[బాలబాలికల కోసం జంతువుల పొడుపు కథలు అందిస్తున్నారు డా. కందేపి రాణీప్రసాద్. ఇది 4వ భాగం.]
ప్రశ్నలు:
31.
నల్లగా ఉంటుంది
నాలుగుకాళ్ళతో నడుస్తుంది
తేనెపట్టుని తింటుంది
చెట్లెక్కి కునుకుతీస్తుంది
32.
గుడ్లు పెడుతుంది, ఎగురుతుంది
కానీ పక్షి కాదు
ఇపుడు బతికి లేదు గానీ
ఒకప్పుడు భూమ్మీద పెద్ద జంతువు
33.
ఇది మాటిమాటికీ
ఒంటి రంగులు మారుస్తుంది
తొండ జాతికి చెందింది
పొడవైన నాలుక ఉంటుంది
పార్టీలు మార్చే నాయకులను
దీనితోనే పోలుస్తారు మరి
34.
నల దమయంతుల
మధ్య రాయబారి
ధవళవర్ణంలో ఉండే
అందాల కొలికి!
35.
విషపు కోరలుంటాయి
కానీ పాములు కావు
నెట్టెల్లో నివసిస్తాయి
వంద కాళ్ళుంటాయి!
36.
ఎత్తు వేసి ఆహారం సంపాదిస్తుంది
జిత్తులతో మోసం చేస్తుంది
మాయమాటలతో నమ్మిస్తుంది
అందని ద్రాక్ష పుల్లనంటుంది
37.
సముద్రజీవి
పాలిచ్చి పెంచే తల్లి
మంచు ప్రాంతాల్లో
నివసించే ప్రాణి
38.
కొండి పైకెత్తి నడుస్తుంది
కోరినా, కోరకపోయినా
ఆ దారంట వెళ్ళేవారందరికీ
షేక్ హ్యాండిస్తుంది
39.
వంటిల్లు దాని సామ్రాజ్యం
అందరూ పడుకున్నాకే లేస్తుంది
ఎవర్నీ కరవదు, కుట్టదు
చిన్నదే అయినా దీన్ని చూస్తే
చాలా మందికి భయం
40.
నేలను తవ్వుతుంది
కానీ అరకగాదు
పైరుకు బలాన్నిస్తుంది
కానీ ఎరువుగాదు
మట్టిలో ఉంటుంది
కానీ మాణిక్యం గాదు
జవాబులు:
31.ఎలుగుబంటి 32. డైనోసార్ 33. ఊసరవెల్లి 34. హంస 35. కాళ్ళ జెర్రి 36. నక్క 37. సీల్ 38. తేలు 39. బొద్దింక 40. వానపాము
డా. కందేపి రాణీప్రసాద్ MA, MSc, PHD, బాల సాహితీ వేత్త, కవయిత్రి, అనువాదకులు, చిత్ర కళాకారిణి. తెలంగాణ రాష్ట్ర ప్రభుత్వ విశిష్ట మహిళా పురస్కారం అందుకున్నారు. తెలుగు విశ్వ విద్యాలయం వారి ఉత్తమ రచయిత్రి పురస్కారం అందుకున్నారు. రాణీ ప్రసాద్ ఆర్ట్ పేరుతో హాస్పిటల్ వేస్ట్‌తో 4000 బొమ్మలను సృష్టించారు. బాల సాహిత్యంలో 48 పుస్తకాలు రచించారు. ‘తెలుగు బాల సాహిత్యంలో సైన్స్ రచనలు’ అనే అంశంపై నాగార్జున విశ్వవిద్యాలయంలో పరిశోధన చేశారు. తెలుగు విశ్వ విద్యాలయంలో బాల సాహిత్య కీర్తి పురస్కారాన్ని నెలకొల్పారు. మిల్కీ మ్యూజియం, స్వీటీ చిల్డ్రన్ లైబ్రరీ లను తమ ఆసుపత్రిలో పిల్లల కోసం నిర్వహిస్తున్నారు. తమ సొంత ఆసుపత్రిలో ప్రిస్క్రిప్షన్ పాడ్ మీద పిల్లల కోసం తెలుగు పాట, బొమ్మ పెట్టి ప్రింట్ చేస్తున్నారు. సైన్సు, యాత్రా సాహిత్యం విరివిగా రాస్తున్నారు. కళాభారతి, కవిత వాణి, చిత్ర కళారాణి అనే ఎన్నో బిరుదులను, 6 వరల్డ్ రికార్డ్స్‌నూ సొంతం చేసుకున్నారు.