జ్ఞాపకాల పందిరి-155 | సంచిక - తెలుగు సాహిత్య వేదిక

జ్ఞాపకాల పందిరి-155

చదువే కాదు.. ఇవి కూడా..!!

పిల్లలు పుట్టగానే, వాళ్ళ ఆటా పాటా ప్రక్కన పెట్టి, కేవలం చదువు గురించి ఆలోచించే తల్లిదండ్రులు ఎక్కువైనారు ఇప్పుడు. అయితే అందరికంటే లేదా అందరిలానే తమ పిల్లలు కూడా మంచిగా చదువుకోవడానికి మంచి విద్యాసంస్థల్ని ఎన్నుకునే ప్రయత్నం చేస్తారు. ఇందులో తప్పేమీ లేదు, కానీ, కేవలం చదువుకు మాత్రమే ప్రాధాన్యత నిచ్చి, మిగతా విషయాలు పట్టించుకొనకపోతే పిల్లలు మానసికంగా ఎదగలేరు, నలుగురితో కలవలేరు, మంచి చెడ్డలు నేర్చుకోలేరు, ప్రపంచ జ్ఞానం తెలుసుకోలేరు, మంచి – మర్యాదలను ఆకళింపు చేసుకోలేరు. ఇవన్నీ కేవలం చదువు వల్ల మాత్రమే వస్తాయనుకుంటే అది పొరపాటే! చదువుతోపాటు పిల్లలకు లోకజ్ఞానం కూడా అవసరమే! మరి, అది పిల్లలకు ఎలా సమకూరుతుంది?

మంచి చదువుతో పాటు, క్రీడలు, నాట్యం, చిత్రలేఖనం, నటన, బొమ్మలు చేయడం, సంగీతం, స్టాంపుల సేకరణ, ఇలా ఒకటి కాదు, అన్నీ పిల్లలకు అవసరమే. వీటికి పిల్లల వయసుతో ప్రమేయం లేదు. ఏ వయసులో, ఎవరికీ, ఏ అభిరుచి ఉంటుందో వాటిని తల్లిదండ్రులు ప్రోత్సహించాలి. అంటే చదువు మాని ఇవి నేర్చుకోమని కాదు దీని అర్థం. చదువుతోపాటు ఇవి కూడా ఉంటే మంచిదని చెప్పడమే నా ప్రధాన ఉద్దేశం. మరి ఇవన్నీ అందరు పిల్లలకి సమకూరుతాయా? అన్న ప్రశ్న కూడా చాలా మందిలో ఉదయించవచ్చు. సాధ్యపడివ వాటిల్లోనే పిల్లలను ప్రోత్సహించాలి. ఇప్పుడు చాలా మటుకు కార్పొరేట్ పాఠశాలల్లో ఇవన్నీ సమకూర్చే ప్రయత్నం చేస్తున్నారు. కాస్త అభిరుచి వుండి, శ్రమ తీసుకునే ప్రభుత్వ పాఠశాలలు కూడా కొన్ని, కార్పొరేట్ పాఠశాలలను అనుకరించే ప్రయత్నం చేస్తున్నాయి. ఇది మంచి పరిణామమే! ప్రభుత్వ పాఠశాలలు చాలా మట్టుకు వీటిపట్ల శ్రద్ధ వహించకపోవడం బాధాకరం. ఉన్న వనరులను ఉపయోగించుకుని, తమ వంతు ప్రయత్నం చేస్తున్న ప్రభుత్వ ఉపాధ్యాయుల కృషిని కూడా ఇక్కడ విస్మరించలేము. ఇలా కార్పొరేట్ పాఠశాలలకు ధీటుగా పనిచేస్తున్న ప్రభుత్వ పాఠశాలలు కూడా లేకపోలేదు, లేదంటే బహు తక్కువ.

నాకు తెలిసి గతంలో ప్రభుత్వ పాఠశాలల్లో, డ్రిల్లు పిరియడ్, డ్రాయింగ్ పిరియడ్, లైబ్రరీ పిరియడ్, క్రాఫ్ట్స్ పిరియడ్ ఉండేవి. ఇప్పుడు అవి కొనసాగుతున్నాయో లేదో నాకు తెలీదు. వీటితో, చదువుకు అదనంగా కొన్ని విషయాలు పిల్లలకు తెలిసేవి. ముఖ్యంగా క్రమశిక్షణ బాగా అలవాటు అయ్యేది. కొన్ని పాఠశాలల్లో తోటపని పిరియడ్ కూడా ఉండేది, ఇది కూడా పిల్లలకు బాగా ఉపయోగపడేది.

