[శ్రీ పెద్దాడ సత్యప్రసాద్ రచించిన ‘కన్నయ్య కోసం’ అనే కవితని పాఠకులకి అందిస్తున్నాము.]
యమున తరంగాల గలగల
రాధ మనసు అందులో అల
కన్నయ్య కోసం
కాగుతున్న కాసారం ఆ హృదయం
నల్లనయ్య రాకకై నిరీక్షణలో
తనను తానే మరచిన వైనం
క్షణాలను యుగాలుగా మారుస్తున్న కాలం
చూపు అంతా యమున వైపే
అసలే నిశి
అంత కంటే చీకటి యమునా తటి
కానీ రధ కన్నులలో మాత్రం వెన్నెల
అది కృష్ణ లీల
వలచిన విభుడు
ఎదలో నిలిచిన అనుభూతి
రాధా హృదయమే
మాధవుని ప్రణయ సీమ
అమలిన ఆ ప్రేమకు
ఈ భువిలో ఏదీ సాటి కాదు సుమా!
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్‌గా పనిచేస్తున్నారు.