ప్రకృతి ఎంతో రమణీయం
ప్రపంచమింకా సుందరం
ప్రేమించడమే నేర్చుకో
బాధను నువ్వు ఓర్చుకో ॥ప్రకృతి॥
నలుగురితో కలవడం, కలివిడిగా తిరగడం
ఉన్నదికాస్త పంచడం, తృప్తిని నువ్వు పొందడం
నరనరాన జీర్ణించుకో
నరునిగా జేజేలందుకో ॥ప్రకృతి॥
.
మంచినే చూడటం, చెడునే విడనాడటం
చిరునవ్వుని చిందించడం, చిరుబురులాడుట మానడం
చెలిమినే పెంచడం, కలిమిగా భావించడం
విధిగా నువ్వు మార్చుకో, నిధిగా దాన్ని చూసుకో ॥ప్రకృతి॥
ఈర్ష్యను దూరం చేయడం, ప్రతిభకు పట్టం కట్టడం
సానుభూతి చూపడం, సాయం కాస్త చేయడం
మనిషిగా నువ్వు మసలుకో
మనీషివై ఇక వెలిగిపో! ॥ప్రకృతి॥
సాదనాల వేంకట స్వామి నాయుడు ప్రముఖ సినీ గేయ కవి, నటుడు, గాయకుడు, పత్రికా సంపాదకుడు. ఉత్తమ ఉపాధ్యాయుడు, వ్యాఖ్యాత, డబ్బింగ్ కళాకారుడు.
- ఆంధ్రప్రదేశ్ ప్రభుత్వం నుంచి 2011లో బంగారు ‘నంది’ని బహుమతిగా అందుకున్నారు.
- భారత ప్రభుత్వ పర్యావరణ అటవీ మంత్రిత్వశాఖ నుంచి వచన కవితకు జాతీయస్థాయి బహుమతిని 1994లో స్వీకరించారు.
- తెలుగు విశ్వవిద్యాలయం నుంచి ‘కృష్ణాపత్రిక సాహిత్య సేవ’ లఘు సిద్ధాంత వ్యాసానికి బంగారు పతకాన్ని 1991లో అందుకున్నారు.
- ఆంధ్రప్రదేశ్ ప్రభుత్వం నుంచి 2011లో ఉత్తమ ఉపాధ్యాయ పురస్కారం పొందారు.
- 1989లో జీసీస్ క్లబ్ ‘అవుట్‌స్టాండింగ్ యంగ్ పర్సన్ అవార్డు’, 1990లో ‘రోటరీ లిటరరీ అవార్డు’ లను పొందారు.
- దృశ్య కవితా సంపుటికి రెండు రాష్ట్రస్థాయి పురస్కారాలను అందుకున్నారు.
- ఆకాశవాణి ‘సుగమ్ సంగీత్’ జాతీయ కార్యక్రమంలో రెండు సార్లు సాదనాల రాసిన లలిత గీతాలు దేశంలోని అన్ని ఆకాశవాణి కేంద్రాల నుంచి ప్రసారమయ్యాయి.
- దక్షిణమధ్య రైల్వే నుంచి ఉత్తమ ఉద్యోగిగా సీనియర్ డి.పి.వో, డి.ఆర్.ఎం, సి.పి.వోల నుంచి పలుమార్లు అవార్డులను అందుకున్నారు.
- నాయుడు బావ పాటలు ‘గేయసంపుటి’ ‘పూలాచావ్లా’ పేరుతో ఒరియాలో సంపుటిగా ప్రచురింతమయ్యింది. ఆంగ్లభాషలోకి అనువదింపబడింది.
- తెలుగులో నాలుగు గ్రంథాలను ప్రచురించారు.
- రేడియో, టీ.వి, సినిమా, ఆడియో కేసట్లకు అనేక గీతాలు రాశారు.