[‘అమెరికా జనహృదయ సంగీతం- కంట్రీమ్యూజిక్’ అనే ఫీచర్‌లో భాగంగా డాన్ విలియమ్స్ పాడిన ‘జస్ట్ బికాజ్ అయామ్ ఇన్ లవ్ విత్ యూ’ అనే పాటని విశ్లేషిస్తున్నారు పి. జ్యోతి.]
- డాన్ విలియమ్స్ – జస్ట్ బికాజ్ అయామ్ ఇన్ లవ్ విత్ యూ
- ఆల్బమ్ – ట్రూ లవ్ (1990)
- రచన – జెస్సీ విన్చెస్టర్
~
ప్రేమ మనుషులను బలహీనులుగా మారుస్తుంది. ప్రేమకు బదులుగా ప్రేమ దొరికితే ఆ మనిషికి ఆ బలహీనతే జీవించే శక్తినిస్తుంది, జీవితంలో ఆనందాన్ని నింపుతుంది. కాని ప్రేమకు బదులుగా కాఠిన్యాన్ని, లౌక్యాన్ని మనిషి ఎదుర్కోవలసి వస్తే ఆ ప్రేమే మనిషికి బందీఖానా అవుతుంది. అందులోనించి బైటపడడం అంత సులువు కాదు. ప్రేమలో పడడం క్షణంలో జరగిపోవచ్చు. కాని అది మనల్ని సమూలంగా నాశనం చేసే ఎమోషన్ అని తెలిసిన తరువాత అందులోనించి బైటపడమని విచక్షణ చెబుతూ ఉన్నా దాన్ని అమలు పరచడానికి చాలా సమయం పడుతుంది. మనసు ఎంతో సంఘర్షణకు గురి అవుతుంది.
సాధారణంగా మన దేశంలో వచ్చే ప్రేమగీతాలలో ప్రేమ నుండి విడుదల కోరుకునే స్థితిని కవులు చాలా అరుదుగా ప్రస్తావిస్తారు. ప్రేమ గీతాలలో విడిపోయే ప్రేమికులు అవతలి వారిని నిందించడం లేదా నిన్ను ఎల్లప్పుడూ గుండెల్లో నింపుకుని ఉంటానని చెప్పడం జరుగుతూ ఉంటుంది. ఒక్క ఆచార్య ఆత్రేయ గారు మాత్రం స్పష్టంగా “వలచుట తెలిసిన నా మనసునకు మరచుట మాత్రమూ తెలియనిదా” అంటూ చెప్పగలిగారు. అందులో కూడా ప్రేయసి సుఖం కోసం ప్రియుడి త్యాగం ఉంటుంది. అయినా అందులోనూ తనకు మరపు అవసరం అని ఆయన ఆ ప్రియుడితో ధైర్యంగా చెప్పిస్తారు. మళ్ళీ ఆయనే “ప్రేమ ఎంత మధురం ప్రియురాలు అంత కఠినం” అంటూ ఓ భగ్న హృదయాన్ని మరో గీతంలో ప్రస్తావించారు. ఇందులో క్షీరసాగర మథనం చేసి హలాహలం ప్రేమలో మింగిన ప్రియుని అశక్తత ద్వనిస్తుంది. కాని ప్రేమించిన ప్రియురాలు తనను ఆటబొమ్మను చేసి ఆడించే వ్యక్తి అయినప్పుడు ఆ ప్రేమను మర్చిపోవాలని సిద్దపడే వ్యక్తుల వేదనను చర్చించిన గీతాలు చాలా తక్కువ. అందుకే డాన్ విలియమ్స్ ‘జస్ట్ బికాజ్ అయామ్ ఇన్ లవ్ విత్ యూ’ అనే పాట నాకు చాలా ఇష్టం. ఇందులో వాస్తవ జీవితానికి చాలా దగ్గరగా ఉండే నిజాయితీ ఉంది.
