జ్ఞాపకాల పందిరి-148

జ్ఞాపకాల పందిరి-148

పెళ్లి సందడి, బాగానే వుంది.. మరి ఆ సంగతి ఏమిటీ..!?

పెళ్లి అనగానే, అదొక పెద్ద సందడి, ఒక పండగ వాతావరణం. తమకు బంధువులు, దగ్గర బంధువులు, స్నేహితులు, శ్రేయోభిలాషులు, ఒకరేమిటి పరిచయం వున్నఅందరినీ ప్రేమగా ఆత్మీయంగా తమ ఇంట్లో పెళ్ళికి రావాలని ఆహ్వానిస్తారు. పెళ్లి ఒక ఎత్తైతే పెళ్లి పిలుపు మరో ప్రత్యేక సందడి. ఈ పెండ్లి పిలుపుల ఆహ్వాన పత్రికల ముద్రణతో అసలు సందడి మొదలవుతుంది. ఈ ఆహ్వానాల పత్రికలు మళ్ళీ వారి వారి స్థాయిని బట్టి రకరకాలుగా ఉంటాయి. ఈ పెళ్లి పిలుపు కార్డుల కోసం, వందలు, వేలు, లక్షలు ఖర్చు పెట్టేవారున్నారు. మళ్ళీ ఇందులో అవతలి వారి స్థాయిని బట్టి కార్డుల విభజన ఇలా ఎన్నో – రకాలుగా సాగిపోతుంటుంది. ఒకప్పుడు పెళ్లి కబుర్లు చెప్పడానికి, దగ్గిర వ్యక్తిని ఎవరినో కాలినడకన గాని, సైకిలు మీదగాని పంపేవారు. ఇప్పటిలా అప్పుడు బంధువులు మరీ దూరప్రాంతాలలో ఉండేవారు కాదు, అందుచేత ఆ పద్ధతి సాధ్యమయ్యేది. తర్వాత పోస్టుకార్డులు రాసి ఆహ్వానించేవారు. టెలిఫోన్ కొందరికి అందుబాటులోనికి వచ్చిన తర్వా ఫోన్ చేసి ఆహ్వానించడంలో కొంత ఆత్మీయత తొంగి చూసేది. తరువాత రవాణా సౌకర్యాలు మెరుగు పడడంతో స్వయంగా వెళ్లడంగానీ, పెళ్లి కార్డులు పోస్ట్ చేయడం గానీ జరిగేది. పెళ్ళి కార్డు పంపినా స్వయంగా పిలిస్తేనే గానీ కొందరు వచ్చేవారు కాదు. ఇప్పుడు డిజిటల్ ప్రపంచంలోకి అడుగు పెట్టిన తర్వాత, మొబైల్ ఆందుబాటు లోనికి వచ్చిన తర్వాత పరిస్థితి పూర్తిగా మారిపోయింది. అలాగే పెళ్ళి ఖర్చు కూడా విపరీతంగా పెరిగిపోయింది. వీడియో వివాహ ఆహ్వానాల ప్రభంజనం ఉవ్వెత్తున ఎగిసిపడుతోంది. ప్రపంచంలో ఎక్కడికైనా క్షణాల్లో విషయం అందజేసే పరిస్థితులు ఇప్పుడు అందుబాటులోకి వచ్చాయి. ఒకప్పుడు పెళ్లి కూతురు ఇంటిదగ్గర గానీ, పెళ్ళికొడుకు ఇంటిదగ్గర కానీ పెళ్లి పందిళ్లు వేసి సహజమైన పద్ధతుల్లో అలంకరించి, పందిరి కింద పెళ్లిమండపం తయారు చేసేవారు. తాటాకులతో, కొబ్బరి ఆకులతో, మామిడి తోరణాలతో పెళ్లి పందిరి కళకళ లాడుతుండేది. ఎవరో పేదవాళ్ళు తప్ప ఇప్పుడు పెళ్ళికి పందిళ్లు వేయడం లేదు. తర్వాత పందిళ్ళకు బదులు టెంట్‌లు వెలుగులోకి వచ్చాయి వీటిల్లో కూడా వారి వారి ఆర్థిక పరిస్థితిని బట్టి రకరకాల షామియానాలు అందుబాటులోకి వచ్చాయి. ఇప్పటికీ కొంతమంది పెళ్లిళ్లకు షామియానాలు ఉపయోగిస్తున్నప్పటికీ, ఎక్కువమంది, ఎంత ఖరీదైన పెళ్ళిళ్ళకోసం ప్రత్యేకంగా నిర్మించిన ‘మేరేజ్ హాల్స్’ వైపే మొగ్గు చూపుతున్నారు. ఇవి అతి ఖర్చుతో కూడుకున్నవి. వీటికి అదనం అలంకరణ ఖర్చులు. అయినా వీటికి ఎవరూ వెనకాడడం లేదు. ఇంత అనవసరపు ఖర్చు దేనికీ వుండదనుకుంటాను.

గతంలో పెళ్ళి విందు బంతి భోజనాలు (క్రింద కూర్చోవడం) పద్ధతిలో పెళ్లి పందిరి క్రిందనో, ఇంట్లోనో, జరిగేది. భోజనానికి విధిగా విస్తరాకులు వాడేవారు. అవి కూడా ఖచ్చితంగా అరటి ఆకు విస్తళ్ళు మాత్రమే! వాటిని కూడా పెళ్ళివారు, కొనవలసిన అవసరం వచ్చేది కాదు. ఎవరో ఒక బంధువు వారి తోటలోని అరటి ఆకులు తెచ్చేవారు.

