జ్ఞాపకాల పందిరి-182 | సంచిక - తెలుగు సాహిత్య వేదిక

జ్ఞాపకాల పందిరి-182

[“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే..!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.]

విపణి వీధిలో..!!

నిత్యావసరాల కోసం దుకాణాలను దర్శించ వలసిందే! కొందరు నెలకొకసారి కావలసిన సరుకులు కొని తెచ్చి పెట్టుకుంటే, మరి కొందరు వారానికి ఒకసారి, ఇంకొందరు ఏరోజుకారోజు అవసరాలు కొని తెచ్చుకోవడం మనం చూస్తున్నాం. ఇప్పుడంటే, ప్రతి చిన్న వూళ్ళోను సూపర్ బజార్లు, మాల్స్ వెలిసాయిగాని, ఒకప్పుడు, గ్రామంలో చిల్లర దుకాణాలు ఉంటే, ఆ దుకాణుదారులు, ఇంకాస్త పెద్ద దుకాణాలు గల తాలూకా స్థాయిలోనూ, తర్వాత జిల్లా స్థాయిలోనూ, జిల్లా వాళ్ళు రాష్ట్ర స్థాయి పెద్ద దుకాణాల మీద ఆధారపడి ఉండేవారు. అప్పట్లో రవాణా సౌకర్యాలు అంతగా లేకపోవడం కూడా ప్రధాన కారణం కావచ్చు. అలా ఎవరి స్థాయిలో వాళ్ళు కొనుగోరుదారులను దోచుకునేవారు. రాష్ట్ర స్థాయిలో కొన్న సరకు గ్రామస్థాయి వచ్చేసరికి రేటుకు రెక్కలు వచ్చేవి.

ఇక కూరగాయల విషయానికి వస్తే, గ్రామాలలో ఎవరి ఇంటి పరిసరాలలో వారు, అవసరమయిన కాయగూరలు, ముఖ్యంగా పొట్లకాయలు, సొరకాయలు (ఆనపకాయలు)కాకరకాయలు, బీరకాయలు, బెండకాయలు, వంకాయలు, దొండకాయలు, చిక్కుడుకాయలు, మునగ కాయలు, మిరప, టమాటా వగైరా పండించి, తమ అవసరాలకు సరిపడా ఉంచుకుని, మిగతావి తెలిసిన వాళ్లకి పంచుకునేవారు. అలాగే, గోంగూర, తోటకూర, పాలకూర, పొన్నగంటి కూర వంటి ఆకుకూరలు కూడా పండించుకునేవారు.

ఫుట్‌పాత్ మీద తాజా ఆకుకూరలు (మినీ ట్యాంక్ బండ్)

ప్రత్యేకంగా కూరగాయలు కొనవలసిన అవసరం ఉండేది కాదు. అలాగే గ్రామాలలో చిన్నకారు, పెద్ద రైతులు, తమ మెట్టభూముల్లో, లంకల్లో వాణిజ్యపరంగా పెద్దమొత్తంలో కూరగాయలు, ఆకుకూరలు పండించి మధ్య దళారులకు అమ్మేసేవారు. అవి, తాలూకాలు, జిల్లాలకు, రాష్ట్ర రాజధానికి సరఫరా అయ్యేవి. అలాగే, కొన్ని గ్రామాలకు అనువుగా ఒక ప్రధాన కేంద్రంలో ఎక్కడో ఒకచోట వారానికి ఒకసారి ‘సంత’ ఏర్పాటు చేసేవారు. అక్కడ అన్నివర్గాల ప్రజలకు అవసరమైన సరకులు, కూరగాయలూ అందుబాటులో ఉండేవి. నేను పుట్టిపెరిగిన మా దిండి (తూ. గో. జిల్లా) గ్రామానికి దగ్గరలో మల్కీపురంలో ప్రతి ఆదివారం సంత జరిగేది. గ్రామంలో సంతకు వెళ్లి రావడం గొప్పగా చెప్పుకునేవారు. ఇంతవరకూ నేను ఆ సంతను చూడలేక పోవడం నా దురదృష్టమని చెప్పాలి. మాంసాహారులకు సైతం వారి అవసరాలు ఆదివారమే తీరేవి.

