[శ్రీ రాచకుళ్ల విశ్వరూప చారి రచించిన ‘తందనాలు’ అనే చిన్న కవితలని పాఠకులకు అందిస్తున్నాము.]
291
పరాచికాలు ఎక్కువైతే
అరాచకాలు ప్రబలే ముప్పు ఉండవచ్చు
మరల మరల జాగ్రత్తగా ఆలోచించి
పరాచికాలు చేయవలసి ఉంటుంది
292
పయనించే ఓ బాటసారి, ఒంటరినని
భయమేల నీకు, దారి వెంట
కోయ దొరలు కాచుకుంటారు నిన్ను
రయమున ముందుకు సాగి గమ్యము చేరు
293
చీకటి వెలుగుల దీపావళి ప్రారంభం
రక రకాల మందు గుండు సామాగ్రి
చక చకా కాల్చి వేసిరి
పక పకా నవ్వులతో ముగిసె దీపావళి
294
బయట అంతా వెన్నెల చల్లగా
కాయకష్టములన్నీ మర్చిపోయి
శయనించక మనసు చల్లబడుటకు
రయమున బైటకు వెళ్లి సేద తీర్చుకో
295
సుడి గాలులకు (టోర్నడోలకు) యెంతో కోపం
వడి వడిగా సుళ్ళు తిరిగి భీభత్సం చేస్తవి
నడ్డి విరిచేస్తవి అన్నిటిని
చడి చప్పుడు కాకుండా పారిపోతవి
296
విశాలమైన ఆకాశంలో విహరించే పక్షుల్లాగ
వశంగాని మనసు అంతే
లేశమంతైనా అదుపులో ఉండదు
శశి అంచుల వరకు వెళ్లగలదు గదా
297
తొలకరి జల్లులతో భూమి పులకించె
మొలకెత్తినవి వెదజల్లిన విత్తనం
కాలానుగుణంగా ఫలాల్నిచ్చాయి
ఫలాల్ని అనుభవించారు జనం
298
వ్యక్తిగత ఆస్తులు లేకుంటే
వ్యక్తులందరూ సమానమేగా సమాజంలో
బిక్షకుల ప్రసక్తే ఉద్భవించదు
కక్షలు కార్పణ్యాలు వుండవు కొంతమేర
299
కపట వేషదారులు చెప్పే మాటలు
అపశకునాలు నమ్ముతారు జనం
అపశకునాలంటే ప్రకృతిలోవేగా
జప తపాలు చేస్తారు నివృత్తికి
300
సూరీడు అంటే కోపం
పరిశీలనగా చూస్తాడని
నేరాలు ఘోరాలు చేసినా చూస్తూనే ఉంటాడు
తరచి చూస్తే ఏమి చేయడని తేలింది, భయమేల?
శ్రీ రాచకుళ్ల విశ్వరూప చారి (ఆర్.వి. చారి) గారిది తెనాలి. ప్రసుతం హైద్రాబాదులో సెటిల్ అయినారు.
చారి గారు ఈ.ఎస్.ఐ. కార్పొరేషన్‌లో సూపరింటెండెంట్‌గా పనిచేసి రిటైర్ అయినారు. వారి మేనమామ గారు కీ.శే. పూసపాటి నాగేశ్వర రావు. అయన వీరబ్రహ్మేంద్ర చరిత్ర పద్య కావ్యం రచించి యున్నారు. కాగా అయన అష్టావధాని కూడా. వారి స్వగ్రామము రావెల్, గుంటూరు జిల్లా. చారి గారికి తమ మామయ్య మాదిరి పద్యాలు వ్రాయాలని కోరిక. కానీ ఛందస్సు తెలిసుండాలిగా. అందుచే వ్రాయలేక పోయారు.
కానీ నానీలు వ్రాయుటకు వారి కుమార్తె శ్రీమతి ప్రత్తిపాటి సుభాషిణి కారణం. ఆమెది బాపట్ల, గుంటూరు జిల్లా. టీచర్‌గా పని చేస్తున్నారు. వారు ఈ మధ్యనే ఒకానొక సంధర్బములో హైదరాబాద్ వొచ్చి తాను రచించిన ‘నిశ్శబ్ద పర్జన్యాలు’ చారిగారికి ఇచ్చారు. అవి చాలా బాగున్నాయి. అవి చదివిన తరువాత, ఆ స్పూర్తితో, నానీలు వ్రాయాలని కోరికతో చారిగారు నానీలు వ్రాసారు. పద్యాలు వ్రాయాలనే వారి కోరిక ఈ విధంగా తీరుచున్నది.