[‘అమెరికా జనహృదయ సంగీతం- కంట్రీమ్యూజిక్’ అనే ఫీచర్‌లో భాగంగా జానీ క్యాష్ పాడిన ‘ఐ వాక్ ది లైన్’ అనే పాటని విశ్లేషిస్తున్నారు పి. జ్యోతి.]
- జానీ క్యాష్ – ఐ వాక్ ది లైన్
- ఆల్బమ్ – ఐ వాక్ ది లైన్ (1956)
- రచన – జానీ క్యాష్
- నిర్మాత – సామ్ ఫిలిఫ్స్
~
మాన్ ఇన్ బ్లాక్ అని అభిమానులు ప్రేమగా పిలుచుకునే జానీ క్యాష్ పూర్తి పేరు జాన్ రే క్యాష్ (ఫిబ్రవరి 26, 1932 – సెప్టెంబర్ 12, 2003). ఈయన గాయకుడూ, గేయ రచయిత, సంగీతకారుడు కూడా. ఈయన పాటల్లో విషాదం ఎక్కువ పాళ్లలో ద్వనిస్తూ ఉంటుంది. లోతైన, ప్రశాంతమైన, బాస్-బారిటోన్ స్వరం ఈయనకి ప్రపంచ వ్యాప్తంగా అభిమానులను సంపాదించి పెట్టింది. ఈయన గీతాలలో విశిష్టమైన గిటార్ ద్వని వినిపిస్తుంది. తన జీవిత కాలంలో అమెరికా లోని జైళ్లలో ఖైదీల కోసం ఎన్నో ఉచిత ప్రదర్శనలు చేసారు. స్టేజీపై ఎప్పుడు నల్ల దుస్తులతో కనిపించే జానీ కంట్రీ మ్యూజిక్‌లో ప్రజలు మర్చిపోలేని గాయకుడు. నాలుగు సంవత్సరాలు ఏర్ ఫోర్స్‌లో కూడా పని చేశారు.
క్యాష్ తన స్టార్‌డమ్, ఆర్థిక హోదాను ఉపయోగించి స్థానిక అమెరికన్ ప్రజలను సమస్యలపై అవగాహన కల్పించే ప్రయత్నం చేసిన గాయకుడు. అమెరికా ప్రభుత్వాన్ని ఎదుర్కోవడానికి క్యాష్ స్థానిక మానవత్వం గురించి పాటలు పాడాడు. చాలా మంది స్థానికేతర అమెరికన్లు తమ సంగీతంలో ఆ అంశాలను ప్రస్తావించడానికి భయపడేవారు. కాని క్యాష్ స్థానిక అమెరికన్ల హక్కుల పరిరక్షణ కోసం కార్యకర్తగా పని చెసారు.
‘ఐ వాక్ ది లైన్’ అనేది 1956లో జానీ క్యాష్ స్వయంగా రాసి రికార్డ్ చేసిన పాట. ఇది బిల్‌బోర్డ్ కంట్రీ చార్ట్‌లో మొదటి హిట్‌గా నిలిచింది. ఈ పాట 43 వారాలకు పైగా రికార్డ్ చార్ట్‌లలో కొనసాగింది. ఇప్పటిదాకా దీనివి రెండు మిలియన్లకు పైగా కాపీలు అమ్ముడయ్యాయి. ఈ రోజుకీ గొప్ప కంట్రీ పాటల లిస్ట్ అన్నిటిలోనూ ఈ పాట వినిపిస్తుంది. ఈ పాట ప్రదర్శించేటప్పుడు ఒక విచిత్రమైన గిటార్ ద్వని పలకడానికి గిటార్ తీగల మధ్య క్యాష్ ఓ డాలర్ బిల్ ను పెట్టేవారట. దీనితో ఆ గిటార్ నుండి వైవిద్యమైన శబ్దం వచ్చి ఈ పాటకు వింత అందాన్ని తీసుకువస్తుంది.
‘ఐ వాక్ ది లైన్’ అనేది ఇంగ్లీషు భాషలో ఓ పద ప్రయోగం. దీన్ని ఆమోదయోగ్యమైన రీతిలో ప్రవర్తించడం, నియమాలను అతిక్రమించకుండా జీవించడం, నమ్మిన వారి అంచనాలను వమ్ము చేయకుండా ప్రవర్తించడం అని అర్థం చేసుకోవచ్చు. మన తెలుగులో గీత దాటకుండా ఉండడం అనే అర్థం దీనికి సరిగ్గా సరిపోతుంది.
