కొన్ని పొడుపు కథలు

[బాలబాలికల కోసం కొన్ని పొడుపు కథలు అందిస్తున్నారు డా. కందేపి రాణీప్రసాద్.]

1.
కొండంత తల్లి గోలీలంత పిల్లలు
తల్లి పచ్చన పిల్లలు ఎర్రన

2.
ఆకుపచ్చని ఆకు
తెల్లని ఆల్కలీ
నల్లని విత్తు కలిపితే
ఎర్రని ద్రవం తయారవుతుంది
ఏమీటీ రంగులు? ఎక్కడ?

3.
తల్లేమో పందిరెక్కి పైన కూర్చుంటుంది
పిల్లలేమో పందిరి పట్టుకొని వేలాడాయి!
ఎవరా తల్లీ పిల్లలు?

4.
మూడు అరల్లో పిల్లలు భద్రం
మురిపించే సుగంధ ద్రవ్యం!

5.
మెండల్ ప్రయోగాల తీగలు
తీగ తీగకు వేలాడే కాయలు
కాయ చీల్చితే పచ్చని ముత్యాలు

6.
బంగారు మేని ఛాయ
పొట్టపై నిలువు గాటు
క్లోరోఫిల్ కన్నతల్లి

7.
కాటుక రంగు పిల్లల్ని
కడుపులో దాచుకున్న
మిసిమి మేను గల అమ్మ
ఎవరా అమ్మ! ఎవరా పిల్లలు?

8.
ఒంటి నిండా పొరల చీరలు
తెలుపు ఎరుపు రెండు రకాలు
ఇవి లేనిదే చేయరు కూరలు
తల్లి కూడా చేయదిలా మేలు

9.
కాగితాలు ఉండ చుట్టినట్లుగా
ముడతల మధ్య దాగిన సిగ్గరి
క్యా బే అని హుంకరిస్తూనే
జీ అంటూ మర్యాదిచ్చే నేర్పరి

10.
పేరులో ఏనుగుంటుంది
దారిలో వేపకు పాకుతుంది
కూరలో వేసుకుంటారు!

11.
దీని పేరు కొలకేషియా
పుట్టిందేమో మలేషియా
రెండూ ఉన్నది ఏషియా

12.
ఈ కర్ర కాని కర్రకు
ఒళ్ళంతా తీపి
రసమంతా పిండామో
మిగిలేది పిప్పి

13.
సపోటా రంగు చర్మం
ఆకుపచ్చని కండ భాగం
పక్షి పేరున్న పండు ఇది

14.
తెల్లగా బిళ్ళల్లా ఉంటుంది
పంచదార కాదు
ఘాటైన వాసన ఉంటుంది
అగరుబత్తీ కాదు
దేవుడి గదిలో ఉంటుంది
కుంకుమ కాదు / కొబ్బరి కాయ కాదు

జవాబులు
1. మర్రిచెట్టు 2. ఆకు, వక్క, సున్నం 3. ద్రాక్ష గుత్తులు 4. యాలాకులు 5. పచ్చి బటానీ 6. గోధుమ గింజ 7. బొప్పాయి 8. ఉల్లిపాయ 9. క్యాబేజీ 10. కరివేపాకు 11. చేమదుంప 12. చెరుకు 13. కివి 14. కర్పూరం

డా. కందేపి రాణీప్రసాద్

డా. కందేపి రాణీప్రసాద్ MA, MSc, PHD, బాల సాహితీ వేత్త, కవయిత్రి, అనువాదకులు, చిత్ర కళాకారిణి. తెలంగాణ రాష్ట్ర ప్రభుత్వ విశిష్ట మహిళా పురస్కారం అందుకున్నారు. తెలుగు విశ్వ విద్యాలయం వారి ఉత్తమ రచయిత్రి పురస్కారం అందుకున్నారు. రాణీ ప్రసాద్ ఆర్ట్ పేరుతో హాస్పిటల్ వేస్ట్‌తో 4000 బొమ్మలను సృష్టించారు. బాల సాహిత్యంలో 48 పుస్తకాలు రచించారు. ‘తెలుగు బాల సాహిత్యంలో సైన్స్ రచనలు’ అనే అంశంపై నాగార్జున విశ్వవిద్యాలయంలో పరిశోధన చేశారు. తెలుగు విశ్వ విద్యాలయంలో బాల సాహిత్య కీర్తి పురస్కారాన్ని నెలకొల్పారు. మిల్కీ మ్యూజియం, స్వీటీ చిల్డ్రన్ లైబ్రరీ లను తమ ఆసుపత్రిలో పిల్లల కోసం నిర్వహిస్తున్నారు. తమ సొంత ఆసుపత్రిలో ప్రిస్క్రిప్షన్ పాడ్ మీద పిల్లల కోసం తెలుగు పాట, బొమ్మ పెట్టి ప్రింట్ చేస్తున్నారు. సైన్సు, యాత్రా సాహిత్యం విరివిగా రాస్తున్నారు. కళాభారతి, కవిత వాణి, చిత్ర కళారాణి అనే ఎన్నో బిరుదులను, 6 వరల్డ్ రికార్డ్స్‌నూ సొంతం చేసుకున్నారు.