పెళ్ళి భోజనంలో ముఖ్యమైన వంటకం తప్పనిసరిగా కందిపప్పు ఉండేది. అదొక కమ్మని సువాసన వెదజల్లేది. దీనికి తోడు గుమ్మడికాయ దప్పళం. పెళ్లి అంటే ఇలాంటి భోజనమే మెదడులో స్థిరపడేది. భోజనం వడ్డించడం ఆత్మీయతతో కూడుకొని ఉండేది. వంటవాళ్లు చేత స్వయంగా వంట చేయించేవారు. అవన్నీఇప్పుడు క్రమంగా కనుమరుగవుతూ వస్తున్నాయి. పెళ్లిళ్లు విలాసవంతమైన వివాహమందిరాల్లో జరుగుతున్నాయి. భోజనం ‘కేటరింగ్’ వాళ్ళు సమకూర్చే సదుపాయాలూ వచ్చేసాయి. ఇప్పుడు పెళ్లి భోజనం అంటే, అందరూ వూహించుకునేది ‘బిర్యానీ’. ఇది ఎన్ని రకాలుగానైనా ఉండచ్చు. కొన్ని పెళ్లిళ్లలో అసలు శాకాహార వంటలకు ప్రాధాన్యమే ఉండదు. పప్పు వంటి ఐటెంల కోసం దుర్భిణి వేసి వెతుక్కోవలసిందే! ఇక శాకాహారుల పెళ్లిళ్లలో పూర్తిగా శాకాహారం ఉండడం అనేది అందరికీ తెలిసిందే! వారి వారి స్థాయిని బట్టి పదార్థాల జాబితా ఉంటుంది. వీటిలో వృథా అయ్యేవే ఎక్కువ!

డబ్బుంటే, ఈ రోజున ఎంత వైభవంగానైనా పెళ్లిళ్లు చేయొచ్చు. పెళ్లిళ్లు ఎంత వైభవంగా చేసినా, దాని కోసం డబ్బు ఎంత విల్లాసంగా ఖర్చు చేసినా, చిన్న చిన్న పొరపాట్లు పెళ్ళికి వచ్చిన అతిథులకు కాస్త చికాకు కలిగిస్తుంటాయి. ఎన్ని అనుభవాలు కళ్లెదుట కనిపించినా, అలాంటి సున్నితమైన విషయాలను నిర్వాహకులు పట్టించుకోక పోవడం బాధ అనిపిస్తుంది.

అందులో మొదటిది – పెళ్ళి ఘనంగా జరిగిపోతుంది, నూతన దంపతులను అక్షింతలు వేసి ఆశీర్వదించే ఘట్టం మొదలవుతుంది. ఇక వేదిక ఎడమవైపునుండి పెద్దలను ఆహ్వానించడం, ఒకేసారి పెద్ద క్యూ ఏర్పడి పోవవడం క్షణాల్లో జరిగిపోతుంది. ఇందులో నడివయస్సులో వున్నవాళ్ళ సంగతి అటుంచితే, వృద్దులు, కురువృద్దులు కూడా వుంటారు. అందరికీ త్వరగా ఆ పని పూర్తి చేసుకుని, భోజనం చేసి వెళ్లాలనే తొందరే! ఈలోపు ఎవరూ చెప్పకుండానే కుడివైపు నుండి గందరగోళం లైన్ మొదలవుతుంది.

వాళ్లకు కనీస జ్ఞానం, బుద్ధి ఉండదు. సజావుగా సాగుతున్న కార్యక్రమంలో గందరగోళం సృష్టిస్తారు. ఎడమ ప్రక్క నున్న వారి సంగతి అసలు ఆలోచించరు. అసలు క్యూ ఒక సెంటీమీటరు కూడా కదలదు. క్యూలో నిలబడ్డ వారికి అసహనం మొదలవుతుంది. దీని గురించి ఎవరు చెబుతారు? అందరూ విద్యావంతులూ, ఉన్నతస్థాయిలో వున్నవారు వుంటారు. ఇక భోజనశాల వ్యవహారం మరీ గమ్మత్తుగా ఉంటుంది. జనం ఎక్కువమంది ఒకేసారి వస్తారు, కౌంటర్లు తక్కువ ఉంటాయి. ఇక ఎప్పుడూ భోజనం సంగతే ఎరగనట్టు కొందరు, సమయం మించిపోయింది అని కొందరు పెద్దవాళ్ళు, ఒక పద్ధతి లేకుండా ఎగబడతారు, ఆధునిక బఫె సిస్టం కదా మరి! చూడ్డానికి ఈ సన్నివేశం కాస్త ఇబ్బందికరంగా ఉంటుంది. నిర్వాహకులు, సమయ పాలన చేయకపోవడం మూలాన, ఎక్కువ కౌంటర్లు ఏర్పాటు చేయకపోవడం వల్ల పెళ్లి వారికి సంబంధించి ప్రత్యేకంగా అజమాయిషీ చేసే పెద్దలు అక్కడ లేకపోవడం వల్ల కూడా ఇలాంటి ఇబ్బందులు ఏర్పడడానికి ముఖ్య కారణం.

పెళ్లి ఎంత ఘనంగా చేసినా, ఇలాంటి లోపాలు మొత్తం కార్యక్రమానికి మచ్చ తెస్తాయి. ఇలాంటి సమస్యల వల్ల పెళ్ళికి వెళ్ళి భోజనం చేయకుండా వెళ్ళిపోయేవారు చాలా మంది వుంటారు, అందులో నేనూ ఒకడిని!

