జ్ఞాపకాల పందిరి-133 | సంచిక - తెలుగు సాహిత్య వేదిక

జ్ఞాపకాల పందిరి-133

తెలుగు కవితా..! వర్ధిల్లు..!!

తెలుగు కవిత్వానికి వందనం. తెలుగు కవితకు స్వాగతం. ఒకప్పుడు చదువుకోవడానికి కవిత్వం పుస్తకాల్లో దొరికేది. ఆ పుస్తకాలు కూడా ప్రసిద్ధ కవులవే ఉండేవి. కవిత్వం వినాలంటే, కవిసమ్మేళనంలోనే సాధ్యం అయ్యేది. దానికి ఒక ప్రత్యేకత ఉండేది. ఆ ప్రత్యేకత తెలుగు సంవత్సరాది, ‘ఉగాది’ రోజున ఉండేది. ఇది ఉగాది పండుగకు అదనపు ఆకర్షణగా ఆనందాన్ని పంచేది. అంటే కవిసమ్మేళనం సంవత్సరానికి ఒకసారి, అదీ ఉగాది రోజున సాధారణంగా ఆహూతుల సమక్షంలో జరిగేది. అది హైద్రాబాద్ అయితే తప్పనిసరిగా రవీంద్ర భారతిలో ఉండేది. విజయవాడలో అయితే తుమ్మలపల్లి క్షేత్రయ్య కళాక్షేత్రంలో జరిగేది. అది కూడా ఆకాశవాణి హైదరాబాద్/విజయవాడ కేంద్రాలు ప్రత్యక్ష ప్రసారం చేసేవి.

నేటి కవిత వారి ప్రశంస

తర్వాత దూరదర్శన్ ఆవిర్భావం నుండి, దూరదర్శన్ కూడా టెలీకాస్ట్ చేస్తూ వస్తున్నది. దిన, వార, పక్ష, మాసపత్రికల్లో కవిత్వం వచ్చేది. పత్రికలలోగానీ, రేడియోలోగానీ, ప్రముఖ కవులకే ఎక్కువగా చోటుండేది. అలా తెలుగు కవిత్వం, తెలుగు కవిత, ఏ కొందరి చేతుల్లోనో ఉండేది. పత్రికలలో, యువతీయువకుల కోసం ఒక ప్రత్యేక పేజీ, రేడియోలో ‘యువవాణి’ లో, యువతకు అవకాశాలు తర్వాత వచ్చాయి. దీనితో మామూలు కవులకు కూడా ప్రాధాన్యత, ప్రోత్సాహం లభించేవి. ఈ పధ్ధతి ప్రస్తుతం పత్రికలలో లేకపోయినా, ఆకాశవాణి కేంద్రాలు, ఇప్పటికీ ‘యువవాణి’లో, యువకవులను ప్రోత్సహిస్తున్నాయి. అయితే రేడియోలో, ఇలాంటి సదుపాయం ఉంటుందని, దానికి కొంత పారితోషికం కూడా లభిస్తుందని ఇప్పటికీ చాలామందికి తెలియదు. ఈ వ్యాస రచయిత ద్వారా చాలామంది ఈ సదుపాయాన్ని సద్వినియోగం చేసుకున్నారు/చేసుకుంటున్నారు కూడా!

