కాల పరీక్ష

[శ్రీ చందలూరి నారాయణరావు రచించిన ‘కాల పరీక్ష’ అనే కవితని పాఠకులకు అందిస్తున్నాము.]

కాలం
లిపి లేని భాషలో మాట్లాడినా
అర్దం చేసుకోవాలి..

రూపం లేని అందాల్ని చెక్కి
ముఖం చాటేసినా
స్వీకరించాలి.

వెంట్రుకతో పర్వతాన్ని
ఎక్కించే ప్రేమను
కొలిచి తరించాలి.

దేహాన్ని సాది
వెలిగించుకున్న చెమట దీపాన్ని
ఆర్పినా భరించాలి.

చిల్లరతో కట్టిన కోటలో
లంకె బిందెలు మొలిస్తే
రహస్యాన్ని గౌరవించాలి.

గుండెను చిలికి
తోడిన కన్నీటితో
దప్పిక తీర్చుకునా మౌనం దాల్చాలి

బాధల కొలిమిలో
కాల్చిన అక్షరాలను నాలుకపై
లిఖించినా ఓర్చుకోవాలి.

కాలం
తన ఆకలికి మనిషి సుఖాల్ని
నంజుతున్నా మూగవై ఉండాలి

కాలం
రహస్య పన్నాగంలో
ప్రతి ఒక్కరూ ఉంటారు.

ఎవరు
ఓడినా జాలిపడదు
గెలిస్తే మాత్రం దీవిస్తుంది.