జ్ఞాపకాల పందిరి-168 | సంచిక - తెలుగు సాహిత్య వేదిక

జ్ఞాపకాల పందిరి-168

[“కొన్ని అనుభవాలు, కొందరి జీవితాలకు జ్ఞాన మార్గాలు కావచ్చు. జీవనశైలిని సరిదిద్దుకునే వినూత్న పోకడలు కావచ్చు. అందుకే, అందరి అనుభవాల జ్ఞాపకాలూ, అందరికి అవసరమే..!!” అంటూ తమ జ్ఞాపకాల పందిరి క్రింద విహరింపజేస్తున్నారు డా. కె. ఎల్. వి. ప్రసాద్.]

పుట్టినరోజు.. పండుగే..!?

చిన్నప్పుడు పుట్టినరోజు తలుచుకుంటే ఆశ్చర్యం వేస్తుంది. సామాన్యుడి నుండి కోటీశ్వరుడి వరకూ చేసుకునే పుట్టినరోజుల గురించి విశ్లేషించుకుంటే, వారి వారి స్థాయిని బట్టి, పుట్టినరోజులు చేసుకోవడం మనం చూస్తూనే వున్నాం. కొందరైతే తమ దర్పం, హోదా చూపించుకోవడానికే ఒకరిని మించి మరొకరు వేడుకలు జరుపుతుంటారు. కొందరి పుట్టినరోజు వేడుక ఇంటివరకే పరిమితమైతే, మరికొందరు పెద్ద పెద్ద హాల్స్ బుక్ చేసుకుని రంగరంగ వైభవంగా నలుగురికీ తెలిసేటట్లు విపరీతమైన హంగామాలు జోడించి పెద్ద పండుగ మాదిరిగా జరుపుకుంటారు.

చి. నివిన్.. పుట్టిన రోజు ఆహ్వానం

బర్త్ డే.. బాబు నివిన్ అయాంశ్.నల్లి

అయితే ఇలా పెద్ద ఎత్తున పుట్టిన రోజు పండుగ జరపడం, పెద్దలకంటే, మొదటి సంతానానికో, లేకుంటే చాలాకాలం తర్వాత పుట్టిన మొదటి సంతానానికో ఘనంగా చేయడానికి ప్రయత్నం చేస్తుంటారు. ఇందులో ఆడపిల్లలకు ఒక మాదిరిగా, మగపిల్లలకు (వంశోద్ధారకులు కదా) మరో మాదిరిగా సెలబ్రేట్ చేస్తుంటారు.

ముది మనుమడి కోసం ప్రార్ధన చేస్తున్న రచయిత అత్త గారు శ్రీమతి.పద్మ (విజయవాడ)

మనవడు నివిన్ కు పుట్టినరోజు శుభాకాంక్షలు చెబుతూ రచయిత

డబ్బున్నవాళ్ళు ఎలాగైనా చేస్తారు. అన్ని హంగులకు ఆర్భాటాలకు కొదవ ఉండదు. జీతాలతో బ్రతికే ఉద్యోగస్థులకు ఇబ్బంది లేదు. జీతం మీద భరోసాతో ఎంతైనా ఖర్చు పెట్టడానికి వెనుకాడరు. పులిని చూసి నక్క వాత పెట్టుకున్నట్టు, సామాన్యుడు కూడా తమ పిల్లల పుట్టినరోజు పండుగగా ఘనంగా చేయాలనే చూస్తాడు. కానీ,అది ఎలా సాధ్యం. అప్పులు చేసి ఆ కోరిక తీర్చుకోవాలి. ఇలా ఒకరిని చూసి మరొకరు ఈ పుట్టిన రోజు పండుగలు చేయడానికి ఎగబడుతున్నారు.

మేనమామ రాహుల్, మేనత్త దివ్య,లతో చి.నివిన్.