ఫుట్‌పాత్ మీద తాజా ఆకుకూరలు (మినీ ట్యాంక్ బండ్)

నా బాల్యం ఎక్కువశాతం హైదరాబాద్‌లో అన్నయ్య దగ్గర గడిచింది. అందుచేత కూరగాయలు కొనుక్కొచ్చే పని నా మీద పడేది. అన్నయ్య కుబ్ధిగూడాలో వున్నప్పుడు, అక్కడికి దగ్గరలోని చాపెల్ బజారుకు అన్నయ్య వెంట (అప్పుడప్పుడూ సుల్తాన్ బజార్) కూరగాయలు తేవడానికి వెళ్ళేవాడిని. ఆ అనుభవంతో, అన్నయ్య మాసాబ్ ట్యాంక్ దగ్గర కాపురం వుంటున్నప్పుడు, చింతల బస్తీకి వెళ్లి నేనే కూరగాయలు కొని తెచ్చేవాడిని. కొద్దిగా హిందీ మాట్లాడడం (ఉర్దూ, హిందీ, తెలుగు మిశ్రమం) ఈ కూరగాయల మార్కెట్ లోనే నేర్చుకున్నాను. 1967లో నేను హైదరాబాద్‌లో విన్న/కొన్న టమాటా కిలో ధర పది పైసలు మాత్రమే! ఇది నాకు బాగా గుర్తుంది.

తర్వాత నేను కూరగాయలు కొనవలసిన అవసరం 1983లో, ఉద్యోగపరంగా మహబూబాబాద్ (అప్పుడు తాలూకా, ఇప్పుడు జిల్లా)లో ఏర్పడింది. అక్కడ వైద్యులకు సంబంధించి నేను ఒక్కడినే కూరగాయల మార్కెట్‌లో కనిపించేవాడిని. డాక్టర్లు ఎవరూ కూరగాయల మార్కెట్‌కు వచ్చేవారు కాదు. తర్వాత నేను హన్మకొండలో స్థిరపడడం మూలాన ఈ కూరగాయల వ్యవహారం నేనే చూసుకునేవాడిని. ప్రతి ఆదివారం అలా కూరగాయల మార్కెట్‌కు‌ వెళ్లడం సంతోషం అనిపించేది. అలా వారానికి ఒకసారి కావలసిన కూరగాయలు తెచ్చుకోవడం అలవాటు అయింది.

ఫుట్‌పాత్ మీద తాజా కూరగాయలు (మినీ ట్యాంక్ బండ్ పక్కన,సఫిల్ గూడ)

ఈ ఫోర్టుఫోలియో ఇప్పటికీ నాతోనే కలసి నడుస్తున్నది. అది నాకు నామోషీగా అనిపించదు.

జీవితంలో మలిదశ ప్రాప్తించింది, ఇద్దరం పదవీ విరమణ చేసాం. కొడుకు ఉద్యోగ రీత్యా అమెరికా (బోస్టన్) వెళ్ళిపోయాడు, కూతురు కూడా ఉద్యోగ రీత్యా సికింద్రాబాద్ చేరుకుంది. మా అవసరాలు, వాళ్ళ అవసరాలను బట్టి మేమిద్దరం సికింద్రాబాద్ (సఫిల్ గూడ) రాక తప్పలేదు. జంటనగరాలలో ఈ రోజున అన్నీ పెద్ద పెద్ద మార్కెట్లు, సూపర్ బజార్లు, మాల్స్ ఉన్నాయి. రుతువులలో పనిలేకుండా అన్ని రకాల కూరగాయలు, ఆకుకూరలు దొరుకుతాయి. డబ్బు ఉండాలే గానీ దేనికీ కొదవలేదు. తర్వాత స్వంత ఇల్లు వున్నవారు, ఇంటి చుట్టూరా నేల లేకపోయినా మిద్దెమీద (టెర్రస్ గార్డెన్) కూరగాయలు, ఆకుకూరలు పండించుకుని హాయిగా తృప్తిగా తింటున్నారు. ప్రకృతి సిద్ధమైన ఎరువులతో ఆరోగ్యకరమైన కూరగాయలు పండించుకోగలుగుతున్నారు.

