ఆరెంజ్ వింటర్

రాత్రంతా చలిలో వణికిపోయిన మహావృక్షాలన్నీ..

సిగ్గువిడిచిన గోపికల్లా చేతులెత్తేశాయి

గొప్పగా చంకలెగరేసిన పిట్టలన్నీ..

గర్వమణిగిన గండభేరుండాల్లా కువకువమంటున్నాయి

ఆలస్యానికి ఆగ్రహించిన పూలేవో..

ముఖం ముడుచుకుని మూతి మూడు వంకర్లు తిప్పుకున్నాయి

తొలి కిరణ సంయోగాన్ని అనుభవించిన కొలనేదో..

చాల్లే సంబరమంటూ తరంగాలను వెనక్కునెడుతోంది

పొగరెక్కిన పరిమళపు కురులను ముడివేసిన ప్రకృతి..

చెంచలించే చనుదోయిని దాచుకోను తాపత్రయపడుతోంది

మాటు వేసిన శీతగాలి కోత ఏదో..

వేకువ దెబ్బకి నాగ్‌పూర్ దాటుతోంది

• దేశరాజు

దేశరాజు

దేశరాజు చక్కని కవి. సంక్లిష్టమయిన భావాలను సరళంగా లలితంగా కవితల్లో ప్రదర్శిస్తారు. జర్నలిజం వృత్తి అయినా కవితలల్లటం ప్రవృత్తి.