నేటి కవిత ఆత్మీయ సమ్మేళనం 14.10.2018

మన ఆధునిక జీవితంలో, అత్యవసర పరికరంగా ఆవిర్భావించిన ‘మొబైల్ ఫోన్’ అన్నివిషయాలు మాదిరిగానే కవిత్వం/కవిత విషయంలో, ఫేస్‌బుక్ రూపంలో ఆధిక్యతను సాధించింది. సాహిత్యపరంగా, కవిత్వపరంగా కుక్కగొడుగుల మాదిరిగా అనేక గ్రూపులు ఏర్పడ్డాయి. కవిత్వం, కథ, వ్యాసం, విమర్శ, పాట, పద్యం, గజల్, ఒకటేమిటి, అన్ని ప్రక్రియలు, అందరూ రాసుకునే వెసులుబాటు కలిగింది. వీటిని అనేకమంది చదివే అవకాశం కూడా కలిగింది. ఎవరికీ వారు స్వంత గ్రూపులు పెట్టడం, చెప్పకుండానే అందులో సభ్యుల్ని చేయడం జరుగుతున్నది. ఇందులో చాలా గ్రూపులు సాహిత్యాన్నీ, కవిత్వాన్నీ ఖూనీ చేస్తుంటే, కొన్ని గ్రూపులు మాత్రం చక్కని సాహిత్యాన్ని, కవిత్వాన్ని, రచయితలను ప్రోత్సహిస్తున్నాయి. కొన్ని గ్రూపులు కవితల పోటీలు పెట్టి, అక్షరదోషాలున్నా, పద దోషాలున్నా, వాటిని గుర్తించకుండా, పరిష్కరించకుండా, ప్రశంసా పత్రాలు జారీ చేయడం బాధాకరం. ఇలాంటి క్రియలు ఆయా కవులకు లేదా రచయితలకు నష్టమే గానీ, లాభం ఏమాత్రం ఉండదు.

ఆత్మీయ సమ్మేళనంలో రచయిత ఉపన్యాసం

కొన్ని గ్రూపులు నిజమైన సాహిత్యసేవ చేస్తున్నాయి. ఉద్దండులైన కవుల చేత, రచయితల చేత రోజుకొక అంశం మీద వ్యాసాలు రాయిస్తున్నాయి, సమీక్షలు చేయిస్తున్నాయి. ఇవి యువకవులకు, రచయితలకు ఎన్నో మెళుకువలు, నేర్పిస్తాయి. కొన్ని గ్రూపులు కవితల పోటీలు పెట్టి బహుమతులు ప్రకటించడం ద్వారా, మంచి కవిత్వానికి బాటలు వేసే ప్రయత్నం చేస్తున్నాయి. కొంత మంది తమ గ్రూపుల ద్వారా ప్రధాన పట్టణాలలో కవిసమ్మేళనాలను ఏర్పాటు చేస్తూ అనేకమంది ప్రాంతీయులకు ప్రోత్సాహం కల్పించడం అభినందనీయం అయినప్పటికీ, ఒకే రోజు వందమందిని ఆహ్వానించి సమయం సరిపోనందున చివర, కవితలు చదవకుండానే శాలువా కప్పి సన్మానం చేయడం, ప్రశంసా పత్రాలు ఇవ్వడం తప్పుకాదా! తప్పే కాదు, నేరం కూడా కదా! సంస్థలు లేదా గ్రూపులు వాటి పేరుకోసం ఇలాంటి కవితా జాతరలు చేస్తుంటారుగాని తెలుగు కవిత్వాన్ని లేదా సాహిత్యాన్ని ఉద్దరించడానికి మాత్రం కాదు!

నేటినిజం.. పత్రిక అధిపతి శ్రీ బైస దేవదాసు (ముఖ్య అతిధి) రచయితకు సన్మానం చేస్తున్న దృశ్యం

సాహిత్యం కోసం, కవిత్వంలో పుష్టికరమైన కవిత్వం సృష్టించడం కోసం కొన్ని గ్రూపులు నిజంగా కష్టపడుతున్నాయి. అలాంటి అన్ని గ్రూపుల గురించి ఇక్కడ ప్రస్తావించలేను గానీ, నాకు తెలిసిన రెండు గ్రూపుల గురించి వారి సాహిత్య సేవ గురించి కొద్దిగా ముచ్చటిస్తాను.