ఇక్కడ నా అనుభవం ఒకటి ఉటంకించక తప్పదు. సుమారు పదేళ్ల క్రితం అనుకుంటాను, ఏలూరులో మా చిన్న మామగారు రిటైర్ అయిన సందర్భంగా, ఒక సన్మాన/అభినందన సభ ఏర్పాటు చేశారు. దానికి నేనే అధ్యక్షుడిని, ఆ తర్వాత యాంకర్‌ని కూడా! ఉపన్యాసాల సందడి ముగిసిన తర్వాత ఒక్కొక్కరు ఒక ప్రక్కనుండి క్యూలో వచ్చి, అభినందించి వెళుతున్నారు. ఈ లోగా మా చిన్న మామగారి కోడలు, పిల్లలు, ఇతర పరివారము మరో ప్రక్క నుండి రావడం మొదలు పెట్టారు. వాళ్ళు నిలబడలేని వృద్దులు కాదు. నా దృష్టిలో నిబంధనలు అందరికీ సమానమే. అందుచేత ఎలాంటి మొహమాటం లేకుండా, వారిని అలాకాకుండా అసలు క్యూలో రమ్మని ఆదేశించాను. వాళ్ళు లోపల నన్ను తిట్టుకున్నారేమో నాకు తెలీదుకానీ, మారుమాట మాట్లాడకుండా వెళ్లి అసలు క్యూలో నిలబడి వచ్చారు. బంధువులు, శ్రేయోభిలాషులు, ఇతరులు, సహకరించకుండా ఇలాంటి కార్యక్రమాలు, ముఖ్యంగా పెళ్లిళ్లు విజయవంతం కావు.

ఇకపోతే మంచి అనుభవాలు కూడా జ్ఞాపకం తెచ్చుకోవాలి. ఈ మధ్యనే నా సహాధ్యాయిని (ప్రొఫెసర్) కొడుకు పెళ్లి రిసెప్షన్‌కు వెళ్లడం జరిగింది. విపరీతమైన జనంతో హాలంతా నిండిపోయింది. వాళ్ళను చూస్తే అసలు భోజనం చేసి వెళ్ళగమా? (ఇలాంటి అనుమానాలు నాకే వస్తాయి) అనిపించింది. రిసెప్షన్ ఎంత చక్కగా మొదలయిందో చెప్పలేను. ఒకే వరుసలో క్యూకట్టి చక్కగా వధూవరులను ఆశీర్వదించి వెళ్లిపోతుంటే ఎంతో సంతోషం అనిపించింది. భోజనం విషయానికివస్తే డైనింగ్ హాల్లో ఎక్కువ కౌంటర్లు పెట్టడమే కాదు, కూర్చుని తినడానికి రౌండ్ టేబిల్స్ కూడా ఏర్పాటు చేశారు. ఎక్కడా ఇబ్బంది అనిపించలేదు. ‘ఆహా.. ఇలా ఉండాలి కదా!’ అనుకున్నాను. ఎవరికైనా అలానే అనిపిస్తుంది. ఒక శుభకార్యం శుభంగా ముగుస్తుంది. పెళ్ళివారు ఫంక్షన్ హడావిడిలోవున్నా, ఎవరో ఒకరు బాధ్యత తీసుకుని పర్యవేక్షకులుగా ఉంటే, ఎలాంటి సమస్యలూ వుండవు.

గొప్పలు చెప్పుకోవడం కాదు గానీ, నా ఇద్దరి పిల్లల పెళ్ళిళ్ళకి (నా దగ్గరే చేసాను) ఇలాంటి జాగ్రత్తలే తీసుకున్నాను. నా మిత్రులు కొందరు ఇప్పటికీ ఈ విషయంలో నన్ను ప్రశంసిస్తూనే వుంటారు, అవన్నీ మధుర జ్ఞాపకాలే మరి!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డాక్టర్ కె.ఎల్.వి.ప్రసాద్
February 5, 2023 at 7:20 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
–డా కె.ఎల్.వి.ప్రసాద్
సికిందరాబాద్.

Log in to Reply
2

Neelima
February 5, 2023 at 7:46 am
డాక్టర్ గారు
ఈనాడు పెళ్లిళ్ల కోసం చాలా బాగా వివరించారు..
అభినందనలు

Log in to Reply
1. 2.1
  
  డా కె.ఎల్.వి.ప్రసాద్
  February 5, 2023 at 6:29 pm
  అమ్మా
  హృదయ పూర్వక కృతజ్ఞతలు.మీకు
  
  Log in to Reply
3

Sagar
February 5, 2023 at 8:01 am
ప్రతి ఒక్కరూ ఓపికగా ఎదురు చూస్తే ఈ సమస్యలన్నీ సజావుగా పరిష్కారం అవుతాయి సర్. ప్రతి ఒక్కరూ హడావిడి పడి తమ వంతు ముందుగా ముగియాలనుకోవడమే అసలు ఇబ్బంది. మీరు అన్నట్లు ఎంత దగ్గరివారైనా నిబంధనలు పాటించాలి. అప్పుడే అంతా సజావుగా జరుగుతుంది. మంచి వ్యాసం అందించిన మీకు ధన్యవాదములు సర్.

