[‘పుస్తక సురభి’ శీర్షికలో భాగంగా ‘లొరెంజో సెర్చెస్ ఫర్ ది మీనింగ్ ఆఫ్ లైఫ్’ అనే నవలని సమీక్షిస్తున్నారు స్వప్న పేరి.]
ఉపమన్యు ఛటర్జీ రచించిన ‘లోరెంజో సెర్చెస్ ఫర్ ది మీనింగ్ ఆఫ్ లైఫ్’ అనేది – లొరెంజో సెనెసి అనే ఇటాలియన్ యువకుడి అస్తిత్వ ప్రయాణానికి సంబంధించిన నవల. అత్యంత తీవ్రమైన ప్రమాదం అనంతరం, లొరెంజో, ఆధ్యాత్మిక అన్వేషణకు ఉపక్రమిస్తాడు. చదువరులను ఆకట్టుకునే ఈ నవలకి ఇతివృత్తాన్ని రచయిత – శ్రీలంకలోని కొలంబోలో కలిసిన ఓ పరిచయస్థుడి జీవితం నుంచి స్వీకరించారు. దీనిలో కల్పన, జీవిత చరిత్ర, ఇంకా ఆధ్యాత్మిక అన్వేషణ అంశాలను అద్భుతంగా అల్లారు. ఛటర్జీ కథనం ఊహాత్మక గద్యం, ఖచ్చితమైన వివరాలు, పదునైన చమత్కారాలతో రూపుదిద్దుకోవడం – ఆయన రచనా నైపుణ్యానికి నిదర్శనం. ఈ నవల అసలైన కళాఖండం!
ఈ నవల లొరెంజోకి జరిగిన ప్రమాదంతో మొదలవుతుంది, ఇది అతని జీవిత ఉద్దేశాన్ని ప్రశ్నించేలా చేస్తుంది. ఈ ఆత్మపరిశీలన అతన్ని గ్రామీణ ఇటలీలోని బెనెడిక్టైన్ ఆశ్రమంలో చేరేలా చేస్తుంది, అక్కడ అతను పది సంవత్సరాలు సన్యాస జీవనంలో మునిగిపోతాడు. ఆశ్రమ జీవితపు స్పష్టమైన వర్ణన పుస్తకంలోని అత్యంత ఆకర్షణీయమైన అంశాలలో ఒకటి, ఎందుకంటే ఛటర్జీ సన్యాసుల క్రమశిక్షణ, దినచర్య మరియు ఆధ్యాత్మిక కృషికి జీవం పోశారు. లొరెంజో ప్రయాణం ఇటలీకే పరిమితం కాదు; తరువాత అతను బంగ్లాదేశ్‌లోని బెనెడిక్టైన్ ఆశ్రమానికి వెళ్తాడు, అక్కడ అతను చాలా భిన్నమైన సాంస్కృతిక మరియు పర్యావరణ పరిస్థితుల మధ్య తన ఆధ్యాత్మిక అన్వేషణను కొనసాగిస్తాడు.
ఆధ్యాత్మిక మార్గపు ఘనతనీ, సాధారణతనీ సమతుల్యం చేయగల సామర్థ్యం ఈ నవల బలాల్లో ఒకటి. లొరెంజో అనుభవాలు అసాధారణమైనవి, సామాన్యమైనవి, అయినా మానవుల అస్తిత్వపు సంక్లిష్టతలను ప్రతిబింబిస్తాయి. సన్యాసి నుండి ఆరోగ్య క్లినిక్‌లో సేవ చేయడం వరకు, చివరికి కుటుంబ వ్యక్తిగా మారడం వరకు అతని ప్రయాణం – జీవితం లోని పరిస్థితులు – ఒకరి అంతర్గత స్వభావాన్ని మార్చకుండానే, వారి మార్గాన్ని ఎలా మారుస్తాయో తెలిపేందుకు చక్కని నిదర్శనం. పరిస్థితులు మారుతున్నప్పటికీ, జీవితానికి అర్థం తెలుసుకోవడం కోసం లొరెంజో కనబరిచిన మొండి పట్టుదల, అన్వేషణను ఛటర్జీ చిత్రీకరించిన విధానం, లక్ష్యం కోసం చేసే మానవ అన్వేషణపై శక్తివంతమైన వ్యాఖ్యానంగా పరిగణించవచ్చు.