కుటుంబ సభ్యుల మధ్య కేక్ కటింగ్

ఈ పండుగలలో ఆత్మీయతలు, ప్రేమలు పక్కన పెడితే, ఫలానా వాళ్ళు ఫంక్షన్ ఎలా చేసారు, ఎంత వైభవంగా చేశారు, ఎన్ని రకాల వంటకాలు వడ్డించారు, ఎంత ఖరీదైన ‘రిటర్న్ గిఫ్ట్‌లు’ ఇచ్చారు, అనే దాని మీదే ఆలోచనలు, సమీక్షలు నడుస్తుంటాయి. ఇప్పుడు ఈ రిటర్న్ గిఫ్ట్ సంప్రదాయం ఒకటి అదనంగా వచ్చి చేరింది. దాని కోసం ప్రత్యేకంగా ఒకరు కాపలా. పైగా ఆ వ్యక్తి బంధువులను, స్నేహితులను గుర్తు పట్టగలిగిన వారై ఉండాలి. ఈ పుట్టినరోజు పండుగలలో, పెళ్లిళ్ల మాదిరిగానే, మరో గొప్ప అంశం ఆశీస్సులు అందివ్వడానికి వెళ్లేవారితో ఫోటోలు. ఈ ఫోటో/వీడియోల ఖర్చు వేలు లక్షల్లో ఉండడం, ఆల్బమ్‌లు వస్తేగాని తెలియదు. ఇలా బోలెడు అనవసర ఖర్చులు, ఈ పుట్టినరోజు పండుగలతో ముడి పడి వున్నాయి. ఈ సంబరానికి ఇంత ఖర్చు అవసరమా? అన్నది ప్రశ్న. డబ్బు ఉన్నంత మాత్రాన అలా విచ్చలవిడిగా, డబ్బును మంచినీళ్ల ప్రాయంగా దుర్వినియోగం చేయవచ్చునా? ఇలా ప్రశ్నించిన వారిని పిచ్చివాళ్లుగా లెక్కగడతారు ఇప్పటి జనం.

కుటుంబ సభ్యులు

‘లేడీస్ సీట్’ పుస్తకావిష్కరణ

నాకు పుట్టినరోజులు జరుపుకోవడంలో పెద్ద మక్కువ లేదు. ఆ సందర్భంగా అనవసర ఖర్చులు చేయడమూ ఇష్టం లేదు. కానీ నా పిల్లలు పెద్దవాళ్ళయి వాళ్లకు కూడా పిల్లలు పుట్టుకొచ్చినప్పుడు నా ఆలోచనలు అభిరుచులతో సంబంధం లేకుండా, నిర్వహణా బాధ్యతలు వాళ్ళ చేతుల్లోకి వెళ్లిపోయాయి. అలా ఈ జూన్ నెల 13న, నా మనవడు నివిన్ ఆయాంశ్, మొదటి పుట్టినరోజు, మెట్టుగూడ (సికింద్రాబాద్) రైల్వే ఆఫీసర్స్ క్లబ్‌లో నిర్వహించడం జరిగింది మనవరాలు ఆన్షి మొదటి పుట్టినరోజు జరిపినట్టే ఘనమైన ఏర్పాట్లు చేశారు. వేదికను చాలా అందంగా ఆకర్షణీయంగా తీర్చిదిద్దారు.

మేనమామ రాహుల్, కేవలం ఈ పుట్టిన రోజు పండుగలో పాలుపంచుకోవడం కోసం అమెరికా నుండి వచ్చాడు. కరోనా తర్వాత కలువలేక పోయిన అనేకమంది బంధువులు, స్నేహితులను కలుసుకునే అవకాశం చి. నివిన్ పుట్టిన రోజు పండుగ రోజున కలిగింది. ముఖ్యంగా మా అత్తగారు, ముదిమనుమడు పుట్టిన రోజు వేడుకను తిలకించడానికి తన 85 ఏళ్ళ వయస్సును లెక్కచేయకుండా విజయవాడ నుండి రావడం అందరికీ ఆనందాన్ని కలిగించింది. బంధువులు మిత్రులు, శ్రేయోభిలాషులతో హాలంతా నిండిపోయింది. పాస్టర్ల విలువైన సందేశంతో, ఆశీస్సులతో పిల్లల సమక్షంలో కేక్ కటింగ్‌తో ముఖ్యమైన కార్యక్రమం ముగిసింది.

కథల సంపుటి

తర్వాత, ఆనవాయితీగా నేను రాసిన ఒక పుస్తకం ఆవిష్కరణ. నిజానికి మనవరాలు చి. ఆన్షిని దృష్టిలో పెట్టుకుని ఇప్పటివరకూ మూడు పుస్తకాలు రాసాను. కానీ సంవత్సరం పూర్తి అయినా మనవడు నివిన్ కోసం ఒక కవిత కూడా రాయలేక పోయాను. ఆ లోటు నన్ను వెంటాడుతూనే వుంది. అందుకే హడావిడిగా ఒక నిర్ణయం తీసుకుని నా దగ్గర మిగిలిన నా చిట్టిపొట్టి కథలను కూర్చి, నా ఐదవ కథా సంపుటిగా (లేడీస్ సీట్ – కథా సంపుటి)తీసుకు వచ్చాను. ముఖచిత్రంతో పాటు లోపలి కథలకు కూడా మొదటిసారి శ్రీ ఎన్. మాధవ్ (కార్టూనిస్ట్ -ఆంధ్రప్రభ) గారి చేత బొమ్మలు వేయించి, ఈ పుస్తకాన్ని, మనవడికి – మనవరాలికి అంకితం ఇచ్చాను.