Log in to Reply
1. 3.1
  
  డా కె.ఎల్.వి.ప్రసాద్
  February 5, 2023 at 6:30 pm
  సాగర్
  ధన్యవాదాలు.
  
  Log in to Reply
4

డా కె.ఎల్.వి.ప్రసాద్
February 5, 2023 at 8:20 am
Nenu jagrathaga vyavaharinchali ani munduga hecharinchi nanduku dhanyavadamulu .🙏
—–ప్రొ.రవికుమార్
హనంకొండ.

Log in to Reply
1. 4.1
  
  డా కె.ఎల్.వి.ప్రసాద్
  February 5, 2023 at 6:32 pm
  సొదరా
  కృత జ్ఞత లు.
  
  Log in to Reply
5

డా కె.ఎల్.వి.ప్రసాద్
February 5, 2023 at 9:29 am
ఆనాటి పెళ్ళిళ్ళ కు, ఈనాటి పెళ్ళిళ్ళ కు తేడా చాలా చక్కగా వివరించారు సార్. దానితో పాటు ఆనాటి రుచులు, పిలుపుల్లో ఆప్యాయతలు, ఈనాటి హంగులు, దుబారాలు, క్రమశిక్షణ, అతిక్రమణ, అది భోజనాల దగ్గర కాని, అభినందనల విషయములో కాని వ్యత్యాసాలు చాలా చక్కగా కళ్ళకు కట్టినట్లు వ్రాశారు సార్. మీరు వ్రాసిన సమస్యలు చాలా మంది ఎదురు కుంటున్నదే . మంచి సమస్యను అందరి దృష్టికి తీసుకుని వచ్చి నందుకు హృదయపూర్వక ధన్యవాదాలు సార్. ఎందుకంటే ఇలాంటి ఆర్టికల్ చదివి నప్పుడు తప్పొప్పులు తప్పక తెలుసుకుని ముందు ముందు ఇలాంటివి జరగకుండా సరి చేసుకునే అవకాశం కలుగుతుంది.ఎన్ని జాగ్రత్తలు తీసుకున్నా ఒక్కోసారి ఫంక్షన్ లలో ఇలాంటి అవకతవకలు మామూలే అని సర్దుకు పోవడం అలవాటైన మూలాన ఎవరూ ఇలాంటి విషయాలు బాధాకరంగా ఉన్నా బహిర్గతం చేయరు. చక్కని పెళ్ళి పందిరి జ్ఞాపకాలను మీ జ్ఞాపకాల పందిరిలో దాచి మాకూ పంచి మీ ఆదర్శాల పీట మాకు వేసినందుకు చాలా సంతోషంగా ఉంది. హృదయపూర్వక శుభాకాంక్షలు శుభాభినందనలు సార్ మీకు 🙏💐🙏💐🙏💐🙏💐🙏💐🙏💐🙏💐🙏
మొహమ్మద్. అఫ్సర వలీషా
భవానీ పట్నా ( కలహంది)

Log in to Reply
1. 5.1
  
  డా కె.ఎల్.వి.ప్రసాద్
  February 5, 2023 at 9:31 am
  కవయిత్రి గారికి
  హృదయపూర్వక
  ధన్యవాదాలు.
  
  Log in to Reply
2. 5.2
  
  డా కె.ఎల్.వి.ప్రసాద్
  February 5, 2023 at 6:33 pm
  అమ్మా
  నీ స్పందనకు ధన్యవాదాలు .
  
  Log in to Reply
6

డా కె.ఎల్.వి.ప్రసాద్
February 5, 2023 at 10:34 am
Gd Mng Doctor garu,
You said it rightly. Formation of “Q’ to greet the newly wedded couple now-a-days has become a very painful part of wedding particularly to the aged guests.
Instead, if one individual come to the guests & collect “AKSHINTALU” & gifts if any, to be passed on to the couple. (Just like what is done in the temples)
—Surya narayana rao
Hyderabad.

