61
నామీద నేనే నవ్వుకుంటే
నా బరువు నాకే తేలికవుతుంది
62
శక్తిహీనులు ఆగ్రహంతో
శక్తిమంతుల్లా కనిపించడానికి ప్రయత్నిస్తారు గనుక
వారు ఘోరంగా విఫలమవుతారు
63
స్వర్గం గాలికి
ప్రాణాలకు తెగించి బురదని గట్టిగా పట్టుకుంటుంది లంగరు
సంకెళ్ల మీద దాని రొమ్ములు బాదుకుంటుంది నా పడవ
64
మరణం స్ఫూర్తి ఏకం
జీవితం స్ఫూర్తి అనేకం
దేవుడు మరణిస్తే మతం ఏకమవుతుంది
65
ఆకాశపు నీలం, భూమి పచ్చదనం మీద ఆశపడుతుంది
వాటి మధ్య గాలి అయ్యో అని నిట్టూరుస్తుంది
66
దినం బాధ దాని ప్రకాశంతో కప్పబడి
రాత్రి నక్షత్రాల మధ్య మండుతుంది
67
దాని ఏకాంతాన్ని ఎన్నడూ తాకలేని
విస్మయ నిశ్శబ్దంలో
నక్షత్రాలు, రాత్రి కన్య చుట్టూ గుమికూడతాయి
68
మేఘం తన బంగారాన్నంతా
వీడ్కోల సూర్యునికిచ్చేసి
ఉదయిస్తున్న చంద్రునికి
పాలిపోయిన నవ్వుతో అభివాదం చేస్తుంది
69
ఎవరైతే మంచి చేస్తారో వారు గుడి ద్వారం దగ్గర కొస్తారు
ఎవరైతే ప్రేమిస్తారో వారు గర్భగుడిని చేరుకుంటారు
70
తుమ్మెద కాని పురుగు మీద
జాలిపడుతుంది పుష్పం
దాని ప్రేమ ఒక అపరాధం, ఒక భారం
71
తీవ్రవాద విజయాల శిధిలాలతో
వాళ్ల బొమ్మలకు ఇల్లు కడతారు పిల్లలు
72
పగలంతా దాని అలక్ష్యాన్ని సహిస్తూ
రాత్రి జ్వాల చుంబనం కోసం
దీపం నిరీక్షిస్తుంది
73
ధూళిలో బద్దకంగా పడున్నాయి ఈకలు
తృప్తిలో వాటి ఆకాశాన్ని మరచిపోయి
74
ఏకాకి అయిన పుష్పం
అసంఖ్యాక ముళ్లను చూసి
అసూయపడాల్సింది లేదు
75
శ్రేయోభిలాషుల నిరాసక్త నిరంకుశత్వంతో
ప్రపంచం చాలా నష్టపోతుంది
(మళ్ళీ వచ్చే వారం)
శ్రీ యల్లపు ముకుంద రామారావు 9 నవంబరు 1944 నాడు పశ్చిమ బెంగాల్ ఖరగ్‌పూర్‌లో జన్మించారు. విద్యార్హతలు M.Sc, D.I.I.T, P.G.D.C.S.
కవిగా, అనువాద కవిగా, రచయితగా ప్రసిద్ధులైన ముకుంద రామారావు – వలసపోయిన మందహాసం (1995), మరో మజిలీకి ముందు (2000), ఎవరున్నా లేకున్నా (2004), నాకు తెలియని నేనెవరో (2008), నిశ్శబ్దం నీడల్లో (2009), విడనిముడి (అన్ని సంకలనాల్లోని ఆత్మీయ అనుబంధాల కవిత్వం) – (2013), ఆకాశయానం (2014), రాత్రి నదిలో ఒంటరిగా (2017) అనే స్వీయ కవితా సంపుటాలను వెలువరించారు.
అదే ఆకాశం – అనేక దేశాల అనువాద కవిత్వం (2010), శతాబ్దాల సూఫీ కవిత్వం (2011), 1901 నుండి నోబెల్ కవిత్వం (కవుల కవిత్వ – జీవిత విశేషాలు) – పాలపిట్ట వ్యాసాలు – (2013), 1901 నుండి సాహిత్యంలో నోబెల్ మహిళలు – సోపతి వ్యాసాలు – (2015), అదే గాలి (ప్రపంచ దేశాల కవిత్వం – నేపధ్యం) – మిసిమి వ్యాసాలు – (2016), భరతవర్షం – సీతాకాంత మహాపాత్ర ఒరియా కావ్యానికి తెలుగు అనువాదం. – (2017), చర్యాపదాలు (అనేక భాషల ప్రధమ కావ్యం – పదవ శతాబ్దపు మహాయాన బౌద్ధుల నిర్వాణ గీతాలు) – (2019), అదే నేల (భారతీయ కవిత్వం – నేపధ్యం) – (2019), అదే కాంతి (మధ్యయుగంలో భక్తి కవిత్వం, సామాజిక నేపథ్యం) – (2022) – వీరి స్వీయ అనువాద రచనలు.
వీరి రచనలు అనేకం – పలు భారతీయ భాషలలోకి, ఆంగ్లంలోకి అనువాదమయ్యాయి.
దేశదేశాల కప్పల కథలు – (2010), నిన్ను నువ్వు చూసుకునే అద్దం (సూఫీ, జెన్ ఇతర నీతి కథలు) – (2015), వ్యక్తిత్వ వికాసం – ఆనంద మార్గాలు (వ్యాసాలు) – (2018), అనువాదం – అనుభవాలు (మహాంద్ర భారతి ప్రచురణ) – (2019) – వీరి కథలు, ఇతర రచనలు.
తెలుగు విశ్వవిద్యాలయం కీర్తి పురస్కారం, తాపీ ధర్మారావు పురస్కారం వంటి ఉత్కృష్ట పురస్కారాలెన్నింటినో పొందారు.