బంగ్లాదేశ్‌లో సన్యాసుల క్రమశిక్షణాయుత జీవితం నుండి ఆచరణాత్మక సేవకు లొరెంజో మారుతున్నప్పుడు, ఈ నవల సేవ, మానవత్వపు ఇతివృత్తాలను కూడా అన్వేషిస్తుంది. ఫిజియోథెరపీ క్లినిక్‌లో లొరెంజో చేసిన పని, సమాజ పరిశుభ్రతపై గ్రామస్థులకు అవగాహన కల్పించడానికి అతను చేసిన ప్రయత్నాలు – ఇతరులకు సేవ చేయడం ద్వారా తమ జీవితాన్ని అర్థవంతం చేసుకోవడం యొక్క ప్రాముఖ్యతను ప్రస్ఫుటం చేస్తాయి. ఈ పరివర్తన కేవలం భౌతిక చర్య మాత్రమే కాదు, ఆధ్యాత్మికం కూడా, ఎందుకంటే దేవునికి సేవ చేసే జీవితం సంతృప్తికరంగా అనిపించినా, అది మాత్రమే సరిపోదు అనే ఆలోచనతో లొరెంజో పోరాడుతుంటాడు. ఈ ఇతివృత్తాలకి సంబంధించి, ఛటర్జీ గారి సూక్ష్మ అన్వేషణ కథనానికి గాఢతని కల్పిస్తుంది, ఇది కేవలం వ్యక్తిగత కథ కంటే ఎక్కువగా తోస్తుంది – ఇది అస్తిత్వపు స్వభావంపై సార్వజనీన తలపోతగా మారుతుంది.
ఉపమన్యు ఛటర్జీ
లోతైన అస్తిత్వ ప్రశ్నలను పాఠకుల ముందుంచుతున్నా, ఛటర్జీ రచనా శైలి, చమత్కారానికీ, హాస్యానికీ దూరం కాదు. నవల గమనం నెమ్మదిగా ఉండి, పాఠకుడు కథనం యొక్క గొప్పతనాన్ని గ్రహించడానికి వీలు కల్పిస్తుంది. సన్యాసుల జీవితం, ఇంకా బంగ్లాదేశ్ సాంస్కృతిక సూక్ష్మ నైపుణ్యాల గురించిన రహస్య వివరాలను చేర్చడం – కథను సుసంపన్నం చేసి, ఈ నవలని చదవడం మనోహరమైన అనుభూతిని కలిగిస్తుంది. హాస్యాన్ని, గంభీరతని కలిపి అల్లుకునే రచయిత సామర్థ్యం ఆయన రచనల ముఖ్య లక్షణం. ‘లొరెంజో సెర్చెస్ ఫర్ ది మీనింగ్ ఆఫ్ లైఫ్’ దీనికి మినహాయింపు కాదు.
చివరగా, ‘లొరెంజో సెర్చెస్ ఫర్ ది మీనింగ్ ఆఫ్ లైఫ్’ అనేది కథ చెప్పడంలో ఉపమన్యు ఛటర్జీ అద్భుత నైపుణ్యాన్ని ప్రదర్శించిన నవల అని చెప్పవచ్చు. ఇది మానవ ఉనికి యొక్క సంక్లిష్టతలను – సున్నితత్వం, హాస్యంతో అన్వేషించిన నిశ్శబ్ద విజయం. ఆధ్యాత్మిక అన్వేషణ, సేవ, జీవితపు అర్థం కోసం అన్వేషణ అనే ఇతివృత్తాలు పాఠకులపై గాఢమైన ప్రభావం చూపుతాయి, సాహిత్య కల్పన లేదా ఆధ్యాత్మిక అన్వేషణపై ఆసక్తి ఉన్న ఎవరికైనా ఈ నవల ఆకర్షణీయమైన పఠనానుభూతిని అందిస్తుంది. ఉపమన్యు ఛటర్జీ గారి ఈ రచన భారతదేశంలోని అత్యంత ప్రతిభావంతులైన రచయితలలో ఒకరిగా ఆయన స్థానాన్ని సుస్థిరం చేస్తుంది, ఈ నవల ఆయన స్థిర ప్రతిభకు నిదర్శనం.
***
Author: Upamanyu Chatterjee
Published By: Speaking Tiger
No.of Pages: 304
Price: ₹ 699.00
Link to buy:
https://www.amazon.in/Lorenzo-Searches-Hardcover-Upamanyu-Chatterjee/dp/935447621X/
స్వప్న పేరి ఫ్రీలాన్స్ బ్లాగర్. పుస్తక సమీక్షకురాలు. సినిమాలంటే ఆసక్తి.