సన్మాన కార్యక్రమంలో శ్రీ సేనాధిపతి (ఎడమ), శ్రీ లక్ష్మయ్య (కుడి)

నాకు రెండు గ్రూపులతో బాగా పరిచయముంది. ఆంటే.. ఆ రెండు గ్రూపుల్లోనూ నేను చురుగ్గా పాల్గొన్నాను. రెండు గ్రూపుల వల్లా ప్రయోజనం పొందాను. అందులో మొదటిది ‘నేటి కవిత’ గ్రూపు. హుస్నాబాద్‌లో ఇది 2017లో శ్రీ దాస్యం లక్ష్మయ్య అధ్యక్షుడిగా (అడ్మిన్), శ్రీ దాస్యం సేనాధిపతి ముఖ్యసలహాదారుగా ప్రారంభమయింది. మిత్రులు డా.శ్రీరంగస్వామి ద్వారా ఈ గ్రూపు నాకు పరిచయం అయింది. సాహిత్యకారుడిగా అంతకు ముందే శ్రీ దాస్యం లక్ష్మయ్య గారు నాకు పరిచితులు. అందులో రోజుకొక అంశం శీర్షికగా ఇచ్చి కవిత రాయమనేవారు. చూచాయగా వాటిని సేనాధిపతి గారు (కవి, కథకుడు, సమీక్షకుడు, విమర్శకుడు) సమీక్ష చేసేవారు, కొన్ని అవసరమైన సూచనలు కూడా చేసేవారు. అందులో నేను రెండు వందలకు పైగా కవితలు రాసాను. ఈ గ్రూపులో నాకు పరిచయమైన వారు, ఇంకా వారి పరిచయాన్ని కొనసాగిస్తూనే వున్నారు.

కవి మిత్రులు జయపాల్ రెడ్డి గారితో

వారిలో, దొండపాటి నాగజ్యోతి శేఖర్ (కాకినాడ), శ్రీమతి అఫ్సర వలీషా (ద్వారపూడి), శ్రీ జి. శ్రీనివాసా చారి (ఖాజీ పేట), శ్రీమతి కట్ల (బాలబోయిన) రమాదేవి తదితరులు. 2018లో నేటి కవిత గ్రూప్ వారు, హన్మకొండలో (శ్రీ రాజరాజ నరేంద్ర గ్రంధాలయంలో) గ్రూపు సభ్యుల కోసం ఒక ఆత్మీయ సమ్మేళనం ఏర్పాటు చేసారు. దానికి వేదికను నేనే స్పాన్సర్ చేసాను. వివిధ ప్రాంతాలనుంచి అనేకమంది కవయిత్రులు, కవులూ వచ్చారు. అందరికీ సన్మానాలు జరిగాయి. అందులో నేనూ ఒక సన్మానితుడ్ని. ఈ గ్రూప్ ద్వారా నేను కవిత్వం రాయడం గురించి చాలా నేర్చుకున్నాను. కొన్ని సాంకేతిక కారణాల వల్ల స్వయంగా గ్రూపు నుండి వైదొలగడం జరిగింది. కానీ ఈ గ్రూప్ ఇప్పటికీ చక్కని సాహిత్య సేవ చేస్తున్నది. చాలామంది వర్ధమాన కవులు/కవయిత్రుల నుండి, సీనియర్ కవులు సైతం ఇప్పటికీ సద్వినియోగం చేసుకుంటున్నారు. ఈ విషయంలో ‘నేటి కవిత’ను ఈ నాటికీ చక్కగా నడిపిస్తున్న లక్ష్మయ్య గారూ, సేనాధిపతి గారూ అభినందనీయులు.