పుస్తకం కోసం శ్రీ మాధవ్ గారి చిత్రాలు

పుస్తకం కోసం శ్రీ మాధవ్ గారి చిత్రాలు

అలా ఈ పుస్తకం నివిన్ పుట్టినరోజు వేడుకలలో ఆవిష్కరణకు నోచుకుంది. పాస్టర్ గారి ప్రార్థన తర్వాత, పుస్తకాన్ని విజయవాడనుంచి వచ్చిన నా పెద్ద బావమరిది శ్రీ రాజబాబు (జాన్) ఆవిష్కరించాడు. అతనికి ఇది పెద్ద సర్‌ప్రైజ్. తర్వాత కథాసంపుటి మొదటి కాపీని, ప్రసిద్ధ రచయిత్రి శ్రీమతి ఝాన్సీ కొప్పిశెట్టి ఆనందంగా స్వీకరించారు. అలా మనవడి పుట్టినరోజు రంగరంగ వైభవంగా ముగిసింది. ఇది కూడా నేను గుర్తుపెట్టుకోవలసిన ముఖ్యమైన రోజు.

శ్యాం కుమార్, ఝాన్సీ కొప్పిశెట్టి గార్లతో రచయిత

ఎన్నో ఘనమైన పుట్టినరోజులు చూసాను. కానీ, చిన్నప్పుడు నా పుట్టినరోజుకు (13-జనవరి) మా అమ్మ కొన్న ఖద్దరు చొక్కా, కాకి నిక్కరు, నాకు పెళ్ళై పిల్లలు పుట్టినా, తానూ బ్రతికినంత కాలం నా పుట్టిన రోజుకు మా అక్క మహానీయమ్మ నాకు కొన్న కొత్త బట్టలు, నాకు గొప్పగా అనిపిస్తాయి. అసలు నా పుట్టినరోజు క్రమం తప్పకుండా జరుపుకుంటున్నది, నా శ్రీమతి అరుణ, నా జీవితంలో ప్రవేశించాకే. పుట్టినరోజులు జరుపుకోవడంలో తప్పులేదు. కానీ ఆ పేరుతో వృథా ఖర్చుల జోలికి పోకూడదన్నదే నా అభిప్రాయం.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

sagar
June 25, 2023 at 7:27 am
మీ అభిప్రాయం మంచిదే కానీ మారుతున్న కాలంతోపాటు మనంకూడా మారాలిగా సర్. వృధా ఖర్చు అని అందరికీ తెలుసు. కానీ ఆ సంబరంలో అది తెలియదు. రాబోయే రోజుల్లో ఇంకా మించవచ్చు కూడ. మంచి వ్యాసం అందించిన మీకు ధన్యవాదములు.

Reply
1. 1.1
  
  డా కె.ఎల్.వి.ప్రసాద్
  June 25, 2023 at 12:52 pm
  సాగర్
  నీ స్పందనకు ధన్యవాదాలు.
  
  Reply
2

డా కె.ఎల్.వి.ప్రసాద్
June 25, 2023 at 8:27 am
పుట్టిన రోజు మధుర జ్ఞాపకాలు తన్మయులను చేస్తుంది ఎవరినైనా వైద్య మహోదయ!
—-ప్రొ.జనార్ధన రావు
ఖాజీపేట.

Reply
1. 2.1
  
  డా కె.ఎల్.వి.ప్రసాద్
  June 25, 2023 at 12:51 pm
  ధన్యవాదాలు మీకు.
  
  Reply
2. 2.2
  
  Chagal shyam kumar
  June 26, 2023 at 9:12 pm
  మారుతున్న కాలాన్ని బట్టి జీవనశైలి అలవాట్లు ఆచార వ్యవహారాలు కూడా పెను మార్పులకు లోనవుతున్నాయి అనటంలోసందేహం లేదు. దానికి తోడు పెరిగిన ఆదాయ పరిమితులు కూడా హంగు ఆర్భాటాలకి కారణం అవుతున్నాయి. పోయిన తరంలో అత్యవసర విలాస వస్తువులు నేటి తరానికి అత్యంత అవసరాలుగా మారిపోయాయి.
  ఈ రోజుల్లో యువతకు రేపటి గురించి చింత లేదు. భవిష్యత్తు అవసరాలకు తగ్గట్టుగా దాచుకోవడానికి ఎటువంటి మానసిక సంసిద్ధత లేదు. నేడు సుఖ భోగాలను అనుభవించడమే వారికి ముఖ్యంగా తోస్తుంది. కార్యక్రమానికి విచ్చేసిన స్నేహితులు బంధుమిత్రులకి ప్రేమాభిమానాలతో నాదనంపటానికి బదులుగా ఈ రోజుల్లో రిటర్న్ గిఫ్ట్ అనే చెత్త కార్యక్రమం మొదలైంది. రచయిత గారు ఎన్నోసార్లు ఉటంకించిన సమయపాలన అన్నది ఎక్కడ ఉండట్లేదు సరి కదా అదొక బ్రహ్మ పదార్థంగా మిగిలిపోయింది.
  రచయిత గారి కార్యక్రమంలో కూడా అది కనపడలేదు .
  