ఇప్పుడు కార్పొరేట్ పాఠశాలల్లో ఫీజులు ఎక్కువైనా, చదువుతోపాటు, క్రీడల్లో, సాహిత్య సాంస్కృతిక కార్యక్రమాల్లో, కరాటే వంటి విద్యల్లో సంగీతంలో, విచిత్రవేషాల్లో, డ్రాయింగులో, నాట్యంలో, ఆధునిక కంప్యూటర్ విజ్ఞానంలో తర్ఫీదు ఇచ్చి వాటిల్లో అందరూ పాల్గొనేలా ప్రోత్సహిస్తున్నారు. కథలు చెప్పటంలో, కథలు అల్లడంలో, పుస్తకపఠనంలో ఉత్సాహం చూపించేలా చర్యలు తీసుకుంటున్నారు. తలుచుకుంటే ప్రభుత్వ పాఠశాలలు కూడా కార్పొరేట్ స్థాయికి చేరుకోగలవు. ఇంటి దగ్గర కూడా చదువు, హోమ్ వర్క్ పూర్తి అయిన పిదప, బలవంతంగా కాకుండా పిల్లల అభిరుచి మేరకు, వాళ్ళు ఆడుకుంటానంటే ఆడుకోనివ్వాలి. బొమ్మలు గీస్తుంటే గీసుకోనివ్వాలి. సంగీతం నేర్చుకుంటానంటే నేర్చుకోనివ్వాలి. రేడియోను, టి.వి.ని అనుకరిస్తూ పాటలు పాడుతుంటే పాడుకోనివ్వాలి, వాటిల్లో ప్రసారమయ్యే పాటలకు అనుగుణంగా, నాట్యం చేస్తుంటే చేయనివ్వాలి. మిమిక్రీ – మైమ్ వంటివి ప్రాక్టీస్ చేస్తుంటే చేయనివ్వాలి. తోటి పిల్లల పుట్టినరోజు పండుగలకు వెళ్లి వాళ్ళతో కలసి మెలసి ఉండేలా తల్లిదండ్రులు ప్రోత్సహించాలి. కులమతాల తేడాను పిల్లల మధ్య రానీయకూడదు. బహుశః ఈ ఉద్దేశంతోనేనేమో, కొన్ని పాఠశాలల్లో కులమతాలకు అతీతంగా ప్రతి పండుగను పాఠశాలలో జరిపి, దానికి తగిన వస్త్రధారణ చేయించి, ఆ పండుగ ప్రత్యేకత పిల్లలందరికీ తెలిసేలా చేస్తున్నారు. దీనికి భిన్నంగా, వాళ్ళు మన కులం కాదు, మతం కాదు, ప్రాంతం కాదు, ఆ దేవుడు మన దేవుడు కాదు అని చిన్నపిల్లల లేతమనసుల్లో విషం చల్లే తల్లిదండ్రులు, ఇతర పెద్దలు కూడా మన సమాజంలో లేకపోలేదు. కానీ ఇది సరైన పద్ధతి కాదు. ఇది వారు తెలుసుకోవాలి.

రచయిత మనవరాలు.. ఆన్షి.నల్లి, – ఐ .వి.ఇంటర్నేషనల్ స్కూల్, హన్మకొండ.

ఆన్షి.నల్లి, – గీతాంజలి పబ్లిక్ స్కూల్,బేగంపేట్,హైదరాబాద్

ఇక నా విషయానికొస్తే, చిన్నప్పుడు నా చదువు అంతంత మాత్రమే ఉండేది. ఇతర విషయాల జోలికి పోయేవాడిని కాదు. ఆర్థికపరంగా చాలా వెనుకబడిన కుటుంబం కనుక, డబ్బుతో ముడిపడిన అంశాల జోలికి అసలు పోయేవాడిని కాదు. ఇంటర్మీడియెట్‌కు వచ్చేవరకూ ఇదే కొనసాగింది. ఇంచుమించు నా పిల్లలు కూడా కొద్దీ తేడాతో ఇలాగే పెరిగారు. నన్ను, నాతో కలిసివచ్చిన అవకాశాలను వాళ్ళు సద్వినియోగం చేసుకున్నారు. పిల్లలిద్దరినీ, నా కులానికి మాత్రమే కట్టి పడవేయకుండా, కులమతాలకు అతీతంగా అందరితో కలిసి మెలసి ఉండేలా పెంచి పెద్ద చేసాను.