కొందరు కవయిత్రులతో

కొందరు కవయిత్రులతో

నేటి కవిత.. ముఖ్య సలహాదారు శ్రీ దాస్యం సేనాధిపతి

నేటి కవిత గ్రూప్ అడ్మిన్ శ్రీ దాస్యం లక్ష్మయ్య

నాకు పరిచయం వున్న మరొక పుష్టికరమైన గ్రూపు ‘ప్రియమైన రచయితలు’ (సింహాచలం). దీనికి అడ్మిన్‌లు చాలామంది ఉన్నప్పటికీ ప్రధాన అడ్మిన్ శ్రీ ఇందూ రమణ గారు. ఇందులో చాలా సీనియర్ కవులూ కవయిత్రులూ వున్నారు. ‘నానీలు’ అనే కవితా ప్రక్రియను ఈ గ్రూపు ద్వారానే నేర్చుకున్నాను. అందుకు ఈ గ్రూపుకు ప్రత్యేక కృతజ్ఞతలు తెలియజేయాలి. శ్రీ ఇందూ రమణ గారు, ‘సాహో’ అనే మాసపత్రికను నిర్వహిస్తూ, ‘ప్రియమైన రచయితలు’ గ్రూపు సభ్యులకు పత్రికలో అధిక ప్రాధాన్యత నిస్తున్నారు. కొన్ని కారణాలవల్ల ఈ గ్రూపులోకూడా ఎక్కువ కాలం నా సభ్యత్వాన్ని కొనసాగించలేకపోయాను. ఇలాంటి గ్రూపులు మంచి మంచి కవులను తయారుచేస్తాయి. కొన్ని గ్రూపులు సభ్యుల బలహీనతలను తెలుసుకుని వారిని వక్రమార్గంలో నడిపిస్తున్నాయి. వర్ధమాన కవయిత్రులూ/కవులూ, సన్మానాలకూ, ప్రశంసా పత్రాలకూ ఆకర్షితులు కాక, వాటికి ప్రాధాన్యం ఇవ్వక, సాహిత్యపరంగా/కవిత్వం పరంగా ఎదగడానికి ప్రయత్నించాలి. పొగడ్తలను పక్కన పెట్టి, మార్గదర్శనం చేసే పెద్దల విమర్శకు ప్రాధాన్యత నివ్వాలి. అప్పుడే కవి – కవిత్వపరంగా ఎదగగలుగుతాడు. అలాగే, గ్రూపులు లేదా సంస్థలు ప్రతిరోజూ ఎక్కడోచోట కవిసమ్మేళనం పెట్టడంవల్ల ప్రయోజనం ఉండదు. కొంతకాలానికి ‘కవిసమ్మేళనాలు’ అంటేనే రోత పుట్టే పరిస్థితి వస్తుంది.

ప్రియమైన రచయితలు.. గ్రూప్ ప్రధాన అడ్మిన్ శ్రీ ఇందూ రమణ గారు

మంచి కవిత్వం రాసి, పత్రికలలో చోటుచేసుకోవాలి. రేడియో/దూరదర్శన్ లను సద్వినియోగం చేసుకోవాలి. అలాగే మన కవిత్వం నలుగురూ చదివేట్టు, వినేట్టు వుండాలి గాని, జనం పారిపోయేట్టు వుండకూడదు. కవులు/కవయిత్రులు సమాజంలో అత్యంత బాధ్యతగల పౌరులని గుర్తుంచుకోవాలి!

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా కె.ఎల్.వి.ప్రసాద్
October 23, 2022 at 8:15 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
—–డా కె.ఎల్.వి.ప్రసాద్
హన్మకొండ.

Reply
2

Sagar
October 23, 2022 at 9:31 am
ప్రోత్సాహం అనేది విభిన్న రంగాలలో నిష్ణాతులైన వారికి ఉండవలసిన మొదటి సుగుణం అని నా అభిప్రాయం సర్. ఈ విషయంలో మీరు ఎంతో సేవచేస్తున్నారు. ఇక నా లాంటి వారిని ప్రియమైన రచయితల సమూహమో లో చేర్చి ప్రోత్సాహం ఇచ్చింది మీరే. నేటికీ నాకు అక్కడ వారంలో నాలుగు రోజులు సోమవారం నుంచి గురువారం వరకు నానీలు, వచన, చిత్ర, మినీ కవితల ప్రక్రియలన్నీ ఇష్టమైన ప్రక్రియలు.ఇలా పరోక్షంగా నాకు నేర్చుకొనే అవకాశం కల్పించారు. ఇక నాకు మీ ప్రత్యక్ష ప్రోత్సాహం విషయం అందరికీ తెలిసిందే.మీకు నా ప్రత్యేక ధన్యవాదములు. సర్

Reply
1. 2.1
  
  డా కె.ఎల్.వి.ప్రసాద్
  October 23, 2022 at 11:55 am
  సాగర్
  నీ అభిరుచి,నీ కృషి,క్రమశిక్షణ నిన్ను
  అలా తయారు చేసాయి
  అభినందనలు.
  