It’s true, you’ve got me going ‘round in circles
You keep me so darned dizzy, I could cry
But every time you hurt me, I grow a little stronger
I’ll soon be strong enough to say goodbye
(నువ్వు నన్ను నీ చుట్టూ తిప్పుకుంటున్నావు అన్నది నిజం. నన్ను ఎంతగా మైకంలో ముంచేసావంటే నాకు ఏడుపు వస్తుంది. కాని నన్ను నువ్వు గాయపరిచిన ప్రతి సారి నేను కొంత బలపడుతున్నాను. నీకు వీడ్కోలు చెప్పగలిగే శక్తి నాకు త్వరలో వస్తుంది)
ఆమె అతన్ని తన చుట్టూ తిప్పుకుంటుంది. అతని ప్రేమ ఆమెకు ఆటలా ఉంది. అతన్ని పూర్తిగా తన మత్తులో ముంచేసి ఆడిస్తుంది. దానితో అతని మనసు ఎంతగానో గాయపడుతుంది. కాని ఆమె ప్రేమలో నిండా మునిగి ఉన్న అతనికి తెలుసు, ఈ గాయలు అతన్ని ఇప్పుడు బాధపెడుతున్నా, ఆ బాధ అతనికో అనుభవంగా మారి, ఆమె మత్తులోనుండి బయటపడడానికి అతనికి కొద్ది కొద్దిగా బలాన్ని ఇస్తుంది. ఆమె అతన్ని గాయపరుస్తూనే ఉంటుంది. ఇది అతనికి తెలుసు కాని ఆ గాయాల ద్వారా అతను ఈ ప్రేమలో నుండి బైటపడే శక్తిని సమకూర్చుకుంటున్నాడు. ఆమెకు వీడ్కోలు ఇచ్చే రోజు దగ్గరలోనే ఉంది. ఈ అనుభవాల శక్తితో అతను ఆమెను నుండి దూరం జరగగలడు. ప్రేమ అతన్ని ఎంత అశక్తుడిని చేసిందంటే, ఈ గాయాలే లేకపోతే అతను అందులో పడి కొట్టుకుపోయేవాడే. ఒక రకంగా ఈ అనుభవాలు అతనికి ఈ విషతుల్యం అయిన బంధం నుండి తప్పించుకోవడానికి అవసరం కూడా.
It will be so good to smile
Gee, it’s been a long, long while
After all that I’ve been through
Just ‘cause I’m in love with you
But there will come a day, you’ll see
You won’t have control of me
You can’t hurt me like you do
Just ‘cause I’m in love with you
(నవ్వడం ఎంత బావుంటుందో కదా. హా.. నేను మనస్పూర్తిగా నవ్వి ఎన్నాళ్ళయింది? నీతో ప్రేమలో ఉన్నందుకు ఎలాంటి స్థితి అనుభవానికి వచ్చింది. కాని నువ్వే చూస్తావు. ఒక రోజు తప్పక వస్తుంది, నాపై నీ నియంత్రణ ఉండదు. నిన్ను ప్రేమిస్తున్నందుకు నన్ను నువ్వు ఇప్పటిలా గాయపర్చలేవు)
ఆమె ప్రేమలో పడి ఆమెను పొందాలన్న ఆశతో అతను నవ్వడం మర్చిపోయాడు. ఎన్నో యుగాలయింది అతను నవ్వి. ఆమెను ప్రేమిస్తున్నందుకు ఎలాంటి హీన స్థితికి అతను చేరాడో అతనికి ఇప్పుడు అర్థం అవుతుంది. కాని లోతుగా ఈ మాయలో కూరుకుపోయిన తరువాత అందులోనించి బైటపడడానికి అతనికి శక్తి కావాలి. అది ఇప్పుడు అతనికి లేదు. ఆమె చేసే గాయలవల్ల రేగే దుఖం నుండి అతను ఆ శక్తిని పొందుతున్నాడు. మెల్లి మెల్లిగా అమె నుండి తన మనసును మళ్ళించుకునే ప్రయత్నం ఇప్పుడే చేస్తున్నాడు. ఇప్పుడు ఆతను పూర్తిగా ఆమె నియంత్రణలో ఉన్నాడు. కాని ఓ రోజు తప్పక వస్తుంది. అతను ఈ ఖైదుని తప్పించుకోగలుగుతాడు. ఆ రోజు అతనిపై ఆమెకు ఏ హక్కూ, ఎలాంటి నియంత్రణ ఉండదు. ఆ రోజు అతనికి పూర్తిగా స్వేచ్ఛ లభిస్తుంది.
నిజానికి మనకు హాని చేసే ఏ బంధం నుండయినా విడిపోవడం అంత సులువు కాదు. మనసు గట్టిపడడానికి చాలా సమయం తీసుకుంటుంది. ఈ సున్నితమైన అంశాన్ని గొప్పగా ప్రస్తావిస్తుంది ఈ పాట. డాన్ ఈ చరణాలను పాడిన విధానం కూడా గొప్పగా ఉంది.