నా మనవరాలు (కూతురి పుత్రికా రత్నం) విషయం వచ్చేసరికి, మొత్తం సన్నివేశం మారిపోయింది. కార్పొరేట్ చదువుతోనే ఆమె బాల్యం మొదలయింది. అందరితో కలిసి వుండాలని, స్నేహం చేయాలని అంటుంది. బడిలో అన్ని పండుగలకు తన ఉనికిని చూపిస్తుంది. ఆ పండుగలకు తగ్గ వేషధారణతో బడికి వెళుతుంది. దేనికైనా నేను సిద్ధం అంటూ వాళ్ళమ్మ ముందు నిలబడుతుంది. తల్లి అన్నీ ఓపిగ్గా చేస్తూ కూతురుని మరింతగా ప్రోత్సహిస్తుంది.

మేనమామ రాహుల్ తో ఆడుతూ చి.ఆన్షి.నల్లి.

ఈ వయసులో (ఇప్పుడు రెండవ తరగతికి వచ్చింది) అలవోకగా బొమ్మలు స్వయంగా గీస్తుంది. ఆ బొమ్మకు ఒక అర్థం లేకపోవచ్చు, కానీ తన ఊహతో ఏవో బొమ్మలు వేసేస్తుంది. ఇక ‘అలెక్సా’ వినిపించే పాటలకు డాన్సు చేసేస్తుంది. ఎప్పుడు అవసరం అయితే అప్పుడు విసుగు లేకుండా విచిత్ర వేషాలకు ‘సై’ అంటుంది. స్వంతంగా కథలు అల్లి చెబుతుంది. ఎంత పెద్ద ఆంగ్ల కవిత అయినా రెండుమూడు సార్లు చదివి, చూడకుండా వల్లించేస్తుంది. తన తరగతిలో ఉపాధ్యాయిని బోధించిన పాఠాన్ని, ఇంటికి వచ్చి యథాతథంగా మాకు బోధిస్తుంది, మాకు ప్రశ్నలు వేస్తుంది, మార్కులు వేసి ర్యాంకులు కూడా ఇస్తుంది.

చి.ఆన్షి.నల్లి కి ఆటవిడుపు

చదువులో ఎప్పుడూ అగ్రగామిగానే ఉంటుంది. ఇక్కడ నా మనవరాలి గొప్పతనం మీ మీద రుద్దడం నా ఉద్దేశం కానేకాదు. అటు బడిలోగానీ ఇటు ఇంట్లోగానీ, పిల్లలకు అనువైన వాతావరణం మనం కల్పించగలిగితే వారు చేసే ప్రతి మంచి పనిని ప్రోత్సహించ గలిగితే, ఆ వాతావరణంలో పెరిగే పిల్లలు అన్ని రకాలుగాను ముందంజలో వుంటారని, వారిని మంచి భావి భారత పౌరులుగా తీర్చిదిద్దిన తృప్తి మనకు మిగులుతుందని చెప్పడమే ఈ నా వ్యాసం ముఖ్యోద్దేశం. చదవడం లేదని విసుక్కోవడం, పిల్లలు చేసే ప్రతి పనినీ విమర్శించడం, అడ్డు తగలడం, అర్థం పర్థం లేకుండా పిల్లల్ని దండించడం వంటి పనులు చేయడం వల్ల పిల్లల్లో సహజంగా వుండే సృజనాత్మక శక్తి క్రమంగా నశించిపోతుంది. అందుచేత ఏదైనా మన కోర్కెలకు తగ్గట్టుగా పిల్లల్ని బలవంతపెట్టకుండా వారి అభిరుచుల మేరకు పిల్లల్ని ప్రోత్సహించాలి.

