జ్ఞాపకాల పందిరి-36 Gnapakala Pandiri 36 | సంచిక - తెలుగు సాహిత్య వేదిక

జ్ఞాపకాల పందిరి-36

“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే…!!”అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.

అలా.. ఊహించలేదు..!!

సమాజంలో మంచి జరిగినా, చెడు జరిగినా, దానివల్ల ప్రజలకు లాభం జరిగినా, నష్టం జరిగినా, బాధ్యత గల వ్యక్తి ముఖ్యంగా రచయితలు లేదా కవులు స్పందించాలి. తమ రచనల ద్వారా ప్రజలలో చైతన్యం తీసుకురావాలి. ఈ సిద్ధాంతాన్ని నేను గట్టిగా నమ్ముతాను. నమ్మడమే కాదు అది స్వయంగా ఆచరించడానికి లేదా అమలు పరచడానికి నా శాయశక్తుల ప్రయత్నం చేస్తాను. స్పందించ వలసిన సమయంలో, స్పందించవలసిన వాళ్ళు స్పందించక పొతే అది సమాజానికి అన్యాయం చేసినట్టే అవుతుంది. భర్తీ చేయలేనంత నష్టం కూడా జరగవచ్చు.

స్పందించడం వరకూ బాగానే వుంది గానీ, స్పందించినంత మాత్రాన అందరూ లేదా సంబంధిత అధికార గణం ప్రతిస్పందిస్తుందా? అంటే, కావచ్చు, కాకపోవచ్చు. అది అవతలి వాళ్ళమీద ఆధారపడి ఉంటుంది. కాస్త సంయమనం పాటించి వెంటపడితే, అది సమంజసమైన అంశం అయితే, నలుగురికీ ఉపయోగపడేది అయితే తప్పక ఫలితాలు ఉంటాయి. లేదంటే కాస్త ఓర్పు అవసరం అవుతుంది అంతే! నా జీవితంలో ఇలాంటి మంచి అనుభవాలు చాలా వున్నాయి. అవి కేవలం నా స్వార్థం కోసమో, నా వాళ్ళ కోసమో స్పందించిన సందర్భాలు కానేకాదు, పదిమందికీ లేదా సమాజానికి అంతో ఇంతో ప్రయోజనం అయ్యేవే! అందుకే వాటి ప్రాధాన్యతలను బట్టి ప్రతిస్పందనలు జరిగి కొన్ని మంచి పనులు జరిగాయి. అందులో ఒకటి మీకు ఇక్కడ వివరించడమే నా ఈ ప్రయత్నం.

అవి నేను మహబూబాబాద్‌లో పని చేస్తున్న రోజులు. అప్పటికే రేడియో తోనూ, రేడియో కార్యక్రమాలతోనూ మంచి అనుబంధం ఏర్పడి వుంది. ఎక్కువగా నా ప్రాధాన్యతలు ‘దంత సంరక్షణ -నోటి పరిశుభ్రత’ ఆధారంగా ఉండేవి. అప్పటివరకు దంత సమస్యల మీద అంత విస్తృతంగా రేడియో ద్వారా ప్రసంగించిన వారు లేరనే చెప్పాలి. సాధారణ నిరక్షరాస్యుడైన శ్రోతకు సైతం నా రేడియో ఉపన్యాసాలు ఆకట్టుకొనే విధంగా ఉండేవి. కష్టమైన దంత వైద్య సాంకేతిక పదజాలాన్ని సాధారణ వాడుక భాషలోకి తర్జుమా చేసి వ్యాసాలు రాస్తూండేవాడిని. అందుచేత ఆకాశవాణి అధికారులూ – పెద్దలూ నన్ను బాగా ప్రోత్సహించేవారు. ఆకాశవాణి ద్వారా/దూరదర్శన్ ద్వారా నన్ను అత్యధికంగా ప్రోత్సహించిన మహానుభావులు ఎందరో.. వారిలో కొందరిని ఇక్కడ ప్రస్తావించక తప్పదు. శ్రీ సత్యవోలు సుందరసాయి, ఆర్. వెంకటేశ్వర్లు గారు, డా. పాలకుర్తి మధుసూదన్ రావు గారు, చలపతిరావు గారు, భీమయ్యగారు, మంత్రవాది సుధాకర్ గారు, శ్రీనివాస రెడ్డి గారు, జయపాల్ రెడ్డి గారు,సి. ఎస్.రాంబాబు గారు, శ్రీమతి సరోజ నిర్మల గారు, శ్రీమతి ఝాన్సీ. కె. వి. కుమారిగారు, బాబూ రావు గారు, మహమూద్ ఆలీ గారు, దక్షిణా మూర్తి గారు, వై. రాఘవులు గారు, రాజారావు, ఇలా ఎందరెందరో నన్ను ఎంతగానో ప్రోత్సహించారు. వీరందరినీ ఎన్నటికీ మరువలేను.