  Reply
  1. 2.2.1
    
    డా కె.ఎల్.వి.ప్రసాద్
    June 27, 2023 at 7:49 pm
    ధన్యవాదాలు మిత్రమా
    
    Reply
3

డా కె.ఎల్.వి.ప్రసాద్
June 25, 2023 at 12:50 pm
Anna grand ga vivin birthday party jarigindi .relatives andaru Kalusu ko Daniki Manchi avakasham vacchindi.
—mrs.Jaya Alexander
Secunderabad.

Reply
1. 3.1
  
  డా కె.ఎల్.వి.ప్రసాద్
  June 25, 2023 at 12:50 pm
  Yes.amma
  Thank you.
  
  Reply
4

sunianu6688@gmail.com
June 25, 2023 at 3:38 pm
పుట్టినరోజులు కాక ఇంకా ఎన్నో సందర్భాలను జరుపుకోవడం ఆనాయితీగా మారింది. సందర్భం ఏదైనా అందరూ కలవడం ముఖ్య ఉద్దేశ్యం గా జరుపుకుంటున్నారు. ఎందుకంటే తమ సంసార బాధ్యతలు వల్ల కానీ, ఉద్యోగ బాధ్యతలు వలన కానీ అందరూ కలిసి గడపటం గగనమే. ఇక ఖర్చులు ఎక్కువే ఐనా ఈ విధమైన జీవితాలకు అందరూ అలవాటు పడిపోయారు అనడంలో ఎటువంటి సందేహం లేదు. రచయత శ్రీ Dr KLV prasad గారికి హృదయపూర్వక అభినందనలు మంచి ఇతివృత్తం ఎన్నుకున్నారు 👌👍🙏

Reply
1. 4.1
  
  డా కె.ఎల్.వి.ప్రసాద్
  June 25, 2023 at 6:08 pm
  అమ్మా…ధన్యవాదాలు
  
  Reply
5

Bhujanga rao
June 26, 2023 at 6:57 am
పిట్టిన రోజు వేడుకలు జరుపుకోవడం,ఇంకా ఇతరత్రా వేడుకలు ఘనంగా చేసుకోవడం ఆనవాయితీగా మారింది.మీరు చెప్పినట్టు పెద్దమొత్తంలో ఖర్చులు చేసి ఈవెంట్ చేయటం అలవాటుగా మారింది. వారి ఆర్ధిక పరిస్థితులు, వారికున్న వేసులుబాటును గుర్తించి ఖర్చులు చేయటం అందరికి ఆమోగ్యమైనది.ముఖ్యమైనది ప్రియమైన వారితో విలువైన సమయాన్ని గడపడం మరియు పుట్టినరోజు బిడ్డకు ప్రత్యేకమైన అనుభూతిని కలుగించడం. మంచి విషయాలు అందించిన రచయిత గారికి అభినందనలు మరియు ధన్యవాదములు🙏

Reply
1. 5.1
  
  డా కె.ఎల్.వి.ప్రసాద్
  June 26, 2023 at 4:31 pm
  రావు గారూ
  ధన్యవాదాలు మీకు.
  
  Reply
6

Rajendra Prasad
June 26, 2023 at 7:16 am
Congratulations Sir on both accasions Birthday of your grand son and Releasing your book. Though you told that you are not interested in such celebrations , it’s an occasion that brought your fami and friends together at one place

Reply
1. 6.1
  
  డా.కె.ఎల్.వి.ప్రసాద
  June 26, 2023 at 2:30 pm
  Yes..prasad garu
  Thank you for your response.
  
  Reply
7

డా కె.ఎల్.వి.ప్రసాద్
June 28, 2023 at 6:04 am
జ్ఞాపకాల పందిరి 168 లో పుట్టినరోజు అంశంపై చక్కగా రాశారు. పుట్టినరోజు, పెళ్లిరోజు, షష్టిపూర్తి సందర్భంగా మీరు చెప్పినట్టుగా డబ్బులు దుర్వినియోగం చేస్తున్నారు. అప్పులు చేసి ఇటువంటి వేడుకలు నిర్వహించడం తలకు మించిన భారమే. ఈ సందర్భంగా మీరు కథాసంపుటిని మనవడికి, మనవరాలికి అంకితం ఇవ్వడం ఆనందాయకం. అభినందనలు.
—-జి శ్రీనివాసాచారి
కాజీపేట.

Reply
1. 7.1
  
  డా కె.ఎల్.వి.ప్రసాద్
  June 28, 2023 at 6:05 am
  ధన్యవాదాలు
  చారి గారు.
  
  Reply