Log in to Reply
1. 6.1
  
  డా కె.ఎల్.వి.ప్రసాద్
  February 5, 2023 at 10:35 am
  ధన్యవాదాలు సర్ మీకు
  
  Log in to Reply
7

డా కె.ఎల్.వి.ప్రసాద్
February 5, 2023 at 12:45 pm
కుల మత ప్రాంతాలకు అతీతంగా ప్రతి పెళ్లి పందిరిలో అతిథులందరూ ఆస్వాదించేది మరియు కొంతకాలం పాటు గుర్తు చేసుకునే సంఘటనే! విందు భోజనం. పెళ్లి పీటల మీద కూర్చున్న వధూవరులు ,వారి దగ్గరి బంధువులు ఎంత ఖరీదైన ఆభరణాలు బట్టలు వేసుకున్నారో, ఎంత ఖరీదైన బహుమతులు ఇచ్చిపుచ్చుకున్నారో గమనించేది బహు కొద్ది మంది మాత్రమే . పెళ్లి తంతు చూసినా, చూడకపోయినా పెళ్లికి హాజరైన ప్రతి ఒక్కరూ ప్రత్యక్షమయ్యేది డైనింగ్ హాలు లోనే. రచయిత గారు తెలియజేసినట్లు నిర్వాకులు సరైన సమయపాలన మరియు ప్రణాళిక పాటించకపోవడంతో ఖరీదైన ఎన్నో రుచికరమైన పదార్థాలు ఉన్నప్పటికీ అవి అందరికీ అందుబాటులో లేక దగ్గరలో ఉన్న కొద్దిపాటి పదార్థాలతోనే సరిపెట్టుకొని రావలసిన పరిస్థితులు కూడా గమనిస్తుంటాము .విందు భోజనాలకున్న ప్రాధాన్యతను దృష్టిలో ఉంచుకొని కాబోలు తిరుపతి ,నెల్లూరు ప్రాంత వాసులు పెళ్లి ముహూర్తాలు తెల్లవారుజామున నిర్ణయించుకొని ముందు రోజు రాత్రి విందు ఏర్పాటు చేయటం వలన అతిథుల పట్ల పెళ్లి పెద్దల మర్యాదలకు భంగం కలగదు.
ఈ వ్యాసం చదువుతున్నప్పుడు నాకు, నాలుగు సంవత్సరాల క్రితం బెంగుళూరులో మా దగ్గరి బంధువుల పెళ్లి పిలుపు ఒకటి గుర్తుకు వస్తోంది. అందులో తెలియజేసిన విషయం… ముందు రోజు రాత్రి విందు భోజనాలు . మరుసటి రోజు రాత్రి వివాహము. పెళ్లి పత్రిక చదివిన తర్వాత నేను వారితో, మరుసటి రోజు పెళ్లికి తప్పకుండా వస్తాను !అని అన్నాను. దానికి వారు మరుసటి రోజు రాకపోయినా పరవాలేదు ,అది కేవలము వధూవరులకు సంబంధించిన కార్యక్రమమే ,ముందు రోజు భోజనానికి తప్పకుండా రావాలి . ఇది వారి ఆర్భాటమో, లేదా దానికున్న ప్రత్యేకతో అర్థం కావట్లేదు. ఆఫ్ కోర్స్ !నేటి పరిస్థితులు అలాగే ఉన్నాయిలెండి😁😁.
—బి.రామకృష్ణా రెడ్డి
హన్మకొండ

Log in to Reply
1. 7.1
  
  డా కె.ఎల్.వి.ప్రసాద్
  February 5, 2023 at 12:46 pm
  ధన్యవాదాలు రెడ్డి గారు
  
  Log in to Reply
8

డా కె.ఎల్.వి.ప్రసాద్
February 5, 2023 at 2:59 pm
లోకంలో జరిగే శుభకార్యాలలో ధనవంతులు వారి వైభవం చాటుకోవడానికే ఎక్కువ ప్రాధాన్యము ఇస్తారు.

వాళ్ళు ముహూర్తం,(సమయం) కార్యక్రమం, అలంకరణ, పటాటోపంకు ఇచ్చిన విలువ భోజనాలకు ఈయరు.

ఉత్సవానికి పిల్లలు, వృద్ధులు కూడ వస్తారు. ఈ రోజుల్లో చాలా మంది శర్కర బీమారీతో బాధపడుతుంటారు. వారు సమయానికి తినకపోతే ఏమౌతుందో అందరికీ తెలిసిందే! వారిగురించి కూడ కాస్త ఆలోచించాలి కద!

ఇక ఫోటోలు —
ఈ ఫోటోల కార్యక్రమంతో విసుగొస్తుంది. అక్షతలు(తలంబ్రాలు) వేయడానికి అరగంట ముందే భోజనాలకు ఆహ్వానిస్తే అత్యవసరము అనుకున్నవాళ్ళు భోజనానికి వెలతారు. మిగతావారు కార్యక్రమంలో ఉంటారు. దీనివల్ల ఒత్తిడి తగ్గుతుంది. భోజనాల తర్వాత మొదట వెల్లినవారు వచ్చి అక్షతలు వేస్తారు.

నాకు తోచింది నేను చెప్పాను. తప్పుగా అనుకోకండేం!

ఆచార్య తంగెడ జనార్దనరావు

Log in to Reply
1. 8.1
  
  డా కె.ఎల్.వి.ప్రసాద్
  February 5, 2023 at 3:00 pm
  హృడయ పూర్వక కృతజ్ఞతలు సర్ మీకు
  
  Log in to Reply
9

డా కె.ఎల్.వి.ప్రసాద్
February 5, 2023 at 3:32 pm
మీరు చెప్పిన మాటలకు మరిన్ని జొడింపులు, ముహూర్తం సమయానికి జరగదు, బ్యూటీషన్లు వధువు కు మెరుగులు దిద్దే పనిలో కాలాతీతమౌతుంది,తాళి సమయానికి రెండవ పురొహితుని విన్యాసాలు (ఫోటో గ్రాఫర్).. ఆహుతులు విజ్ఞతతో వ్యవహరించాలని, కర్తవ్యాన్ని నిర్వహిస్తూ ఉన్నావారు తమ పరిధి దాటకుండా మెదిలితే … అంతా ఆనందంగా జరుపుకునే అవకాశం ఏర్పడుతుంది
—–జానికీ రామ శాస్త్రి
కరీంనగర్.

