[డా. సి. ఉమా ప్రసాద్ గారి ‘సంకెళ్ళు తెంచుకో’ అనే కవితని అందిస్తున్నాము.]
ఇది లేనిదే – మనిషికి గడువదు
నిరంతరం – వెంటపెట్టుకొని
తిరిగితే కానీ – మనిషి
జీవించలేనిది – ప్రాణం కన్న మిన్న
మనుషులను – కలవలేకపోయినా
దృశ్యరూపంలో – చూస్తూ
మాట్లాడే – చిత్ర – కొత్త- పరికరం
కనికొట్టిన మనిషి – వాస్తవ జీవితానికి
దూరం అవుతున్నా గ్రహించలేని స్థితికి
తీసుకెళ్ళే ఆధునిక పరికరం
తెలియని విషయాలు తెలుసుకొనే
పరిజ్ఞానం కన్నా,
నేరాలు ఎలా చేయవచ్చో,
సులువు మార్గాలను – సూచించే పరికరం
ఇది చేతిన లేనిదే ఉండలేని పరిస్థితి
అరచేతిలో ఒదిగిపోయే యంత్రమా
అరక్షణం కూడా తీరిక లేకుండా చేసే సాధనమా
మనుషులను బంధించే బంగారు పంజరమా
అనుబంధాలను దూరం చేసే యమపాశమా
చరవాణివా, శిరోభారానివా
చూపులను బంధించీ – మనస్సును లగ్నం చేస్తే
జీవితంలో సగ బాగం దానితో
సహచర్యం అలవాటుయైన మనిషి –
మానసిక స్థితి ఎంత చిత్ర విచిత్రమో
అంతర్జాలం అంటూ గాలం వేస్తావు
అంతరంగిక విషయాలు బట్టబయలు చేస్తావు
పలకరింపులు కరువాయె
నువ్వే లోకం – అన్నట్లుగా మానవుల ప్రవర్తన
చరవాణి సంకెళ్ళకు మనిషి శాశ్వత ఖైదీ
పాల బుగ్గల పసికూనల నుండి –
వృద్ధుల వరకు చరవాణికి – బానిస అయినవాడు
గ్యాంబ్లింగ్, ఆటలకు అలవాటుపడి –
వ్యసనపరులై – ధనాన్ని పోగొట్టుకొన్నవారు కొందరైతే
చూడరాని దృశ్యాలను వీక్షిస్తు –
మృగ తృష్ణ నింపుకొని – మానభంగాలు
చేసేవారు కొందరైతే –
దోపిడి దొంగలుగా మారి నేరాలు
చేయటంలో ఆరితేరిన వారు మరికొందరు
సాధనము – పరికరము ఉపయుక్తం కావాలి గాని
మనిషి జీవితాన్నే నష్టపరిచేది
సాధనంగా – మార్చుకోకూడదు
ఆలుమగల మధ్య కీచులాటకు
దారి తీసే సాధనము –
రహస్య చిత్రాల చిత్రీకరణ –
భార్యాభర్తలకు అనుమానమునకు తావు ఇచ్చే సాధనం
ఎల్లలు లేని చరవాణి – ఊసులు చెప్పే
సమాచారవాణి
సరిగమలు పలికే – రాగాల వాణి
దూరాన్ని దగ్గర చేసిన తరంగ వాణి
వినోదర్పణ వాణి – మాయ చేసే యంత్రవాణి
చేతిలో ఇమిడి మనసులో ఒదిగే
భావాలు నింపుతుంది – ప్రభావిత వాణి
తానే ప్రపంచమై ఆడించే క్రీడావాణి
అగాధంలోకి నెట్టే అంతర్జాల వాణి
మానవ సౌకర్యం కోసం సృష్టిస్తే
మానవులనే శాసించే నియంత వాణి
కృత్రిమ వాణి – మేధ వాణి
కలల వాణి – విష సంస్కతి నాడే
అందాల వాణి – అజ్ఞాత వాసి దూరవాణి
ఎన్నని చెప్పను – దీని లీలలు
విశ్వ చరవాణిని – విజ్ఞానం కోసం వాడు
మనిషి విలువ తెలుసుకో
చరవాణి చెరలో – చిక్కకు
చరవాణికి బానిసవ్వకు –
సంకెళ్ళు తెంచుకొని –
వాస్తవంలో – జీవించు.
డా. సి. ఉమా ప్రసాద్ గారు పుట్టింది, పెరిగింది రాజమండ్రి. వారి స్థిర నివాసం హైదరాబాద్. తల్లి తండ్రులు – కీ.శే: M.V. రంగా చార్యులు, M. ప్రమీలా దేవి. అత్తామామలు: కీ. శే.డా. సి. ఆనందా రామం, శ్రీ రామా చార్యులు.
భర్త: సి. బదరీ ప్రసాద్(రిటైర్డ్ సీనియర్ మేనేజర్ ఆంధ్రా బ్యాంక్). ఉమా ప్రసాద్ ఉపాధ్యాయురాలిగా (M A ఎకనామిక్స్ ఆంధ్రా యూనివర్సిటీ) పని చేశారు. వారి ప్రవృత్తి సంగీతాభిలాష (పిహెచ్‌డి ఇన్ మ్యూజిక్ పద్మావతి మహిళా యూనివర్సిటీ).
భావ కవితలు, స్వీయ సంగీత రచన, రాగల కూర్పు, పుస్తక పఠనం వారి అలవాట్లు. వివిధ సంగీత పత్రికలలో- సంగీత రచన వ్యాసాలు మరియు కవిత్వ ప్రచురణాలు, లక్ష గళార్చన ప్రశంసా పత్రం, తెలుగు బుక్స్ ఆఫ్ రికార్డ్స్ లో కవిత్వ ప్రచురణ పురస్కారాలు.
గురువులు: విజయవాడ సంగీత కళాశాలలోని అధ్యాపకులైన అందరి గురువులు, శ్రీమతి రేవతి రత్న స్వామి గారు మొట్టమొదటి గురువు- తదనంతరం పెమ్మరాజు సూర్యారావు గారు, MV రమణ మూర్తిగారు, కిట్టప్పగారు, అన్నవరపు రామస్వామి గారు, డా. నూకల చిన సత్యనారాయణ గారు. తదితరుల ఆశీస్సులతో సంగీతంలో ఓనమాలు దిద్దుకొని సంగీతంలో పిహెచ్‌డి పట్టా పొందారు. “మహా సముద్రంలో ఒక నీటి బిందువు నా సంగీత -కృషి” అంటారు.
మధుర గీతికలు (రెండు భాగాలు), రస గాన లహరి, స్వర అమృతవాహిని, హనుమ కీర్తనల సమాహరం, చైతన్య భావ కవితామాలికలు, రాగరంజని (రెండు భాగాలు), భావ-రాగ-లహరి (రెండు భాగాలు), కవితామృతఝరి అక్షర తరంగిణి, అపురూప-అపూర్వ-రాగలహరి వంటి పుస్తకాలను వెలువరించారు.