ఆన్షి గీసిన చిత్ర మాలిక

పిల్లల విషయంలో తల్లిదండ్రులు కూడా కొన్ని త్యాగాలు చేయాలి. పిల్లలకు ఎక్కువ సమయం కేటాయించాలి. వాళ్ళు చదువుకుంటున్నప్పుడు, చదువుకోవాల్సిన సమయం ఆసన్నమయినప్పుడు, తల్లిదండ్రులు గానీ, ఇతరులు గానీ, గట్టిగా మాట్లాడుకోవడం, ఫోన్‌లో గట్టిగా మాట్లాడుకోవడం, టి.వి. చూడడం, రేడియో వినడం వంటివి చేయకపోవడమే మంచిది. పిల్లల చదువుకు, ఇంట్లో ప్రశాంత వాతావారణం కలగజేయవలసిన ప్రధాన బాధ్యత తల్లిదండ్రులదే! పిల్లల ముందు అరుచుకోవడం, పోట్లాడుకోవడం, ఒకరిని మరొకరు నిందించుకోవడం, తల్లిదండ్రులు చేయకూడని పనులలో మరికొన్ని అని అర్థం చేసుకోవాలి. పిల్లలకు చదువు సంధ్యలు ఎంత ముఖ్యమో, వాళ్లకి ఆటా-పాటా కూడా అంతే ముఖ్యమని అర్థం చేసుకోవాలి.

ఆన్షి విచిత్ర వేషాలు

చదువుతో పాటు ఇంట్లో సంస్కారం, మన సంస్కృతీ -సంప్రదాయాలు, మంచి -మర్యాద నేర్పుకోవలసిన బాధ్యత తల్లిదండ్రులది లేదా పిల్లల ఇతర సంరక్షకులదీను. తల్లిదండ్రులు మాట్లాడే ప్రతి మాట, ప్రతి పని, పిల్లలు గమనిస్తూ ఉంటారన్న సంగతి తల్లిదండ్రులు ఎప్పుడూ మర్చిపోకూడదు. ఈ విషయంలో నా ఈ స్థితికి కారకులైన నా తల్లిదండ్రులను, ఇద్దరు అన్నలను, ఇద్దరు అక్కలను, ఇతర శ్రేయోభిలాషులను ఎన్నటికీ మరువలేను.

పిల్లలకు చదువు అవసరమే
చదువుకు అదనంగా
క్రమశిక్షణ, ఆట – పాటలు
సంస్కృతీ – సంప్రదాయాలు,
ఇష్టమైన అభిరుచులు
ప్రోత్సహించవలసిన అంశాలు!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్
March 26, 2023 at 7:45 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
—-డా కె.ఎల్.వి.ప్రసాద్
సికిందరాబాద్.

Log in to Reply
2

డా కె.ఎల్.వి.ప్రసాద్
March 26, 2023 at 8:30 am
పిల్లలను ప్రోత్సహించడం శతవిధాల మంచిది. ఈ రోజుల్లో తలిదండ్రులు ఉద్యోగాలకు పోయివచ్చేవరకే అలసిపోతున్నారు. పిల్లల అలనా పాలనా చూసే ఓపిక ఎక్కడుంటుంది?
—-ప్రొ.జనార్ధన రావు
హన్మకొండ.

Log in to Reply
1. 2.1
  
  డా కె.ఎల్.వి.ప్రసాద్
  March 26, 2023 at 5:31 pm
  సర్
  హృదయ పూర్వక కృతజ్ఞతలు సర్ మీకు.
  