ప్రతి రోజు ఉదయం కనిపించే చిరువ్యాపారస్థుల కూరగాయల షాపులు (సఫిల్ గూడ)

అది అలా ఉంచితే, ఆశ్చర్యకరమైన విషయం ఏమిటంటే, ఇంత పెద్దనగరంలో కూడా ‘సంత’ సంస్కృతీ కొనసాగడం. హైదరాబాద్ – సికింద్రాబాద్ నగరాలలో ప్రతి రోజు ఎక్కడో ఒక చోట ఈ సంతలు కనిపిస్తున్నాయి. చక్కని తాజా కూరగాయలు – ఆకుకూరలు, పండ్లు లభ్యం అవుతున్నాయి. అదృష్టావశాత్తు, మేము వుండే సఫిల్ గూడ ప్రాంతంలో, ప్రతి ఆదివారం ‘సంత’ వుంటున్నది. అలా ఈ సంత నాకు చాలా అనుకూలంగా వుంది. ఇక్కడ కూడా కూరగాయల వ్యవహారం నాదే. చక్కగా వారానికి సరిపడా నచ్చిన కూరగాయలు తెస్తుంటాను. అలా తాజా కూరగాయలు తిన్నామన్న తృప్తి, సరాసరి రైతునుండి కొనుగోలు చేస్తున్నామన్న మానసిక ఆనందం వెలకట్టలేనిది. ఆదివారం సంతతో పాటు ప్రతిరోజూ కూరగాయలు, ఆకుకూరలు, పండ్లు, గ్రామాలనుండి తీసుకు వచ్చి ఫుట్‌పాత్‌ల మీద పెట్టి అమ్ముతుంటారు. ఇవి కూడా తాజా కూరగాయలే! వీరి దగ్గర బేరమాడాలని అనిపించదు. కానీ ఎక్కువ శాతం జనం బేరమాడే అలవాటును కలిగి ఉండడం వల్ల అమ్మే వాళ్ళు కూడా ముందు ఎక్కువ రేట్లు చెప్పడం మొదలు పెట్టడంతో నాలాంటి వాళ్లకి ఇబ్బంది కలుగుతున్నది.

కార్పొరేట్ సూపర్ బజార్లలో, ఎంత రేటు రాసివున్నా మాట్లాడకుండా కొనుగోలు చేస్తాముగానీ, ఇలా కస్టపడి దూరాభారాలు లెక్క చేయకుండా మనకు అందుబాటులో వుండే చిన్న దుకాణాలలో మాత్రం బేరాలాడి వాళ్ళని విసిగిస్తాం. జనంలో ఈ పద్ధతి పోవాలి. సాధ్యమయినంత వరకూ ఇంటి చుట్టూరా ఏ కొంచం నేల వున్నా, పూలమొక్కల ప్రాధాన్యత తగ్గించి, కూరగాయలు, ఆకుకూరలు పండించుకోవాలి. శక్తి సామర్థ్యాలు వున్నవాళ్లు, మిద్దెతోట ఏర్పాటుకు సిద్ధపడాలి. దీనివల్ల రసాయనాల బారినుండి తప్పించుకుని స్వచ్ఛమైన తాజా కాయగూరలు పండించుకుని, తినే అవకాశం కలుగుతుంది.

ప్రతి రోజు ఉదయం కనిపించే చిరువ్యాపారస్థుల కూరగాయల షాపులు (సఫిల్ గూడ)