I’ll ask, whatever saint looks after lovers
I’ll ask, would you please look after me
And would you kindly hear my prayer and have a little mercy
Please, if she doesn’t love me, set me free
(ఏ దేవతలయితే ప్రేమికులకు రక్షగా ఉంటారో, వారినే నేను నన్ను కాపాడమని కోరుకుంటాను. నా ప్రార్థనను వినగలిగితే నాపై కొంచెం జాలి చూపమంటాను. ఆమె నన్ను ప్రేమించకపోతే పోనీ, నన్ను ఈ బంధం నుండి విముక్తిడిని చేయమని వేడుకుంటాను)
అతనామె ప్రేమలో ఎంతగా కూరుకుపోయాడంటే అందులో నుండి బైటపడడానికి మానవ ప్రయత్నంతో పాటు దేవతల సహాయమూ అతనికి కావాలట. ప్రేమికులను కొన్ని దైవ శక్తులు కాపాడుతూ ఉంటాయంటారు. ఆ శక్తి స్వరూపాలను ఆయన ఒక కోరిక కోరుతున్నాడు. ఆమె నన్ను ప్రేమించట్లేదన్నది నిజం అయితే ఈ బంధం నుండి బైటపడే మార్గాన్ని సులభతరం చేయండి. ఇలా అతను కోరుకోవడంలో ఆ ప్రేమికుడిలోని అశక్తత. ప్రేమలో లోతుగా దిగిన వైనం అర్థం అవుతూ అతనిపట్ల హృదయం సానుభూతిలో స్పందిస్తుంది.
It will be so good to smile
Gee, it’s been a long, long while
After all that I’ve been through
Just ‘cause I’m in love with you
But there will come a day, you’ll see
You won’t have control of me
You can’t hurt me like you do
Just ‘cause I’m in love with you
(ఎంత బావుంటుందో మనస్పూర్తిగా నవ్వుకోవడం. ఎన్నాళ్లయిందో అంత స్వేచ్ఛను అనుభవించి. నేను పడ్డ వేదన కేవలం నిన్ను ప్రేమించినందుకే కదా. కాని ఓ రోజు తప్పకుండా వస్తుంది చూడు. నీ అధికారం నాపై సాగదు. నన్ను నువ్వు కట్టిపడేయలేవు. కేవలం ప్రేమించినందుకు ఇంత గాయాల పాలు చేస్తున్నవు కదా. ఆ బాధ నేను ఎల్లకాలం పడబోను)
ఇలాగే ఏదో ఓ రోజు ఆమె నియంత్రణ నుండి తాను బైటపడతానని అప్పుడు ఆమె తనను బాధించలేని స్థితిలోని తాను చేరతానని, ఆమె నుండి పూర్తిగా విముక్తిడిని అవుతానని అతను పాడడంలో విషాదం ఉంది. జీవితంలో ముందుకు సాగాలనే కోరికా ఉంది. అలాగే విఫలమయిన ప్రేమానుభవపు తార్కికత ఉంది.
ఈ పాటలో డాన్ విలియమ్స్ ప్రదర్శించే ఆ బాలెన్స్‌డ్ విషాదం నాకు చాలా ఇష్టం. ప్రేమలోని నిజాయితీ మనిషిని అశక్తుడిగా మార్చినా అందులోనిండి బైటపడడానికి మనిషి ప్రయత్నించాలి. అదే జీవితం. దానికి కొంత కష్టం తప్పదు. కాని ఆ కష్టమే అతనికి అనుభవాన్ని, జీవన సారాన్ని బోధిస్తుంది. జ్ఞాన చక్షువులను తెరిపిస్తుంది. ఇలాంటి అనుభవం కొందరిని బలహీనపరిచి నిర్వీర్యులని చేస్తే, మరి కొందరిని శక్తివంతులుగా మారుస్తుంది. జీవితంలో చాలా మంది అనుభవాలు ఒకేలా ఉంటాయి. కాని ఆ అనుభవాల నుండి వారేమి నేర్చుకున్నారు. వాటిని దాటుకుని జీవితంలో ఎలా ముందుకు సాగారు అన్నది వారి వ్యక్తిత్వం నిర్దేశిస్తుంది. ఎందుకో తాగి నాశనం అయిపోయే దేవదాసుల కన్నా నాకు ఇలాంటి వక్తులే పరిపూర్ణమైన మానవులుగా కనిపిస్తారు. ప్రేమలో మోసాన్ని, ప్రేమ ఫలించని దురదృష్టాన్ని అనుభవిస్తున్నప్పుడు ప్రతి ఒక్కరి బాధ ఒకేలా ఉంటుంది. కాని తన ప్రేమను అవమానించిన వారి నియంత్రణ నుండి తప్పించుకోవాలనే ఎరుక మనిషికి చాలా అవసరం. ఈ ప్రేమికుడు ఆ అవసరాన్ని గుర్తించి ఆ వైపు ప్రయాణించడం జీవితం పట్ల అతనికున్న స్పష్టతకు నిదర్శనం. అందుకే ఈ పాట నాకు చాలా ఇష్టం.
But there will come a day, you’ll see
You won’t have control of me
భలే వాక్యాలుగా ఇవి..
ఈ పాటని యూట్యూబ్‍లో ఈ లింక్‍ లో వినవచ్చు.
(మళ్ళీ కలుద్దాం)