  Log in to Reply
3

Shyam Kumar Chagal
March 26, 2023 at 8:34 am
చదువు మరియు బాల్యం గురించి డాక్టర్ KLV. ప్రసాద్ గారి విశ్లేషణ ప్రస్తుత పరిస్థితులకు అవసరమయ్యేదిగా ఉంది.
చిన్నప్పుడు విద్యార్థులకు చదువు మాత్రమే కాక ఆట పాటలు, సాంస్కృతిక కార్యక్రమాలు ఉండేవి. ఇతర రంగాల్లో వారు పాలుపంచుకుంటే అది వారి యొక్క మానసిక పరిణతి దోహదం చేస్తుందని వేరే చెప్పనవసరం లేదు. ఈ మధ్యకాలంలో కార్పొరేట్ స్కూల్లో ఇటువంటి కార్యక్రమాలు మెండుగా జరుగుతూనే ఉన్నాయి. కాకపోతే మనం దురదృష్టం ఏమిటంటే ఇవేవీ ప్రభుత్వ పాఠశాలల్లో చోటు చేసుకోవటం లేదు. దానికి బోలెడు కారణాలు ఉన్నాయి కూడా. దానికి బాధ్యత ప్రభుత్వందేకాక స్కూలు యాజమాన్యాలది కూడా.
ఒకప్పుడు స్కూలుకు దగ్గరలోని లేదా అదే ఊర్లో గురువులు నివసించేవారు. మారిన మారుతున్న సామాజిక పరిస్థితులు వారి పిల్లలు పెద్ద స్కూల్లో చదివించడం లాంటి కారణాల చేత గురువులు చాలావరకు స్కూలుకు దూరంగా పట్టణాల్లో నివసిస్తూ పొద్దున్నే లేచి హడావిడిగా స్కూల్కు బయలుదేరడం అక్కడికి చేరి మమ అన్నట్లుగా పాఠాలు చెప్పి చేతులు దులుపుకొని ఇంటికి బయలుదేరి వెళ్లడంలోనే వారి శక్తి సామర్థ్యాలు వెచ్చించడం జరుగుతుంది. ప్రభుత్వం కూడా వీరి పైన వేరే పనులు పురమాయిస్తూ బోధనేతర పనులతో వారి తలకు మించిన బాధ్యతలను అప్పజెప్తూ విద్యా బోధన మీద వారికి తగినంత శ్రద్ధ లేకుండా చేస్తుందనే విషయం మనం గమనిస్తే తెలుస్తుంది. ఏది ఏమైనా కనీసం కార్పొరేట్ స్కూళ్లలో అయినా పాఠ్యాంశాలలో వివిధ రకాల కళలను ఆటలను చొప్పించడం మంచి పరిణామం అని చెప్పాలి.
ప్రతివారం సామాజికంగా మనందరికీ సంబంధించిన విషయాలను మన దృష్టికి తెస్తున్న డాక్టర్ కే ఎల్ వి. ప్రసాద్ మరియు సంచిక పత్రికకు ఉన్న అభినందనలు.

Log in to Reply
1. 3.1
  
  డా కె.ఎల్.వి.ప్రసాద్
  March 26, 2023 at 5:30 pm
  మిత్రమా
  చాలా వివరంగా రాసావు
  నీ విశ్లేషణ బాగుండి.
  రచయితవు అనిపించావు.
  మరి ధన్యవాదాలు నీకు.
  
  Log in to Reply
4

డా కె.ఎల్.వి.ప్రసాద్
March 26, 2023 at 8:37 am
పిల్లలకు విద్యతో పాటు ఇతర వ్యాపకాలు ఎంత అవసరమో అందరికీ అర్థమయ్యే రీతిలో చాలా వివరంగా చెప్పారు. మీ ఈ ప్రయత్నం అభినందనియం
—–శ్రీమతి లీల.చాగల్
నిజామాబాద్.

Log in to Reply
1. 4.1
  
  డా కె.ఎల్.వి.ప్రసాద్
  March 26, 2023 at 5:22 pm
  మిత్రమణీ
  కృతజ్ఞతలు .
  
  Log in to Reply
5

Sagar
March 26, 2023 at 10:08 am
చాలా మంచి విషయాన్ని చెప్పారు సర్. మీరన్నట్లు అందరికీ అందుబాటు లేకపోవచ్చు కానీ ఉన్న వనరులలో ప్రోత్సాహం చాలా ముఖ్య విషయం. విచారకరం ఏమిటంటే చదువుకు తప్ప మిగిలిన విషయాలను పెద్దలు పట్టించుకోకపోవడం, ఆ పంధా మారితే సర్వత్రా సంతోషమే. మీకు ధన్యవాదములు సర్.

Log in to Reply
1. 5.1
  
  డా కె.ఎల్.వి.ప్రసాద్
  March 26, 2023 at 5:21 pm
  సాగర్
  ధన్యవాదాలు.
  