ఇప్పుడు నా జీవితం, ఉదయకాలంలో, కూరగాయల – ఆకుకూరల కొనుగోలు, నా నిత్య నడకతో అనుసంధానమై వుంది. గంటసేపు నడక కొనసాగించి, తిరుగు ప్రయాణంలో కనిపించిన తాజా కూరగాయలో, ఆకుకూరలో కొని తేవడం నిత్యకృత్యం అయిపొయింది. అప్పుడప్పుడూ ఇళ్ల వద్దకు కూడా రావడం వల్ల, హైదరాబాద్ వంటి మహానగరాల్లో కూడా చాలా ప్రాంతాల్లో తాజా కాయగూరలు సరసమైన ధరలలో కొనుక్కునే అవకాశం కలుగుతున్నది. అందుచేత నా ఓటు ఎప్పుడూ చిన్న చిన్న దుకాణాలకే! కొన్ని అవసరాలకు కార్పొరేట్ సూపర్ మార్కెట్‌లు దర్శించక తప్పదు మరి!! చిన్న చిన్న వ్యాపారస్థులను కూడా వారి జీవనోపాధిని దృష్టిలో ఉంచుకుని ప్రోత్సహించక తప్పదు. అలాగే రోడ్డు ప్రక్కన చిన్నదుకాణదారులు వద్ద లభ్యమవుతున్న కూరగాయలు కొనడం, తక్కువగా అంచనా వేయకూడదు. నామోషీగా ఫీల్ కాకూడదు.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్
October 1, 2023 at 7:44 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
—-డా కె.ఎల్.వి.ప్రసాద్.

Reply
2

Sagar
October 1, 2023 at 8:30 am
కాలగమనంలో సూపర్ మార్కెట్ల విజృంభణ చిన్న వ్యాపారుల పాలిట శాపమయ్యింది సర్ . ఇక ధనవంతుల ఓటుకూడ సూపర్ మార్కెట్లకే పడటంతో చిన్న వ్యాపారుల పరిస్ధితి దీనాతి దీనం. ఇలాంటి పరిస్ధితుల్లో స్వామి కార్యం, స్వకార్యంలా మీరు వాకింగ్ తో పాటు కూరగాయల కొనుగోలుతో చిన్న వ్యాపారస్దులకు మీ వంతు సహాయం చేయడం అభినందనీయం. మీకు ధన్యవాదములు సర్ .

Reply
1. 2.1
  
  డా కె.ఎల్.వి.ప్రసాద్
  October 2, 2023 at 6:29 am
  సాగర్
  నీ స్పందనకు ధన్యవాదాలు .
  
  Reply
3

డా కె.ఎల్.వి.ప్రసాద్
October 1, 2023 at 5:20 pm
బాగుంది మీ వ్యాసం…నా ఓటు మీకే…నేనూ అంతే! చివరికి కిరాణా సామానుకు కూడా మాల్స్ కి వెళ్లను.ఇంటికి దగ్గరగా ఉండే షాపులో నే గత 40 ఏళ్లుగా సామాను కొంటున్నాము.ఈమాల్స్ వచ్చి చిన్న సన్నకారు వ్యాపారులను బాగా దెబ్బ తీసింది.
—-పెబ్బిలి హైమవతి
విశాఖపట్నం

Reply
1. 3.1
  
  డా కె.ఎల్.వి.ప్రసాద్
  October 2, 2023 at 6:30 am
  ధన్యవాదాలు
  అక్కగారూ…..
  
  Reply
4

పుట్టి నాగలక్ష్మి
October 1, 2023 at 11:23 pm
సంత గురించి వ్రాశారు.హాయిగా అనిపించింది. మేము మా అబ్బాయి డా.శ్రీకాంత్ ఉద్యోగరీత్యా నిజామాబాద్ జిల్లాలోని ఆర్మూర్ లో ఉంటున్నాము.ఇక్కడకి వచ్చిన దగ్గర నుంచీ సంతలో తాజా కూరగాయలు కొనుక్కుంటున్నాము.
నాకు కూడా మాల్స్ చూస్తుంటే జీవనోపాధి కోల్పోయిన చిరు వ్యాపారులు గుర్తు కొచ్చి బాధ కలుగుతుంది. చాలా మంచి విశేషాలను అందించిన మీకు అభినందనలు, ధన్యవాదాలు డాక్టర్ గారూ! 🌹💐🙏🏻

