[శ్రీమతి గీతాంజలి రచించిన ‘మేఘం పాడిన పాట!’ అనే కవితను పాఠకులకు అందిస్తున్నాము.]
ఎవరో మేఘ మల్హర్ రాగం పాడుతున్నట్లున్నారు..
అక్కడ ఖాళీ అయిన మబ్బుల్లో.,
తమ గుండెల్లోని.. వియోగాన్ని,
కళ్ళల్లోని కన్నీటిని.. వంపుతున్నట్లున్నారు.
ఇక్కడ నా ఆకాశంలో
కొత్త మేఘాలు.. తాజా కన్నీళ్లు!
***
ఆమె వెళ్లిపోయాక
నగరం ఖాళీ అయిపోయింది
నా హృదయంలా!
***
సమస్తమూ ఆమెకి ఇచ్చేసిన
సంగతి మరిచిపోయి
నాలో నేనే ఏదో వెతుకుతూ ఉంటాను.
***
నువ్వు నాకెన్నటికీ
దొరక్కపోవడమే ప్రేమ!
***
అవును కానీ.. నాకిది చెప్పు!
నువ్వింతగా నాకు
జ్ఞాపకానికి వస్తావని
నీకు ముందే తెలుసు కదూ..
తెలిసీ తలుపు తట్టావెందుకు..
మరిచిపోయావెందుకు?
సరేలే.. అందరూ ఉంటారు నీతో..
కానీ నేను ఉండను!
నేను లేకుండా మరి
నువ్వుండగలవేమో చూస్కో!
శ్రీమతి గీతాంజలి (డా. భారతి దేశ్పాండే) వృత్తిరీత్యా సైకోథెరపిస్ట్, మారిటల్ కౌన్సిలర్. కథా, నవలా రచయిత్రి. కవయిత్రి. అనువాదకురాలు. వ్యాస రచయిత్రి. ‘ఆమె అడవిని జయించింది’, ‘పాదముద్రలు’. లక్ష్మి (నవలిక). ‘బచ్చేదాని’ (కథా సంకలనం), ‘పహెచాన్’ (ముస్లిం స్త్రీల ప్రత్యేక కథా సంకలనం), ‘పాలమూరు వలస బతుకు చిత్రాలు’ (కథలు), ‘హస్బెండ్ స్టిచ్’ (స్త్రీల విషాద లైంగిక గాథలు) ‘అరణ్య స్వప్నం’ అనే పుస్తకాలు వెలువరించారు. ‘ఈ మోహన్రావున్నాడు చూడండీ..! (కథా సంపుటి)’ త్వరలో రానున్నది. ఫోన్: 8897791964