[శ్రీ పెద్దాడ సత్యప్రసాద్ రచించిన ‘ఏకాంతంలో ఎంతో ఉంది’ అనే కవితని పాఠకులకి అందిస్తున్నాము.]
ఏకాంతంలో ఎంతో అందం వుంది
ఏ కాంతలో లేని సొగసుంది
మనసుని నస పెడుతుంది
వయసుకి సెగ పుడుతుంది
రేపెట్టే ఆశలు చలిపెట్టే వూసులు
నేల మీద నిలవని కాళ్ళు
నింగిని తాకే యవ్వన పరవళ్ళు
మోహానికి తోరణాలు
మౌనాలకు స్వాగతాలు
ఇవన్నీ ఏకాంత కాంత చేసే
అసలు సిసలు విన్యాసాలు
అందుకే ఎంత కాదనుకున్నా
ఏకాంతానికి దాసోహం అనాల్సిందే
పెద్దాడ సత్యప్రసాద్ విశాఖపట్నం జిల్లా వాస్తవ్యులు, కవిగా, రచయితగా దశాబ్దాల ప్రయాణం. వీరి కధలు, కవితలు వివిధ పత్రికలలో ప్రచురితమవడమే కాక, ఆకాశవాణి విశాఖపట్నం కేంద్రం ద్వారా కూడా ప్రసారం అయ్యాయి. ఇక, వృత్తిగతంగా పాత్రికేయులు. రెండున్నర దశాబ్దాలకు పైగా పాత్రికేయ వృత్తిలో అంకితభావంతో పనిచేస్తున్నారు. రాజకీయ విశ్లేషణలు వీరి ప్రత్యేకత. ప్రస్తుతం ఆకాశవాణి విశాఖపట్నం ప్రాంతీయ వార్తా విభాగంలో న్యూస్ ఎడిటర్గా పనిచేస్తున్నారు.