Log in to Reply
1. 9.1
  
  డా కె.ఎల్.వి.ప్రసాద్
  February 5, 2023 at 3:33 pm
  ధన్యవాదాలండీ
  
  Log in to Reply
10

డా కె.ఎల్.వి.ప్రసాద్
February 5, 2023 at 7:20 pm
పురోహితుడు లేకున్నా పెండ్లి అవుతుందేమోగాని ఫోటోగ్రాఫరు దర్శకత్వం లేనిది కార్యకలాపాలేవీ జరగవు.పురోహితుని మంత్ర్ల మధ్య ఓసారి ఫోటోగ్రాఫరు దర్శకత్వంలో మరోసారి తాళికడ్తాడు పెండ్లి కొడుకు.అన్నీ రెండు రెండుసార్లు చేయాలె తలబ్రాలు పోస్యున్నప్పుడు వరుడు వధువు ఒకరినొకరు చూచుకోవటం వుండదు.వారి వారి మనోభావాలెట్లవుంటయో పరస్పర చూపులుండవు.వధూవరులు ఫోటోగ్రాఫర్ ను చూచి ఇగిలించవలసినదే.పూలమాలలు కూడా వేస్తూ పెండ్లిపిల్ల సిగ్గుపడదు సిగ్గుపడ్డట్టుఫోటోగ్రాఫల్ మొహం చూస్తుంది వరూడూ నిస్సహాయంగా ఫోటోగ్రాఫరుమొహమే చూడాల్సి వస్తుంది…రెండుసార్లు తాళికట్టాలె.రెండుసార్లు మెట్టెలు పెట్టాలె.ఎన్నిసార్లు తలబ్రాలు పోయాలోవపోస్తూ,ఆగాలో ఆగుతూ పొయ్యాలో అర్థంకాదు. తమనెత్తిమీద అక్షతలెవరు వేస్తున్నారోకూడా వధువరులకూ పట్టదు .వారికి పట్టిందల్లా ఒకేఒక్క ఫోటోగ్రాఫరూ ఆయన దర్శకత్వమూనూ.
జానకిరామశాస్త్రి గారుచెప్పింది అక్షరాలా నిజం.
ఇక భోజనాలసంగతి చెప్పేపని లేదు.. అనుకున్న సమయానికి ముహూర్తం జరగక అతిథులందరూ ఎప్పుడెప్పుడా అని ఎదురు చూసి ఒక్కటేసారి పొద్దెక్కినాక కొట్టంతలుపులు తీస్తే ఓటిమీద ఓటి పడుతూ పరుగెత్తే పశువుల లాగ( మన్నించాలె) తోసుకొని తోసుకొని తిండికోసం పోవటం..నిదానంగా తినే అవకాశమే వుండదు.
ఇక అతిథుల భోజన ప్రక్రియ. బఫెట్ భోజన ఏర్పాట్లు ఎవరికెంత ఏదికావాలో అది అంతవేసుకొని తినటం జరగాలె.ఎంతెంత ఆహార పదార్థాలు ఎంత వ్యర్థం అవుతాయో చూస్తే చికాకు కలుగుతుంది.
ఇవాళ ఫన్క్షన్లన్నీ తలిదండ్రుల చేతిలో ఉండటం లేదు పిల్లలచేతిలోనే వుంటున్నై
పిల్లల సంతోషాలకోసం తలిదండ్రులు మౌనంగా వుండవలసివస్తున్నది.
ఇక రిసెప్షన్ అగచాట్లు( అతిథులవే) వేరే .7 గంటలసమయమని శుభ లేఖలో ఇస్తే 9 గంటలకూ గాని వధూవరులు హాలుకు రారు. రాగనే ఫోటోలు దిగటం. అతిథులను ఆహ్వానించినమనే యాది గాని స్పృహ గాని ఆహ్శానించిన భోజనాలసంగతి సరేసరి.ముందర చెప్పినదానికిభిన్నంగా ఏమీవుండదు.
ఇదంతా ఒక చర్చకు అలవికాని లేదా వీలులేని విషయం అయిపోయింది…
ఇఇప్పటికే ఎక్కువ అనవసర చర్చ చేసినామేమో
—రామశాస్త్రి.

Log in to Reply
1. 10.1
  
  డా కె.ఎల్.వి.ప్రసాద్
  February 5, 2023 at 7:21 pm
  ధన్యవాదాలు శాస్త్రి గారు.
  
  Log in to Reply
11

డా కె.ఎల్.వి.ప్రసాద్
February 5, 2023 at 9:38 pm
పూర్వం అతిథులు పరిమితంగా వుండేవారు.బంధువులే ఎక్కువ స్నేహితులంటే కుటుంబ స్నేహితులుమాత్రమే అదీ పరిమితమే.పెండ్లికి వారం రోజులముందర వచ్చి పనులలో సాయం చేసి పెండ్లి అంతా అయినాక వచ్చిన దగ్గరిబంధువులు వెళ్ళిపోయేవారు.
పెండ్లి పిలుపు ఆహ్వానాలు కుటుంబ పెద్ద తలఫున్నే పెళ్ళేవి.ఇవాళ తలిదండ్రులు ఆహ్వాన పత్రికలు అట్చువేయించినా పిల్లలు తమమిత్రులకోసం ఆహ్వానాలు వారేవేసుకుంటున్నరు.పెండ్లికొడుకు/పిల్ల ల తోడబుట్టిన వారూ తమ తోడబూట్టిన వారి పెండ్లికోసం థమ పేరుమీద ఆహ్వానాలు అచ్చు వేసుకుంటున్నరు.లేదా థమ మిత్రులనుఫోన్ద్వారాఆహ్వానిస్తున్నరు.అతిథులెంతమందో అంచనా కు రాలేడు కుటుంబపెద్ద.. అదికూడా భోజనాలదగ్గర తొక్కిడికి కారణం అవుతున్నది.ఇంకొక కారణం ఫన్క్షన్ హాల్ చుట్టుపక్కలవుండేవారు భోజనాలు ఆరటభంకాగానే మొదటిబ్యాచ్లో వచ్చి దర్జాగా భోంచేసి వెళ్ళిపోతున్నరు .
కంట్రోల్ చెయ్యలేని కారణాలున్నాయి.పెండ్లి పద్ధతి భోజనాల గురించిఇదివరకేచర్చ జరిగిందిగదా.సర్!
—రామశాస్త్రి

Log in to Reply
1. 11.1
  
  డా కె.ఎల్.వి.ప్రసాద్
  February 5, 2023 at 9:40 pm
  అది వేరు
  ఇది వేరు కడాసర్..
  అయినా ధన్యవాదాలు మీకు.
  
