[శ్రీమతి మంగు కృష్ణకుమారి రచించిన ‘మనసు గీసిన గీత’ అనే కథని పాఠకులకు అందిస్తున్నాము.]
ప్రేంచంద్. అతని పేరు విన్నా, మనిషిని చూసినా, గీతాలక్ష్మికి ఒళ్ళు పులకరించిపోతుంది. పక్క పక్క ఇళ్ళే.
మూల్ చంద్‌కి మంచి బిజినెస్ ఉంది. ప్రేంచంద్‌కి ముందు ఇద్దరు కొడుకులు. ఇద్దరు కోడళ్ళు వచ్చేరు. అందరూ మూల్ చంద్ భార్య మీరాబాయ్ మాట జవదాటరు.
గీత అంటే మీరాకి చాలా గారం. స్వీట్స్, రోటీలు పనీర్ కర్రీలు ఏది చేసినా గీతకి ఇవ్వకమానదు. గీత మీరా అంటే చాలా గౌరవంగా ఉంటుంది.
ప్రేంచంద్ ఎమ్ బిఎ పూర్తి చేసి, తండ్రి బిజినెస్‌లో హెల్ప్ చేస్తున్నాడు.
గీత అక్కడకి వెళితే ఆమె ప్రాణం అంతా అతనిమీదే ఉంటుందని, అతని చిన్న నవ్వుకీ ఆశగా చూస్తుందని ఎవరికీ తెలీదు. గీత తల్లి రామలక్ష్మి చాలా సంప్రదాయం పాటించే ఉత్తమ ఇల్లాలు. మీరాతో ఆమెకీ మాట స్నేహం కలిసేయి. వాళ్ళు కలిసి భజనలు చేసేవారు. షాపింగ్‌లు చేసేవారు.
రామలక్ష్మి చేసిచ్చిన పులిహార మీరావే కాదు ఆమె కొడుకులు, కోడళ్ళు ఆఖరికి మూల్ చంద్ కూడా ఇష్టంగా తినేవారు. వాళ్ళ కోసం అని తక్కువ కారం వేసి, నిమ్మరసంతో ఘుమఘుమ లాడుతూ చేసేది రామలక్ష్మి.
ఆ రోజు భజన పూర్తయింది. మీరా పాలకోవాలు తెచ్చింది. తింటూ కబుర్లు చెప్తున్నారు. చటక్కున మీరా అడిగింది. “భాభీ, మన గీతకి షాదీ ఎప్పుడు?” గీతాలక్ష్మి ఉలిక్కిపడింది.
రామలక్ష్మి కూడా ఉత్సాహంగా “మా దగ్గర బంధువుల అబ్బాయి ఇంజనీర్ చేసేడు. మన గీత అంటే ఇష్టం చూపిస్తున్నాడు. పిల్లలు చూసుకొని, ఒకళ్ళనొకళ్ళు ఇష్టపడితే, సంబంధం కుదిరినట్టే” అంది.
మీరా ఆనందానికి హద్దులేదు. ఆ రోజంతా గీత పెళ్ళి ఎలా ధూమ్ ధామ్‌లా చేయాలో, తను ఎంత ఇష్టంగా ఉందో చెప్తూనే ఉంది.
ఆ వారంలోనే వరుడు శేఖర్, తల్లిదండ్రులు పెళ్ళిచూపులకి వచ్చేరు. శేఖర్ చాలా హుషారుగా అందరికీ కనిపించేడు.
మీరా స్వయంగా రసగుల్లా చేసి తెచ్చి తనని తను పరిచయం చేసుకుంది. శేఖర్ తల్లి మీరాని తన చెల్లిలాగే చూసింది.
మళ్ళీ వారం మళ్ళా వస్తాం అని పెళ్ళివారు వెళిపోయేరు.
గీతాలక్ష్మి ఆలోచిస్తూనే ఉంది.
నిశ్శబ్దంగా మీరా ఇంట్లోకి అడుగు పెట్టింది. వెళుతూనే ప్రేంచంద్ కనిపించేడు.
“ఓహ్ కంగ్రాట్స్. మేరేజ్ ఫిక్స్ అయిందిట” నవ్వుతూ అన్నాడు. గీత గుండె లయ తప్పింది. ఏదో అనబోయి ఏమీ అనలేక మాటాడకుండా ఊరుకుంది.
