బాల్కనీ బ్రతుకులు..!!
తినడానికి వున్నా తినలేని జీవితాలు కొందరివి. తినడానికి లేకున్నా ఉన్నదానితో సంతృప్తిపడి సుఖ జీవనం పొందేవాళ్ళు మరికొంతమంది. సరిపడినంత సంపాదించుకుంటూ, ఆధునిక జీవితాన్ని తమకు అందుబాటులో ఉన్నంతవరకూ అనుభవిస్తూ, ఆనందమయ జీవితాన్ని ఆస్వాదించేవాళ్ళు ఇంకొందరు. వీళ్ళందరికీ భిన్నంగా సంపాదన తక్కువ వున్నా జల్సాలకు అధికవ్యయం వినియోగించి అప్పులు పాలై దుర్భర జీవితాన్ని గడిపేది ఎందరో! ఇన్ని రకాల కుటుంబాలు సమాజంలో మనకు ఎక్కడో ఒక చోట ఎదురౌతూనే ఉంటాయి. ఉండి కూడా వినియోగించుకోలేక అతిసాధారణ జీవితం గడపడానికి ప్రయత్నం చేయడం ఎంతో, దుబారా ఖర్చులతో జీవితాన్ని దుఃఖమయం చేసుకోవడం కూడా అంతే!
పొదుపు అనేది మనిషికి ముఖ్యమే, కానీ అతి పొదుపు అసలు మంచిది కాదు. పొదుపు అనేది కనీస జీవితానికి సరిపడా సొమ్ము వినియోగించుకుని మిగతా భవిష్యత్ జీవితానికి ఉపయోగపడేలా పొదుపు చేసుకోవడం సరైన పద్ధతి. అంతేగానీ పొదుపు అంటే సరిగా తినకుండా, సరైన బట్టలు వేసుకోకుండా, కనీస సరదాలు తీర్చుకోకుండా డబ్బు కూడబెట్టుకోవడం కాదు. కనీస అవసరాలను ప్రాధాన్యతా పరంగా సమకూర్చుకోగలగాలి. ఎవరో కారు కొనుక్కున్నారని, మన ప్రాధాన్యత లిస్టులో లేని కారు కొనుక్కుంటే, దాని నిర్వాహణ ఎలా? కారు కొనుక్కోవడానికి బ్యాంకులు రుణాలు ఇస్తాయి ఫరవాలేదు, కానీ పెట్రోలు ఎలా? అది ఆలోచించాలి.
అలాగే కారు కొనుక్కుని, దానిని నిర్వహించుకోగల స్తోమత వున్నవాళ్లు ఖచ్చితంగా కారు కొనుక్కోవచ్చు. దానివల్ల కలిగే సౌకర్యాన్ని ఆనందంగా అనుభవించవచ్చు. ఒకప్పుడు కారు హోదాకు సంకేతం, ఇప్పుడు అదనపు సౌకర్యానికి ఆధారం. కష్టపడి సంపాదించుకున్నవాడు, పొదుపు చేసుకోగా మిగిలిన సొమ్ముతో ఇలాంటి ఆనందాలు అనుభవిస్తేనే ఆ.. జీవితానికి పరమార్థం. డబ్బుండి కూడా అనుభవించడం చేతకానివాళ్ళు మన సమాజంలో కోకొల్లలు. అలాంటి వారి జీవితం నిస్సారంగానే ముగుస్తుంది. అది ఒక అర్థం పర్థం లేని జీవితంగా మిగిలిపోతుంది.
