[డా.టి.రాధాకృష్ణమాచార్యులు రచించిన ‘చిగురులెత్తే కొమ్మలు’ అనే కవితని పాఠకులకు అందిస్తున్నాము.]
బోర్లించిన దొప్పల్లా రెండుచేతుల అల్లిక
చల్లని నీడై బతికే ఇంటి కప్పు
నన్ను నడిపించిన తొవ్వల
వీచే శీతలగాలి రాగమాల
పాదాల కింద వేడికి
కమిలిన ఆనవాలు నా బతుకు
చేదబావి బొక్కెన నీళ్లు
తోడిన సుతిమెత్తని చేతుల పూచిన కాయలు నా శ్రమ బాల్యం
పెరిగిన మేధస్సు ఉరుకులు విడిచే శరాలు
ఏఐలో చిక్కిన జటాజూట కురులు
అందం చీకటి కొట్లో కాటుకలిసింది
జీవంలేని ముఖారవిందం ముసుగు మేకప్
జారిన సిగపూలు వాడిన సెటప్
అంతా కృత్రిమ సంగమం
తాత్కాలిక సంగీతంలో బాణీలు
బతుకు గొప్పదే
బతుకడం ఆలిచిప్పలో ముత్యాల సరాలు
బతికిన చెట్లు ఇప్పుడు కనిపించవు
మూలాలతో పెకిళించబడ్డ వనాలవి
ఆకులు రాలి కొమ్మలు వాలి
పచ్చదనం కత్తిపోటుకో
గొడ్డలివేటుకో
నేలపై కురిసే కన్నీటిబాధ
బతికిన ఆరడుగుల నీడను కూల్చడం
దమన కుయుక్తి
కనికరంలేని పద్మవ్యూహ అహం
కయ్యంలో నెయ్యంలో కుటిల దుర్బుద్ది
మనిషిని చేసే మహావిద్య సంయమనం
తెగిన దారాల జడ విప్పే
శూన్య ప్రవాహ సన్నాయి శాంతం
గాలిని బందించడం అనర్థం
స్వేచ్ఛ దాని శతారం సూచీ అనంతం
వనాలు
కాల్చినా కూల్చినా
మళ్లీ మొలకెత్తే ఆకుపచ్చ గీతాలు
చిగురులేసే రక్తచెమటల పాఠాలు
డా.టి.రాధాకృష్ణమాచార్యులు సీనియర్ వైద్యులు, ప్రముఖ కవి,రచయిత, అనువాదకులు, సమీక్షకులు.
5 సంకలనాలు తెలుగు కవిత్వంలో 1999 నుండి కరీంనగర్ నుండి పబ్లిష్ చేశారు. నలిమెల భాస్కర్ ‘సాహితీ సుమాలు’ వివిధ భారతీయ భాషల్లోని సాహితీవేత్తల పరిచయ సంకలనాన్ని “The Speaking Roots” Title తో ఆంగ్లంలోకి అనువాదం చేసినారు.