నాటి దూరదర్శన్ సంచాలకులు డా. పాలకుర్తి మధుసూదన్ రావు

శ్రీ సి.ఎస్.రాంబాబు, అసిస్టెంట్ స్టేషన్ డైరెక్టర్, హైదరాబాదు

ఇక అసలు విషయానికొస్తే, ఖమ్మంలో నాకు కజిన్ బ్రదర్ (కొత్తవాళ్లు మా ఇద్దరినీ సొంత అన్నదమ్ములు అనుకునేవారు) నల్లి భగవాన్ దాస్ ఉండేవాడు (ఎన్. బి. దాస్‌గా ప్రసిద్ధులు). ఆయన అక్కడ ఇంజనీరు గా పనిచేసేవారు. కేవలం ఆ కుటుంబంతో గడపడానికి, నేను ప్రతి ఆదివారం ఖమ్మంలో క్లినిక్ నడిపేవాడిని. చాలా ఆనందకరమైన రోజులు అవి. ఖమ్మంలో క్లినిక్ పెట్టుకోవడానికి మిత్రులు డా. ఎం. వి. ఎల్. నరసింహారావు గారు (హోమియో వైద్యులు), డా. సత్యన్నారాయణ రెడ్డి గారు సహకరించారు. దీని ఆధారంగా నేను ఆకాశవాణి -కొత్తగూడెంకు, దంతసంరక్షణ సంబంధమైన వ్యాసాలు పంపుతుండేవాడిని. ఒకసారి నాకు అక్కడి నుండి కాంటాక్ట్ వచ్చింది. బొత్తిగా తెలియని ప్రదేశం. అయినా సాహసం చేసాను. బస్సులో కొత్తగూడెం వెళ్లి, అక్కడినుండి, రేడియో స్టేషన్‌కు ఆటోలో వెళ్లాను. వూరికి చాలా దూరంలో ఉంటుంది అది. మంచి వేసవి కాలం. కానీ ఆకాశవాణి ఆవరణలోకి చేరగానే, అక్కడి ఆహ్లాదకర వాతావరణానికి ఎంతో హాయి అనిపించింది. అది మామూలు ఎఫ్. ఎం,కేంద్రాలకు చాలా భిన్నంగా చక్కగా వుంది. స్వర్గీయ వెంగళరావు గారు కేంద్రమంత్రిగా వున్న కాలంలో ఆవిర్భవించిన ఆకాశవాణి కేంద్రం అది. భవనంకు ముందు మొక్కలతో చక్కని పూలవనంలా ఉండేది. ఆ వాతావరణం చాలా సంతోషాన్ని పంచింది. లోపలికి వెళ్లి సంబంధిత అధికారికి (PEX) నా కాంటాక్ట్ లెటర్ చూపించాను. బహుశా అప్పుడు మిత్రులు మహమూద్ ఆలీ గారు ప్రోగ్రాం ఎగ్జిక్యూటివ్‌గా ఉన్నట్టు వున్నారు. ఆయన అప్పటికే నాకు విజయవాడలో పరిచయం. ఆయన చాలా మర్యాద చేసి త్వరలో పిలుస్తామని, విశ్రాంతి గదిలో కూర్చోమని చెప్పారు. విజిటర్స్ విశ్రాంతి గది బాగుంది. కానీ పంకా సదుపాయం లేనందువల్ల చాలా ఉక్కబోతగా వుంది. సిబ్బంది ప్రతి గదిలోనూ కూలర్లు హోరెత్తిస్తున్నాయి. ఆ గదిలో నాలాంటి వారు నలుగురైదుగురు, నాలానే గాలి ఆడక ఇబ్బంది పడుతున్నారు.

క్లినిక్‌కు సహకరించిన డా.ఎం.వి.ఎల్. నరసింహరావు, ఖమ్మం.

