జ్ఞాపకాల పందిరి-104

గుర్తొస్తే.. గుండె ఝల్..!!

ఇప్పుడు కాస్త పరిస్థితులు మారాయి కానీ.. ఒకప్పుడు ఆడపిల్ల పుడితే తల్లితో పాటు ఇంటిల్లిపాదీ తెగ బాధపడిపోయేవారు. మొదటి సంతానం అసలు ఆడపిల్ల వద్దని కోరుకునేవారు. ఆడపిల్లకు జన్మనిచ్చిన తల్లి, తన భర్త ముఖం చూడాలంటేనే భయకంపితురాలైపోయిన రోజులు. ఆమె అలా భర్త నుండే కాదు, అత్తామామలనుండి ఇతర బంధువర్గాలనుండి కూడా, ఆడపిల్లను కనడం అంటే అదొక నేరంలా భావించిన రోజులవి. ఇక రెండో సంతానం కూడా ఆడపిల్లను కంటే, ఆ కన్నతల్లి అనుభవించే మానసిక క్షోభను వర్ణించలేము. ఇంట్లో వాళ్ళతో పాటు, ఇరుగుపొరుగు నుండి వచ్చే సూటిపోటి మాటలకు మానసికంగా కృంగిపోయే పరిస్థితి ఏర్పడేది. ఆడపిల్ల పుట్టుక సమాజంలో అంత వ్యతిరేకత సంతరించుకోవడానికి కారణాలు అనేకం ఉండచ్చు. కానీ అది జన్మనిచ్చే తల్లికి సంబంధం లేని అంశం. కానీ తల్లిని మాత్రమే టార్గెట్ చేసి యావత్ సమాజమూ ఆమెను గుండెల్లో గుచ్చుకునే మాటలతో హింసించడం ఎంతవరకూ సమంజసం? కొంతకాలానికి తల్లులు కూడా తమకు పుట్టబోయే శిశువు ఆడపిల్ల కాకూడదని పూజలు, ప్రార్థనలు చేసిన సంఘటనలు కూడా లేకపోలేదు. ఆడపిల్ల పుడితే తమ కొడుక్కి మరో పెళ్లి చేస్తామని కోడళ్లను బెదిరించిన/హెచ్చరించిన అత్తమామలు ఎంతమందో!

‘ఆడపిల్లను కన్నావంటే.. నీకు విడాకులిస్తా’నని భయపెట్టిన భర్తలనూ చూసాం. మరి ఆడపిల్ల పుట్టకపోతే భవిష్యత్ సమాజ నిర్మాణం ఎలా కొనసాగుతుందని ఎవరూ ఎందుకు ఆలోచించలేదో! అయితే ఆడపిల్లను ఎందుకు వద్దనుకునేవారో ఆలోచిస్తే కొన్ని విషయాలు మన ముందు ప్రత్యక్షం కాక తప్పదు.

ఎవరైనా ముందు కోరుకునేది మగపిల్లవాడిని. కారణం అతగాడు వంశోద్దారకుడై, వారి వంశం లేదా ఇంటిపేరు కొనసాగేలా చూడగలడన్న ఉద్దేశం కావచ్చు. కానీ మరో ఇంటి ఆడపిల్ల తోడు లేకుండా మగపిల్లాడు ఆ పని కూడ చేయలేడు కదా! అయినా మగపిల్లాడే కావాలంటారు. అలాగని మగపిల్లాడిని కోరుకోవడంలో తప్పులేదు. కానీ ఆడపిల్ల వద్దనుకోవడం, ఆడపిల్ల పుడితే భయకంపితులు అయిపోవడం పొరపాటుకదా!

మరి కొందరైతే, పేదరికంతో ఆడపిల్లను పెంచలేని పరిస్థితి, పుట్టినప్పటి నుండి అంచలంచెలుగా ఎదుగుతున్న ఆడపిల్లను రక్షించుకోలేని పరిస్థితి. కాపాడుకోలేని పరిస్థితి. ఇది పేదల్లోనే కాదు గొప్పింటి కుటుంబాలలో సైతం ఇదే తంతు. లేదంటే పేదవాళ్ళింట్లో జరిగేవి త్వరగా ప్రచారం అవుతాయి. పెద్దవాళ్ళ గుట్టు చప్పుడు అవసరం అయితే తప్ప బయటికి రావడం కష్టం!

అందువల్ల అప్పట్లో ఆడపిల్ల వద్దనుకునేవాళ్లే ఎక్కువ వున్నారు. తర్వాత మరో ముఖ్యమైన విషయం – ఆడపిల్లల పెళ్లిళ్లు. ఈ పెళ్లిళ్ల దగ్గరే అసలు సమస్య.