Reply
1. 4.1
  
  డా కె.ఎల్.వి.ప్రసాద్
  October 2, 2023 at 6:31 am
  మీ స్పందన కు ధన్యవాదాలండీ
  
  Reply
5

Mohammad. Afasara Valisha
October 2, 2023 at 2:02 am
మీరు వ్రాసింది అక్షరాలా నిజం సార్ చిరు వ్యాపారుల పట్ల మీకున్న ఆదరణ అభినందనీయం సార్ షాపింగ్ కు వెళ్లామా చేశామా వచ్చామా అని కాకుండా మన వంతు సాయం ఏం చేశామా అనే మీ సహృదయతకు శిరస్సు వంచి నమస్కరించాలి సార్. చిన్నదైనా, పెద్దదైనా విషయం స్ఫూర్తి దాయకంగా వ్రాసి మమ్మల్ని మీ అడుగు జాడలలో పయనింప చేస్తున్నందుకు హృదయపూర్వక ధన్యవాదాలు కృతజ్ఞతలు సార్. మంచి విషయాలను వ్యాసాలుగా వ్రాసి మాకు అందిస్తున్న మీకు నా హృదయపూర్వక శుభాకాంక్షలు శుభాభినందనలు సార్ 💐💐💐💐💐💐💐💐💐💐💐💐🙏
మొహమ్మద్. అఫ్సర వలీషా
ద్వారపూడి (కోనసీమ జిల్లా)

Reply
1. 5.1
  
  డా కె.ఎల్.వి.ప్రసాద్
  October 2, 2023 at 6:32 am
  ఆమ్మా
  మీ అభిమానానికి
  ధన్యవాదాలు.
  
  Reply
6

డా కె.ఎల్.వి.ప్రసాద్
October 2, 2023 at 6:27 am
మీరు ఏ అంశం స్పృశించినా భలే తాజాగా ఎంచుకున్నారే అనిపిస్తుంది సర్.ఈ రోజు తాజా కూరలు గూర్చి ,చాలా మంది పెద్ద ఉద్యోగాల్లోకి వెళ్ళాక కూరగాయలు సంత నుండి తేవడం నామోషీగా భావిస్తారు మీరు ఖుషీగా భావిస్తారు అని తెలిసి సంతోషం గా ఉంది.చిరు వ్యాపారులను ప్రోత్సహించాలనే అభిప్రాయం చాలా మంచిగా ఉంది.మీ అనుభవాల్లోంచి ఎప్పటికీ తాజాగా ఉండే జ్ఞాపకాలను పంచుకున్నందుకు ధన్యవాదాలు సర్💐💐💐🙏
—-నాగ జ్యొతి శేఖర్
కాకినాడ.

Reply
1. 6.1
  
  డా కె.ఎల్.వి.ప్రసాద్
  October 2, 2023 at 6:32 am
  జ్యొతీ
  నీ స్పందనకు ధన్యవాదాలు.
  
  Reply
7

డా కె.ఎల్.వి.ప్రసాద్
October 2, 2023 at 6:35 am
చాలా చక్కటి అంశం తీసున్నారు సర్
—-కె.కళావతి
USA

Reply
1. 7.1
  
  డా కె.ఎల్.వి.ప్రసాద్
  October 2, 2023 at 6:42 am
  ధన్యొస్మీ
  
  Reply
8

డా కె.ఎల్.వి.ప్రసాద్
October 2, 2023 at 6:41 am
Gd Evng Doctor garu,

Buying vegetables is my job even today.

We go to “Mandi” a veg shop near our house to get the fresh 🥦🥕🌽 for 2-3 days requirement.

🍃🍀vegetables we take from the vendor who visits daily to our area.
—–suryanarayana rao
Hyderabad.

