తెలుగులో ‘మంకుతిమ్మన కగ్గ’-34

[కన్నడంలో శ్రీ డి.వి.జి. రచించిన ‘మంకుతిమ్మన కగ్గ’ను తెలుగులోకి అనువదించి అందిస్తున్నారు శ్రీ కల్లూరు జానకిరామరావు.]

~
331.
సత్యశివసుందర సచ్చిదానంపు చిత్రంబులోన
నిత్యంబు కాననగు విచిత్ర వర్ణంపు జీవచిత్రణము
నిత్యంబు నీ వద్దాని విస్మరింపక తలంతు వేని
యత్యంత తన్మయుడ వయ్యెదవు – మంకుతిమ్మ!

332.
సత్యమన్నదది యేడ? నీ యంతరంగంబు నందునో, లేక
నిత్యము నీ వనుభవించు బాహ్య చిత్రణమందునో?
యుక్తి చేత రెంటిని సమన్వయించి సరిజూచిన
తత్త్వ దర్శనమది కలుగు – మంకుతిమ్మ!

333.
సత్యానుభవ మందరికి నొక్క రీతిగా నుండ సాధ్యమే?
ఎత్తయిన గిరి తలమున నొకడు, గుహాంతరమున నొకడు
ఎత్తరి చూడగలడు లోయలనుంచి యొకడు, మహో
న్నత యంబర దృశ్యముల – మంకుతిమ్మ!

334.
ఒకరొకరి యంతరంగ గుణము లొక్కొక రీతి
ఒక్కొక్కరు కొక్కొక్క రీతి భారంబులు మోయ; జడకోలాటలో
ఒక్కక్కరు తమ పగ్గంబుల పట్టి గంతులేయ; వారి నాడించు
డొక్కరుండా విధి గాదె – మంకుతిమ్మ!

335.
ఫల మదేది దక్కు? ఈ సంసార వనంబున, చూతమో, నింబ
ఫలమో? యయ్యది దక్కు జన్మంపు ఋణము వలన, కర్మ
ఫలంబు వలన – రెంటినీ మేళవించి, భావ జ్వరంబు పోద్రోల
గ్రోలవలె యా రసంబును – మంకుతిమ్మ!

336.
ఈ నీ జీవనంపు టెదుగుదలకు కారకులెందరో
ఎన్నగ, నీ వొకండవె కాదు, అన్య శక్తులు తోడయినవి,
అన్నం బిడిన వారు, విద్య గఱపిన వారు, తోడ బుట్టినవారు
మిన్నగ చేయూత నిడిరి – మంకుతిమ్మ!

337.
అనిల గుణంబు, భూమి, సస్య ధాన్య గుణంబులు, మన
తను గుణంబుల, మనోగణంబుల ప్రభావితంబు జేయు
జనపదంబు వారల తను మనోగుణంబులును నంతెయె
మనుజుడొకడు, సమూహము శత శతంబు – మంకుతిమ్మ!

338.
నేనొంటరి నీ జగానయని తలంచ నేల? నీ
జన్మదాతలు, పూర్వీకులు, బంధు మిత్రులు, శత్రువులు దాగియున్నారు
ఎన్నో శత శతంబుల యడగియున్నారు నీ యంతరాళంబులోన
గుణంబులవి వారివి గలసియున్నవి నీలోన – మంకుతిమ్మ!

339.
నీ తాత, ముత్తాత, వారి తాతలెల్లరూ నెలసి యున్నారు
నీ తనువులోన, మరి జనించనున్నారు ముందు ముందు
నీ తనయుడు, వాని తనయుడవ్వాని తనయుడు
నీ తామర తంపరాన్వయము లోన – మంకతిమ్మ!

340.
తెలియని వ్రాతలవేవో గలవు నీ నొసట, చదివి
తెలియ జెప్పు వారెవరు? రహస్యమవి: తెలియరావు
తెలిసిన నీ వ్యవహారంబులె నిర్భరించు నాక నరకంబుల
తెలియుము నీ యాత్మ – మంకుతిమ్మ!

(ఇంకా ఉంది)