  Reply
3

డా కె.ఎల్.వి.ప్రసాద్
October 23, 2022 at 11:53 am
మన కవిత్వం నలుగురు వినేట్టు.. చదివేట్లు ఉండాలనే వ్యాస ముగింపు సందేశం బాగుంది..
—వెంకట్రామ నరసయ్య
మహబుబాబాద్

Reply
1. 3.1
  
  డా కె.ఎల్.వి.ప్రసాద్
  October 23, 2022 at 11:54 am
  ధన్యవాదా లు
  మిత్రమా….
  
  Reply
4

డా కె.ఎల్.వి.ప్రసాద్
October 23, 2022 at 12:12 pm
జగమెరిగిన రచయిత మీరు…. ఏభై సంవత్సరాల మీ సాహితీ ప్రయాణంలో ఎంత అనుభవం సంపాదించారో!….ఈ వ్యాసంలో వ్రాసింది ౘాల తక్కువ అనిపిస్తుంది….వ్యాసం పరిమితి వుంది కదా…. ముఖ్యంగా మీ జిల్లాలోని కార్యక్రమాలు (మీకు అందివచ్చినవి) వివరించారు…. Nice one!
—–ఎస్.వి.ఎల్.ఎన్.శర్మ
హైదరాబాద్

Reply
1. 4.1
  
  డా కె.ఎల్.వి.ప్రసాద్
  October 23, 2022 at 12:13 pm
  కృత జ్ఞత లు
  మిత్రమా…
  
  Reply
5

డా కె.ఎల్.వి.ప్రసాద్
October 23, 2022 at 12:40 pm
చాలా బాగా వివరించారు సర్
తెలుసుకోదగిన విషయాలు ఉన్నాయి
—–కె.కుమార స్వామి
హన్మకొండ.

Reply
1. 5.1
  
  డా కె.ఎల్.వి.ప్రసాద్
  October 23, 2022 at 12:41 pm
  ధన్యవాదాలండీ.
  
  Reply
6

Bhujanga rao
October 23, 2022 at 2:33 pm
జ్ఞాపకాల పందిరి 133 తెలుగు కవితా వర్ధిల్లు.. ఎన్నో తెలియని విషయాలను బాగా వివరించారు. మంచి కవిత్వం రాయడంతో పాటు పత్రికలు మరియు రేడియో/దూరదర్శన్ లను వినియోగించుకుంటూ, మన కవిత్వం నలుగురు వినేటట్లు మరియు చదివేటట్లు ఉండాలని చక్కని వివరణ ఇచ్చిన మీకు ధన్యవాదములు🙏.

Reply
1. 6.1
  
  డా కె.ఎల్.వి.ప్రసాద్
  October 23, 2022 at 7:34 pm
  ధన్యవాదాలండీ.
  
  Reply
7

Rajendra Prasad
October 23, 2022 at 3:08 pm
Many points about సాహిత్యం and groups are mentioned. True some are encouraging and some are doing for their own good. It’s very nice people like you are contributing to తెలుగు సాహిత్యం and some are promoting and people like us enjoying

Reply
1. 7.1
  
  డా కె.ఎల్.వి.ప్రసాద్
  October 23, 2022 at 7:35 pm
  Thank you
  Prasad Gary.
  