Reply
1. 8.1
  
  డా కె.ఎల్.వి.ప్రసాద్
  October 2, 2023 at 6:42 am
  Thank you sir
  
  Reply
9

Shyamkumar Chagal. Nizamabad
October 2, 2023 at 11:54 am
ఈ రోజుల్లో ఎంత పెద్ద పెద్ద సూపర్ మార్కెట్ లు మన అందుబాటులోకి వచ్చినప్పటికీ మన ఇళ్లకు దగ్గరగా అత్యవసర సమయాల్లో మన అవసరాలు తీర్చేది చిరు వ్యాపారులే అన్నది గమనించాలి.
చిన్న చిన్న కిరాణా దుకాణాలు కూరగాయల కొట్లు ఆ వ్యాపారస్తుల లాభార్జన కొరకై పెట్టినప్పటికీ నేటి పెద్ద పెద్ద వ్యాపార సముదాయాల దోపిడి ముందు అవి చాలా చిన్నవి. కొన్నిసార్లు ఈ చిన్న వ్యాపారస్తుల దగ్గర కాస్తంత ధరలు ఎక్కువున్నప్పటికీ వాటి మీద ఆధారపడ్డ ఆ వ్యక్తి యొక్క శ్రమ ముందు అవి ఏ పాటికి కొరగావు.
ఎండా వానలకు ఓర్చుకుంటూ వీధి పక్కన కూర్చుని పళ్ళు కూరగాయ లు అమ్ముతున్న వారిని ఒకసారి గమనించి చూస్తే వారితో మనం బేరం చేసి మిగులుచుకుంటున్న ఒకటి రెండు రూపాయలు మన అమాయకత్వానికి , అపరిపక్వత కు ఉదాహరణలు మాత్రమే.

నిజం చెప్పాలంటే కూరగాయలు కొనుగోలు అనేది మొత్తంగా కళ మరియు నైపుణ్యంతో కూడినవి. ధర మరియు నాణ్యతతో సహా తూకం విషయంలో కూడా జాగ్రత్త వహించకపోతే ఇంట్లో మొట్టకాయలు తప్పనిసరిగా పడిపోతాయి.

ఇంటి లో కూరగాయలు పండించుకోవడం అన్నది పూర్వకాలంలో అతి సాధారణం అయినప్పటికీ ప్రస్తుత రోజుల్లో దాబా గార్డెన్స్ అంటూ హాబీ ప్రాచుర్యంలోకి వస్తోంది. ముఖ్యంగా కరోనా సమయంలో
వీటి అవసరం అందరికీ అర్థమైంది.
చిరు వ్యాపారుల పట్ల రచయిత గారి దృక్పథం చాలా బాగుంది. అంతేకాదు మన అందరికీ కూడా ఆచరణీయమని చెప్పాలి. ఈ విషయంలో ఈ మధ్యకాలంలో సోషల్ మీడియాలో ఎన్నో రకాలైన సలహాలు కూడా చూస్తున్నాం. అనుబంధాలతో ప్రేమతో వ్యవహరించే చిరు వ్యాపార సంస్థలే మన భారతీయ జీవిత సరళి లో భాగం.
వీధి వ్యాపారం లో బేరం చేయ క తప్పనిసరి అవడం రచయిత అన్నట్లు గా’ బాధాకరం’. వారు కూడ అధిక ధర చెప్పటం అలవాటు గా మారింది.
అయినా సరే అక్కడ చాలా వరకు కొనడమే సరైన పద్ధతి.
జ్ఞాపకాల పందిరి గురించి ప్రతివారం ఒక కొత్త విషయాన్ని గమనించి దాని మీద వ్యాసం రాయడానికి కావలసిన సంగతులను ఆసక్తికరంగా మన ముందు ఉంచడం అంత తేలికైన పని కాదు. అయినా ప్రతి వారం ఒక కొత్త అంశాన్ని ఎన్నుకొని దానికి తన జీవితంలోని దైనందిన అంశాలను జోడించి మనకు అందిస్తున్న రచయిత గారికి నా అభినందనలు.

ప్రతివారం జ్ఞాపకాల పందిరి శీర్షికలో ఆరోగ్యకరమైన విషయాలను మన ముందు చర్చకు మనకు అందిస్తున్న నా గురువుగారు డాక్టర్ కే ఎల్ వి ప్రసాద్ గారికి నా నమస్సులు.

Reply
10

N.Bhujanaga Rao
October 2, 2023 at 12:01 pm
ఈ సంచికలో ఒక మంచి విషయాన్ని తీసుకొని చక్కగా చెప్పారు.సూపర్ మార్కెట్లు, మాల్స్ వచ్చాక చిరు వ్యాపారులకు శాపమే.సూపర్ మార్కెట్లోకి వెళితే అంత తాజాగా ఉండవు కానీ రెట్ మాత్రం ఎక్కువగానే ఉంటుంది. రోడ్ ప్రక్కన చిన్న వ్యాపారుల వద్ద లభ్యమౌతున్న కూరగాయలు మరియు దినుసులు గానీ తాజాగా ఉండటమే కాకుండా రేట్ కూడా తక్కువగా ఉంటాయనడంలో సందేహం లేదు. ఏరోజు ఆరోజు అన్నట్లుగా జీవనం గడుపుకునే చిన్న స్థాయి వీధి వ్యాపారులపై ఉదారంగా వ్యవహరించాలని, వారికి చేయూత నివ్వడంలో మన బాధ్యతను గుర్తు చేసి మంచి విషయాలు అందించిన డాక్టర్ గారికి అభినందనలు మరియు ధన్యవాదములు 🙏