ప్రసారభారతి డైరెక్టర్ జనరల్‌గా పని చేసిన తొలి తెలుగు వ్యక్తి శ్రీ రాపూరి వెంకటేశ్వర్లు గారు

ఇలా అలాంటి వాతావరణంలో ఇబ్బంది పడుతున్న సమయంలో, నాకు రికార్డింగ్ కోసం పిలుపు వచ్చింది. రికార్డింగ్ రూమ్‌లో ఏ.సి. ఉండడం వల్ల హాయిగా అనిపించింది. మనసు కుదుట పడింది. రికార్డింగ్ అయిపోయిన తర్వాత తేనీరు తాగించి, చెక్కు చేతిలో పెట్టారు. ఆనందంగా చెక్కు తీసుకుని, బస్సులో ఖమ్మం బయలుదేరాను. అక్కడినుండి రైలులో మానుకోటకు చేరుకున్నాను. ఇంటికి వచ్చాక ఒక ఆలోచన వచ్చింది, ఆలోచన రావడమే తరువాయి ఆచరణలో పెట్టేసాను. కొత్తగూడెం ఆకాశవాణి సంచాలకులకు ఒక ఉత్తరం రాసాను.

రేడియో కేంద్రం గురించి, సిబ్బంది గురించి, చాలా గొప్పగా రాస్తూ, ఈ మండు వేసవిలో సిబ్బంది అంతా హాయిగా కూలర్లు పెట్టుకుని, వేసవి తాకిడిని తప్పించుకుంటున్నారని, మరి ఎంతో దూరంనుంచి వస్తున్న మాలాంటి వారు కూర్చునే విశ్రాంతి గదిలో ఒక పంకా కూడా లేకపోవడం బాధాకరం అని.. ఇది మీ చేతిలో లేకపోయినా, ఒక బాధ్యత గల సాధారణ పౌరుడిగా మాత్రమే ఈ లేఖ రాస్తున్నానన్నది ఆ ఉత్తరం సారాంశం. నా.. ఉత్తరానికి వాళ్ళు భయపడి పోయి ఏదో చేస్తారని కాదు! స్పందించే నా గుణం ఆ.. పని చేయించింది అంతే. ఉత్తరం పోస్ట్ చేసి ఆ విషయం మర్చిపోయాను.

నేను ఉత్తరం రాసిన పది రోజులకు అనుకుంటాను, ఆకాశవాణి -కొత్తగూడెం స్టేషన్ డైరెక్టర్ గారి నుండి నాకు ఒక రిజిస్టర్డ్ లేఖ వచ్చింది. అది నాకు ఎంతో ఆశ్చర్యాన్నీ, ఆనందాన్నీ కలిగించింది. ఇలా కూడా జరుగుతాయన్న మాట అనిపించింది. సామాన్యుడి సణుగుడికి జవాబు దొరుకుతుందన్న నమ్మకం ఏర్పడింది.

ఇంతకీ డైరెక్టర్ గారి ఉత్తరంలోని సారాంశం ఏమిటంటే, విశ్రాంతి గదిలో పంకాలు లేకపోవడం నిజంగా కరెక్టు కాదనీ, విజిటర్స్‌ను ఇబ్బంది పెట్టడం మా ఉద్దేశ్యం కాదు అని, విషయం వారి దృష్టికి తీసుకు వచ్చినందుకు ధన్యవాదాలు తెలుపుతూ, మీ లేఖ చదివిన మరుక్షణమే విశ్రాంతి గదిలో రెండు పంఖాలు బిగించినామని, ఒకసారి వచ్చి చూడమని. స్పందించే గుణం, ప్రజల అవసరాలను అర్థం చేసుకునే అధికారులు ఉన్నంత వరకూ ఎలాంటి సమస్యలూ ఉండవని తెలుసుకున్నాను. తన జిల్లాకు శ్రీ వెంగళరావు గారు అందించిన సదుపాయాలు వృథా పోలేదని స్పష్టమయింది. ఈ సంఘటన ఎన్నటికీ మరువరానిది. ఆనాటి ఆ సహృదయ అధికారులకు చేతులెత్తి నమస్కరిస్తున్నాను.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్
December 13, 2020 at 7:09 am
సంచిక
సంపాదక వర్గానికీ
ఇతర సాంకేతిక వర్గానికీ
హృదయ పూర్వక కృతజ్ఞతలు.

