జ్ఞాపకాల పందిరి-127 | సంచిక - తెలుగు సాహిత్య వేదిక

జ్ఞాపకాల పందిరి-127

వివాహ భోజనంబు..!!

సాధారణంగా వయసు వచ్చిన లేదా యవ్వన ప్రాంగణం లోనికి అడుగుపెట్టిన అమ్మాయిలను గానీ, అబ్బాయిలను గానీ, అతి సమీప బంధువర్గానికి చెందిన పెద్దలు గానీ, శ్రేయోభిలాషులైన పెద్దలు గానీ “పప్పన్నం ఎప్పుడు పెడుతున్నావ్?” అంటూ జోక్ చేస్తుంటారు, లేదా సరదాగా ఆట పట్టిస్తుంటారు. అంటే ‘పెళ్ళీడుకొచ్చేసావ్, పెళ్ళెప్పుడు చేసుకుంటావ్?’ అని వాళ్ళ అర్థం అన్నమాట! ఏ వయసులో చేయవలసింది, ఆ వయసులోనే చేయాలన్న పెద్దల వాక్కుకు అది నాందీ ప్రస్తావన అన్నమాట! అలాగే పెళ్లి భోజనానికి వున్న ప్రత్యేకతను, ప్రాధాన్యతను తెలియజేస్తుంది. పెళ్లి భోజనం అంటే రుచికరమైన భోజనం ఉంటుందన్నది అందరికీ తెలిసిన విషయమే! గతంలో మధ్యతరగతి కుటుంబాలలో జరిగే పెళ్లిళ్లు యెంత సాధారణ స్థాయిలో జరిగినా, ఆత్మీయంగా ఉండేవి. టెలీఫోన్లు, మొబైల్స్ లేని కాలంలో ఉత్తరాలు ప్రధాన సమాచార సాధనాలుగా ఒక వెలుగు వెలిగాయి. అందుకే ఈ పెళ్లిళ్ల సమాచారం కొద్దిరోజులు ముందుగానే తెలియజేసేవారు. అందుకే పెళ్ళికి వెళ్ళవలసినవారు అన్నిరకాలుగా సిద్ధపడడానికి తగినంత సమయం దొరికేది.

ఒకప్పుడు ఎవరి బియ్యం వారు తెచ్చుకోవాలని పెళ్లి పిలుపు లోనే రాసేవారట. కాస్త అతి సమీప బంధువులైతే, అరిటాకులు, గుమ్మడికాయలు, సొరకాయలు, ఇలా ఎవరికి అందుబాటులో వున్నవి వారు తెచ్చి, పెళ్లింటి వారికి కొద్దో గొప్పో సహాయపడేవారు. అప్పుడు ఎంతో ఆత్మీయమైన పంక్తి భోజనాలు (తర్వాత బఫే పద్ధతి అంటువ్యాధిలా వ్యాపించింది) ఉండేవి కనుక విస్తరాకుల (అరటి ఆకులు) అవసరం బాగా ఉండేది. అందుకే బంధువులు ఎవరో ఒకరు తప్పని సరిగా అరటి ఆకులు తెచ్చేవారు. పెళ్ళిళ్ళల్లో గుమ్మడికాయ దప్పళం తప్పనిసరి కనుక, దాని ప్రాధాన్యత కూడా బాగా వుండేది. చాలామంది స్వయంగా గుమ్మడికాయలు పండించేవారు కనుక, వాటి కొరత గానీ వాటిని కొనవలసిన అవసరం కానీ ఉండేది కాదు. ఈ పంక్తి భోజనాలు, ఏదో కొద్దిమందికి నిరుత్సాహాన్ని కలిగించినా, కావలసింది వడ్డించమని అడిగి తిని చాలా సంతృప్తి పడేవారు. కాలం మార్పుతో పద్ధతుల్లోనూ, అలవాట్లలోను ఎన్నో మార్పులు వచ్చాయి, దానికే ‘ఆధునికత’ అని నామకరణం చేశారు.