ఇలా కాకుండా, సంపాదన సంగతి ఆలోచించకుండా, అంతకుమించిన అనవసర ఖర్చులకు అలవాటు పడి, దుర్వ్యసనాల భారిన పడి, అప్పులు పాలై జీవితంలో మళ్ళీ కోలుకోలేనివారు కూడా వుంటారు. ఇది అసలు కరెక్ట్ కాదు. మన సంపదను బట్టి ఖర్చులను రూపొందించుకోవాలి. సరదాలు-షికార్ల మాయలో పడి కన్ను మిన్ను కానరాకుండా ఖర్చు చేస్తే కొండలు కూడా కరిగిపోవడం ఖాయం. మనిషి తన స్వంత జీవితం మొదలు పెట్టగానే అవగాహన చేసుకోవలసినవి, గుర్తుంచుకోవలసినవి – 1) సంపాదన 2) ఖర్చు [విలాసాలు, వినోదాలతో సహా] 3) భవిష్యత్ జీవితం కోసం దాచుకునే పొదుపు సొమ్ము. ఈ మూడు విషయాల పట్ల శ్రద్ధ చూపించిన వారి జీవితానికి తిరుగుండదు. ఇలాంటి వారు ఎలాంటి సమస్యనైనా త్వరితగతిన పరిష్కరించుకోగల సామర్థ్యం, దైర్యం ఉంటాయి.
నా జీవితం పూర్తిగా పొదుపులతోనే నిర్విఘ్నంగా కొనసాగుతూ వస్తున్నది. మొదటి నుండి ప్రాధాన్యతలను దృష్టిలో పెట్టుకుని అవసరాలు తీర్చుకోవడానికి ప్రయత్నం చేసాను. నా ఒత్తిడి లేకుండానే, నా భార్య, పిల్లలు నాకు సహకరించారు. వాళ్ళను ఇబ్బందులకు పాలు చేయకుండా కనీస వసతులు కల్పించాను, మంచి విద్యావంతులు కావడానికి నా శక్తి సామర్థ్యాలను వినియోగించాను. వారికి తృప్తికరంగా జీవితాన్ని అందించి ప్రయోజకులను చేసాను.
అయితే ఇక్కడ నా జీవితం, నా పిల్లల జీవితం ఒక మోడల్‌గా చెప్పడం ఈ వ్యాసం ఉద్దేశం కాదు! నేనెదో గొప్ప పనులు చేసానని చెప్పుకోవడమూ కాదూ. ఈ ఉపోద్ఘాతం అంతా ఒక భిన్నమైన వ్యక్తిత్వం గల వ్యక్తి గురించి ఆయన నాకు చాలా దగ్గర బంధువు కావడం మరో ప్రత్యేకత! ఐతే ఆయన గురించి ప్రత్యేకంగా చెప్పవలసిన అవసరం ఏముంది? ఒక సాధారణ, సౌకర్యవంతమైన జీవితం గడపగలిగి ఉండి కూడా, అనవసర ‘పొదుపు’ చేయడం వల్ల, ఆ జీవితాలు ఎలా ఉంటాయన్నది నలుగురికీ తెలియాలన్నది ఈ వ్యాసం ముఖ్య ఉద్దేశం.
ఆయన (పేరు చెప్పడం భావ్యం కాదనుకుంటాను) నాకు అత్యంత సమీప బంధువు. నా విద్యార్థి జీవితం నుండి ఆయనను నేను గమనిస్తున్నాను. ఆయన జీవనశైలిని పూర్తిగా అవగాహన చేసుకున్నాను. జీవితంలో ప్రాథమిక దశల్లో ఆర్థిక వనరుల విషయంలోనూ, వినియోగం విషయంలోనూ, పొదుపు విషయంలోనూ ఆయన చాలా జాగ్రత్తలు పాటించేవాడు. దానికి ఆయన భార్య కూడా అమితంగా సహకరించేది. అనవసర ఖర్చులు అసలు చేసేవాడు కాదు. తర్వాత ఆయనకు ఇద్దరు పిల్లలు పుట్టడం, వాళ్ళు పెద్దవాళ్ళై పెళ్లిళ్లు చేసుకోవడం, పిల్లల్ని కనడం కూడా జరిగింది. ఇద్దరు పిల్లల్లో పెద్దతను తండ్రిని మించి అతి పొదుపు అతి జాగ్రత్తలతో సాధారణ జీవితం, సౌకర్యాలు, భార్యకు పిల్లలకు ఇవ్వకుండా తనకంటూ ఒక ప్రత్యేక జీవనశైలిని ఏర్పరచుకుని అదే అసలైన జీవితంగా భ్రమలో పడి జీవితం కొనసాగిస్తున్నాడు. ఉదాహరణకు ఇంట్లో టి.వి. ఉంటుంది గాని, పిల్లలను చూడనివ్వడు.