Log in to Reply
2

sagar
December 13, 2020 at 8:11 am
మనప్రయత్నం మనం చేయాలి అని ఇక్కడ మీ రచన స్పష్టంగ తెలియచేస్తుంది సర్ . ఒక బాధ్యతకలిగిన పౌరుడిగా మీరు స్పందించినతీరు ముదావహం. కొత్తగూడెం రేడియో స్టేషన్ వెంగళరావు గారు పరిశ్రమల మంత్రిగా ఉన్నప్పుడు చేయించారని, అది అప్పటీ ఆకాశవాణి డైరెక్టర్ జనరల్ అనంతపద్మనాభరావుగారి ఆద్వర్యంలో జరిగింది అని నేను చదివాను. ఇప్పుడు మళ్ళి మీద్వారా ఙ్ఞాపకంతట్టిలేపింది. ఒక బాధ్యతకలిగిన ప్రభుత్వ ఉద్యోగిగా మాత్రమే కాక ఒక పౌరుడిగా, కవిగా, మీరు అందించిన సందేశం ఎంతో ఆచరణీయం సర్ . మీకు ధన్యవాదములు.

Log in to Reply
1. 2.1
  
  డా కె.ఎల్.వి.ప్రసాద్
  December 13, 2020 at 11:33 am
  సాగర్ ధన్యవాదాలు మీకు
  
  Log in to Reply
3

డా కె.ఎల్.వి.ప్రసాద్
December 13, 2020 at 9:03 am
డాక్టర్ గారికి నమస్సులు 🙏
ఏదో వెళ్లి… పనిచూసుకుని వచ్చాము అని అనుకునేవాళ్ళే ఎక్కువ ప్రస్తుత సమాజంలో..
మీరు దంత సంరక్షణయే కాకుండా
కవిగా స్పందించే మనసు ….
పరుల కోసం ఆలోచించే మీ వ్యక్తిత్వం
ఎందరికో ఆదర్శం….
మనవల్ల ఏమవుతుందని అనుకోకుండా… మీరు ప్రయత్నించడం… అది ఫలించడం
గొప్ప విషయం… మీ అనుభవాలు
మాకు తెలియని విషయాలను
పాఠాలుగా చెప్తున్నాయి…
శుభాకాంక్షలు సర్ 🙏

—–కళావతి.కందకట్ల.
హైదారాబాద్

Log in to Reply
1. 3.1
  
  డా కె.ఎల్.వి.ప్రసాద్
  December 13, 2020 at 9:03 am
  అమ్మా…
  మీ స్పందన కు
  ధన్యవాదాలండీ .
  
  Log in to Reply
4

Jhansi koppisetty
December 13, 2020 at 9:47 am
ఏదో వచ్చాము వెళ్ళాము… మనకెందుకు అనుకునే సమాజం తీరుకి విభిన్నంగా మీ వ్యక్తిత్వం ఎంతైనా ఆదర్శనీయం… మీ వ్యక్తిత్వానికి మరోసారి నా నమస్సులు🙏🏻🙏🏻🙏🏻

Log in to Reply
1. 4.1
  
  డా కె.ఎల్.వి.ప్రసాద్
  December 13, 2020 at 10:36 am
  ధన్య వాదాలు
  ఝాన్సీ గారు
  
  Log in to Reply
5

డా కె.ఎల్.వి.ప్రసాద్
December 13, 2020 at 10:35 am
డాక్టర్ గారికి నమస్సులు…… మీ జ్ఞాపకాల పందిరి చదివి చాలా సంతోషించాను .అభినందనలు💐 .విజిటర్స్ రూమ్ లో మీరు పడిన ఇబ్బంది మల్లి పునరావృతం కాకుండా రేడియో స్టేషన్ అధికారుల దృష్టికి తీసుకెళ్లి మంచి పనిచేసారు .అయితే మీరు లేఖతో కాకుండా ….మీ రికార్డింగ్ అయిపోయిన తర్వాత మీకు కాఫీ & చెక్ ఇచ్చినప్పుడు కూడా చెప్పి ఉండ వచ్చు . ఏది ఏమైనా మీరు చేసిన పని అభినందనీయం 💐💐
—–రాధాకృష్ణ
హనంకొండ.