కన్యాశుల్కం సమస్య సమసిపోయి పూర్తిగా దానికి భిన్నమైన మరో సమస్య ‘వరకట్న సమస్య’ ఆడపిల్ల మెడకు ఉరితాడుగా మారింది. కట్నం కోసం అత్తమామల నుండి, భర్త నుండి, ఆడపడచుల నుండి, మరుదుల నుండి వేధింపులు, అవి భరించే ఆడపిల్లలకే కాదు, ఆడపిల్లలను కన్న తల్లిదండ్రులకు కూడా నరకప్రాయంగా మారింది. మధ్యతరగతి, దిగువ మధ్యతరగతి కుటుంబాలలో ఈ సమస్య కాన్సరులా విస్తరించడం మొదలుపెట్టింది. ఆడపిల్లలు వద్దనుకోవడానికి ఇది కూడా ఒక ప్రధాన కారణం కావచ్చు. దీనితో పాటు కులాంతర మతాంతర వివాహాలు చేసుకుంటున్నామని చెబుతూ, పెళ్లిళ్లు అయిన తర్వాత నిజస్వరూపాలు బయటపడి, అక్కడ కూడా ఆడపిల్ల భంగపడే పరిస్థితులు ఏర్పడుతున్నాయి. పెద్ద కులాలుగా చెప్పబడే కుటుంబాలలోని ఆడపిల్లలు, తక్కువ కులాలుగా చెప్పబడే కుటుంబాలలోని ఉన్నతస్థాయి గల అబ్బాయిలను ప్రేమ పేరుతోనో, కులాంతర వివాహం పేరుతోనో ఎగరేసుకుపోతున్నప్పుడు, చిన్న కుటుంబాలలోని ఆడపిల్లలు నష్టపోవడం మరో విచిత్రమైన అంశం. ఎంతో ఆశతో కని, ప్రేమగా పెంచి, పెద్దచేసిన ఆడపిల్ల పెళ్లి పేరుతో అన్ని ఇబ్బందులు పడడం, యవ్వనంతో మొదలై పెళ్లయ్యేవరకూ ఆడపిల్లను రక్షించుకోలేని అయోమయంలో చిన్నకుటుంబాల తల్లిదండ్రులు పడిపోవడం లాంటి సమస్యలు ఆడపిల్ల వద్దనుకోవడానికి కారణాలు కావచ్చు. కానీ అది మన చేతిలో లేదు కదా! ఆడ-మగ క్రోమోజోముల కలయికల నిష్పత్తిమీద ఆధారపడి ఉంటుంది. దానిని మాత్రం ఎవరూ అర్థం చేసుకోరు. అయితే ఈ సందర్భంలో నా అనుభవం ఒకటి మీతో పంచుకోవాలని ఆడపిల్ల తండ్రిగా ఆశపడుతున్నాను. అలా అని ఆందోళన పడవలసిన విషయం కాదు గాని ఆ సమయంలో నా లాంటి తండ్రి పడే టెన్షన్ వర్ణించలేనిది.

బాల్యంలో నిహార కానేటి

1994లో నేను మహబూబాబాద్ నుండి బదిలీ అయిన తరువాత జనగాం ప్రభుత్వ ఆసుపత్రిలో (ఇప్పుడు జిల్లా ఆసుపత్రి) బాధ్యతలు స్వీకరించిన పిదప స్థిరనివాసం హన్మకొండలో ఏర్పాటు చేసుకోవడం జరిగింది. పిల్లలిద్దరినీ, నారాయణ రెడ్డి గారి ‘సెయింట్ పీటర్ హై స్కూల్’లో చేర్చడం జరిగింది.

నిహార.కానేటి

మా అమ్మాయి ఎనిమిదవ తరగతి చదువుతున్న రోజులనుకుంటా. నేను ఉదయం స్కూటర్ మీద కాజీపేట స్టేషన్‌కు వెళ్లి స్కూటర్ స్టాండ్‌లో పెట్టి భాగ్యనగర్ ఎక్సప్రెస్‌లో జనగాం డ్యూటీకి వెళ్ళేవాడిని. మా పాపకు మొదటి నుండి బయాలజీ సబ్జక్టులో అభిరుచి బాగా ఉండడం వల్ల వాళ్ళ బడిలో బయాలజీ టీచర్ శ్రీ ఫణికుమార్ (ముంబైలో స్థిరపడ్డారు) గారి వద్ద ట్యూషన్ ఏర్పాటు చేసాము. ఆయన ‘సుమంగళ ఫంక్షన్ హాల్’ వెనుక వీధిలో ఉండేవారు. ఆయన బోధనా పరంగానూ, క్రమశిక్షణ పరంగానూ, వ్యక్తిత్వపరంగానూ చాలా మంచివాడని తెలిసి అక్కడ ట్యూషన్ ఏర్పాటు చేసాము.

అన్న(రాహుల్), చెల్లెలు(నిహార)

బడిలోనూ, బయటా, ఆయనకు మంచి పేరు ఉండేది. మా పాప రోజూ సైకిల్ మీద ట్యూషన్‌కు వెళ్లి నేను జనగాంకు బయలుదేరే సమయానికే ఇంటికి వచ్చేసేది. బయాలజీలో ఉన్నత స్థానానికి చేరుకోవాలని ఆమె చిన్నప్పుడే గట్టి నిర్ణయం తీసుకుంది. అమెరికా వెళ్లి అక్కడ పరిశోధన చేసి పి.హెచ్.డి పట్టా పొందాలన్నది ఆమె ప్రధాన ఆశయం. ఆ ఉద్దేశం తోనే కష్టపడి చదివేది. దానికి సరిపడా ఫలితాలు కూడా పొందేది. నేను కూడా ఆ దిశలోనే బాగా ప్రోత్సహించేవాడిని. ససేమిరా మెడిసిన్ చదవమని ముందే చెప్పేసింది. ఏదైనా అలా నిష్కర్షగా భయం లేకుండా చెప్పేసేది. వాళ్ళ అమ్మకు ఆమెను డాక్టర్ చేయించాలని ఉండేది. నేను మాత్రం అమ్మాయి నిర్ణయానికే ప్రాధాన్యత నిచ్చాను.

