లయమైన భావాలన్నీ.. మదిలో హొయలై పోతుంటే…
నిరీక్షణ క్షణాలన్నీ…. ఇలలో అపురూపమై
నీకై… వేచిచూస్తూ…
నా హృదయాంతరాళలో శీతల ఆవాస మొకటి నిర్మించా,
నీ ఎదలోతులలోకు వెళ్లి చూడు, ఆరని చితాగ్ని కనిపిస్తుంది.
స్పృశించిన అనుభూతుల సమ్మోహనాలన్నీ.. నీ చేతుల్లోకి వాలిపోతుంటే…
వాలిపోయిన సమ్మోహనాలన్నీ… అనుభవాల
స్పర్శకై అరాటపడుతుంటే..
నీ అరని చితాగ్నితో.. నన్ను నీలో అణువణువు
కలిపేసుకోవా….!
చిత్రమైన ఆత్రమేదో… నిముషమైనా నన్ను నిలువనీకుంది…
మరెన్నటికీ నిన్ను విడిపోని వీడిపోని అందమైన అనుబంధమవ్వాలని..
నిలువెత్తు ఆరాధనకు రూపమై నేను నీకై నిలవాలని ఉంది..
నడిరాత్రి నిశీధిలో తారకలా మెరుస్తావో…
చంద్రునిలా..వెన్నెలే పంచుతావో…
గ్రీష్మంలా వెచ్చగా నన్ను చుట్టుకుంటావో..
హేమంత తుషారమై నన్ను స్నిగ్ధను చేస్తావో…
నీ చెయ్యి పట్టుకొని ఏడడుగులు వేయాలనుంది..
నిండు పున్నమి సాక్షిగా..!
క్షణమైనా నిలునీయని నీ ప్రేమకై ఏమిచ్చి రుణం
తీర్చుకోను…
మెత్తని పెదవులతో వెచ్చని స్వచ్ఛమైన ముద్దుతో..
నిన్ను ముంచెయ్యనా…
కల్మషంలేని నా కంటికాంతులలో..నిన్ను నిలువెత్తుగా నింపుకొనా…
నా పెదవి వంపులో…చిరునవ్వుగా నిన్ను
అందంగా పొదుపుకోనా..
నీకై జన్మ జన్మలకై వేచివుంటూ నా కన్నులతో
నిత్యం నీరాజనాలు పట్టనా…!
చిట్టె మాధవి వృత్తి రీత్యా ప్రభుత్వ ఫార్మసీస్ట్. కవితలు.. కథలు.. సమీక్షలు వ్రాయడం, చిత్రలేఖనం.. వీరి ప్రవృత్తి.
3 Comments
డా.కె.ఎల్.వి.ప్రసాద్
మాధవి గారూ
మీ కవితాత్మక ప్రేమలేఖ
బాగుంది.
మీకు అభినందనలు.
——డా.కె.ఎల్.వి.ప్రసాద్
హనంకొండ
చిట్టె మాధవి
హృదయపూర్వక ధన్యవాదాలు సర్
రాము కోలా
ప్రేమకు అక్షర భావాలు పలికే నిరాజనాలు..ఇవేనేమో..
************
లయమైన భావాలన్నీ.. మదిలో హొయలై పోతుంటే…
నిరీక్షణ క్షణాలన్నీ….ఇలలో అపురూపమై
నీకై…వేచిచూస్తూ…
ఎంతటి ప్రేమను ఆస్వాదిస్తూ పలికే భావ పులకింత ఇది.అక్షరం తనని తాను మలచుకుంటూ..భావ అమృత సాగరంలో మేమేకమైనట్లుగా.
నిలువెత్తు ఆరాధనకు రూపమై నేను నీకై నిలవాలని ఉంది..
ఆరాధనకు పరాకాష్టగా మలచిన వాక్య సోయగం.తన ఆరాధనకు తానే నిలువెత్తు సాక్ష్యం అని ఎద అంతరాలంలోని అనురాగంను బయటకు చూపించే ప్రయత్నం.
కల్మషంలేని నా కంటికాంతులలో..నిన్ను నింపుకొనా…
నీకై జన్మ జన్మలకై ,నా కన్నులతో
నిత్యం నీరాజనాలు పట్టనా….
ఎంతగా కోరుకుంటుందో మనసు ,ప్రేమ సాన్నిహిత్యాన్ని.
చూపులో కూడా కల్మషం లేకుండా నట.
ఏమా ప్రేమ పరవశం
గోదావరి పరవళ్ళు, కృష్ణమ్మ పరుగులు, ప్రకృతి వీచే సంధ్యా సమయ పవనాలు .మయూరి నడకలు అక్షరంలో నింపుకున్న కవనం ఇదే కదా.
.సృష్టిలోని ప్రేమను అణువణువు తనలోనే నింపుకున్న ఎదలోని
తన్మయత్వం..కూడా ఇదేనేమో…
సోదరి కవితకు చిరు స్పందన.
రాము కోలా.. ఖమ్మం.