Log in to Reply
1. 5.1
  
  డా కె.ఎల్.వి.ప్రసాద్
  December 13, 2020 at 10:35 am
  మీకు ధన్యవాదాలు సర్
  
  Log in to Reply
  1. 5.1.1
    
    డి.వి.శేషాచార్య
    December 13, 2020 at 11:04 am
    వ్యవస్థలో లోపాలను అందరూ చూస్తూనే ఉంటాం. కానీ స్పందించే విషయం లో మాత్రం మనకెందుకు లే అనుకునే వారే ఎక్కువ. మీరు సరైన విధంగా స్పందించారు. ఫలితంగా ఎందరికో సౌకర్యం కల్పించే అవకాశం కలిగింది.
    మంచి పని చేసానన్న తృప్తి మీకు మిగిలింది .
    సంతోషం.
    
    Log in to Reply
    1. 5.1.1.1
      
      డా కె.ఎల్.వి.ప్రసాద్
      December 13, 2020 at 11:32 am
      మిత్రమా
      మీకు
      ధన్యవాదాలు.
      
      Log in to Reply
6

Sambasivarao Thota
December 13, 2020 at 3:18 pm
Prasad Garu!
Chivaraki manche jarigindi..!!
Chaalaa Manchi Vishayam!!!
🙏🙏🙏

Log in to Reply
1. 6.1
  
  డా కె.ఎల్.వి.ప్రసాద్
  December 13, 2020 at 4:11 pm
  Thank you.
  
  Log in to Reply
  1. 6.1.1
    
    చిట్టె మాధవి
    December 14, 2020 at 5:15 pm
    సమయం లో స్పందించడం..బాధ్యతగా వ్యవహరించడం…పరిస్థితులను అవగాహన చేసుకోవడం…సరైన వారినే ప్రశ్నించడం..ఇవన్నీ ఉన్నత వ్యక్తిత్వ లక్షణాలు..మీరు ఎప్పుడూ పదిమందికి ఆదర్శప్రాయులు.మీకు వందనాలు🙏
    
    Log in to Reply
    1. 6.1.1.1
      
      డా కె.ఎల్.వి.ప్రసాద్
      December 14, 2020 at 9:00 pm
      అమ్మా
      మీ స్పందన కు
      ధన్యవాదాలండీ .
      
      Log in to Reply
7

డా కె.ఎల్.వి.ప్రసాద్
December 13, 2020 at 4:10 pm
జ్ఞాపకాలపందిరి 36
నిజాన్ని నిర్భయంగా చెప్పడం వలన
కళాకారులకు ,అతిధులుగా వచ్చే
పౌరులకు మీద్వారా కలిగిన ఉపయో
గం అది.ఇక దంతసమస్యల గురించి
నలుగురికి తెలియజెప్పి వారిని దంత
ఆరోగ్యంపట్ల శ్రద్ధ వహించే విధంగా
చేయాలనుకునే మీ ఆలోచనను
రేడియోలద్వారా ,దూరదర్శనుల
ద్వారా ,పత్రికలద్వారా తెలియజెప్ప
డం సదాచరణ. కేవలం జీతానికే
కాకుండ జీవితాలగూర్చికూడా ఆలో
చించే మీలాంటి వైద్యులు అన్ని వైద్య
శాఖలలో ఉండి రోగనిరోధక అలవాట్లు ,జాగ్రత్థలు ప్రసారం చేస్తే
చాల ఉపయోగం ప్రజలకు ,
ధన్యవాదాలు
———వజ్జల రంగా చార్య
హనంకొండ.

Log in to Reply
1. 7.1
  
  డా కె.ఎల్.వి.ప్రసాద్
  December 13, 2020 at 4:11 pm
  మీ స్పందన కు
  ధన్యవాదాలండీ .
  
  Log in to Reply
8

డా కె.ఎల్.వి.ప్రసాద్
December 13, 2020 at 9:20 pm
ఈనాటి మీ జ్ఞాపకాల పందిరి కవి సామాజిక బాధ్యతని,స్పందించే గుణాన్ని మరోసారి తేటతెల్లం చేసింది. కవి,రచయితా ఎప్పుడూ ఒక్కడు కాదు తనంటేనే సమాజం…అతి సున్నితమైన అంశాల నుండి కఠిన మెయిన విషయాల వరకూ ప్రశ్నించే స్వర కర్త.తనతో పాటు సమాజం బావుండలనే తపన కలిగి ఉండడమే కాక తన వంతుగా ప్రయత్నం కూడా చేస్తే ఫలితాలు అందించే సహృదయులు ఎదురౌతారని మంచి ఋజువుని అందించారు సర్…ఈ ఫాస్ట్ యుగంలో ఉన్న మా తరానికి మంచి అంశాన్ని పాఠం గా అందించారు. ధన్యవాదాలు సర్💐🙏

—— నాగ జ్యోతి శేఖర్

Log in to Reply
1. 8.1
  
  డా కె.ఎల్.వి.ప్రసాద్
  December 13, 2020 at 9:21 pm
  అమ్మా..
  మీ స్పందన కు ధన్యవాదాలండీ.
  