అలా రోజూ ట్యూషన్‌కు వెళ్లి వచ్చేక్రమంలో ఒకరోజు నేను జనగాం బయలుదేరే సమయానికి మా అమ్మాయి ఇంటికి రాలేదు. కాసేపు ఎదురు చూసాను అయినా రాలేదు. నాలో భయం మొదలైంది. అప్పటికి మొబైల్ సదుపాయం రాలేదు. ల్యాండ్ ఫోన్ ఉండేది. అలా టీచర్ ఫణికుమార్ గారికి ఫోన్ చేసాము. ఆయన రోజూ మాదిరిగానే సకాలానికే ఇంటికి తిరిగి వచ్చిందని చెప్పాడు.

రచయిత.. అమ్మాయి నిహార

నాలో టెన్షన్ మొదలైంది. నా శ్రీమతి మాత్రం చాలా మొండి ధైర్యంతో “మీరు జనగాం వెళ్లిపోండి, అమ్మాయి వస్తుందిలే” అని నాకు దైర్యం చెప్పి నన్ను సాగనంపింది. అయిష్టంగానే నేను బయలుదేరి, నేను వెళ్ళవలసిన రైలు వెళ్లిపోవడంతో బస్సు పట్టుకుని జనగాం చేరుకున్నానే గాని, నా మనసులో మనసు లేదు. అమ్మాయి ఇంకా ఇంటికి వచ్చిందోలేదోనన్న భయం నన్ను అక్కడ సరిగా పనిచేయనివ్వలేదు.

నిహార… పదవతరగతి ప్రోగ్రెస్ కార్డు

సాయంత్రం నాలుగు గంటలకు ఇంటికి వస్తేనే గానీ అసలు విషయం తెలియలేదు. అప్పుడు తెలిసింది ఏమిటంటే అమ్మాయి సైకిల్‍కు పంక్చర్ పడడంతో ఆమె ఆ పని కోసం కొంత సమయం దారిలో వెచ్చించవలసి వచ్చింది. ఇంట్లో కంగారు పడతారన్న విషయం ఆమెకు అవగాహన లేదు.

చిన్నప్పటి నుండీ ఆమెకు ఎక్కడా లేని దైర్యం. ఆమె ఇంటికి వచ్చి తయారై హాయిగా బడికి వెళ్ళిపోయింది. నా శ్రీమతి చక్కగా బ్యాంకుకు వెళ్ళిపోయింది మధ్యలో నేను పెద్ద టెన్షన్‌కు గురి అయ్యాను.

రచయిత.. అమ్మాయి నిహార

ఆడపిల్లను యెంత జాగ్రత్తగా పెంచాలో, యెంత జాగ్రత్తగా కనిపెట్టుకుని ఉండాలో, ఉండవలసిన అవసరం ఎంతో గుర్తు చేయడానికే ఈ సంఘటనను ఇక్కడ ఉదహరించాను. ఈ రోజున నా కుమారుడు ఉద్యోగ రీత్యా ఎక్కువకాలం అమెరికాలో ఉంటున్న నేపథ్యంలో, సర్వం తానే అయి కంటికి రెప్పలా కాపాడుతున్నది ఒక ‘ఆడపిల్ల’ అదే నా కూతురు నిహార. పిల్లలు ఇద్దరూ నాకు సమానమే, కానీ ఆడపిల్ల ప్రత్యేకం! ఒక రకంగా ఆ.. అన్నకు (రాహుల్) ఈ చెల్లెలు (నిహార. కానేటి) కూడా ప్రత్యేకమే!

ఆనాటి సంఘటన గుర్తుకు వస్తే ఇప్పటికీ ఒళ్ళు ఝల్లుమంటుంది. నేను ఆ రోజు జనగాం ఎలా వెళ్లగలిగానా.. అన్నది ఇప్పటికీ ఆశ్చర్యమే!! ఆడపిల్లలంటే ఇప్పుడు ఆషామషీ కానే కాదు. ఇప్పుడు ఆడపిల్లలే కావాలనుకునే రోజులు కూడా రాబోతున్నాయ్. ఎప్పుడైనా ఆడ : మగ సమతుల్యత పాటించవలసిందే. ఆ రోజు కోసం ఎదురు చూద్దాం. ఆడ పిల్లలు వద్దు అనే నినాదానికి చరమ గీతం పడేద్దాం.

(మళ్ళీ కలుద్దాం)

డా. ప్రసాద్ కె. ఎల్. వి.