కానీ ఆ పిల్లలు ఇంకో ఇంటికి వెళ్లి హాయిగా టి.వి. తనివితీరా చూస్తారు. పిల్లలకు ఇష్టమైనవి తిననివ్వరు. వాళ్ళు పెట్టిందే పిల్లలు తినాలి. ఉదాహరణకి, చిన్నకొడుకు ఇంట్లో పుట్టినరోజు పండుగ జరిగిందనుకోండి అందరూ కేకు ముక్కలు తింటుంటే, పెద్దకొడుకు పిల్లలు వాళ్ళవంక చూస్తూ ఉండాలి. అక్కడ క్రమశిక్షణ పేరుతో ఆ చిన్న పిల్లల నోళ్లు బలవంతంగా కట్టేస్తారు. వాళ్ళ దృష్టిలో పొదుపు ఉద్యమంలో ఇది కూడా ఒక భాగం. ఇంట్లో కారు ఉంటుంది, కానీ పిల్లల్ని స్కూటర్ మీదే బయటికి తీసుకు వెళతారు. పిల్లలను నిరుత్సాహ పరుస్తారు. ఇంట్లో భోజనం విషయంలో కూడా నిబంధనలు. ఏదో ఆరోగ్య దృష్ట్యా మితాహారం పాటిస్తున్నారని మనం అనుకుంటాం, కానీ అదే వ్యక్తులు ఎక్కడైనా విందులకు, పార్టీలకూ వెళ్ళినప్పుడు వారు తిండి తినే సన్నివేశం కొంచం అసహ్యం కలిగిస్తుంది.
ఇక ఇంట్లో ఎక్కడ వుంటే అక్కడ మాత్రమే బల్బు వెలగాలి. మిగతా ఇల్లంతా అంధకారమే! వున్న బల్బులు కూడా గుడ్డి దీపాల్లా వెలుగుతుంటాయి. ఇలాంటి వాతావరణాన్ని ఎదుగుతున్న పిల్లలు ఎలా అర్థం చేసుకుంటారు?
మరొక ముఖ్యమైన అంశం వేసవికాలం. వేసవికాలంలో వీరి ప్రవర్తన గమ్మత్తుగా ఉంటుంది. పెద్దకొడుకు ఉదయం నుండి సాయంత్రం వరకూ ఆఫీసులో ఏసి-హాలులో గడిపి వస్తాడు. కోడలు చమటలు కక్కుతూ వంట పని, ఇంటి పని చేస్తుంటుంది. ఫ్యాన్ సదుపాయం వున్నా పెద్దాయన పిల్లల్ని పెట్టుకుని చమటలు కక్కుకుంటూ బాల్కనీలో కాలక్షేపం చేస్తుంటాడు. వాడిన ముఖాలతో పిల్లలు సాయంత్రానికి నీరసించిపోతారు. వాళ్ళ దృష్టిలో ఇది పెద్ద ‘పొదుపు’ కింద లెక్క అన్న మాట. ఇంతేకాదు ఎలాంటి అనారోగ్య సమస్య వచ్చినా స్వంత వైద్యం చేసుకోవడం, మెడికల్ షాపు వాళ్ళ మీద ఆధారపడడం వంటి పనులు వింతగా అనిపిస్తాయి. పేదవారి విషయం వేరు ఇలాంటి వాళ్ళు డబ్బుండి పొదుపు పేరుతో మరిన్ని సమస్యలు కొని తెచ్చుకోవడమే అవుతుంది కదా! ఇది సరైన పొదుపు కిందికి వస్తుందా?