ఆ ఆధునికతలో రంగప్రవేశం చేసిందే ‘బఫే సిస్టం’. పంక్తి భోజనాలలో క్రింద కూర్చోవడం గానీ, ఎదురుగా వున్న బల్లముందు కుర్చీలో గానీ కూర్చుంటే, విస్తరాకులో భోజనం, కూరలు, కావలసినవి, ఆ పెళ్లికోసం తయారుచేసిన ఇతర పదార్ధాలూ ఒకదాని తర్వాత ఒకటి వడ్డించే వారు. అవి కూడా అరడజనుకు మించి వెరైటీలు ఉండేవి కాదు. తృప్తిగా భోజనం చేసి లేచేవారు. ఆహారపదార్థాలు ఎక్కువగా వృథా అయ్యేవి కాదు!

లేదంటే అక్కడక్కడా, అప్పుడప్పుడూ వినిపించే ఫిర్యాదు ఏమంటే, తాము అడిగిన పదార్థాలు అడిగినంత వడ్డించలేదని. కొందరు కావాలని ఇలాంటి ఫిర్యాదులతో గొడవ పెట్టుకునేవారు. కొందరికి అదొక వినోదంలా ఉండేది. మరు క్షణమే అవి సమసిపోయేవి.

ఇక పెళ్లిళ్లు ఆధునికత్వంలోకి అడుగు పెట్టాక, భోజనాల వ్యవహారం కూడా మారిపోయింది. ఎవరికి వారు వడ్డించుకు తినే (బఫే) వెసులుబాటు వచ్చింది.

ఫలానా ఫుడ్ ఐటం అందలేదని ఫిర్యాదుకు తావులేదు. కావలసినవి ఎవరికీ వారు వడ్డించుకుని నిలబడి తినే ప్రక్రియ ఇది. మన సంస్కృతీ సంప్రదాయాలకు విరుద్ధమైనది. బహుశః పాశ్చాత్యుల నుండి దిగుమతి చేసుకున్న సంస్కృతీ కావచ్చు. తప్పు లేదు కానీ ఈ పద్ధతిలో ఆహార పదార్థాలు ఎక్కువ స్థాయిలో వృథా కావడానికి అవకాశాలు ఎక్కువగా వున్నాయి. తమ గొప్పలు ప్రదర్శించుకోవడానికి లెక్కలేనన్ని వంటకాలు విందు భోజనానికి సిద్ధం చేస్తారు. ఇక వాటి వినియోగం మాత్రం ఒక మంచి పద్ధతిలో జరగదు. ఎక్కడలేని ఆరాటంతో అన్ని రకాల పదార్థాలూ ప్లేట్లో పెట్టేసుకుంటారు. కానీ అన్నీ తినలేరు. సగం సగం వదిలేస్తారు. అది కాస్తా ఎటూ కాకుండా చెత్త గంపలోకి వెళ్ళిపోతుంది. అన్నం విలువ, ఆకలి విలువ తెలిసిన వారికి ఇది అత్యంత బాధాకరంగా అనిపిస్తుంది. సమాజంలో తిండిలేక అనేక మంది ఆకలి చావులకు బలి అయిపోతున్న నేపథ్యంలో, ఇలాంటి వృథా పనులు ఎంతవరకూ సమంజసం?

ఇది పెళ్ళిలో విందు ఏర్పాటు చేసిన పెద్దల తప్పా? లేక విందును సద్వినియోగం చేసుకోని అతిథులదా? అని ప్రశ్నించుకుంటే, ఇద్దరిలోనూ తప్పు కనిపించవచ్చు. విందులలో ఎక్కువ రకాల పదార్థాలు పెట్టడం మొదటి తప్పు. వారి ఉద్దేశం వచ్చిన అతిథులకు రుచికరమైన భిన్నమైన పదార్థాలను పెట్టి ఆనంద పరచాలనే తృప్తికరమైన ఆలోచన ఉంటే వుండవచ్చు, కానీ విందును సరైన పద్ధతిలో ఆస్వాదించలేని అతిథులు వున్నప్పుడు, యెంత సొమ్ము వృథా? ఎన్ని ఆహార పదార్ధాలు వృథా?

