[శ్రీ ఎస్. హనుమంతరావు రచించిన ‘కుండీలో కవి సమయం’ అనే కవితని పాఠకులకు అందిస్తున్నాము.]
ఆ బాల్కనీ కుండీలో
బ్రహ్మజెముడు మొక్క!
గన్‌మెన్ల మధ్య నాయకుడిలా
ఒళ్లంతా ముళ్లతో..
ఇప్పుడిక్కడున్నా
దాని ప్రవాస పరంపర
ఏ సహారాలోనో
థార్‌ ఎడారిలోనో మొదలైంది..
ఇలా పెరగడం వల్ల
అక్కర లేనంత నీళ్లతో
వృక్షం నీడన వున్న మొక్కలా
గిడసబారి.. గారం ఎక్కువైన పాప మాదిరి..
పెంచడం ఫ్యాషన్‌ వారికి
దానిది బ్రతుకుపోరు..
అయినా అపుడపుడు
అలసట నవ్వులా.. ఓ పువ్వు!
‘బ్రహ్మజెముడు పుష్ప వికసనంలా చంద్రోదయం’
అన్నాడుగా సర్రియలిస్టు కవి నారాయణ బాబు..
చిరుగాలికి కదిలే
ఆ కోమల కుసుమం
కుండీలో కవి సమయం..
జీవితేచ్ఛా పద చిత్రం!
వృత్తిరీత్యా ఆకాశవాణి హైదరాబాద్, విశాఖ కేంద్రాలలో పనిచేసి, ఎకౌంటెంట్‌గా పదవీ విరమణ చేసిన శ్రీ ఎస్. హనుమంతరావు ప్రవృత్తి రీత్యా, కవి, కథకులు. 1976 లో తొలి కవిత, 1979లో తొలి కథ ప్రచురితమయ్యాయి. తదుపరి వీరి కవితలు, కథలు అన్ని ప్రముఖ పత్రికలలో ప్రచురితమయ్యాయి. సొల్లుఫోను అనే కథా సంపుటి, స్నేహ ధర్మం అనే బాలల కథల పుస్తకం వెలువరించారు. శ్రీ మక్కెన రామసుబ్బయ్య స్మారక అవార్డు, శ్రీ నారంశెట్టి బాల కథాసాహిత్య పీఠం నుంచి ప్రశంసాపత్రం పొందారు. ప్రస్తుత నివాసం విశాఖపట్టణం.