ఒక వ్యక్తిని ప్రేమిస్తే వారి కోసం నైతికంగా అన్ని రకాల ప్రలోభాలను ఎదుర్కుని నిజాయితీగా ఉండగలగడం ఎటువంటి మనావ సంబంధంలోనైనా అత్యవసరం. ఈ కమిట్మెంట్ లేనిది ప్రేమ అనిపించుకోదు. పాశ్చాత్య దేశాలలో మానవ సంబంధాలలో కమట్మెంట్‌కు ప్రాధాన్యత ఉండదన్నది అపోహ మాత్రమే. ఏ దేశంలోనయినా ప్రాంతంలోనయినా మనుషులు పరస్పర నమ్మకం ఉన్నప్పుడే కలిసి ఉండగలుగుతారు. అందుకే ఈ పాట కంట్రీ మ్యూజిక్ గీతలలోనే టాప్ వన్‌గా నిలిచింది.
I keep a close watch on this heart of mine
I keep my eyes wide open all the time
I keep the ends out for the tie that binds
Because you’re mine, I walk the line, mmm
(నేను నా హృదయాన్ని చాలా దగ్గరగా గమనిస్తూ ఉంటాను. నా కళ్ళు అన్ని సమయాలలోనూ తెరచి ఉంచుకుంటాను. మనసులు కలిపే మార్గాలను తెరచి ఉంచుకుంటాను. నువ్వు నా దానివయ్యావు కాబట్టే నేను గీత దాటను)
జీవితంలో మనిషి ఎన్నో ప్రలోభాలకు ఎదురీదవలసి వస్తుంది. ఎన్నో ఆకర్షణల నడుమ ప్రయాణించవలసి వస్తుంది. ఎన్నో బలహీన క్షణాలకు దాటవలసి వస్తుంది. అందుకే అతను తన హృదయాన్ని ఎల్లప్పుడు అదుపులో పెట్టుకుంటున్నాడట. ఎట్టి పరిస్థితిలోనూ ఏ రకమైన మాయలకు లోను కాకుండా అన్ని సమయలలోనూ కళ్ళు తెరచి ఉంచుకుంటున్నాడట. మాయ కళ్ళను కప్పేస్తుందని అతనికి తెలుసు అందుకే చాలా జాగరూకతతో అతను ప్రపంచంలో నడుచుకుంటున్నాడు. ఎందుకంటే అతని జీవితంలో ఆమె ఉంది. ఆమె అతనికి పూర్తిగా సొంతమయింది. ఆమెకు అతను ఎట్టి పరిస్థితిలోనూ అన్యాయం చేయదల్చుకోలేదు. తమ బంధాన్ని, ఆమె తనపై ఉంచిన నమ్మకాన్ని అతను వమ్ము చేయదల్చుకోలేదు.
I find it very, very easy to be true
I find myself alone when each day is through
Yes, I’ll admit that I’m a fool for you
Because you’re mine, I walk the line, mmm
(ఇలా ఉండడం చాలా సులువుగా అనిపిస్తుంది. ప్రతి రోజూ ఒంటరిగానే గడుపుతున్నాను. నేను నీకు మూర్ఖుడిగా కనిపిస్తున్నాడని నాకు తెలుసు, నువ్వు నా దానివి కాబట్టే నేను గీత దాటాలనుకోవట్లేదు)
ఏ ప్రలోభాలకు లొంగకుండా, ఏ ఆకర్షణలకు గురి కాకుండా ఉండటానికి రోజంతా అతను ఒంటరిగా గడుపుతున్నాడు. కాని ఇది అతనికి ఏమీ బాధ కలిగించట్లేదు. ఆమె తని సొంతం అయిన తరువాత అతనికి ఈ ఒంటరితనం బాధ కలిగించట్లేదు. అతని మౌనం, ఇతరుల పట్ల అతను చూపే ఉదాసీనత ఆమెకీ నవ్వు తెప్పించవచ్చు. కాని ఆమె తనదైన తరువాత అతనికి ఇంకేది వద్దనిపిస్తుంది. అందుకే ఎవరినీ దగ్గరకు రానివ్వలేక ఆమె కోసం ఎదురు చూస్తు అతను రోజంతా గడుపేస్తున్నాడు.