ఒకసారి ఎవరికివారు ఆలోచించుకోవలసిన అవసరం వుంది. విద్యావంతులు, మంచి హోదాలలో వున్నపెద్దలు సైతం అనాలోచితంగా ఇలాంటి పనులు చేయడం బాధాకరం. ఈ పెళ్లిళ్లలో యెంత వృథా అవుతుందో ఒకసారి ఆలోచించాలి, అవసరమైతే, క్షేత్రస్థాయిలో పరిశీలించాలి. ఈ పద్ధతికి ఏదో రూపంలో అడ్డుకట్ట వేయాలి. పులిని చూసి నక్క వాత పెట్టుకున్నట్టుగా, ఒకరిని చూసి మరొకరు ఇలాంటి వృథా పనులకు ఆస్కారం ఇవ్వకూడదు. సంస్కారవంతులైన ప్రజలు ఆహార పదార్థాలు వృథా కాకుండా సద్వినియోగ పడేలా విందుల సందడిలో అప్రమత్తంగా ఉండాలి. నిజానికి పెళ్లి కోసం ఎన్ని లక్షలు ఖర్చుచేసినా, విందును బట్టే పెళ్లి గొప్పతనం చెప్పుకుంటారు. అందుకే మంచి రుచికరమైన భిన్నమైన రుచులను అందివ్వడానికి పెళ్ళివారు ప్రయత్నం చేస్తారు. మరి తినేవారికి ఉండాలి కదా, యెంత, ఎలా తినాలనేది? అందుకే ఎక్కువ ఆహార పదార్థాలు ఎవరికీ ఉపయోగం లేకుండా అయిపోతున్నాయి. ఆధునికత పేరుతో మనకు జరుగుతున్న నష్టం అది. ఆధునికతను (బఫే)ను, నేను ఆక్షేపించడం లేదు, దానిని సద్వినియోగం చేసుకోవాలని మాత్రమే నేను అభిప్రాయ పడుతున్నాను.

ఇక నా విషయానికొస్తే, మావి మధ్యతరగతి కుటుంబాలు కనుక మా చిన్నతనంలో మా బంధువుల ఇళ్ళల్లో పెళ్ళి భోజనాలు పంక్తి భోజనాలే! మా పెద్దన్నయ్య (మీనన్) పెళ్ళికి, చిన్నక్క (భారతి) పెళ్ళికి, పంక్తి భోజనాలే! నా పెళ్ళికి (విజయవాడ) పంక్తి భోజనాలు ఏర్పాటు చేసారు, కానీ నా రిసెప్షన్ (హైదరాబాద్ – ద్వారకా హోటల్లో) మాత్రం అన్నయ్య బఫే పద్దతిలో ఏర్పాటు చేసాడు. నా కూతురు (నీహార) పెళ్ళికి, కొడుకు (రాహుల్ ) పెళ్ళికి, బఫే పద్దతి తప్పలేదు. నా ఆలోచనలు అక్కడ కుదరలేదు. కానీ ఆహార పదార్థాలు వృథా కాకుండా చాలా జాగ్రత్త పడ్డాను, అయినా కొంత శాతం వృథా కాక తప్పలేదు.

ఇంట్లో కూడా ఆహార పదార్థాలు, ముఖ్యంగా అన్నం, కూరలు, పండ్లు వృథా చేయడం నేను ఇష్టపడను. నేనే కాదు ఎవరైనా ఈ విషయంలో జాగ్రత్త పాటించవలసిందే!

అలా అని మన ఇంట్లో ఒకలా, వేరే చోట మరోలా ప్రవర్తించకూడదు. మాయాబజార్ సినిమాలో, ‘వివాహ భోజనంబు..’ పాట సన్నివేశం కాస్త అతిశయోక్తితో కూడుకున్నదిగా ఉన్నప్పటికీ, ఒక్క పదార్థం కూడా వృథా కాకుండా తినడం అనే అంశాన్ని మాత్రమే సానుకూలంగా తీసుకోవాలి.

పెళ్లి భోజనం ఖచ్చితంగా ప్రత్యేకతను కలిగి ఉండి, రుచికరమైన పదార్థాలు అందుబాటులో ఉంటాయి. స్వంత వంటకాలైనా, కేటరింగ్ అయినా, తక్కువతో మొదలుపెట్టి, అవసరమైతే మళ్ళీ వడ్డించుకోవాలి తప్ప, ఎక్కువ వడ్డించుకుని తినలేక పారవేయడం అసలు మంచి పద్ధతి కాదు. చిన్నపిల్లల ప్లేట్లలో ఎక్కువగా వడ్డించి, వాళ్ళు తినకపోతే పారవేయడం ప్రతి చోటా మనం గమనిస్తున్న విషయమే!