  Reply
8

డా కె.ఎల్.వి.ప్రసాద్
October 23, 2022 at 10:40 pm
ఒకానొక సందర్భం లో శ్రీశ్రీ గారు “వచనం రాయడమే కష్టం వచనకవిత్వం రాయడం మరీ కష్టం ” అన్నారు …. కానీ ఈ రోజుల్లో చాలామంది వచనకవిత్వం రాయడం ఎంతో సులభం అనుకుంటూ కుడి ఎడమ చేతులతో రాసిపారేస్తున్నారు ….. దానివల్ల కవిత్వాలలో వాసి కన్నా రాశి పెరిగింది , బరువు తగ్గింది ….. అందుకే కవిత్వమన్నా కవిసమ్మేళనాలన్నా జనానికి ఒకరకమైన ఏవగింపుపుట్టింది ….. కేవలం రాయాలన్న తపనసరిపోదు , విస్తృతంగా ఇతరుల కవిత్వాన్ని బాగా చదవాలి . అప్పుడే మీరన్నట్టు కవిత్వం వర్ధిల్లుతుంది తప్ప వర్ధిల్లడమంటే కేవలం పుస్తకాల సంఖ్య పెరగడం కాదుకదా ! మీరు సూచించిన సూచనలు ఇప్పటి కవులు పాటిస్తే మంచి మంచి కవిత్వాలు వెలువడే సదవకాశం ఉంది ….. ఆ ప్రయత్నం చేయి స్తున్న మిత్రుల్లో మా సేనాధిపతి ముఖ్యుడు , ఆయనకు తోడు లక్ష్మయ్య …….. వీళ్లిద్దరి కృషి ఎందరో కొత్త తరపు కవులను తెలుగు కవితారంగానికి పరిచయం చేసింది ఇందులో మీరు పేర్కొన్న మాధ్యమాలూ ప్రధానమైన ఒక భాగమే …… కవిత్వం వర్ధిల్లాలన్న మీ ఆశయం సంపూర్ణంగా నెరవేరాలని కోరుకుంటూ , పురస్కృతులైనందుకు హృదయపూర్వకంగా అభినందిస్తున్నాను
—–గన్నమరాజు గిరిజా మనోహర బాబు
హైదరాబాద్ .

Reply
1. 8.1
  
  డా కె.ఎల్.వి.ప్రసాద్
  October 23, 2022 at 10:41 pm
  ధన్యవాదాలు గురువుగారూ.
  
  Reply
9

డా కె.ఎల్.వి.ప్రసాద్
October 24, 2022 at 6:08 am
తెలుగుకవిత వర్ధిల్లాలనే మీ ఆకాoక్ష.. మీ సంబంధ బాంధవ్యాలు చక్కగాఉన్నాయి 👏👏👏🙏💐🙏
—కోరాడ నరసింహారావు
విశాఖపట్నం.

Reply
1. 9.1
  
  డా కె.ఎల్.వి.ప్రసాద్
  October 24, 2022 at 6:08 am
  ధన్యవాదాలండీ.
  
  Reply
10

శ్యామ్ కుమార్ చాగల్
October 24, 2022 at 4:38 pm
జ్ఞాపకాల పందిరి 133 లో మీరు
ఉటంకించిన విషయాలు చాలా వరకూ అందరూ చూసీ చూడనట్లుగా ఉండేవే. కవిత్వం అంటే తీయని భావన కలిగే రోజులవి. మీరన్నట్లుగా నేడు సోషల్ మీడియా లో చూస్తే కవులు ,రచయితలు కోకొల్లలు. రాసి పెరిగింది..కానీ వాసి గురించి అందరికీ తెలిసిందే.
పూర్వం వ్రాతలు ప్రచురించే మాధ్యమాలు అతి స్వల్పం. నేడు అవి విరివిగా లభ్యం అవుతుండటం తో వ్రాసేవారికి సౌలభ్యం పెరిగింది. కాకపోతే పాఠకుల సంఖ్య మాత్రం దానుకనుగుణంగా పెరగటం లేదని అనుమానంగా వుంది. ప్రచురించే సాధనాలు రోజురోజుకి ఆదరణ కరువై మూతబడిపోతున్నాయి.
కవిసమ్మేళాలకి, పుస్తకావిష్కరణలకి హాజరయ్యే జనం పలచబడి పోతుండటం మనం గమనిస్తూనే వున్నాం. అయినప్పటికీ సాహిత్య సేవ పరంపరలో ఎంతో మంది వాటిని కొనసాగిస్తూ ఉండటం, డిజిటల్ మాధ్యమాలు వారిని ప్రోత్సహించటం ఒక మంచి పరిణామమని చెప్పాలి.
ఇక పోతే మీరు రాసినట్లుగా గ్రూపులు కూడా మంచి చెడు లాగ కొనసాగుతున్నాయి. అన్నింటా చెడు ప్రభావం చొరబడినట్లుగా ఇందులో కూడా జరగటం మన దురదృష్టం. ఈ యొక్క సాహిత్య సేవ లో మీకు ఎదురయిన వ్యక్తుల, సమూహాల గురించి సందోర్బచితంగా మాకు తెలియ చేసినందుకు , ఔత్సాహిక రచయితలకు మీరిచ్చిన సలహా, సూత్రాలకు .మరియు ప్రచురించిన సంపాదకుల కు నా ధన్య వాదాలు.