  Log in to Reply
9

మొహమ్మద్. అఫ్సర వలీషా
December 14, 2020 at 12:55 am
వావ్ సూపర్బ్ సార్👏👏👏👏 మీ స్పందించే గుణానికి శత కోటి వందనాలు.🙏🙏🙏🙏సమాజానికి మీ సేవ అపూర్వం అపురూపం సార్. ఒక దంత వైద్యులు గా , కవిగా , సమాజ లోటు పాట్లను సరిదిద్దే ఒక సామాజిక పౌరునిగా అధికారుల దృష్టికి తేవడం చక్కని మీ సహృదయతను చాటుతున్నది.మీ అనుభవాలు మాకు చక్కని మార్గదర్శకాలు. వారం వారం మీ జ్ఞాపకాల పందిరి నుండి జాలువారుతున్న చిక్కని అనుభూతుల వ్యాసాలకు హృదయపూర్వక శుభాకాంక్షలు శుభాభినందనలు ధన్యవాదాలు సార్ 🙏💐💐🙏💐🙏💐🙏💐🙏

Log in to Reply
1. 9.1
  
  డా కె.ఎల్.వి.ప్రసాద్
  December 14, 2020 at 5:38 am
  అమ్మా
  మీ స్పందన కు
  ధన్యవాదాలు.
  
  Log in to Reply
10

డా కె.ఎల్.వి.ప్రసాద్
December 14, 2020 at 8:58 pm
“ ప్రయోజనమనుద్దిశ్య నమందోఽపి ప్రవర్తతే “ అంటారు ( ప్రయోజనమనేది లేకుండా మందుడైనా సరే ఏ పనీ చెయ్యడు ) , కానీ ఆ ప్రయోజనమేదో పదిమందికీ మంచి చేసేదైతే మనంచేసిన పనికి సార్థకత ఉంటుంది … సరిగ్గా మీ ఆలోచనలు , మీరు చేస్తున్న ప్రయత్నాలు ఆ కోవలోకే వస్తాయి .. మనం ఉంటున్న చోటనో ,మనం వెళుతున్న చోటనో , ఎక్కడైనా చెయ్యాల్సిన పనులేవైనా ఉంటే దాని బాధ్యులకు తెలియజెయ్యటం మన ప్రాథమిక కర్తవ్యం … చాలామంది ఆ విషయం లో కొంత నిర్లక్ష్యాన్ని ప్రదర్శిస్తుంటారు … చెప్పినా అవతలి వారు పట్టించుకోరనో , మనం ఎందుకు చెప్పాలి వాళ్ళకు తెలియదా అనో కారణాలేవైనా కానీ చెప్పడం మాత్రంచెయ్యరు … ఆ విషయంలో మాత్రం మీరు పనిచేసిన ప్రతిచోటా బాధ్యతతో ప్రయత్నం మాత్రం మానకపోవటం మీలోని నిబద్ధతకు , ఒక పౌరబాధ్యతను విస్మరించక పోవటానికి నిదర్శనంగా చెప్పొచ్చు ..
మీరు చెప్పిన పని జరగటం ఆ పెద్దలకు తమ విధులపై ఉన్న శ్రద్ధకు తార్కాణం ..
ఇక్కడ మరో చిన్న మతలబు ఉంది .. మనం అనుకున్నది , మనంచెప్పింది కార్యరూపంలోకి వచ్చినప్పుడు మనం మరింత ఉత్సాహంతో ఇటువంటి వాటికి స్పందించటానికి తగిన ప్రోత్సాహం లభించినట్లౌతుంది …
ఇటువంటి మంచి పనులకు అది కారణమై నిలుస్తుంది ..
ఆకాశవాణి తో అనుబంధాన్నీ , అక్కడి ఆత్మీయమిత్రుల్నీ మీ జ్ఞాపకాల్లోంచి వెలికి తీసి మరోసారి మాకందరికీ గుర్తు చేసి ఆనందం కలిగించారు .. ధన్యవాదాలు సర్ …

——-గన్నమరాజు గిరిజామనోహర్ బాబు
హనంకొండ.