Reply
11

డా కె.ఎల్.వి.ప్రసాద్
October 2, 2023 at 12:57 pm
సాధారణంగా చాలామంది మనలో ఉదయం పూట వాకింగ్ వెళ్లటం సర్వసాధారణ అంశమే ,కానీ దారిలో కనిపించే అవసరమైన కూరగాయలు కొనుగోలు చేసి తీసుకురావడానికి బద్దకిస్తూ లేదా నామోషీగా ఫీల్ అవుతూ ఉంటారు .సిటీ ఔట్స్కట్స్ లో ఉంటున్న మనలాంటి వారికి వారాంతపు సంతలే కాకుండా ,తాజా కూరగాయలు ముఖ్యంగా ఆకుకూరలు లభించటం ఒక వరంగా భావించవచ్చు. మెట్రో సిటి లో ఉంటున్న వారందరికీ పెద్దపెద్ద షాపింగ్ మాల్స్ లో , ఫ్రీజర్ లో పెట్టిన కూరగాయలు ,కెమికల్ స్ప్రే ద్వారా నవనవలాడే ఆకుకూరలు తప్ప తాజా కూరగాయలు లభించకపోవడం ఒక శాపములాంటిదే అనుకోవాలి.
ఉదయం పూట వాకింగ్ కి వెళ్లి వస్తూ, తాజా కూరగాయలు ఇంటివారికి అందించడం అనేది ,స్వామి( శ్రీమతి )కార్యం ,స్వకార్యము రెండు పూర్తి చేసినట్లే. ఇక్కడ శ్రీమతి… అని నర్మగర్భంగా తెలియజేయడంలో ఉద్దేశం ,సద్ది పెట్టెను వెతుక్కుని ,ఆరోజు ఏ కూర చేయాలి! అనే సంథిగ్ధావస్థకు పరిష్కారం చూపిన వారమే కాకుండా ,చిరు వ్యాపారులకు కూడా ఉపాధి కల్పించిన వారమవుతాము అనటంలో ఎటువంటి అతిశయోక్తి లేదు.
ఇకపోతే తమ రచనల ద్వారా మరియు వైద్యుడి గాను ,సుపరిచితులైన డాక్టర్ కె ఎల్ వి గారు ,వారి అనుభవాలతో కూడిన రచనలు అందించడంలో సిద్ధహస్తులు .వారు తమ పూర్వాశ్రమంలోని వైద్య వృత్తిని గుర్తు చేస్తూ మార్నింగ్ వాకింగ్ వలన కలిగే ప్రయోజనాలను , చిరు వ్యాపారును ప్రోత్సహించడం అనే సామాజిక సేవ యొక్క విశిష్టతను ,తాజా కూరగాయలు తినటం వలన కలిగే ఆరోగ్య ప్రయోజనాలను వివరిస్తూ మరో వారం ఈ శీర్షికలో అందిస్తే బాగుంటుంది.
—–బి.రామ కృష్ణారెడ్డి
సఫిల్ గూడ.

Reply
12

అల్లూరి Gouri Lakshmi
October 3, 2023 at 6:23 am
తాజా కూరల గురించి చక్కగా వివరించారు..సూపర్ మార్కెట్ లో కూరలు konevallanu చూస్తే జాలి కలుగుతుంది..ఫ్రెష్ వెజిటబుల్స్ అందించే సంతను కళ్ళతో చూస్తే చాలు హాయిగా ఉంటుంది.ఈ వారం జ్ఞాపకాల పందిరి మా నాన్నగారిని గుర్తు చేసింది.ఆయన Sunday సంతకి మలికిపురం వెళ్ళేవారు.

Reply