  Log in to Reply
12

శ్యామ్ కుమార్ చాగల్
February 6, 2023 at 10:38 am
వివాహ సంబరాల్లో ఈ మధ్య కాలం లో జరిగే అనర్థదాయకమైన, అనారోగ్య కరమైన సంప్రదాయాలు చోటుచేసుకుంటున్న సమయం లో వాటి గురించి క్లుప్తంగా ఉదాహారణలతో చర్చించడం బావుంది. ఈ విషయాల్లో ఎన్ని రకాలుగా వివరించినా తక్కువే.
ప్రతీ ఒక్కరు ఈ ఇబ్బందులు ఎదుర్కుంటున్న వారే . అయినా వాటిని వాడుకలోనుండీ తీసేసే ప్రయత్నం చేయరు,
పెళ్లి మొదలయ్యిన క్షణమ్ నుండీ అతిధుల గురించి పట్టించుకునేవారే వుండరు. వధూవరులను ఆశీర్వదించే కార్యక్రమం ఒక ప్రహసనం అనే చెప్పాలి. దాని గురించి తోపులాట, పెద్ద క్యూ , అక్కడ ఫోటో లు, ముఖ్యమైన అతిధులు,రాజకీయ నాయకులు, ముఖ్యులు క్యూ ని అతిక్రమించి రావటం, వారికి ప్రత్యేక ఆతిధ్యం గురించి ఇక చెప్పాల్సిన అవసరం లేదు.
దాని తర్వాత భోజనాల వద్ద పెద్ద క్యూ. కొన్నే కౌంటర్లు, కిక్కరిసిన హాలు లో ఒకరి ఎంగిలి కంచాలు ఇంకొకరి వీపులకు అంటిస్తూ,మన బట్టలకు మరకలు అంటిస్తూ..పళ్లెం నిండా మరి మరుక్షణం తిండి దొరకదేమో అన్నంత నిండుగా తిండి పదార్థాలు. , చూడటానికి ఇబ్బంది ఉంటోంది అన కుండా ఉండలేం. వడ్డించుకున్న పదార్తాలల్లో సగాని పైగా పళ్లెం తో సహా చెత్త బుట్ట దాఖలు.
ఇహ భోజనాల వద్ద తినమని ప్రేమ గా అనేవారు కరవైపోయారీ రోజుల్లో. అందరూ హడావిడిగా, కంగారు పడుతూ , కావాల్సిన పదార్థాలు గురించి వెదుకుతూ, చెమటలు కక్కుతూ తినటం ఆ తర్వాత అమ్మయ్య అని ఊపిరి తీసుకొని ఇళ్లకు బయలు దేరటం అన్నది ఒక పెద్ద తప్పని సరి అయ్యిన కార్యక్రమం గా మారిపోయింది.
ఇక సమయ పాలన అన్నది వివాహాల్లో కనపడటం లేదు. సమయానికి వెళితే అక్కడ అంతా ఖాళీగా ఉంటుంది సరికదా ఇక పెళ్ళివారు కూడా కనపడరు.

పెళ్లి భోజనాల విషయానికొస్తే,అక్కడ అనవసరపు ఆర్భాటాలు ఎక్కువైపోయాయి. భోజనం తో బాటు చాట్ , స్వీట్, ఐస్ క్రీం,పండ్లు , టిఫిన్లు,దోసెలు, ఇలాటివి పెళ్లి వారి ఆర్ధిక స్థోమతను చూపించుకునే ప్రయత్నం గా మారిపోయింది. ఆర్థికంగా వీలు ఉంటే అలా చేయటం లో తప్పు ఏంటని అనొచ్చు,అయితే ఇవన్నీ లేని పెళ్లి భోజనాలు చప్పగా కనిపించటం మొదలయ్యింది.
కానీ ,వడ్డన కార్యక్రమం తో వుండే పంక్తి భోజనాల ముందు ఇవన్నీ దిగదుడుపే అని నా అభిప్రాయం.

ఇకపోతే , డబ్బులు ఏంచేయాలో అర్థం కాక ఇంకో కొత్త అర్థం లేని సంప్రదాయమొకటి మొదలయ్యింది, అదే రిటర్న్ గిఫ్ట్.
ఇవన్నీ ఆర్థికంగా అమ్మాయి తరఫు వారిని ఇబ్బందుల పాలు చేయటమే తప్ప ఇంకొకటి కాదు.

ఎదురు చూసిన కార్యక్రమం గంటల ఆలస్యంగా మొదలయ్యి న తర్వాత, పెళ్లి ఇంటి వారి ఫోటోల కార్యక్రమం మనం చచ్చినట్లు వీక్షించ వలసిందే.
ఇన్నీ ఇబ్బందులను ఎదుర్కోవటానికి మనం సన్నధులమై న తర్వాతే పెళ్లి వేడుకలకు హాజరు కావాలి సుమ.