వృత్తిరీత్యా వైద్యులు, ప్రవృత్తి రీత్యా రచయిత అయిన డా. కె.ఎల్.వి. ప్రసాద్ పుట్టింది, పెరిగింది తూర్పు గోదావరి జిల్లా దిండి గ్రామం. హైస్కూలు విద్య పాక్షికంగా అప్పటి తాలూకా కేంద్రం రాజోలులో. తదుపరి విద్య నాగార్జున సాగర్ (హిల్ కాలనీ), హైద్రాబాదులలో. వారి అన్నయ్య కె.కె.మీనన్ స్వయంగా నవలా/కథా రచయిత కావడం వల్ల, చిన్న వయస్సులోనే పెద్ద పెద్ద రచయితల సాహిత్యం చదువుకున్నారు. ఇంటర్మీడియట్ నుండే కవితలు రాయడం మొదలుపెట్టారు. 1975 నుండి వ్యాసాలు రాస్తున్నారు. 1983 నుండి కథలు రాస్తున్నారు. ఉద్యోగ రీత్యా హన్మకొండలో స్థిరపడ్డారు. వరంగల్ “సహృదయ సాహిత్య సాంస్కృతిక సంస్థ”కు వరుసగా 15 సంవత్సరాలు అధ్యక్షుడిగా ఉన్నారు. 2011లో కరీంనగర్ జిల్లా ఆసుపత్రిలో సివిల్ సర్జన్‌గా రిటైర్ అయ్యారు. “కె ఎల్వీ కథలు”, “అస్త్రం”, “హగ్ మీ క్విక్”, “విషాద మహనీయం” (స్మృతి గాథ) వంటి పుస్తకాలను వెలువరించారు.

1

డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
April 3, 2022 at 8:02 am
సంచిక సంపాదకవర్గానికి ఇతర సాంకేతిక నిపుణుల కు హృదయపూర్వక ధన్యవాదాలు
–డా కె.ఎల్.వి.ప్రసాద్
హన్మకొండ జిల్లా.

Log in to Reply
2

Sagar
April 3, 2022 at 8:18 am
ఎన్ని తరాలు గడచినా, కాలం ఎంతమారినా అన్ని రంగాలలో ఆడపిల్ల ఎంత ఎదిగినా, ఆమె భద్రత విషయంలో తల్లితండ్రులకు ఎప్పుడూ ఆందోళనే. అందుకు పైన మీరు ఉడహరించిన నిజాలు ఒక కారణం. అంటే ఆడపిల్ల వేదింపుల విషయం. ఏది ఏమైనా మీ విషయంలో అంతా సుఖాంతమై నిహార గారు మీ యోగక్షేమాలు చూడడం మీ అదృష్టం. మీకు అభినందనలు మరియు మీకు ధన్యవాదములు.

Log in to Reply
1. 2.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 12:58 pm
  సాగర్
  నీ స్పందనకు ధన్యవాదాలు.
  
  Log in to Reply
3

రమాదేవి బాలబోయిన..మృదువిరి
April 3, 2022 at 10:23 am
ఆడపిల్లలందరికీ….నాన్నలు బంగారు తండ్రులు…వారి కూతుర్లు వారికే తల్లులు 👏🌺🌷🌱

Log in to Reply
1. 3.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 12:57 pm
  ధన్యోస్మి.
  
  Log in to Reply
4

ADLURU NARASIMHA MURTHY
April 3, 2022 at 10:43 am
రచయిత
డా. కానేటి లక్ష్మీవర ప్రసాద్ గారికి అభినందనలు!
ఆడపిల్లల జననం…
కుటుంబంలో మరియు సమాజపరంగా
ఎదుర్కొనే (కంటికి కనబడని) మానసిక క్షోభను కళ్ళకుగట్టినట్లుగా
విశదీకరించారు.
నిజ జీవితంలో, వారు తన కూతురు ఇంటికి రావడం ఆలస్యం ఐనందుకు పడిన
మనోవేదన సహజంగా ఉంది.
ఆడపిల్లలను పెంచడంలో తీసుకోవలసిన
జాగ్రత్తలను వివరించిన తీరు బావుంది.
నమస్కారాలతో!
మీ..
అడ్లూరు నరసింహమూర్తి.

Log in to Reply
1. 4.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 12:56 pm
  మూర్తి గారూ
  ధన్యవాదాలండీ.
  
  Log in to Reply
5

డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
April 3, 2022 at 12:48 pm
104 వ భాగం ఒక సామాజిక అంశంపై ఆధారపడింది.గర్భస్థ పాప ఆడనో మగనో కావటానికి మగవాడే కారణమని ఎంతమంది వైద్యులు,నెత్తీనోరూ కొట్టుకొని మొత్తుకున్నా ఆడపిల్ల పూట్టటానికి ఆడవాళ్ళే కారణమని నిందించటం ,సాధించటం
సాధారణమైంది.అంథేనా సంతానం కలగక పోవటానికి మగవాడూ కారణంకావచ్చునంటే ఒప్పుకోని తల్లు లెందరో.ఆనమ్మకంతో మగవారు వైద్య పరీక్షలకూ పోనే పోరు.ఎంత సేపూ కోడలిని సాధించటమే.పురుషాధిక్య ప్రపంచం ఐపోయింది..మాబంధువుల్లో ఒక జంటకు సంతానం కలుగక పోతే ఆ అమ్మాయి తన భర్తనుకూడా వైద్య పరీక్షలకు రమ్మంటే వానికెందుకు పరీక్షలు నువ్వు పో.అని అత్తమామలు లొల్లి.ఆ మామ గారు వైద్య శాఖతో సంబంధం ఉన్నవాడే.కొడుకు బూజర్.ఐనా కొడుకు లోపం బయటికి తెలిస్తే పరువు కదా.కోఢలి పరువే తియ్యాలె .కొడుకు బుద్ధిమంతుడే.
ఈ 22 వ శతాబ్దం లో కూడా ఇదే నడుస్తున్నది .ఏంచేద్దాం సమాజం అట్లా వున్నది..ప్రతి చాప్టర్ లో ఏదో ఒక సామాజిక సమస్యను చర్చిస్తున్నరు మీరు.అందుకే అది కేవలం మీ జ్ఞాపకాల పందిరిగా మాత్రమే మిగిలిపోదు .సమాజానికవసరమున్న జ్ఞానం కొంత వుంటది.అందుకు మీకు అభినందనలు.
–రామశాస్త్రి
హన్మకొండ.

