మరచిపోయిన ఘటనలు
అకస్మాత్తుగా మది ముంగిట తలుపు తడితే…
ఆ ఉద్విగ్న క్షణాలు
వెలకట్టలేని అపురూపాలై,
కనుమరుగైనా వీడని
కలలుగా సాగిపోయే,
ఆణిముత్యాలే అవి!!
ఉబుసుపోక కాలక్షేప
నిమిత్తం వీక్షించే టివి-
నాటి సంఘటనలైన,
పాఠశాలనుంచి కళాశాల వరకు,
అనుభవించిన తీపి గురుతులను
చలన చిత్రం కనువిందుచేస్తూ,
ఆనందింపచేస్తుంటే
వెనక్కిమరలే మనసును
ఆపలేని ఆనంద స్థితి అది!!
మొక్కుబడిగా మొదలెట్టిన
వీక్షణలో సన్నివేశాలు
అంతరంగాన్ని తట్టిలేపుతూ
కడవరకు కదలనీయక
కనులముందు నిలిచి
గతాన్ని నెమరవేస్తుంటే
అనుభవించే ఆ అనుభూతిని
ఏ రూపంలో వర్ణించగలం!!
సాంప్రదాయాల నీడలో
పెరిగిన మధురమైన
ఆనాటి తెలిసీ తెలియని
అరుదైన జీవితం-
అనుభవించడమే తప్ప,
వ్రాసేందుకు పరిజ్ఞానం లేని,
అరుదైన కాలమది.
వయస్సూ, మనస్సూ
రెచ్చగొట్టినా, విలువల
వలువలు విసర్జించలేని
కట్టుబాట్లకు మైలురాయి
ఆనాటి జీవనశైలి!!
గడచిన ఆ మధురాతి
మధుర అనుభవాలను
తలచుకుంటూ విధి ఆడిన
వింతనాటకంలో శాశ్వతంగా
దూరమైన మిత్రుల ఎడబాటు
మనస్సును మెలితిప్పినా
ఏమీ చేయలేని నిస్సహాయులమై,
కాలచక్రానికి తలవంచి
చేసే వినమ్రప్రణామమే
మన మరో జీవితం!!
సాగర్ రెడ్డిగారి పూర్తి పేరు పెనుబోలు విద్యాసాగర్ రెడ్డి. స్వంత ఊరు నెల్లూరు జిల్లా, నెల్లూరుపల్లి కొత్తపాళెం గ్రామము. ప్రాథమిక, ఉన్నత పాఠశాల విద్య నెల్లూరుపల్లి కొత్తపాళెంలోని ప్రాదమిక మరియు జిల్లాప్రజాపరిషిత్ పాఠశాలలో పూరి చేశారు. ఎన్ బి కె ఆర్ సైన్స్ అండ్ ఆర్ట్స్ కళాశాలలో ఇంటర్మీడియట్ నుంచి బికాం వరకు చదివారు. చెన్నై లోని విక్కీ ఇండస్ట్రీస్‌లో మార్కెటింగ్ విబాగంలో సేల్స్ ఎగ్జిక్యూటివ్‌గా పని చేస్తున్నారు. కవితా రచనలు ప్రవృత్తి. ఇప్పటి వరకు 400 కవితలు రచించడం జరిగింది.