ఇది కూడా కరెక్ట్ పద్ధతి కాదు. రుచికరమైన భోజనం తిని మనం యెంత ఆనందిస్తామో, అదే విధంగా మనల్ని ఆహ్వానించినవారు కూడా మన పద్ధతులు – ప్రవర్తన చూసి ఆనందించాలి, తృప్తిపడాలి. గొప్పలు చెప్పుకుంటున్నానని అనుకుంటారు గానీ, ఇప్పటికీ నా మిత్రులు ఎవరైనా కనపడితే, వాళ్ళు ముందుగా గుర్తు చేసే మాట “మీ పాప పెళ్లి విందు ఇప్పటికీ మరచిపోలేక పోతున్నాం సార్” అని. ఇలాంటి మాటలు విన్నప్పుడు చెప్పలేనంత ఆనందం కలుగుతుంది. ఈ సందర్భంగా ‘హర్ష కేటరింగ్’ యజమాని గోపి గారికి, సహకరించిన బంధుమిత్రులకు, శ్రేయోభిలాషులకు నేను ఎప్పటికీ రుణపడి వుంటాను.

‘వివాహభోజనం – విలువైన జ్ఞాపకం..!!’.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

పుట్టి. నాగలక్ష్మి
September 11, 2022 at 6:48 am
నాటి సహపంక్తి భోజనాలు.. పరస్పర సహకారం, వృథా చేయకపోవడం… నుంచి ఈనాటి బఫే భోజనాలు..ఎక్కువ వృథాకావడం..వరకు ప్రతి అంశాన్ని స్పృశించి మంచి సందేశాన్ని అందించారండీ! అభినందనలు 👍💐💐🙏🏻🙏🏻

Reply
1. 1.1
  
  డా కె.ఎల్.వి.ప్రసాద్
  September 11, 2022 at 8:49 am
  కృతజ్ఞతలు
  నాగలక్ష్మి గారు
  
  Reply
2

sunianu6688@gmail.com
September 11, 2022 at 7:31 am
చాలా బాగా వ్రాశారు సర్! చాలా ఫంక్షన్లలో తినే భోజనం కన్నా వృధానే ఎక్కువ కనిపిస్తుంది. కలిసి కూర్చుని తినడం అనేది చాలా మంది మర్చిపోతున్నారు.మా ఇంట్లో ఇప్పటికీ ఏ ఫంక్షన్లలో ఐనా కూర్చుని తినే భోజనాలు కే ప్రాధాన్యత ఇస్తాం. నిలబడి తినాలి అంటే నాకు చాలా ఇబ్బంది గానే ఉంటుంది. కొంతమంది ఎక్కువ అభిమానం తో ప్లేట్ నిండా వడ్డిస్తారు. నిలబడి ఆ ప్లేట్ హ్యాండిల్ చేయలేక ఒకసారి, గుంపులో వెళ్లి మళ్ళీ వడ్డించు కోలేక ఒకసారి భోజనం మధ్యలో వదిలేసిన సందర్భాలు ఎన్నో. బిజీ లైఫ్ అన్ని మిస్ అవుతున్నము చాలా ఉపయోగకరమైన అంశాన్ని వ్రాసిన రచయిత గారికి ధన్యవాదాలు👌👌👍👍💐💐

Reply
1. 2.1
  
  డా కె.ఎల్.వి.ప్రసాద్
  September 11, 2022 at 8:36 am
  మీ స్పందనకు
  హృదయపూర్వక కృతజ్ఞతలు
  సర్
  
  Reply
3

D. Umashanker
September 11, 2022 at 8:21 am
నమస్తే డాక్టరుగారు. మీరు చెప్పినట్లు ఇప్పటి వివాహ భోజనాలు వారి వారి స్టేటస్ సింబల్ ప్రదర్శనగా మారిపోతున్నాయి. అనుబంధాలు, ఆత్మీయతలు మొక్కుబడిగా మారిపోయినాయి. వృథా సంగతి చెప్పనక్కరలేదు
ఈ మధ్య ఖమ్మం లో ఒక రాజకీయ నాయకుడు 2000 కోట్లు ఖర్చు చేసి కూతురు వివాహం చేశాడు. అంత అవసరమా. నిజంగా ప్రజల పట్ల అంత ప్రేమ ఉంటే వారికి శాశ్వతంగా ఉపయోగపడే పని చేయొచ్చు కదా. కాల ప్రయాణం తో మనం కూడా కొట్టుకు పోవడమే తప్ప ఏమీ చేయలేము మనలాంటి వారం.