Log in to Reply
1. 5.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 12:56 pm
  శాస్త్రి గారికి హృదయపూర్వక కృతజ్ఞతలు.
  
  Log in to Reply
6

డి. వి. శేషాచార్య
April 3, 2022 at 12:57 pm
నిజమే డాక్టర్ గారూ. ఆడపిల్లలు సకాలంలో ఇల్లు చేరకపోతే తల్లిదండ్రులు పడే హైరానా అంతా ఇంతా కాదు. ఇంటర్, డిగ్రీ స్థాయి పిల్లల విషయంలోనైతే ఆ టెన్షన్ చెప్పలేము.

Log in to Reply
1. 6.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 4:34 pm
  అవునండి
  మీ స్పందనకు ధన్యవాదాలు సర్
  
  Log in to Reply
7

డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
April 3, 2022 at 1:01 pm
సహజసిద్ధంగా ఆడపిల్లలు శారీరకంగా బలహీనులు కావటం వలన ,సమాజంలోని కొందరు వ్యక్తులు వారి యొక్క బలహీనతను అవకాశంగా తీసుకొని వారికి హాని తలపెట్టే విషయంలో నాటికి నేటికీ పెద్దగా తేడా లేదు. కాబట్టి ఆడపిల్లలు కలిగిన ప్రతి తల్లిదండ్రి పిల్లల యొక్క భద్రత విషయంలో ఆందోళన చెందటం సహజమే. కానీ ఒక కన్న తండ్రిగా లేదా తల్లిగా తమ పిల్లల యొక్క మనోధైర్యాన్ని అంచనా వేయటంలో పొరబడి భయాందోళనలకు గురి అవుతూ నేటి తరం ఆడపిల్లలు ఎంతో ధైర్యవంతులు. బయట వ్యక్తులతో ఎలా మసలుకోవాలో, పరిస్థితులకు అనుగుణంగా ఎలా ప్రవర్తించాలో మన ఊహకు అందని ఈ విధంగా ఎదిగారు. ఇదేగా మన ఆశించిన నేటి తరం!..
–బి.రామకృష్ణా రెడ్డి
సికింద్రాబాద్.

Log in to Reply
1. 7.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 1:02 pm
  రెడ్డి గారు
  మీ స్పందనకు ధన్యవాదాలు సర్.
  
  Log in to Reply
8

Shyam kumar chagal
April 3, 2022 at 4:37 pm
అమ్మాయిలు వద్దు అబ్బాయే పుట్టాలి అనుకోవటానికి భారత దేశం లో కొన్ని వందల కారణాలున్నాయి. కంటికి రెప్పలా కాపాడుకోవటమే కాకుండా , వివాహం చేసిన తర్వాత కూడా కూతురు అనుభవించే ఇబ్బందులను తల్లి తండ్రి కూడా తమ వృద్దాప్యం లో ఎదురుకోవాల్సి రావటమనే దురదృష్టకర అంశం అప్పుడూ ఇప్పుడూ కూడా వున్నదే.

పుత్రుడి తో వచ్చే ఇబ్బందులు కూడా ;చాలా ఉంటాయి. కానీ అవి అంతగా తల్లి తండ్రులను నరకం లోకి నెట్ట లేవు. కొద్దిపాటి క్షోభ ఉంటుంది కానీ కొడుకు జీవితానికి వచ్చే ఇబ్బంది నష్టం ఉండదు . కానీ కూతురు కు ఎప్పుడు ఎం జరిగిన కూడా మొదటగా అది తల్లి తండ్రినే ఏడిపిస్తుంది. ఆడవారికి ఇటువంటి అనేక సాంఘిక , ఆర్ధిక , కుటుంబ పరమైన అసమానతలు మన భారతావని లో ఎక్కువ . ఇవి పాశ్చత్య దేశాలలో వుండవు కనుక అక్కడ అమ్మాయి పుట్టినప్పటికీ అందరూ సంతోషిస్తారు.

కొద్దిగా ఈ రోజులలో అమ్మాయిలకు కూడా మానసిక ధైర్య ము, ఆర్ధిక స్వావలంబన రావటం మూలాన పరిస్థితులలో కాస్త మార్పు కనపడుతోంది. అయిన్పటికీ మగవాడికున్న శారీరక , ఆర్ధిక , సంఘ బలమెప్పుడూ ఆడవారికి బలహీనతే అవుతుంది.