  Log in to Reply
6

sunianu6688@gmail.com
March 26, 2023 at 11:41 am
అవును! మేము చదువుకునే రోజుల్లో మాకు కూడా dance,croft ,games period వుండేవి. ప్రతీ ఒక్క విద్యార్ధి తప్పక పాల్గొనాలి. దానివల్ల విద్యార్థులకు అంతా కలిసి మెలసి వుండడం, ఒకరికి ఒకరు సహాయపడటం అలవాటు అవుతుంది. రచయత గారు చక్కగా చెప్పారు. చివరిగా మీ మనవరాలు అన్ని రంగాల్లో దూసుకుపోవడం హర్షణీయం. అందుకు మీ కుటుంబ సభ్యులు సహకారం అభినందనీయం. అన్షి కి శుభాశీససులు అందచేయగలరు🙏💐

Log in to Reply
1. 6.1
  
  డా కె.ఎల్.వి.ప్రసాద్
  March 26, 2023 at 5:20 pm
  అమ్మా..
  మీ స్పందనకు ధన్యవాదాలు.
  
  Log in to Reply
7

Bhujanga rao
March 26, 2023 at 12:02 pm
పిల్లలకు విద్యతో పాటు ఇతర వ్యాపకాలు ఎంత అవసరమో ఈ వ్యాసం ద్వారా చక్కగా వివరించారు. పిల్లలకు ఏమైనా నేర్పాలన్న,వాటిపై శ్రద్ద రావాలన్న అది బాల్యం నుండే మొదలు కావాలి.చిన్న క్లాస్ నుండి వాళ్ళతో కల్సి హోంవర్క్ రాయించడం, ఏ రోజు పాఠాలు ఆ రోజే చదివి అర్థం చేసుకునే స్థాయికి రావడం అది అలవాటుగా మారాలి వాటి మీద శ్రద్ద రావాలంటే తల్లిదండ్రులదే బాధ్యత.పిల్లలకు వత్తిడి లేని చదువుని అలవాటు చేయాలి.అంటే పుస్తకాలు చదవటమే కాకుండా జనరల్ నాలెడ్జి,ఆటలు,పాటలు మరియు నాట్యం మొదలగు వాటిలో చురుకుగా పాల్గొనేలా తయారుచేయాలి. ఇప్పుడున్న పరిస్థితులకు అనుగుణంగా ప్రతివారం సమాజంలో మారుతున్న పరిస్థితులకు సంబంధించిన ఎన్నో మంచి విషయాలు మన దృష్ఠికి తెస్తున్న డాక్టర్ గారికి అభినందనలు మరియు నమస్కారములు,🙏

Log in to Reply
1. 7.1
  
  డా కె.ఎల్.వి.ప్రసాద్
  March 26, 2023 at 5:19 pm
  భుజంగరావు గారూ
  మీ స్పందనకు ధన్యవాదాలు సర్.
  
  Log in to Reply
8

డా కె.ఎల్.వి.ప్రసాద్
March 26, 2023 at 12:32 pm
నేటి విద్యారంగం గురించి క్లుప్తంగా నైనా వాస్తవ పరిస్థితులు చెప్పారు……బాగా చదివే విద్యార్థులకు చెప్పాలని ఏ ఉపాధ్యాయుడికైనా అనిపిస్తుంది.. అలా చెప్పటం ఆనందంగా ఉంటుంది. ఉపాధ్యాయుల శక్తి సామర్థ్యాలను వినియోగించుకోవడం ప్రభుత్వం పైనా, విద్యార్థుల పైనా ఆధారపడి వుంటుంది.
——-శ్రీ గొనుగుంట

Log in to Reply
1. 8.1
  
  డా కె.ఎల్.వి.ప్రసాద్
  March 26, 2023 at 5:19 pm
  సర్
  మీ స్పందనకు ధన్యవాదాలు సర్.
  
  Log in to Reply
9

డా కె.ఎల్.వి.ప్రసాద్
March 26, 2023 at 2:45 pm
చదువే కాదు ఇవి కూడా ……

చాలా బాగుంది సర్ …

Old స్కూలింగ్ ని గుర్తు చేశారు….

