పాట

పాట

(1)
అనుభూతుల తోరణం, ఆనంద తీరాలకు డోల
తేనెల ఊట, తియ్యదనాల మూట
తీపి గురుతుల గని, పుడమినుండి లేచిన మొలక
నిత్య నూతనం, అజరామరం – అదే పాట
(2)
మృదుమధుర మంజుల పదాలతో గిలిగింతలు
నవరస భరితమైన అలరింపులు
జోల పాడి నిదుర పుచ్చే కన్న తల్లి
మొద్దు నిద్దుర తట్టి లేపి వెలుగునిచ్చే దీపం పాట
(3)
నైరాశ్యాన్ని పారద్రోలే ఆశా కిరణం
జగతిని జాగృత పరిచే వజ్రాయుధం
యువతను కార్యోన్ముఖులను చేసే నగారా
ప్రేయసీ ప్రియులకు ఆలంబనం పాట
(4)
లాలి పాటలతో శైశవం
ఉత్తేజాన్నిచ్చే సందేశాలతో కౌమార్యం
మరులొలికించే, గిలిగింతల పుంతతో యవ్వనం
బంధాల బంధుత్వం, వేదాంతపు రంగరింపులతో వృద్దాప్యం
(5)
పృథివి, ఆకాశం, వాయువు, నిప్పు, నీరు, జీవనాధారాలు
మానవ మేధను సేద తీర్చే దివ్యఔషధం పాట
సమస్త సృష్టినీ రసరాగ రంజితం చేసేది పాట
పాటకు నీరాజనం, పాట కర్తలకు సుమాంజలి

జొన్నలగడ్డ శేషమ్మ

1

Shyama Krishna Tenneti
November 1, 2022 at 2:22 pm
పాట మీద పాట, చక్కని పదాల కూర్పు, బాగుంది!
శ్యామకృష్ణ తెన్నేటి, హైదరాబాదు

Reply
2

Rajendra
November 1, 2022 at 3:46 pm
బాగా ఉంది మీ కవిత మేడం !

Reply
3

Kalyani.R
November 1, 2022 at 4:14 pm
రాగం, తానం, పల్లవి తో భావ యుక్తం గా సాగే పాటకు మన తో పాటు ప్రకృతి కూడా పారవశ్యం చెందుతున్న..ఆ పాటను కవితా వస్తువుల తీసుకొని..అలతి.. అలతి పదాల తో మనసుకు హత్తు కొనే ల చాలా చక్కగా ఉంది శేషమ్మ గారి కవిత. ధన్యవాదాలు.

Reply