[డి. బి. గాయత్రి గారు రచించిన ‘ధన్యత!’ అనే కవితని పాఠకులకి అందిస్తున్నాము. సంచిక సాహితి ప్రచురణలు సంయుక్తంగా నిర్వహించిన 2025 శ్రీ విశ్వావసు ఉగాది కవితల పోటీలో సాధారణ ప్రచురణకు ఎంపికైన కవిత.]
మట్టి ప్రమిదలో
పుట్టిన దీపం
వట్టి మట్టికి
ఎట్టి విలువను
పట్టిస్తుందో కదా?
రేకులలో ఒదిగిన
మొగలి పువ్వు
వట్టి ఆకులకు
ఎట్టి సౌరభాన్ని
చుట్టిస్తుందో కదా?
చిన్ని గుండెలో
పెరిగిన ప్రేమ
చిట్టి ప్రాణిని
ఎట్టి మహత్వానికి
ఎత్తివేస్తుందో కదా?
