తెలుగులో ‘మంకుతిమ్మన కగ్గ’-36

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~

351.
అడగి యున్నాడెచటనో పరమాత్మడీ తనువు నందో
ఎడద యందో, మరి మన మెదడు నందో, కనుబొమల నడిమి యందో
ఏడ యడగి యున్నాడో యను తర్కమేల? నే నుడివెద వినుడు
వాడడగి యున్నాడు మన యుదరంబులోన – మంకుతిమ్మ!

352.
ఇడుము లెన్నో నిత్యము జానెడు పొట్టకై
ఊడిగము సేయ నొడలు కడు వడలి పోవు,
పిడికెడన్నమునకు, కట్టుబట్టకై నిత్య మంగలాపులు
కడు దైన్యము మన బదుకు లివి – మంకుతిమ్మ!

353.
ఏమైన నేమి? నీవెక్కడి కేగిన నేమి? మాన ప్రాణా
భిమానముల కాపాడగ జేయు యతన మదేదైన నేమి?
అమ్మానవాతీత శక్తియది మనల నడిపించు చుండు
అమ్మెయి దెలిసి చరియించుము – మంకుతిమ్మ!

354.
లోకపు వర్తన మెల్ల దైవలీలయే యనిన, ఈ లీలలన్
శోక, కష్ట, కార్పణ్యాది సంకటము లేల? ఇయ్యవి
లేకున్న నీరసంబగునా జీవనము – మూకకు కల్ద్రావించి, తేల్గరిపించు
ఏక పక్షపు లీలగాదె – మంకుతిమ్మ!

355.
గణించి, గుణించి, వెంపరలాడిన ఫలమదేమి? మన
గణనకు చిక్కని లెక్కయది యా విధి గణాంకములు
అణగి యుండి, నీ లెక్కలన్నింటిని తారుమారు జేయు
కనరాని యా విధి లీల – మంకుతిమ్మ!

356.
ఆశల వల విసిరి, తన వైపునకున్ నిను లాగి
వెస నీవు కొట్టుమిట్టాడుచు నోరు దెరవం
జూసి మైనిమిరి, మరి అడ్డకాల్వెట్టి, గుట్టుగ నవ్వుకొను
మోసంపు యాటగాడు యా విధి – మంకుతిమ్మ!

357.
విధాత నూనె గానుగలోన చిక్కిన నూగింజవు నీవు
ఆత డందరినిన్ గుజ్జు సేయు – వీడడెవ్వరిని
ఆతురత లేక, మరి ఏమరక నుపేక్ష సేయక
అందర శిక్షించు సమముగ – మంకుతిమ్మ!

358.
ఇది కాలేదది నిలచి పోయెనంచు
ఎదగుంది చిందులు వేయనేల
అధికార పట్టమును గట్టిన వారెవరు నీకు?
విధి నియమించినా మేస్త్రీగా నిన్ను – మంకుతిమ్మ!

359.
వంకరల సరిచేయ యతన మది
ఏ కాలము నుండియో సాగుచునే యున్నది; ఫలమేమి?
ఒకటి సరిజేయ నింకొకటి పుట్టుకొను
ఒక చోట పూడ్వ, నింకొక చోట క్రుంగు నీ ధర – మంకుతిమ్మ!

360.
బెదరకు, ఇంకేమి? మరేమి నా గతి యేమని
విధి వ్రాసిన వ్రాతల చెరుపగలవే నీ కరమున?
విధి లీలలు మన కవగతము లగునే! మది
నిది తెలిసి నెమ్మది వహించు – మంకుతిమ్మ!

(ఇంకా ఉంది)