పొదుపుకు నేను వ్యతిరేకం కాదు. కానీ ఆ పొదుపు కనీస జీవితాన్ని సైతం అడ్డుకునేలా వుండకూడదు. నిజానికి నా జీవితం పొదుపుతోనే కొనసాగుతూ వచ్చింది. చిన్నమొత్తాలైనా మెరుగైన జీవితాన్ని అందించింది. కనీస జీవితాన్ని అనుభవించగల స్థితి వున్నప్పుడే పొదుపు ప్రయోజనం ఉంటుంది, అంతేగాని పొడుపు కోసం జీవితాన్ని మాడ్చి మసిబొగ్గు చేసుకొనవసరం లేదు. అందుచేత ప్రయోజనకరమైన పొదుపు ఆహ్వానించదగ్గదే. కానీ కడుపు మాడ్చుకునేంత పొదుపు ఆరోగ్యప్రదం కాదు.
ఇందులో కొసమెరుపు ఏమిటంటే, నేను చెప్పిన పెద్దాయన చిన్నకొడుకు బాగా సంపాదిస్తాడు, తన స్థాయిలో జీవితాన్ని ఆనందంగా, హాయిగా అనుభవిస్తాడు, అదే స్థాయిలో పొదుపు కూడా చేసుకుంటాడు. అందుకే మనం ఏర్పాటు చేసుకునే మన జీవన శైలి, మనకు తృప్తిగా ఉండడమే గాక ఎదుటి వారి దృష్టికి ఒక మాదిరిగా అనిపించాలి.
పొదుపు నా జీవితాన్నే మార్చేసింది మరి!
(మళ్ళీ కలుద్దాం)
వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.
32 Comments
sagar
పొదుపు ఖచ్చితంగ భవిష్యత్తుకు అవసరమే సర్ . మీరు చెప్పినట్లు కడుపు మాడ్చుకుని బార్యా పిల్లలను ఇబ్బందిపెట్టేలా మసలడం పొదుపు అనేకంటే చాదస్తం అనాలి. పొదుపు తో సుఖమైన జీవితాన్ని పొందినందుకు మీకు శుభాకాంక్షలు మరియు మంచి విషయాలను తెలియపరచినందుకు ధన్యవాదములు సర్.
ఎల్.వి.ప్రసాద్. కానేటి.
ధన్యవాదాలు
సాగర్ రెడ్డి.
పుట్టి. నాగలక్ష్మి
మీ పొదుపు బంధువు వంటి బంధువు మాకూ ఉన్నారు.. బియ్యం డబ్బా కి తాళం వేసుకుని వెళ్ళేవాడు.. ఆయన కూతురు రెండాకుల ఎక్కువ చదివింది.. అన్నం, కూర పెట్టెలో పెట్టి తాళం వేసి బడికి వెళ్ళేది.. పొదుపు చాలా సూత్రాలు న్నాయి.. జాగ్రత్తగా పాటిస్తే సంతోషం.. లేకపోతే దుఃఖమే! మీకు
ఎల్.వి.ప్రసాద్. కానేటి.
ధన్యవాదాలండీ.
ఎల్.వి.ప్రసాద్. కానేటి.
సంపాదనలో… యే కాస్తంతైనా పొదుపు చేసుకోవాలి
దుబారాలేని జీవితం కడదాకా ఆనందం !…
—కోరాడ నరసింహారావు
విశాఖపట్నం.
ఎల్.వి.ప్రసాద్. కానేటి.
ధన్యవాదాలండీ
Sambasiva+Rao+Thota
ప్రసాదుగారు !
పొదుపు గురించి చాలా చక్కగా వివరించారు ..