As sure as night is dark and day is light
I keep you on my mind both day and night
And happiness I’ve known proves that it’s right
Because you’re mine, I walk the line, mmm
(రాత్రి చీకటి పగటి వెలుగు ఎంత నిజమో, నా మదిలో రాత్రీ పగలు నిన్ను దాచిపెట్టుకొవడం అంత నిజం. దానితో నేను అనుభవిస్తున్న ఆనందం నా దారి సరైనది అని నిరూపిస్తుంది. నువ్వు నా దానివి కాబట్టి ఏ గీత దాటనవసరం నాకు లేదు మరి)
ఆమెను పగలు రాత్రి ధ్యానిస్తూ, ఆమె జ్ఞాపకాలు మదిలో నిలుపుకుని అతను రోజు గడుపుతున్నాడు. ఇది అతనికి ఎంతో ఆనందాన్నిస్తుంది. ఇలాంటి స్థితిలో ఉండడం అతనికి ఎంతో బావుంది. ఆమె తనదైన తరువాత ఎవరి అవసరమూ తనకు లేదనిపిస్తుంది అందుకే ఆ స్థితిని ఆస్వదిస్తూ ఆ ప్రేమను గౌరవిస్తూ అతను ఎట్టి పరిస్థితులలో బలహీనపడకూడదని నిశ్చయించుకున్నాడు. ఎప్పుడు గీత దాటకూడదని నిశ్చయించుకున్నాడు.
You’ve got a way to keep me on your side
You’ve give me cause for love that I can’t hide
For you, I know I’d even try to turn the tide
Because you’re mine, I walk the line, mmm
(నన్ను ఎప్పుడు నీ పక్కనే కట్టిపడేసుకునే శక్తి నీకుంది. నేను దాచుకోలేనంత ప్రేమను నువ్వు నాకు అందిస్తున్నావు. నీ కోసం నేను దేన్నైనా మార్చగలను. నువ్వు నా దానివి. ఇక నాకు గీత దాటాల్సిన అవసరం మాత్రం ఎందుకుంటుంది)
తాను అంత నిబద్ధతతో జీవించడానికి కారణం ఆమె అందించే ప్రేమ. తానెంత ప్రేమను అనుభవిస్తున్నాడో అది అతని ప్రవర్తనలో వ్యక్తం అవుతూనే ఉంది. ఆమె కోసం దేనినైనా మార్చుకునే స్థితిలో అతను ఉన్నాడు. అప్పటి దాకా తన జీవిన శైలి, ఆలోచనా సరళి, జీవించే విధానం మార్చుకోవడం అతనికి కష్టం అనిపించట్లేదు. అతనికి ఇలా ఉండడమే బావుంది. మనసు నిండా ఆమె ఉండగా మరో ఆలోచన మనసులోని రానివ్వక ఆమె ప్రేమలో తనను తాను మరచి తనలోకి తాను లీనమయి ఆమెలేని సమయాన్ని గడపడంలో గొప్ప ఆనందాన్ని అతను అనుభవిస్తున్నాడు. ఇంత తృప్తిని ఆస్వాదిస్తూ ఇక గీత దాటే స్థితి అతను ఎందుకు తెచ్చుకుంటాడు?
I keep a close watch on this heart of mine
I keep my eyes wide open all the time
I keep the ends out for the tie that binds
Because you’re mine, I walk the line, mmm
(నా మనసును దారి తప్పకుండ జాగ్రత్తగా కాచుకుంటాను. నా కళ్ళూ మూసుకుపోకుండా చూసుకుంటాను. మనలని ఇంకా దగ్గర చేసే కారణాలను తెరచి ఉంచుకుంటాను. నువ్వు నా దానివి అయ్యాక నేను నా పరిధిలోనే ఉండిపోతాను. ఎప్పుడు ఈ గీత దాటను)
ఆమె తనదయన తరువాత అతనికి మరేదీ అక్కర్లేదు. అందుకె ఆమె ద్వారా దక్కుతున్న ఈ ఆనందాన్ని ఎప్పటికీ నిలిపి ఉంచుకోవడానికి ఏ సందర్భంలోనూ పరిధి దాటను అని అతను చెప్పుకోవడంలో ఆమెపై అతని ప్రేమ కనపడుతుంది. అలాగే ప్రేమకు నమ్మకం పునాది అని అదే అవతలు వారికి తామిచ్చే అసలైన ప్రేమ కానుక అని చెప్పడం అతని ఉద్దేశం.
కంట్రీ సంగీతంలో ఏ మాత్రం పరిచయం ఉన్న వారయినా ఈ పాటను ఇష్టపడకుండా ఉండలేరు. జానీ క్యాష్ విలక్షణమైన గాత్రం గిటార్ వాయిద్యం ఈ పాటను అదనపు ఆకర్షణలు.
ఈ పాటని యూట్యూబ్‍లో ఈ లింక్‍ లో వినవచ్చు.
(మళ్ళీ కలుద్దాం)