రచయిత డాక్టర్ కె ఎల్వి ప్రసాద్ చెప్పినట్లుగా , కూతురు ప్రేమ మయి, కూతురితో జీవితం ప్రేమ మయం కానీ అధిక బరువు బాధ్యత ల తో కూడింది. అందుకనే మొదటగా కొడుకు పుడితే వంశోద్ధారకుడనీ, అదనీ, ఇదనీ మానసిక అంతరంగం లో కలిగే సంతోషం అంత ఇంతా కాదు. రెండవ సంతానం అమ్మాయి పుడితే అప్పుడు ఇంకా హ్యాపీ.

ఎవరైతేనేమి ,, అమ్మాయే బెటర్ అంటారు ,అమ్మా యి పుట్టిన తర్వాత చాలా వరకు అందరూ. ఇద్దరు అమ్మాయిలే అయ్యారనుకోండి అప్పుడు ” ఆబ్బె మాకేమీ ఫీలింగ్ లేదు..మాకు ఎవరైనా ఒక్కటే ” అని నవ్వేస్తారు. ఇంకాస్త ముందుకెళితే ” ఈ రోజుల్లో అమ్మాయిలే బెటర్ ,,చూస్తున్నాగా..అబ్బాయిల తల్లి తండ్రులు పడే బాధలు” అంటారు.
ఏది ఏమైనా దేశ కాల పరిస్థితి లో మార్పు వస్తోంది. మన దేశం లో కూడా ఆడవారికి మగవాడితో సమానంగా జీవించే రోజు రావటం కావాలి.

ఆ రోజుల్లో నాకు రెండవ సంతానంగా అమ్మయి పుట్టగానే, బాధ్యత భయపెట్టి, తన పేరు మీద నా స్థాయిని మించిన ఎల్ ఐ సి పాలసీ తీసుకుని ,అది సరిగ్గా పెళ్లి సమయానికి వచ్చేట్లుగా చేసి ..ఊపిరి పీల్చుకున్నాను. అయితే తర్వాత పెళ్లి సమయానికా ఖర్చులు ఎన్నో రేట్లు పెరిగి పోయి , నేను ఆర్థికంగా కాస్త బలహీన పడటం అన్నది చేదు వాస్తవం.
ఇంతటి ముఖ్యమైన సామాజిక అంశాన్ని మన చర్చ కు తీసుకుని రావటం రచయిత చేసిన గొప్ప రచన.

వారికి నా ధన్యవాదాలు

Log in to Reply
1. 8.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 6:04 pm
  మిత్రమా….
  నీ విశ్లేషణ చాలా బాగుంది
  హృదయపూర్వక కృతజ్ఞతలు నీకు.
  
  Log in to Reply
9

Rajendra+Prasad
April 3, 2022 at 5:52 pm
మీరు అన్నట్లు ఆడ పిల్లలు కావాలని అనే రోజులు భవిష్యత్తులో వస్తాయేమో? కానీ ఆడపిల్లలు వద్దు అని మాత్రం అనుకోని రోజుల్లో ఉన్నామని అనుకుంటున్నాను. సమాజంలో స్వార్థం పెరిగి, అజ్ఞానం తోడయ్యి ఇలాంటి దుర సంప్రదాయాలు, దుర అభిప్రాయాలు మనిషికి శాపాలు అయ్యాయి.
– రాజేంద్ర ప్రసాద్

Log in to Reply
1. 9.1
  
  డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
  April 3, 2022 at 7:26 pm
  అవునండి
  ధన్యవాదాలు మీకు
  
  Log in to Reply
10

డా.కె.ఎల్.డా కె.ఎల్.వి.ప్రసాద్వి డాక్టర్ .ప్రసాద్
April 3, 2022 at 8:45 pm
ఆడ పిల్లల ను పెంచే విధానము, పేరెంట్స్ కు ఆడ పిల్లల విషయంలో ఎంత టెన్షన్ ఉంటుందో వివరించిన విధానము చాలా బాగుంది అన్నయ్య గారు.
—–జయ. అలెగ్జాండర్
అమెరికా.

Log in to Reply
1. 10.1
  
  ఎల్.వి.ప్రసాద్. కానేటి.
  April 3, 2022 at 8:47 pm
  అమ్మా ధన్యవాదాలు మీకు
  
  Log in to Reply
11

ఎల్.వి.ప్రసాద్. కానేటి.
April 4, 2022 at 6:55 am
జ్ఞాపకాల పందిరి 104 లో ఆడపిల్లలకు జన్మనిచ్చే తల్లుల మానసిక వేదనను చాలా చక్కగా వర్ణించారు. కారణాలను సామాజిక పరంగా, శాస్త్రీయపరంగా తెలియచేశారు. ఎంతో చదువుకున్నవారు సైతం ఆడపిల్లలను వద్దంటున్నారు. మూర్ఖంగా ప్రవర్తిస్తున్నారు.
ఆడపిల్లలను పిరికిమందు నూరిపోయకుండా మగపిల్లలతో సమానంగా పెంచడం తల్లిదండ్రుల బాధ్యత. చక్కటి అంశంపై మీ కథనం బాగుంది. అభినందనలు.
—జి.శ్రీనివాసాచారి
కాజీపేట.