Reply
1. 10.1
  
  డా కె.ఎల్.వి.ప్రసాద్
  October 24, 2022 at 4:51 pm
  మిత్రమా
  నీ విశ్లేషణ బాగుంది
  హృడయ పూర్వక కృతజ్ఞతలు.
  
  Reply
11

డా కె.ఎల్.వి.ప్రసాద్
October 24, 2022 at 8:51 pm
,మీజ్ణాపకాలపందిరి133 బాగున్నది.
మీరన్నట్టు ఒకప్పటికి ఇప్పటికీ కవులెక్కువయ్యారు,కవిత్వమూ ఎక్కువే అయింది.చిక్కటి కవిత్వం రాస్తున్నారు చాలా మందికవులు.. ఒక కవిత ఏదో దినపత్రికలో ప్రచురించబడుతుంది.ఆపేపరు కటింగు మళ్ళీ తను టైప్చేసి కవిత పూర్తిపాఠం పెడుతున్నారు కవిమిత్రులు.ఏదో ఒకటిశచాలుగదా.టొప్ చేసికింద నోట్ ఫలానా పత్రికలో అచ్చైందని ఇవ్వ వచ్చు కదా.
అట్లనే ఒక కవితనోవపద్యమో రాసి నలుగురైదుగురిథో చదివించి( పాడి) ధ్వని ముద్రణ పెట్తున్నరు కొందరు ఒక్కరు చదివింది చాలదా? అట్లనే ఒకేకవిత అయిదారు గ్రూపులలో పోస్ట్ చేయటం .మీరన్నట్టు మన ప్రమేయం లేకుండనే అన్ని గ్రూపులలో సభ్యత్వం కల్పించటం వలన ఒక కవిత ఐదుసార్లు చదవవలసి రావటం లేదాఐదింతల స్పేస్ ఆక్రమించటం.మొహమాటస్తులకు మరీ ఇబ్బంది. కవిసమ్మేళనాలది అదోవప్రత్యేకంగా చెప్పుకోవలసిన విషయం.లెక్కకు మిక్కిలికవులను ఆహ్వానించటంశసమయాభావం వలన అని శాలువాలు కప్పిపంపటం.సహస్రాధికకవిసమ్మేళనాలు శతాధిక కవిసమ్మేళనాలూ చూసినం.ఒక కవి చదువుతుండగానే పక్కన ఇంకో కవిని పిల్చి నిలబెట్టటం .(హోటల్లో మీల్స్ టికెట్ తీసుకొని లోపలికిపోయి ఎవడు ముందర భోజనం ముగిస్తాడోనని వాని వెనుక నిలబడటం వలె) సన్మానం పక్క గదిలో .కెమెరా ముందట ( సభలో కాదు).itla untunnai sabhalu ,kavi sammelanalu
,,,నాగిళ్ళ రామ శాస్త్రి
హన్మకొండ.