Reply
1. 3.1
  
  డా కె.ఎల్.వి.ప్రసాద్
  September 11, 2022 at 8:34 am
  ధన్యవాదాలండీ
  బాగా చెప్పారు.
  అలాగే వుంది పరిస్థితి.
  
  Reply
4

డా కె.ఎల్.వి.ప్రసాద్
September 11, 2022 at 8:31 am
Good Pelli vindu kadaa.
Prof.V.Rama krishna murthy
U S A

Reply
1. 4.1
  
  డా కె.ఎల్.వి.ప్రసాద్
  September 11, 2022 at 8:50 am
  Thank you
  Somuch
  Guruji.
  
  Reply
5

sagar
September 11, 2022 at 8:48 am
అన్నం విలువ తెలిసిన వాళ్ళు ఖచ్చితంగ వృధాను అరికట్టగలరు అని నా అభిప్రాయం సర్. ఆధునికతనూ అందిపుచ్చుకోవాలి ఖచ్చితంగ. అయితే అందులో విలువలను జోడించాలి. మీరన్నట్లు గొప్పకోసం పదార్ధాల సంఖ్య పెంచేవారు ఉన్నప్పటికీ తినేవారు ఖచ్చితంగ వృధానూ అరికట్టినపుడే అది సంతోషకర కార్యం కాగలదని నా అభిప్రాయం. మంచి వ్యాసాన్ని అందించినందుకు ధన్యవాదములు సర్.

Reply
1. 5.1
  
  డా కె.ఎల్.వి.ప్రసాద్
  September 11, 2022 at 12:32 pm
  ధన్యవాదాలు
  సాగర్.
  
  Reply
6

డా కె.ఎల్.వి.ప్రసాద్
September 11, 2022 at 12:31 pm
రచన అన్న గొప్ప కళ
మీకు మాత్రమే సాధ్యమైన వరం
మరిన్ని మంచి మంచి మాటలు మీ కలం నుండి రావాలని కోరుకుంటున్న
—-డా.శ్రీధర్
హైదరాబాద్

Reply
1. 6.1
  
  డా కె.ఎల్.వి.ప్రసాద్
  September 11, 2022 at 12:33 pm
  ధన్యవాదాలు
  డా.శ్రీధర్.
  
  Reply
7

డా కె.ఎల్.వి.ప్రసాద్
September 11, 2022 at 6:06 pm
వివాహ భోజనాల గురించి చక్కగా వివరించారు. ఈ రోజుల్లో ఫంక్షన్లలో తినటం తక్కువ పడే యటం ఎక్కువ అయినది. అన్నయ్య గారు
–జయ.అలెగ్జాండర్
సఫిల్ గూడ
సికింద్రాబాద్.

Reply
1. 7.1
  
  డా కె.ఎల్.వి.ప్రసాద్
  September 11, 2022 at 6:06 pm
  అమ్మా
  మీ స్పందనకు ధన్యవాదాలు.
  
  Reply
8

Neelima
September 11, 2022 at 9:10 pm
డాక్టర్ గారు
నమస్కారములు..
ముందుగా పెళ్లి భోజనాలు గుర్తు చేసి, ఒకసారి పెళ్లి భోజనం చేస్తే బావుండు అనే కోరికను కలగచేశారు..
పెళ్లి భోజనంలో వృధా కోసం చక్కగా వివరించారు.. కొంతమంది అయిన ఇది చదివి మారతారు అని ఆశిస్తున్నాను అండి..

ధన్యవాదములు

Reply
1. 8.1
  
  డా కె.ఎల్.వి.ప్రసాద్
  September 12, 2022 at 6:50 am
  అమ్మా
  మీ స్పందనకు
  హృదయపూర్వక ధన్యవాదాలు.
  
