మామిడిచెట్టై మమ్మల్ని పెంచిన అమ్మ
ఆ ఆ లు దిద్దించి
విద్యను పంచిన అమ్మ
రెండు కోసుల దూరం పోయి
మా గొంతులు తడిపే గంగను మోసుకొచ్చిన అమ్మ
ఒంటి చేత్తో ఇంటెడు చాకిరినీ
చుట్టుకొచ్చిన అమ్మ
ఇవాళ అరసున్నాలా
వంగిపోతోంది
ఎలా వున్నావని పలకరించినపుడల్లా
నా బాల్యం నుంచీ నన్నెత్తుకున్న
సంబరాన్నంతా ప్రతిస్పర్శ లోనూ
నాకు పంచిపెడుతోంది
ఎప్పుడూ ఎవరినీ ఏడిపించకూడదని
ఒక్కోసారి కన్నీటితో చెప్పిన అమ్మ
మానవత్వపు పాఠాన్ని
గుర్తుచేస్తునే వుంది
జీవితాన్ని మథించి
అమృతాన్ని పంచిన అమ్మ
దేవతలై ఎలా బతకాలో
చెప్తూనే వుంది
నా కూతురితో కలిసి
నవ్వుతూ కూర్చునే అమ్మ
నా ముంగిట మరో చిన్న తల్లై
ప్రేమ వర్షాన్ని కన్నులలో
కురిపిస్తూనే వుంది
భూమిని దేవతని ఎందుకంటారో
దేవుడని ఎందుకనరో చెప్పే
అమ్మ మాట
మరు జన్మలోనైనా
అమ్మై పుట్టాల్సిన
అవసరాన్ని
గుర్తు చేస్తోంది

విజయ్ కోగంటి పేరుతో తెలుగు, ఇంగ్లీషులలో కవిత, కధా రచన, అనువాదాలు చేసే డా. కోగంటి విజయబాబు ఆంగ్ల అధ్యాపకుడు. దక్షిణాఫ్రికా లోని వివక్ష రాజకీయాలను తన రచనలలో ఖండించిన అటోల్ ఫ్యుగాడ్ నాటకాలపై సిద్ధాంత గ్రంధానికి పి.హెచ్డీ పొందారు. ఆంగ్ల భాష, సాహిత్య విషయాలపై పలు పత్రాల సమర్పణ, వ్యాసరచన చేసారు. విద్యార్ధి కేంద్రిత ఆంగ్ల బోధనా పద్ధతులపై అనేక మంది అధ్యాపకులకు కార్యశాలల ద్వారా శిక్షణ ఇస్తున్నారు. రెండు సార్లు అంతర్జాతీయ స్కాలర్షిప్ తో పాటు ఆంధ్రప్రదేశ్ రాష్ట్ర ఉత్తమ అధ్యాపక పురస్కారం అందుకున్నారు. ‘ఇలా రువ్వుదామా రంగులు’ (2017) , ‘ఒక ఆదివారం సాయంత్రం ఇంకా ఇతర కవితలు’(2020)ఈయన కవిత్వ సంపుటులు. పాశ్చాత్య రచయితలను పరిచయం చేస్తూ ‘ పడమటి రాగం’ ఆనే వ్యాస సంపుటిని,
కేంద్ర సాహిత్య అకాడెమీ పురస్కార గ్రహీత శ్రీ దేవిప్రియ ప్రేమ కవితలను డా. పద్మజ తో కలిసి ఆంగ్లం లోనికి ‘స్లీపింగ్ విద్ ద రెయిన్ బొ’ గా అనువదించారు. ‘ ద స్పారో అండ్ ద కానన్’ అనే ఆంగ్ల కవితల సంపుటిని 2021 లో ప్రచురించిన డా. విజయ్ కోగంటి తన మొదటి కవిత్వసంపుటి ‘ఇలా రువ్వుదామా రంగులు’ (2017) కి శ్రీ నాగభైరవ సాహితీ పురస్కారం అందుకున్నారు. ‘పైనాపిల్ జామ్’ (2023) ఈయన మొదటి కథా సంపుటి.
డా. కోగంటి విజయబాబు ప్రస్తుతం కామవరపుకోట ప్రభుత్వ డిగ్రీ కళాశాలకు ప్రిన్సిపల్ గా వ్యవహరిస్తున్నారు.
drvijaykoganti2@gmail.com
8309596606
1 Comments
Koganti Dasaradhi