Log in to Reply
1. 10.1
  
  డా కె.ఎల్.వి.ప్రసాద్
  December 14, 2020 at 8:59 pm
  గురువు గారూ
  మీ..స్పందనకు
  హృదయ పూర్వక ధన్యవాదములు.
  
  Log in to Reply
11

డా కె.ఎల్.వి.ప్రసాద్
December 17, 2020 at 8:31 pm
Good evening Sir 🙏…part 36 of your educative cirsus vitae(c.v) is significantly memorable for:
1) The literati must take it as their societal and civic obligation to express their views opinions and impressions on issues of concern… Intellectuals are unacknowledged legislators…(Aeropagitica … by John Milton)
2) Some of the personnel of the AIR in general, and COTHAGOUDEM in particular… with whom you had some bonds are known to me as well…CS Rambabu, Jhansi KV kumari, N. Baburao , Dakshina Murthy,M Sudhakar, Mohd Khan et al..no doubt , were veterans of b casting.

However, two contra suggestible ( in my personal experience)individuals who were quoted in the episode,played a destructive,demoralising, devitalizing and devilish role in my identity by stigmatising, vilifieing , and assassinating my Conduct, Character, career , individuality and my stature for NO Reason or Rhyme like the villain IAGO in “Othello “..a play of Shakespeare…

3) The photo of the Station of AIR COTHAGOUDEM speaks of my tenure there. The office vehicle during my term was an arresting and come- hither BRIDE -BEAUTY with interior and exterior trappings… however, after my unchristian departure, the Bride too left the station permanently to the junk yard as a victim of CORRUPTION..😭😭

Sir, your Jnapakaala pandiri 36 , took me pleasantly into my memories I had with those who are friends and foes… and the Station…

You deserve accolades for your responsibilities in raising the issues of common /public concern with malice towards NONE.🙏🙏🙏❤️❤️❤️

—-Nakka.Sudhakar
Hyderabad

Log in to Reply
1. 11.1
  
  డా కె.ఎల్.వి.ప్రసాద్
  December 17, 2020 at 8:32 pm
  Thank you so much
  For your analytical
  Comment
  Sudhaakar garu.
  
  Log in to Reply
12

డా కె.ఎల్.వి.ప్రసాద్
December 18, 2020 at 7:53 am
బాగుందండీ
….మీ సామాజిక స్పృహ అలాంటిది మరి….

—–శర్మ
హైదారాబాద్.

Log in to Reply
1. 12.1
  
  డా కె.ఎల్.వి.ప్రసాద్
  December 18, 2020 at 7:54 am
  ధన్యవాదాలు
  
  Log in to Reply
13

డా కె.ఎల్.వి.ప్రసాద్
December 18, 2020 at 5:15 pm
మీరు విశ్రాంతి గదిలో పంఖా లేని విషయం స్టేషన్ డైరెక్టర్ దృష్టికి తీసుకురావడం, వారు మీ సూచనను సహృదయంతో స్వీకరించి అమలుచేయడం బహు ఆనందదాయకం. నిజంగా మీలాంటి వాళ్ళు చాలా అరుదు.

—–జి.శ్రీనివాసాచారి
కాజీపేట.