మీరు చెప్పిన విధంగా ఆర్ధిక క్రమశిక్షణ కలిగివున్నవారి జీవితం ఆనందమయం .
మంచి విషయం ..
ధన్యవాదాలండి
ఎల్.వి.ప్రసాద్. కానేటి.
కృతజ్ఞతలు మీకు
సాంబశివ రావుగారు.
Bhujanga rao
పొదుపు అంటే తమ ఆదాయంలో డబ్బును ఖర్చు చేయకుండా ఉండడం పొదుపు,అంటే ఖర్చును తగ్గించుకోవడం.డబ్బు ఎలా ఎందుకు పొదుపు చేయాలి దాని అవసరాలు గుర్తించి,వాటి మార్గాల గురించి తెలుసుకొని ఆదా చేసినట్లయితే,అత్యవసర ఖర్చులను అధిగమించి తద్వారా ఆర్ధిక స్వేచ్చను పొందవచ్చని ఈ సంచిక ద్వారా పొదుపు గురించి చక్కగా వివరించారు. మంచి విషయాలు అందిస్తున్న మీకు ధన్యవాదములు డాక్టర్ గారు
ఎల్.వి.ప్రసాద్. కానేటి.
ధన్యవాదాలండీ.
D. Umashanker
Very educative. What you said is absolutely correct.
ఎల్.వి.ప్రసాద్. కానేటి.
Thank you sir.
ఎల్.వి.ప్రసాద్. కానేటి.
సంపాదన, ఖర్చు, పొదుపు ముఖ్య మైన పాయింట్స్. అతి పొదుపు కూడ అంత మంచిది కాదు అని ఈ సంచికలో వివరించారు అన్నయ్య గారు
—-శ్రీమతి జయ అలెగ్జాండర్ ,
అమెరికా.
ఎల్.వి.ప్రసాద్. కానేటి.
అమ్మా…
ధన్యవాదాలు
Rajendra+Prasad
పరిమితిని మించి పొదుపు అయినా, ఖర్చు అయినా మంచిదికాదు. పొదుపు పేరు చెప్పి, స్థోమత ఉన్నా, అవసరాలు కూడా తీర్చుకొక పోతే మూర్ఖత్వం అవుతుంది
– రాజేంద్ర ప్రసాద్
ఎల్.వి.ప్రసాద్. కానేటి.
ధన్యవాదాలండీ.
ఎల్.వి.ప్రసాద్. కానేటి.
జ్ఞాపకాల పందిరి-116 లో సంపాదన మరియు పొదుపుపై చక్కటి కథనం. కొందరు సంపాదన తక్కువైనా తృప్తిగా ఉన్నదాంట్లో గడుపుతారని, మరి కొందరు ఆదాయం ఎక్కువైనా దుబారా ఖర్చులు చేసి అప్పులపాలవుతారని జీవిత సత్యం తెలిపారు. పొదుపు చేస్తూ పిల్లల ఎదుగుదలకు, ఉన్నతికి పాటుపడితే మంచిదే. పొదుపు మంచిదైనా, అదుపులో ఉండాలి. జీవితంలో ఏదీ అనుభవించక కడుపు మాడ్చుకునేది కాకూడదని తెలిపారు. మీరు చెప్పినట్టుగా కొందరు విందులకు వెళ్లినప్పుడు ఆబగా తింటారు. ఇంట్లో కడుపు మాడ్చుకుంటారు. సందేశాత్మక కథనం.
జి.శ్రీనివాసాచారి
కాజీపేట.
ఎల్.వి.ప్రసాద్. కానేటి.
మీ విశ్లేషణ బాగుంది
కృతజ్ఞతలు చారిగారు..
ఎల్.వి.ప్రసాద్. కానేటి.
