ముందు నీ యుభయంబుల దాటి సాగిన యగు నీకు
బంధ విమోచనము – మంకుతిమ్మ!

(ఇంకా ఉంది)