చదువుతో పాటు లోకజ్ఞానం అవసరం ,
పిల్లల్లో all round development వుండే దిశగా మన ప్రయత్నం ,
సృజనాత్మకత పెంచే activities గూర్చి చెప్పిన అంశాలు చాలా బాగున్నాయి సర్ ….

Almost టీచర్ ట్రైనింగ్ లో ఒక పాఠంలా ఉంది …..🙏🙏
—-శ్రీధర్ రెడ్డి
హన్మకొండ.

Log in to Reply
1. 9.1
  
  డా కె.ఎల్.వి.ప్రసాద్
  March 26, 2023 at 5:18 pm
  బాబూ
  హృదయ పూర్వక కృతజ్ఞతలు.
  
  Log in to Reply
10

డా కె.ఎల్.వి.ప్రసాద్
March 26, 2023 at 5:17 pm
మీరు,చెప్పిన విద్యావిధానంలోనూ ,ఎట్లా వుండాలనిమీరనుకుంటున్నారో అట్లా వుండాలని ఆశించటం లోనూ తప్పులేదు..
కార్పొరేటు విద్యాసంస్థలు అన్నీ మీరన్నట్టు అన్ని సౌకర్యాలు కలిగిస్తున్నయా అనేది చర్చనీయాంశం.
—-నాగిళ్ళ రామశాస్త్రి
హన్మకొండ.

Log in to Reply
1. 10.1
  
  డా కె.ఎల్.వి.ప్రసాద్
  March 26, 2023 at 5:17 pm
  శాస్త్రి గారు ధన్యవాదాలండీ .
  
  Log in to Reply
11

డా కె.ఎల్.వి.ప్రసాద్
March 27, 2023 at 9:00 am
పిల్లల చదువు గురించి ఆలోచిస్తూ, పిల్లల మానసిక వికాసం గురించి మరచిపోతున్నారు నేటి తల్లితండ్రులని తెలిపారు. పిల్లలను పెంచే విధానం గురించి చక్కటి విషయాలు తెలిపారు. చక్కటి కథనం. అభినందనలు
—జి.శ్రీనివాసా చారి
కాజీపేట.

Log in to Reply
1. 11.1
  
  డా కె.ఎల్.వి.ప్రసాద్
  March 27, 2023 at 9:01 am
  చారి గారూ
  ధన్యవాదాలు.
  
  Log in to Reply
12

D. Umashanker
March 28, 2023 at 9:43 am
డాక్టరుగారు మీరు ప్రస్తావించిన విషయాలు అక్షర సత్యాలు. నేటి యాంత్రిక జీవనంలో పిల్లల గురించి పట్టించుకునే సమయం, ఓపికా తల్లిదండ్రులకు వుండడం లేదు. తాతలు, నానమ్మలు, అమ్మమ్మలు కలిసి వుంటే కొంత నయంగా వున్నది పరిస్తితి. ఇద్దరూ సంపాదిస్తే కానీ నడవని కాలం ఇది. ఇది అందరికీ వర్తించక పోయినా వాస్తవం ఇదే. పిల్లలను సహజంగా పెరగనిస్తే వారి ప్రతిభా పాటవాలు బయటకు వస్తాయి. మంచి విషయాలు ప్రస్తావించిన మీకు ధన్యవాదాలు

Log in to Reply
1. 12.1
  
  డా కె.ఎల్.వి.ప్రసాద్
  March 31, 2023 at 10:18 am
  అవునండీ
  ధన్యవాదాలు మీకు.
  
  Log in to Reply
13

డా కె.ఎల్.వి.ప్రసాద్
March 31, 2023 at 10:16 am
పిల్లల పెంపకం, ఇంట్లో, బడులలో సహ విద్యాకార్యక్రమాల ద్వారా పిల్లలలో అభ్యసనాభివృద్దిని, పరిణతిని పెంచవలసిన ఆవశ్యకత ను చక్కగా వివరించారు.. అభినందనలు, మరియు ధన్యవాదాలు
—–పుట్టి నాగలక్ష్మి
గుడివాడ.

Log in to Reply
1. 13.1
  
  డా కె.ఎల్.వి.ప్రసాద్
  March 31, 2023 at 10:18 am
  మీ స్పందనకు ధన్యవాదాలు.
  
  Log in to Reply