మీ నూటపదహార్ల సంచిక చదివినాను సర్.అందులో వ్యాఖ్యానించటానికేంలేదు చేతనైతే అనుసరించి ఆచరించవలసిన విషయాలేవున్నృయి.పొదుపువిషయంలోనూ మీఅభిప్రాయాలునాదృష్టిలో సరైనవే.
పాఠకుడిని మీవిషయం వెంట తీసుకొని పోయే మీరు రాసిన పద్ధతి బాగున్నది నాకు చాలా ఇష్టం
—రామశాస్త్రి
హన్మకొండ జిల్లా.
శ్యామ్ కుమార్ చాగల్
జీవితం లో ఆదాయ వనరులను దృష్టిలోనుంచుకుని జీవం విధానం లో సమతుల్యత ఎలా పాటించాలో వ్యక్తిగత అనుభవాలను రంగరించి మనకు వివరించారు రచయిత. ఇటు పిసినారి జీవితాలు ఎలా ముగుస్తాయి, అటు జల్సా రాయుళ్ల జీవితాలు ఏ విధంగా నాశన మై పోతాయో మనమందరూ చూస్తున్నప్పటికీ విజయ వంతంగా మన దృష్టి కి తెచ్చే ప్రయత్నం చేశారు. చిన్న చిన్న సేవింగ్స్ తో కలిగే లాభాలు చాలా పెద్దవి. అధిక పొదుపు తోటే కొందరి జీవితాలు దుర్భరంగా మారిపోతాయి. అవి వారినే కాక వారి కుటుంబ సభ్యుల బ్రతుకులను కూడా పేదరికం లో గడిపేలా చేస్తాయి.
పిసినారితనానికి మరో పేరు సింపుల్ లివింగ్. ఇది అందరు పిసినార్లు స్టైల్ గా చెప్పే గొప్ప తనం. డాక్టర్ కె ఎల్వి ప్రసాద్ చెప్పినట్లుగా మూడు సూత్రాలను పాటిస్తే అందరూ సుఖంగా జీవించి , సంతోషంగా మరణిస్తారు.
డబ్బు గురించి , వాగాహన వున్నా వారెందరో హాయిగా జీవనము కొనసాగించటం మనం చూస్తున్నాం, అలాగే భవిష్యత్తును భూతంగా చూస్తూ అధికంగా పొదుపు చేసిన వాళ్ళు బీద వాడిగా మరణించటం కూడా చూస్తున్నాం.
ఏది ఏమైనా బ్యాలెన్సుడ్ గా జీవించటం అంత సులభం ఏమీ కాదు.
ఎల్.వి.ప్రసాద్. కానేటి.
ధన్యవాదాలు మిత్రమా.
ఎల్.వి.ప్రసాద్. కానేటి.
ధన్యవాదాలు
మిత్రమా……
డి. వి. శేషాచార్య
దీనిని కథగా మారిస్తే అద్భుతంగా ఉంటుంది. పొదుపు, పిసినారితనం మధ్య తేడాను చాలా బాగా చెప్పారు.
ఎల్.వి.ప్రసాద్. కానేటి.
ధన్యోస్మి మిత్రమా.
ఎల్.వి.ప్రసాద్. కానేటి.
ప్రతి వ్యక్తి తమ తమ వ్యక్తిగత జీవితాలను ప్రారంభించటానికి ముందే ఒక క్రమబద్ధమైన ప్రణాళికతో అవసరమైన సదుపాయాలను సమకూర్చుకోవటంతో పాటు, భవిష్యత్తులో ఒడుదుడుకులను అధిగమించటానికి, తోటివారిని అవసర కాలంలో ఆదుకోవడానికి కావలసిన ధనసముపార్జన ఎంతో అవసరం. కానీ ఈ సంపాదన ,పొదుపు ఎంత ముఖ్యమో ,అవసరమైనప్పుడు వాటిని పరిమితంగా ఖర్చు చేయడం కూడా అంతే అవసరం. ఇటువంటి జీవన విధానానికి పెద్దల మార్గదర్శకం ,స్నేహితుల సహకారం, మరియు తను ఎన్నుకున్న సమాజ ప్రభావం దోహదపడతాయి. తోటి వారికి ఎంతో మేలు చేసే ఈ సద్గుణాలను రచయిత తమ స్వవిషయాలను జోడించి చక్కగా వివరించారు.