అసలు సమాజం లో చోటు చేసుకుంటున్న విపరీత పోకడలను, జ్ఞాపకాల పందిరి రూపంలో మన కందిస్తున్న రచయిత,సంపాదకులకు మనందరి తరఫున ధన్యవాదాలు.

Log in to Reply
1. 12.1
  
  డా కె.ఎల్.వి.ప్రసాద్
  February 6, 2023 at 12:42 pm
  చాలా బాగా రాసావు మిత్రమ
  కృత జ్ఞత లు.
  
  Log in to Reply
13

Bhujanga rao
February 6, 2023 at 11:03 am
పూర్వపు రోజుల్లో జరిగిన పెళ్లిళ్లు మరియు ఇప్పుడు జరుగుతున్న పెళ్లిళ్లకు ఉన్న వ్యత్యాసాలు చాలా బాగా వివరించారు సర్.పెళ్లి అనేది ఆడంబరాల కంటే జ్ఞాపకాలకు సంబంధించినదిగా గుర్తించాలి. రెండు మనసుల కలియుక మరియు రెండు కుటుంబాల మధ్య కొత్త అనుబంధాలు,ఇలాంటి ఆశయాలతో ఆరంభమైన వేదిక ఆడంబరాలకు,వృధా ఖర్చులకు వేదిక అయింది. వివాహపు ఖర్చులను అన్ని భాగాలుగా విభజించి,ఏ భాగానికి ఎంత ఖర్చు చేయాలనుకుంటున్నారు ఆలోచించి చేయాలి,కొన్ని ఊహించని ఖర్చులు కూడా అవుతాయి.ఆడంబరాల కు పోకుండా విందు భోజనాలకు ఉన్న ప్రాముఖ్యాన్ని దృష్టిలో ఉంచుకొని చేయాలి.జ్ఞాపకాల పందిరి 148 లో అందరికి ఉపయోగకరమైన విషయాన్ని అందించిన మీకు హృదయపూర్వక నమస్కారములు సర్.🙏

Log in to Reply
1. 13.1
  
  డా కె.ఎల్.వి.ప్రసాద్
  February 6, 2023 at 12:43 pm
  భుజంగ రావు గారూ
  హృదయ పూర్వక కృతజ్ఞతలు సర్ మీకు.
  
  Log in to Reply
14

sunianu6688@gmail.com
February 6, 2023 at 1:24 pm
రచయత గారు చెప్పినట్లు జరిగితే ఎంత బాగుండు అనిపించింది చదవగానే. కానీ ప్రస్తుత పరిస్థితుల్లో అలా ఆశించడం అత్యాశే. ఇంతకుముందు పెళ్లి అంటేనే బంధువులందరూ 10రోజుల ముందుగానే పెళ్ళి పనులలో పాలుపంచుకునే వారు. ఇప్పుడు సొంత అక్కాచెల్లెళ్ళు, అన్నదమ్ములు పెళ్లి 1 గంట,1 రోజు ముందుగ వస్తారు. వచ్చినా వాళ్ల shopping, వాళ్ల personal పనులు తప్ప పెళ్ళీ పనులలో పాల్గొనరు. ఎవరి హడావుడి వారిది. రచయిత KLV ప్రసాద్ గారు చెప్పినట్లు ప్రతీ ఒక్కరు ఈ విషయం మీద అవగాహన కలిగి ఉండాలి. మంచి విషయము గురించి వ్రాసిన రచయిత KLV ప్రసాద్ గారికి ధన్యవాదాలు 👌👍💐

Log in to Reply
1. 14.1
  
  డా కె.ఎల్.వి.ప్రసాద్
  February 6, 2023 at 2:31 pm
  అమ్మా..మీ సహృదయ స్పందనకు ధన్యవాదాలు.
  
  Log in to Reply
15

డా కె.ఎల్.వి.ప్రసాద్
February 6, 2023 at 2:29 pm
మా వైశ్య కుటుంబాల్లో ఈవెంట్స్ అనుకుంటూ కోలాటం, మ్యాజిక్ షో, డ్యాన్స్ పోటీలు… ఇలా వివాహపు పవిత్రతను తగ్గించే ఓ జాతర లాంటి గలభా అగుపిస్తున్నాయి.
—-శ్రీధర్.చోడారపు
కవి,హైదరాబాద్.

Log in to Reply
1. 15.1
  
  డా కె.ఎల్.వి.ప్రసాద్
  February 6, 2023 at 2:32 pm
  కవి గారి స్పందనకు
  కృత జ్ఞత లు.
  
  Log in to Reply
16

Rajendra Prasad
February 6, 2023 at 3:32 pm
We need to take care of serving food on time beside sufficient counters. I found in some marriages the host will not care to wish the guests personally but confine to their rituals on the stage which I think is not a good reception

Log in to Reply
1. 16.1
  
  డా కె.ఎల్.వి.ప్రసాద్
  February 7, 2023 at 11:23 am
  Wonderful response
  Thank you prasad garu.
  
  Log in to Reply
17

పుట్టి. నాగలక్ష్మి
February 7, 2023 at 1:16 am
నాటి, నేటి వివాహ తంతు, ఆశీర్వాదాల క్యూ, భోజనాల ప్రహసనం.. మీ వర్ణన సూపర్ డాక్టర్ సాబ్..

Log in to Reply
1. 17.1
  
  డా కె.ఎల్.వి.ప్రసాద్
  February 7, 2023 at 11:24 am
  ధన్య వాదాలాండీ
  
  Log in to Reply