ఆ అమ్మాయి –
అమ్మ కమ్మని చేతివంట
కడుపారా తినాలని
నాన్న తెచ్చిన రకరకాల పళ్ళన్నీ
మనసారా రుచి చూడాలనీ
అమ్మానాన్నల తీపి కబుర్లు వింటూ
కంటినిండా నిద్రపోవాలనీ
ఊహల రెక్కలు అల్లారుస్తూ
సెలవు లివ్వగానే
కాలేజీ హాస్టలు నుంచి
రామచిలకై రయ్యిన ఊర్లో వాలిపోతుంది.
ఇంట్లో అడుగు పెట్టగానే –
అమ్మా నాన్నల అరుపులు ఆహ్వానిస్తాయి
రణగొణ ధ్వనులు విస్మయపరుస్తాయి
చదువుకున్న సంస్కారం విడిచి
ఇద్దరూ పరిసరాలను మరిచి
దున్నల్లా రంకెలేస్తూ పోట్లాడుకుంటూ
ఒకరిపై ఒకరు దుమ్మెత్తి పోసుకుంటుంటారు.
ఆ బీభత్స దృశ్యాన్ని చూసి
భీతిల్లి ఒంటరి కుందేలై కుమిలిపోతుంది.
తనువు రెండు శకలాలుగా విడిపోతుంది
ఇల్లు నరకానికి నకలుగా తోస్తుంది
ఇప్పటివరకు జైలుగా భావించిన హాస్టలు భవనం
సుందర నందనవనమైపోతుంది
అంతే –
స్నేహితుల మధ్య సీతాకోకచిలుకలా విహరించడం కోసం
మనసు రైల్వే స్టేషన్ వైపు పరుగుతీస్తుంది!
పిల్లల భవితవ్యాన్ని ప్రమాదంలోకి నెట్టివేసే
ఆ బాధ్యత లేని బాంధవ్యం
రెండు సమాంతర రైలు పట్టాల్లా
విడాకుల వైపుకు దారి తీస్తుంది!
సాదనాల వేంకట స్వామి నాయుడు ప్రముఖ సినీ గేయ కవి, నటుడు, గాయకుడు, పత్రికా సంపాదకుడు. ఉత్తమ ఉపాధ్యాయుడు, వ్యాఖ్యాత, డబ్బింగ్ కళాకారుడు.
- ఆంధ్రప్రదేశ్ ప్రభుత్వం నుంచి 2011లో బంగారు ‘నంది’ని బహుమతిగా అందుకున్నారు.
- భారత ప్రభుత్వ పర్యావరణ అటవీ మంత్రిత్వశాఖ నుంచి వచన కవితకు జాతీయస్థాయి బహుమతిని 1994లో స్వీకరించారు.
- తెలుగు విశ్వవిద్యాలయం నుంచి ‘కృష్ణాపత్రిక సాహిత్య సేవ’ లఘు సిద్ధాంత వ్యాసానికి బంగారు పతకాన్ని 1991లో అందుకున్నారు.
- ఆంధ్రప్రదేశ్ ప్రభుత్వం నుంచి 2011లో ఉత్తమ ఉపాధ్యాయ పురస్కారం పొందారు.
- 1989లో జీసీస్ క్లబ్ ‘అవుట్స్టాండింగ్ యంగ్ పర్సన్ అవార్డు’, 1990లో ‘రోటరీ లిటరరీ అవార్డు’ లను పొందారు.
- దృశ్య కవితా సంపుటికి రెండు రాష్ట్రస్థాయి పురస్కారాలను అందుకున్నారు.
- ఆకాశవాణి ‘సుగమ్ సంగీత్’ జాతీయ కార్యక్రమంలో రెండు సార్లు సాదనాల రాసిన లలిత గీతాలు దేశంలోని అన్ని ఆకాశవాణి కేంద్రాల నుంచి ప్రసారమయ్యాయి.
- దక్షిణమధ్య రైల్వే నుంచి ఉత్తమ ఉద్యోగిగా సీనియర్ డి.పి.వో, డి.ఆర్.ఎం, సి.పి.వోల నుంచి పలుమార్లు అవార్డులను అందుకున్నారు.
- నాయుడు బావ పాటలు ‘గేయసంపుటి’ ‘పూలాచావ్లా’ పేరుతో ఒరియాలో సంపుటిగా ప్రచురింతమయ్యింది. ఆంగ్లభాషలోకి అనువదింపబడింది.
- తెలుగులో నాలుగు గ్రంథాలను ప్రచురించారు.
- రేడియో, టీ.వి, సినిమా, ఆడియో కేసట్లకు అనేక గీతాలు రాశారు.