—–
బి.రామకృష్ణా రెడ్డి
మేరీలేన్డ్
అమెరికా
ఎల్.వి.ప్రసాద్. కానేటి.
ధన్యవాదాలండీ.
ఎల్.వి.ప్రసాద్. కానేటి.
మనిషి ఎదుగుదలకు పొదుపు అవసరమే మీరు చెప్పినట్లు అతి పనికిరాదు.కనీసవసరాలకు కూడా అదీ ఉండి కూడా మరీ అలా కుటుంబ సభ్యులను బాధ పెట్టి మరీ కూడబెట్టడం దానిని పొదుపు అనే కంటే పిసినారితనం అంటారేమో సార్. చక్కని విశ్లేషణాత్మకతతో వివరణాత్మకంగా వ్రాశారు పొదుపు అతి పొదుపు మధ్య జరిగిన మీరు గమనించిన విషయాలు. అందరికీ మేలుకొలుపు సార్ మీ జ్ఞాపకాల పందిరిలో దాగిన జ్ఞాపకాలు. హృదయపూర్వక శుభాకాంక్షలు శుభాభినందనలు మీకు
మొహమ్మద్. అఫ్సర వలీషా
ద్వారపూడి (తూ. గో .జి)
ఎల్.వి.ప్రసాద్. కానేటి.
అమ్మా
నీ స్పందనకు ధన్యవాదాలు.
sunianu6688@gmail.com
పిసినారితనానికి,పొదుపు కి మధ్య ఒక సన్నటి రేఖ వుంటుంది. డబ్బు లేకపోతే పీనాసితనామ్ బావుంటుంది కానీ డబ్బు వుండి పీనాసితనామ్ తో తాను అనుభవించక, పిల్లలుని ఇబ్బందులు పెట్టి పోయేటప్పుడు ఏమి తీసుకు వెళ్లగలం. అలాగే డబ్బు లేక ప్రక్కన వారిని చూసి వాత పెట్టుకుంటే మన వళ్లే కాలుతుంది. చాలా ఉపయోగకరమైన విషయాలు వెల్లడించిన రచయిత గారికి ధన్యవాదాలు.
ఎల్.వి.ప్రసాద్. కానేటి.
మీ స్పందన కు ధన్యవాదాలండీ.
ఎల్.వి.ప్రసాద్. కానేటి.
చాలా విలువైన ఆర్థికాంశాలు ,జీవించాల్సిన విధానం గూర్చి సవివరంగా తెలియచేశారు.పొదుపు విషయంలో మీరు చెప్పిన ఆనందాల్ని పొందలేని వారిని చూస్తే నిజంగానే జాలి,నిస్తేజం కలుగుతుంది. సంపాదించిన దాన్ని సరైన రీతిలో అనుభవించడం ఖచ్చితంగా తెలియాలి.చాలా చిన్ని.చిన్ని.ఆనందాల్ని కూడా కోల్పోతారు కొందరు పొదుపు పేరుతో.కొందరు మీలా తృప్తి కరమైన జీవితాన్ని జీవిస్తారు.రెండు భిన్నమైన జీవితాల్ని కళ్ళకు కట్టినట్లు చూపి చాలా మంది మనసుల్ని తట్టి లేపారు సర్.మీ అక్షర సత్యాలకు హృదయపూర్వక ధన్యవాదాలు
నాగజ్యోతి శేఖర్
కాకినాడ.
ఎల్.వి.ప్రసాద్. కానేటి.
అమ్మా
మీ స్పందనకు
హృదయపూర్వక ధన్యవాదాలు.