  Reply
9

డా కె.ఎల్.వి.ప్రసాద్
September 12, 2022 at 6:49 am
మీరు ఎంచుకునే ప్రతి అంశం సహజ మైనది అయినా ఎప్పుడూ విభిన్నంగా ఉంటుంది. మీ ప్రత్యేక పరిశీలనలో ఒక సామాజిక ప్రయోజనం ఉంటుంది సర్.నాటి సహపంక్తి భోజనాలు నుండి నేటి బఫె వరకూ ఎన్ని విధానాలు మారినా మన స్వీయ నియంత్రణతో ఆహార పదార్థాల వృధాను అరికట్టాలి అనే సందేశం శుష్టికర మైన భోజనంతో పాటు తాంబూలం ఇచ్చినంత ప్రయోజనం గా ఉంది సర్.మనమేది చేసినా మన ఆనందంతో పాటు బాధ్యత కూడా ఉండాలి అని చక్కగా చెప్పారు.మీ అమ్మాయి పెళ్లి విందు ఎప్పటికి మర్చిపోకుండా చేసిన మీ విందుభోజన తయారీ వారికి మా తరుపున కూడా అభినందనలు చదివించండి సర్.ధన్యవాదాలు💐💐🙏
—నాగజ్యోతి శేఖర్
కాకినాడ

Reply
1. 9.1
  
  డా కె.ఎల్.వి.ప్రసాద్
  September 12, 2022 at 6:51 am
  బాగా రాసారు
  హృదయపూర్వక కృతజ్ఞతలు జ్యోతి
  
  Reply
10

Bhujanga rao
September 12, 2022 at 8:23 am
అందరికి ఉపయోగకరమైన విషయం వివాహ భోజనం వాటి విలువలు, పూర్వపు రోజుల్లో క్రమ పద్ధతిలో ఉండేవి,పొదువును పాటించి అంతకు మించి ఆత్మీయతతో పలకరింపులు ఉండేవి. ఇప్పుడు జరిగే ఏ కార్యక్రమమైన వారియొక్క హోదాకు అనుగుణంగా పొదువును పాటించకుండా,అనవసరమైన ఖర్చులు చేస్తున్నారు. ఇది చాలా ప్రమాదకరం,వాటి గురించి చక్కని వివరణ ఇచ్చారు ధన్యవాదములు సర్🙏

Reply
1. 10.1
  
  డా కె.ఎల్.వి.ప్రసాద్
  September 12, 2022 at 10:23 am
  ధన్యవాదాలండీ
  భుజంగరావు గారూ.
  
  Reply
11

డా కె.ఎల్.వి.ప్రసాద్
September 12, 2022 at 10:19 am
127 వసంచిక పెండ్లి భోజనాలగురించి చాలాసున్నితంగా చెప్పిన్రు.
బఫేలో ఆహారపదార్థాలు విపరీతంగా వృథా అవుతున్నయి.బఫే ఉద్దేశ్యం– ఎవరికి నచ్చిన పదార్థాలు ( రుచ్యమైన) వారే ,వారికి కావలసినంత వారే వడ్డించుకొనిఅందరితో మాట్లాడుకుంటూ తినటం -‘అనుకుంట . ఆతిథ్యం ఇచ్చిన వారు తయారుచేయించే రకరకాల ఆహారపదార్థాలు అందుకే.కాని అతిథులుగా వచ్చిన వారు బాగావృథా చేస్తున్నరు.ప్లేట్ నిండా వడ్డించుకుని కొద్దిగా రుచిచూసి అంతా పడవేసి వేరేది వడ్డించుకోవటం.
కొందరైతే జీవితంలో మళ్ళీ అవకాశం వస్తుందో రాదో అన్నట్టుగా ప్రవర్తిస్తరు.
ఈబఫేవిందులగురించి మీవంటి కథకులు మంచికథ రాయవచ్చు.
నాకైతే ,ఆహారపదార్థాలను వృథాచేయటం( ఎవరికి కూడా) నచ్చదు.ఇంట్లో కూడా.తినేవాడు ఇది మన ఇల్లుకాదుగా అనుకుంటాడేమో
నాకు ఈవిషయాన్ని ఇదివరలో చర్చించినట్టు యాది.ముఖ్యంగా మాంసాహార భోజనాలదగ్గర,ఇది మరీ విపరీతం గా వుంటది. ఐతే మీరు చెప్పినంత సుతిమెత్తగా చెప్తే జనం గ్రహిస్తరా అనేది ప్రశ్న .
–నాగిల్ల రామశాస్త్రి
హన్మకొండ

Reply
1. 11.1
  
  డా కె.ఎల్.వి.ప్రసాద్
  September 12, 2022 at 10:22 am
  శాస్త్రి గారు
  హృదయపూర్వక ధన్యవాదాలు
  