Log in to Reply
1. 13.1
  
  డా కె.ఎల్.వి.ప్రసాద్
  December 18, 2020 at 5:16 pm
  చారి గారూ ధన్యవాదాలు
  
  Log in to Reply
14

బి.జానిభాష
December 18, 2020 at 6:35 pm
సమాజంలో నలుగురికీ సంబంధించిన సమస్య ఏదైనా ఉత్పన్నం అయినప్పుడు స్పందించే గుణం చాలా తక్కువ మందిలో ఉంటుంది సర్.
తమకు సంబంధం లేదు విషయం కదా,అనవసరంగా మనం ఎందుకు స్పందించడం అని,తమ పని చూసుకునే వాళ్ళే ఈ సమాజంలో ఎక్కువ సర్.
కానీ మీలాంటి పెద్దలు ఇలాంటి నలుగురికి ఉపయోగపడే సమస్యల పై దృష్టి సారించి,దానిని సంబందిత అధికారుల దృష్టికి తీసుకువెళ్లినప్పుడు తప్పకుండా పరిష్కరం లభిస్తుంది అని మీరు పంచుకున్నా జ్ఞాపకం ద్వారా మరోమారు రుజువైంది సర్.
తమ కోసం, తమ కుటుంబ కోసం మాత్రమే బ్రతికే ఈ సమాజంలో మీలాంటి పెద్దలు(మహనీయులు)సమాజానికి ఉపయోగపడే పనులు యువతరానికి మార్గదర్శకంగా ఉంటుంది సర్.
సమాజ హితం కోసం స్పందించే పెద్దలందరికీ ఈ సందర్భంగా నా హృదయ పూర్వక ధన్యవాదాలు తెలియజేస్తున్నాను సర్…..మీ జాని

Log in to Reply
1. 14.1
  
  డా కె.ఎల్.వి.ప్రసాద్
  December 19, 2020 at 5:45 pm
  జానీ..
  ధన్యవాదాలు.
  
  Log in to Reply
15

డా కె.ఎల్.వి.ప్రసాద్
December 18, 2020 at 6:42 pm
జానీ భాషా
మీ స్పందన కు
ధన్యవాదాలండీ .

Log in to Reply
16

డా కె.ఎల్.వి.ప్రసాద్
December 19, 2020 at 5:46 pm
[19/12, 15:12] MANJULA M. DR: There are many people who responds to the problems immediately. Many will not raise the issues thinking that they will not be solved.
[19/12, 15:12] MANJULA M. DR: Because you are friendly with everyone they will also reciprocate.

Log in to Reply
1. 16.1
  
  డా కె.ఎల్.వి.ప్రసాద్
  December 19, 2020 at 5:46 pm
  Thank you Dr.
  
  Log in to Reply
17

డా కె.ఎల్.వి.ప్రసాద్
December 19, 2020 at 5:49 pm
Gd Aftn Doctor garu.
As you said, each individual has to involve in setting right the things. Whether they finally take a shape or not.

——suryanarayana Rao
Hyderabad

Log in to Reply
1. 17.1
  
  డా కె.ఎల్.వి.ప్రసాద్
  December 19, 2020 at 5:49 pm
  Thank you sir
  
  Log in to Reply
18

డా కె.ఎల్.వి.ప్రసాద్
December 19, 2020 at 5:53 pm
నమస్తే సార్. మీ ఙాపకాలపందిరి ఆకాశవాణి వారి పరిచయాలు, వారి నిజాయితీని తెల్పుతూ చాలా బాగుంది సార్. నేను వరంగల్ ఆకాశవాణి కేంద్రం ప్రారంభంలో ఒక సంవత్సరం ప్రోగ్రాం అసిస్టెంట్ గా పనిచేశాను. మీరు తెల్పిన వారిలో 50% నాకూ పరిచయం. అందరూ ఆత్మీయంగా మాట్లాడేవారు. మీ ఙాపకాలపందిరితో వారిని,అప్పటి నా ఙాపకాలను గుర్తు చేసినందుకు ధన్యవాదాలు, వందనాలు సార్. 👌🙏

. .—-డా.విద్యాదేవి
హనంకొండ.

Log in to Reply
1. 18.1
  
  డా కె.ఎల్.వి.ప్రసాద్
  December 19, 2020 at 5:54 pm
  మీ కు
  ధన్యవాదాలు.
  
  Log in to Reply
19

రాపాక అశోక్ కుమార్
December 20, 2020 at 8:29 am
సాధారణంగా ఇటువంటి పరిస్థితుల్లో బయటకు వచ్చి మన స్నేహితులతో సందర్శకులకోసం ఒక ఫ్యాన్ కూడా వేయించలేదు. వాళ్లు మాత్రం ఎసి రూమ్ లో కూర్చుంటునారు అని మన అసహనం, అసౌకర్యం వ్యక్తం చేస్తాం. అలా చేయడం వలన లాభం లేకపోగా వారి దృష్టికి వెలితే మన మీద వున్న గౌరవం పోతుంది. కానీ మీరు అప్రోచ్ అయిన విధానం బాగుంది. హుందాగా వుంది. వారు సంతోషించే లా వుంది. అందుకే పని జరిగింది.

Log in to Reply