ప్రేంచంద్ వివరాలు అడుగుతూనే ఉన్నాడు మీరా వచ్చింది. గీత కాబోయే అత్తగారిని శేఖర్‌ని తెగ పొగిడింది.
“ఓహ్ అయితే మన గీత చాలా లక్కీ అన్నమాట” అన్నాడు ప్రేంచంద్.
గీతకి ఎంత ఆలోచించినా ఈ పరిస్థితుల్లో తన ప్రేమ బయట పెట్టకుండా ఊరుకుంటేనే రెండు కుటుంబాల స్నేహం సజీవంగా ఉంటుంది అనిపించింది. ఇంతకీ ప్రేంకి అసలు తన మీద ఏ ఫీలింగ్ లేదేమో? ఏదో స్నేహితురాలు కదాని కాస్త ఆప్యాయంగా మాటాడేసరికి తనే ఎక్కువ ఆశలు పెట్టుకుందేమో?
గిరుక్కున తిరిగి ఇంటికి వెళిపోయింది. కానీ ప్రేంచంద్ కూడా తనలాగే ఆలోచించేడని, అతని మనసంతా తనే ఉందని గీతకి కూడా తెలీదు. అసలు ప్రేంచంద్ ఎవరికీ చెప్పలేదు. అనుమానం వచ్చేలా ప్రవర్తించలేదు. గీతమీద ఇష్టం పెరుగుతున్నా, తమ కుటుంబాల కలయిక ఎంత అసాధ్యమో అతనికి ప్రాక్టికల్‌గా తెలుసు. మీరాకి ఇప్పుడున్న ఈ అభిమానం, స్నేహం ఏవీ ఉండవు. తనకోసం ఎవరినో ఓ అమ్మాయిని ఈపాటికే తల్లి ఎంచి ఉండే ఉంటుంది. ఇలాటి విషయాల్లో తండ్రి ఆమె మాట కాదనడు.
ఇప్పుడు తను ‘గీతనే పెళ్ళి చేసుకుంటాను’ అంటే అమ్మా, నాన్నా ఇద్దరూ తనని ఇంట్లోంచి తగిలిసినా తగిలీవచ్చు. తన పలుకుబడి ఉపయోగించి మూల్ చంద్, రామలక్ష్మి కుటుంబాన్ని నవ్వులపాలు చేయవచ్చు. ఇంతకీ గీతకి ఒకవేళ శేఖర్ అంటే చాలా ఇష్టం ఉండి ఉంటే? రాజీపడి తీరాలి.
ప్రేం కూడా కామ్‌గా అయిపోయేడు.
గీత పెళ్ళి చాలా సంప్రదాయకంగా నవ్వులతో సందడిగా జరిగింది.
మీరా, ప్రేం చాలా సహాయాలు చేసేరు.
శేఖర్ ప్రేంచంద్ స్నేహితులు అయిపోయేరు. మీరా తెల్లటి వజ్రం ఉన్న ఉంగరం గీత వేలికి పెట్టేసరికి గీత మీరాని పట్టుకొని వెక్కి వెక్కి ఏడ్చేసింది. “మా గుర్తుగా ఉంచు బేటీ, మళ్ళా ప్రేం పెళ్ళికి మీరు ఇద్దరు రావాలి. కానుకలు తీసుకెళ్ళాలి” అంది ప్రేమగా.
రామలక్ష్మితో పాటు శేఖర్ కూడా “అమ్మాయి డిసైడ్ అయిపోయిందా? మాకు పరిచయం చేయరూ?” అన్నారు.
“ఓ మీకు చెప్పకుండానా? విద్యా మా దగ్గర బంధువుల అమ్మాయి. పుట్టినప్పుడే మా ప్రేంకి అనుకున్నాం” అంటుంటే శేఖర్ ప్రేంచంద్ కి షేక్ హేండ్ ఇచ్చేడు.
అందరి మొహాలమీదా నవ్వులు విరిసేయి. గీతాలక్ష్మి తన మనసు పూర్తిగా శేఖర్ మీదకి తిప్పేసుకుంది.