Log in to Reply
1. 11.1
  
  ఎల్.వి.ప్రసాద్. కానేటి.
  April 4, 2022 at 6:55 am
  చారి గారూ
  మీ స్పందనకు ధన్యవాదాలు సర్.
  
  Log in to Reply
12

ఎల్.వి.ప్రసాద్. కానేటి.
April 4, 2022 at 6:58 am
Gd morning doctor garu,
I feel girls are more courageous than boys any time. It’s our over protective nature makes us feel tension.
—Suryanarayana rao
USA.

Log in to Reply
1. 12.1
  
  ఎల్.వి.ప్రసాద్. కానేటి.
  April 4, 2022 at 6:58 am
  Thank you sir
  
  Log in to Reply
13

ఎల్.వి.ప్రసాద్. కానేటి.
April 4, 2022 at 7:21 am
👍..
మంచి విశ్లేషణ సర్ ….👏👏
–శ్రీధర్ రెడ్డి
హన్మకొండ.

Log in to Reply
1. 13.1
  
  ఎల్.వి.ప్రసాద్. కానేటి.
  April 4, 2022 at 7:21 am
  ధన్యోస్మి.
  
  Log in to Reply
14

Bhujanga rao
April 4, 2022 at 12:58 pm
జ్ఞాపకాల పందిరి 104 లో ఆడ పిల్లల పెంపకంలో తీసుకోవాల్సిన జాగ్రత్తలు చక్కగా వివరించారు.కాలం మారిన అన్ని రంగాలలో పురుషులతో సమానంగా ఎదిగినా వాళ్ళ భవిష్యత్తు విషయంలో తల్లిదండ్రుల ఆవేదన అలాగే ఉంది.ఒక అమ్మ కోసం,సోదరి కోసం,భవిష్యత్తు కోసం మరియు భార్య కోసం,ఆడ పిల్లను కాపాడుకుందాం స్త్రీలను గౌరవిద్దాము. అలాగే మన ఇంట్లొ ఆడపిల్లలు చేసే ప్రతి పనికి,వారి శ్రమకు తగిన గుర్తింపు నివ్వాలి. వారి సమస్యలకు పరిష్కారం స్త్రీ పురుషులు కల్సి ఆలోచించాలి మరియు తెలుసుకోవాలి. సమాజానికి మంచి సందేశం ఇచ్చిన మీకు అభినందనలు మరియు ధన్యవాదములు సర్.🙏🙏🙏

Log in to Reply
15

ఎల్.వి.ప్రసాద్. కానేటి.
April 4, 2022 at 5:27 pm
రావలసిన సమయానికి ఆడపిల్లలు ఇంటికి రాకపోతే తలిదండ్రులు ఆందోళన చెందడం సహజం !

అందునా సెల్ఫోన్ లేని రోజుల్లో మీ అమ్మాయి ఇంటికి సకాలంలో రానందువల్ల

మీకు ఆందోళన కలగడం ..
మీ తండ్రి ప్రేమనీ ,

గాభరా పడకపోవడం వల్ల మీ శ్రీమతి ఆత్మ నిబ్బరాన్నీ ,

తన సైకిల్ బాగు చేసుకుని , తాపీగా ఇంటికి రావడం మీ అమ్మాయి ఆత్మవిశ్వాసాన్నీ

సూచిస్తున్నాయి !
—-డాక్టర్ అమృత లత
నిజామాబాద్/హైదరాబాద్

Log in to Reply
16

ఎల్.వి.ప్రసాద్. కానేటి.
April 4, 2022 at 5:27 pm
ధన్యవాదాలండీ.