  Reply
12

Rajendra Prasad
September 12, 2022 at 10:45 am
ఈసారి మంచి సందేశాన్ని ఇచ్చారు. I have observed addtional advantages with Buffet system in addition to the option to the individual to serve to one’s likeness.
1. Process of eating will be faster.
2. Wastage at individual level is minimized though ( as you said) there is scope of wastage due to preparation of many items
3. The embarrassment of waiting behind people’s chairs to grab the seat when they finish eating.
4. It avoids the complaints of bias in serving
However, we should see the other disadvantages to children & elderly people.
In the recent wedding at Bangalore both options are given to the guests

_ Rajendra Prasad

Reply
1. 12.1
  
  డా కె.ఎల్.వి.ప్రసాద్
  September 13, 2022 at 6:34 pm
  Thank you prasad garu.
  I do agree with you.
  
  Reply
13

డా కె.ఎల్.వి.ప్రసాద్
September 13, 2022 at 7:16 am
జ్ఞాపకాల పందిరి 127 లో నాటి సహపంక్తి భోజనాలను గుర్తుచేశారు. సహపంక్తి భోజనాలు గత వైభవమే. నేడంతా బఫే యుగం. మీరు చెప్పినట్టుగా ఆహార పదార్థాలు వ్యర్థం అవుతాయి. ఒకవైపు ఆకలి మరణాలు..మరోవైపు విందు భోజనాలు.. ఆహార పదార్థాల వ్యర్థాలపై తగిన చట్టం రూపొందించి అమలుపరిస్తే మంచిదని నా అభిప్రాయం. చక్కటి కథనంతో సాగింది. అభినందనలు.
—-జి.శ్రీనివాసాచారి
కాజీపేట.

Reply
1. 13.1
  
  డా కె.ఎల్.వి.ప్రసాద్
  September 13, 2022 at 7:17 am
  ధన్యవాదాలండీ
  చారి గారూ…..
  
  Reply
14

శ్యామ్ కుమార్ చాగల్
September 13, 2022 at 6:20 pm
వివాహ భోజనం తోలో వుండే ఆనందం తో మొదలయ్యి దాంట్లో కల సంఘం కట్టుబాట్లు, అందులోనూ నేటి విపరీత పోకడల గురించి చర్చించిన రచయిత గారు చివరికి విషయాన్నివ్యక్తిగత ఉదాహరణల తో ముగింపు ఇచ్చారు.
తాను ఉటంకించినట్లుగా పూర్వకాలం లో ప్రేమాభినాలకు ఆలవాలమైన వివాహ భోజనం కాస్తా ఇప్పుడు భేషజాలకు, ఆర్ధిక స్థోమత లకు చిహ్నం గా మారింది. ఇది కాస్త ప్రస్తుత రోజుల్లో ప్రతీ సామాన్యుడి కూతురి వివాహపు ఖర్చు కాస్తా తలకు మించిన భారం అయ్యికూర్చుంది.
రచయిత గారన్నట్లుగా పెళ్లి సంబరాలన్నీ ఒక ఎత్తు, భోజనాల ఖర్చు ఇంకో ఎత్తు అయ్యి పోయాయి. అందులో దుబారాల కు కొదువే లేదు. అతిధి లు కూడా ఎన్నో రోజుల నుండీ తిండికి మొహం వాచినట్లుగా పళ్లెం నిండా స్థలం కాష్ఠంత కూడా కూడా వదలకుండా వేసుకుని, దాదాపుగా సగం పారవేయడం చూస్తూనే వున్నాం.
జ్ఞాపకాల పందిరి లో ప్రస్తుతం జరిగిపోయిన విషయాల మీద కాకుండా మనం రోజు వారీ ప్రస్తుతం ఎదుర్కుంటున్న సమస్యలు , ఇబ్బందులు, అర్థం లేని పోకడ ల గురించి విశ్లేషణ చేస్తూ వున్నారు. ఎన్నో సామాజిక రుగ్మతల మీద మన దృష్టిని కేంద్రీకరించేలా చేసి పాఠకుల మనసుల కు హత్తుకునేలా రాస్తున్న ఈ రచనలకు ,రచయిత గారికి మరియూ పత్రిక యాజమాన్యానికి నా అభినందనలు. ,

Reply
1. 14.1
  
  డా కె.ఎల్.వి.ప్రసాద్
  September 13, 2022 at 6:31 pm
  ధన్యవాదాలు మిత్రమా.
  
  Reply