ఎవరి కెరుక?

గుప్పెడంత గుండె లోతుల్లో
కడలిని మించిన ఆశలేమిటో?
అనంతమైన ఆకాశపుటంచుల్లోనూ,
అంతమేలేని ఆలోచనలెన్నెన్నో!
పెదవి మాటున దాగిన
చెప్పలేని మాటలు మరెన్నో,
కరిగిపోయిన కలనే మరల – మరల
గాంచాలనే తపన ఈ కన్నుల కెందుకనో?
మరలిరాని నిన్నటి కోసం
పిచ్చి మనసు ఎదురు చూచుటేలనో?
చిల్లు పడిన ఈ జీవితనౌక.
ఏ తీరున తీరం చేరునో ఎవరి కెరుక?

చల్లా సరోజినీదేవి

చల్లా సరోజినీదేవి చక్కని కథా రచయిత్రి. సమకాలీన సామాజిక పరిస్థితులను ప్రతిబింబించే కథలను “భావ సుధలు” పేరిట సంపుటంగా వెలువరించారు.