Log in to Reply
17

ఎల్.వి.ప్రసాద్. కానేటి.
April 5, 2022 at 12:29 pm
Naga Jyothi Sekhar: నాడూ నేడూ ఎదుర్కొంటున్న సామాజిక అంశాన్ని స్పృశించారు సర్.నిజమే ఆడపిల్ల జననాన్ని ఆక్షేపించే వారెందరో ఉన్నారు మీలా ఆడపిల్ల పట్ల ఆపేక్ష చూపేవారు అరుదుగానే ఉన్నారు.ఏ మాటకామాటే చెప్పాలి అమ్మాయిని కన్నందుకు తల్లి ఎంత నిరసనను ఎదుర్కొన్నా పుట్టాక మాత్రం తండ్రికి అపురూపం అయిపోతుంది.ఇదో నిర్వచించలేని విషయం.ఆడపిల్ల భద్రత నాడూ నేడూ సమస్యగానే ఉంది.అయితే నేటి పరిస్థితుల్ని ఎదుర్కోగల స్థైర్యం నేటి తరం అమ్మాయిలకు ఉండడం ఆహ్వానించదగ్గ పరిణామం.ఆడపిల్ల భద్రత పెరగాలంటే ఇంటి నుండే స్త్రీని గౌరవించే సంస్కారాన్ని అబ్బాయిల్లో పెంచాల్సింది తల్లి దండ్రులదే.ముఖ్యంగా తల్లిదే. మీరు నిహారా గారి కోసం పడ్డ ఆందోళన తండ్రి ప్రేమను వెల్లడిస్తూనే మీ అమ్మాయి ధైర్యాన్ని కూడా మాకు కనబరిచింది.చదువుల్లో ముందుండి మంచి స్థాయికి చేరుకున్న వారు మీకు ఆడపిల్ల గా కాక అమ్మగా తోడుంటూ మగపిల్లలే కావాలనుకునే వారికి చెంపపెట్టులా అనిపిస్తున్నారు.ఆడపిల్లకు ఇంత ప్రాధాన్యత నిచ్చే ఏ కుటుంబం అయినా సుఖ శాంతులతో ఉంటుంది అది కూతురైనా కోడలైనా. మంచి సామాజిక అంశంతో ,మంచి ఆత్మీయ జ్ఞాపకాన్ని పంచుకున్న మీకు ధన్యవాదాలు సర్💐💐🙏
9 ఏళ్లకు లేక లేక నాకు అమ్మాయి పుడితే ఆడపిల్లని నా అత్త మామలు చూడడానికి రాలేదు.పిల్లనెత్తుకొని ఇంటికి వెళితే సారె సరిపోలేదని గొడవ పెట్టి నన్ను పిల్లతో గుమ్మం బయటే నిలబెట్టిన వైనం నేను అనుభవించిన క్షోభ నా కళ్లముందుకు వచ్చింది సర్.ఆ చేదు అనుభవం నేనెప్పటికీ మర్చిపోలేను.మొన్న మొన్నటి వరకూ అబ్బాయిని కనలేదని నా బాగ్ ని బయటికి విసిరేసి నన్ను దూషించిన క్షణాలను కూడా మరువలేను.సారీ ఈ మీ జ్ఞాపకం నాకు అవన్నీ గుర్తుకు తెచ్చింది☺️
—నాగజ్యోతి శేఖర్
కాకినాడ

Log in to Reply
1. 17.1
  
  ఎల్.వి.ప్రసాద్. కానేటి.
  April 5, 2022 at 12:30 pm
  మీ స్పందన కు ధన్యవాదాలమ్మా
  మీ అనుభవం బాధపెట్టిన్ది.
  
  Log in to Reply
18

ఎల్.వి.ప్రసాద్. కానేటి.
April 5, 2022 at 5:29 pm
ఆడపిల్ల తండ్రి ైనందుకు గర్వ పడుతూ ఉన్నాను👍👍డా.శంకర్ లాల్
చందానగర్.

Log in to Reply
1. 18.1
  
  ఎల్.వి.ప్రసాద్. కానేటి.
  April 5, 2022 at 5:30 pm
  శుభం బ్రదర్
  
  Log in to Reply
19

మొహమ్మద్+అఫ్సర+వలీషా
April 7, 2022 at 12:02 am
మేము ఐదుగురం ఆడపిల్లలం అయినా అమ్మా నాన్నలకు ఎంతో అపురూపాలమని చెప్పడానికి గర్వ పడుతున్నాను సార్. మీరూ ఆడపిల్లను ఎంతో ఆత్మీయంగా అందరికీ ఆదర్శంగా ప్రేమించడం, ఆత్మ విశ్వాసంతో పెంచడం చాలా గర్వించదగిన విషయం సార్ 👏👏👏ఆడపిల్లలైనా మగపిల్లలైనా వారిని క్రమశిక్షణ తో పెంచితేనే చక్కని మార్గదర్శకతతో తల్లి దండ్రులను గౌరవిస్తారు.మీరు ఆ ప్రేమ ఆప్యాయత స్వేచ్ఛ ఇవ్వబట్టి నిహార గారు ఈ రోజు మీకు సరైన సమయంలో సరిపడా సపోర్ట్ ఇస్తున్నారు.ఓ ఆడపిల్ల తండ్రి కి ఇంతకంటే సంతోషం ఏముంది సార్. నలుగురిలో ఆదర్శం గా పెంచి నలుగురికీ స్ఫూర్తి నింపే చక్కని వ్యాసాలను జ్ఞాపకాల పందిరిలో దాచి మాకు అందిస్తున్నారు. హృదయపూర్వక ధన్యవాదాలు సార్.🙏🙏🙏🙏🙏 చక్కని మీ వ్యాసాలకు హృదయపూర్వక శుభాభినందనలు సార్.💐💐💐💐💐💐💐💐💐నిహార గారికి హృదయపూర్వక శుభాకాంక్షలు శుభాభినందనలు చెప్పండి సార్ 💐💐💐💐💐💐💐💐💐💐💐

Log in to Reply
1. 19.1
  
  ఎల్.వి.ప్రసాద్. కానేటి.
  April 7, 2022 at 6:07 am
  అమ్మా
  నీ స్పందనకు హృదయ పూర్వక కృతజ్ఞతలు.
  
  Log in to Reply
20

ఎల్.వి.ప్రసాద్. కానేటి.
April 8, 2022 at 8:50 am
Real Story very nice as usual. U r a proud father. Lovely daughter 😍
—Dr.Sujatha
Vijayawada.

Log in to Reply
1. 20.1
  
  ఎల్.వి.ప్రసాద్. కానేటి.
  April 8, 2022 at 8:50 am
  Amma
  Thank you somuch.
  
  Log in to Reply