Reply
1. 11.1
  
  డా కె.ఎల్.వి.ప్రసాద్
  October 24, 2022 at 8:51 pm
  కృత జ్ఞత లు
  శాస్త్రిగారు.
  
  Reply
12

డా కె.ఎల్.వి.ప్రసాద్
October 25, 2022 at 6:47 am
జ్ఞాపకాల పందిరి..133 లో నేటి సాహిత్య విలువలను ప్రస్తావించారు. డిజిటల్ విప్లవంతో తెలుగులో వచన కవిత్వానికి ప్రాధాన్యత పెరిగింది. సాహిత్య విలువలు పడిపోతున్నాయి మీరు చెప్పినట్టుగా. కవులకు ప్రశంసాపత్రాలు ఇచ్చే సమూహాలు నేడు ఎక్కవౌతున్నాయి. నిజంగా బాధాకరం.

నాకు వచనకవిత్వంలో ఓనమాలు నేర్పింది నేటికవితా సమూహమే. కొన్ని కారణాల వల్ల నేను కూడా సమూహం నుంచి వైదొలిగాను. నేటి సాహిత్య విలువలపై చక్కగా విశ్లేషించారు. అభినందనలు.
—–జి. శ్రీనివాస చారి
కాజీపేట.

Reply
1. 12.1
  
  డా కె.ఎల్.వి.ప్రసాద్
  October 25, 2022 at 6:48 am
  ధన్య వాదాలాండీ
  చారి గారూ….
  
  Reply
13

డా కె.ఎల్.వి.ప్రసాద్
October 25, 2022 at 8:04 am
చాలాబాగా రాశారు డాక్టర్ గారూ
ధన్యవాదాలు
–దాస్యం సేనాధిపతి
కరీంనగర్

Reply
1. 13.1
  
  డా కె.ఎల్.వి.ప్రసాద్
  October 25, 2022 at 11:07 am
  ధన్యవాదాలండీ.
  
  Reply
14

డా కె.ఎల్.వి.ప్రసాద్
October 25, 2022 at 11:09 am
మీరు ప్రస్తావించిన నేటికవిత సమూహం ఎవరికి ఎంత మేలు చేసిందో కానీ నాకైతే నా కవిత్వాన్ని మెరుగుపరుచుకోవడం తో పాటు విలువైన మీ పరిచయాన్ని గావించి నాకెంతో మేలు చేసింది.ఎంతంటే నాలో ఎంతో ఆత్మవిశ్వాసం నింపి నా అక్షరాలన్నీ పదిలంగా ఓ పుస్తకం గా తీసుకు వచ్చేలా చేసి నా ఉనికిని సాహితీ లోకంలో తెలియచేసింది మీ మార్గ దర్శనంలో.నా చిరకాల కోరిక రేడియోలో వినిపించడం మీ గైడెన్స్ వల్లే నెరవేరింది.ఇక ప్రియమైన రచయితల సమూహం ద్వారా నా పుస్తకం నాణ్యంగా ప్రచురితం అయ్యింది.అదీ కూడా మీ మార్గదర్శనం వల్లే.సాంకేతిక త వల్ల అత్యంత లబ్ది పొందింది నేనే.ఈ సమూహా నిర్వాహకులకు ,మీకు ఈ వేదిక మీదుగా హృదయపూర్వక ధన్యవాదాలు సర్🙏🙏💐
—–నాగజ్యోతి శేఖర్
కాకినాడ.

Reply
1. 14.1
  
  డా కె.ఎల్.వి.ప్రసాద్
  October 25, 2022 at 11:09 am
  అమ్మా
  ధన్యవాదాలు..
  
  Reply
15

sunianu6688@gmail.com
October 28, 2022 at 5:58 pm
అక్షర సత్యాలు సర్. ప్రస్తుత పరిస్థితుల్లో మీరు వివరించిన విషయాలు వాస్తవానికి ప్రతీకలు.ఇంత విపులంగా చెప్పినందుకు మీకు హృదయ పూర్వక అభినందనలు👌👌👍👍👍💐💐💐

Reply